Naegbọn Kunnudetọ Jehovah tọn lẹ Ma Nọ Dù Noẹli?
Linlẹn agọ̀ he gbayipe lẹ
Lalo: Kunnudetọ Jehovah tọn lẹ ma nọ dù Noẹli na yé ma tindo yise to Jesu mẹ wutu.
Nugbo lọ: Klistiani wẹ mí yin. Mí yise dọ Jesu Klisti kẹdẹ gblamẹ wẹ mí sọgan yin whinwhlẹngán gbọn.—Owalọ lẹ 4:12.
Lalo: Mì nọ klan whẹndo lẹ na mì nọ plọn hagbẹ whẹndo tọn lẹ ma nado dù Noẹli.
Nugbo lọ: Dagbemẹninọ whẹndo lẹ tọn nọ duahunmẹna mí sisosiso, podọ mí nọ yí Biblu zan nado gọalọna gbẹtọ lẹ nado wleawuna whẹndo he lodo lẹ.
Lalo: Mì ma tindo gbigbọ he Hùnwhẹ Noẹli tọn nọ hẹn wá aimẹ, yèdọ gbigbọ johẹmẹ tọn, jijọho hinhẹnwa aigba ji tọn po dagbewiwa na mẹdevo lẹ po tọn.
Nugbo lọ: Egbesọegbesọ wẹ mí nọ dovivẹnu nado nọ nanúmẹ podọ nado yin jijọhonọ. (Howhinwhẹn lẹ 11:25; Lomunu lẹ 12:18) Di apajlẹ, aliho he mẹ mí nọ deanana opli mítọn lẹ bosọ nọ dọyẹwheho te tin to kọndopọ mẹ hẹ anademẹ Jesu tọn ehe: “Vọnu wẹ mì mọyi, vọnu wẹ mì ni namẹ.” (Matiu 10:8) Gbọnvona enẹ, mí sọ nọ dọ̀n ayidonugo gbẹtọ lẹ tọn wá Ahọluduta Jiwheyẹwhe tọn ji, yèdọ ahọluduta dopo akàn he na hẹn jijọho wá aigba ji.—Matiu 10:7.
Naegbọn Kunnudetọ Jehovah tọn lẹ ma nọ dù Noẹli?
Jesu biọ to mí si nado nọ flin okú etọn, e ma yin jijizan etọn.—Luku 22:19, 20.
Apọsteli Jesu tọn lẹ po devi owhe kanweko tintan tọn lẹ po ma nọ dù Noẹli. Otànwe lọ Le livre des superstitions dọmọ: “Hùnwhẹ jijizan Jesu tọn yin didoai to owhe kanweko ẹnẹtọ mẹ gbọn Ṣọṣi dali,” yèdọ ojlẹ dindẹn to okú apọsteli lẹ tọn godo.
Kunnudenu depope ma dohia dọ Jesu yin jiji to 25 décembre; azán he gbè e yin jiji ma yin kinkandai to Biblu mẹ.
Mí yise dọ Jiwheyẹwhe ma kẹalọyi Hùnwhẹ Noẹli tọn na e sinai do aṣa po nuyiwa kosi lẹ tọn po ji.—2 Kọlintinu lẹ 6:17.
Naegbọn mì nọ jlo na gbọnvo na gbẹtọ lẹ bo nọ gbẹ́ nado dù Noẹli?
Mẹsusu gbẹ́ nọ dù Noẹli mahopọnna dọ yé yọnẹn dọ hùnwhẹ enẹ wá sọn kosi lẹ dè bo ma sinai do Biblu ji. Omẹ mọnkọtọn lẹ sọgan kanse dọ: Naegbọn Klistiani lẹ dona gbọnvo? Naegbọn yé dona gbẹ́ nado doalọ to hùnwhẹ lọ mẹ?
Biblu dotuhomẹna mí nado nọ lẹnnupọn, nado nọ yí “huhlọn nulẹnpọn tọn” mítọn zan. (Lomunu lẹ 12:1, 2) E plọn mí nado nọ yí nukun nujọnu tọn do pọ́n nugbo lọ. (Johanu 4:23, 24) Enẹwutu, dile etlẹ yindọ nuhe mẹdevo lẹ lẹn gando mí go nọ duahunmẹna mí, mí nọ nọgbẹ̀ sọgbe hẹ nunọwhinnusẹ́n Biblu tọn lẹ eyin enẹ tlẹ biọ dọ mí ni gbọnvo na mẹdevo lẹ.
Mahopọnna dọ mílọsu wẹ de ma nado dù Noẹli, mí nọ na sisi jlọjẹ mẹdopodopo tọn nado de eyin e na doalọ to hùnwhẹ lọ mẹ kavi lala. Mí ma nọ glọnalina mẹdevo lẹ nado dù Noẹli.