Gbẹtọ lẹ Masọ to Jidedo Tonudọtọ lẹ Go Ba—Etẹ Biblu Dọ?

To 2024, vòbibla he na wá aimẹ lẹdo aihọn pé na suhugan dehe ko nọ yin bibasi to owhe dopodopo mẹ dai lẹ. Etomọṣo, mẹsusu wẹ masọ to jidedo tonudọtọ lẹ go ba.

•  To hokansemẹ de whenu, Amelikanu susu wẹ dọ dọ “suhugan tonudọtọ lẹ tọn wẹ nọ ví do yede tọn mẹ” kakati nado gọalọna mẹhe ze yé lẹ.a—Pew Research Center, 19 septembre 2023.

Mọdopolọ, jọja susu lẹ masọ nọ dejido tonudọtọ lẹ go ba.

•  “To egbehe, susu jọja lẹ tọn wẹ nọ lẹnnupọndo lehe yè gán mọ pọngbọ na nuhahun gbẹ̀mẹ tọn lẹ do ji, amọ́ sọgbe hẹ dodinnanu de, jọja lẹ dọ dọ tonudọtọ lẹ ma gán mọ pọngbọ na nuhahun ehelẹ.”—The New York Times, 29 janvier 2024.

•  “Sọgbe hẹ dodinnanu lẹ, jọja lẹ tlẹ nọ dejido mẹhe nọ ze video do YouTube ji to Intẹnẹt ji lẹ go taun hugan tonudọtọ lẹ.”—The Korea Times, 22 janvier 2024.

Be mí gán dejido tonudọtọ lẹ go nado tindo sọgodo dagbe de ya? Mẹnu go wẹ mí gán dejido?

Yí sọwhiwhe do de mẹhe go a na dejido

Owhẹ̀ gbẹtọ lẹ tọn whẹ́n dọ yé ma nọ yawu dejido mẹdepope go domọ poun. Biblu dọ dọ “wunvinọ nọ yí ohó lẹpo sè, ṣigba, zinzintọ nọ lẹnnupọndo afọdide dopodopo ji.”—Howhinwhẹn lẹ 14:15.

•  Nado mọ ayinamẹ lẹ gando lehe a gán nọ gbeje nudọnamẹ he a nọ mọyi lẹ pọ́n do go, hia hosọ lọ “Nọ Aṣeji Gando Nudọnamẹ Lalo lẹ Go.”

Humọ, nuhe tonudọtọ he tlẹ nọ dọ nugbo hugan bo tindo linlẹn dagbe hugan lẹ gán wà do dogbó. Enẹwutu wẹ Biblu do na avase dọmọ:

•  “Mì dotudo ahọvi lẹ go blo, kavi do ovi gbẹtọ tọn go, mẹhe mẹ whlẹngán depope ma tin te.”—Salmu lẹ 146:3, Biblu Wiwe lọ—Gun Alada.

Nukọntọ de he go a gán dejido

Biblu basi zẹẹmẹ dọ Jiwheyẹwhe ko de nukọntọ he pegan bọ yè gán dejidego de, yèdọ Jesu Klisti. (Luku 1:32, 33) Jesu wẹ yin Ahọlu Ahọluduta Jiwheyẹwhe tọn, yèdọ gandudu de he na dugán sọn olọn mẹ.—Matiu 6:10.

•  Pọ́n nuhewutu mí gán dejido Jesu go gọna nuhe e na wà nado hẹn pọngbọ wá na nuhahun he mí to pipehẹ lẹ. Hia hosọ lọ lẹ “Mẹnu Wẹ Yin Ahọlu Ahọluduta lọ Tọn?” po “Etẹwẹ Ahọluduta Jiwheyẹwhe Tọn Na Wà?” po.