Be Onọ̀ Jiwheyẹwhe Tọn Wẹ Malia Yin Ya?

Gblọndo Biblu tọn

Lala, Biblu ma plọnmẹ dọ Malia yin onọ̀ Jiwheyẹwhe tọn, mọ e masọ dohia dọ Klistiani lẹ dona nọ sẹ̀n Malia.a Lẹnnupọndo nuhe bọdego lẹ ji:

• Malia ma dọ gbede dọ emi yin onọ̀ Jiwheyẹwhe tọn. Biblu basi zẹẹmẹ dọ ewọ ji “Visunnu Jiwheyẹwhe tọn,” e ma yin Jiwheyẹwhe lọsu.​—Malku 1:1; Luku 1:32.

• Jesu Klisti ma dọ pọ́n gbede dọ Malia yin onọ̀ Jiwheyẹwhe tọn kavi dọ ewọ jẹna gbégbò vonọtaun gba. E tlẹ gbẹnuna nawe de he lẹndọ Malia yin omẹ vonọtaun, na e yin onọ̀ etọn wutu, bo dọna ẹn dọmọ: “Lala, kakatimọ, ayajẹnọ wẹ mẹhe to ohó Jiwheyẹwhe tọn sè bo to yíyí i hẹn lẹ!”​—Luku 11:27, 28.

• Hogbe lọ lẹ “Onọ̀ Jiwheyẹwhe tọn” po “tẹọtọkọs” (mẹhe ji Jiwheyẹwhe) po ma sọawuhia to Biblu mẹ.

• To Biblu mẹ, hodidọ lọ “Ahọsi Olọn tọn” ma to alọdlẹndo Malia, amọ́ yẹwhe-yọnnu lalo de he Islaelivi atẹṣitọ lẹ nọ sẹ̀n. (Jelemia 44:15-19) “Ahọsi Olọn tọn” lọ na ko yin Iṣta (Astalte), yèdọ yẹwhe-yọnnu Babilọni tọn de.

• Klistiani dowhenu tọn lẹ ma sẹ̀n Malia, mọ yé ma na ẹn gbégbò vonọtaun de. Whenuho-kantọ de dọ dọ Klistiani dowhenu tọn lẹ “ma nọ sẹ̀n Malia gba podọ yé na ko mọdọ ayidonugo he ma sọgbe nina ẹn na taidi yẹwhe-yọnnu de sinsẹ̀n.”​—In Quest of the Jewish Mary.

• Biblu dọ dọ Jiwheyẹwhe ma tindo bẹjẹeji. (Salmu lẹ 90:1, 2; Isaia 40:28) Enẹwutu, e ma gán tindo onọ̀ de. Humọ, Malia ma sọgan hẹn Jiwheyẹwhe do vidọ̀ etọn mẹ; Biblu dohia hezeheze dọ olọn lẹ ma tlẹ sọgan hẹn Jiwheyẹwhe.​—1 Ahọlu lẹ 8:27.

Malia yin onọ̀ Jesu tọn, e ma yin “Onọ̀ Jiwheyẹwhe tọn”

Juvi-jiji wẹ Malia yin, bo wá sọn kúnkan Davidi tọn mẹ tlọlọ. (Luku 3:23-31) Jiwheyẹwhe do nukundagbe daho hia ẹ, na yise po tonusise etọn po wutu. (Luku 1:28) Jiwheyẹwhe de e nado yin onọ̀ Jesu tọn. (Luku 1:31, 35) Ewọ po asu etọn Josẹfu po wá ji ovi devo lẹ.​—Malku 6:3.

Biblu dohia dọ Malia wá lẹzun devi Jesu tọn, amọ́ Biblu masọ dọ nususu gando ewọ go.​—Owalọ lẹ 1:14.