KANBIỌ HE JỌJA LẸ NỌ KANSE
Eyin Họntọn de Ka Hẹn Homẹgble Mi Lo?
Nuhe a dona yọnẹn
Nuhahun ma hán to haṣinṣan de mẹ. Taidi mapenọ, họntọn vivẹ́ towe—etlẹ yin mẹhe a nọ pọnhlan di họntọn alọmayiemẹ de—sọgan dọ kavi wà nude he na hẹn we gblehomẹ. Na nugbo tọn, mapenọ wẹ hiẹ lọsu. Enẹwutu nado dọ hójọhó, be e ma ko jọ pọ́n bọ hiẹ lọsu hẹn homẹgble mẹde ya?—Jakọbu 3:2.
Intẹnẹt gán zọ́n bọ homẹgble na yawu fọ́n. Di apajlẹ, jọja de he nọ yin David dọmọ: “Eyin a mọ fọto họntọn towe de tọn to Intẹnẹt ji bọ e to ayidedai de tẹnmẹ, a gán jẹ kinkanse dewe ji dọ etẹwutu e ma do basi oylọna we. Podọ a gán jẹflumẹ bo jẹ linlẹn ji dọ e zan emi.”
A gán plọn nado didẹ nuhahun lọ.
Nuhe a sọgan wà
Gbeje dewe pọ́n. Biblu dọmọ: “A yawu nado gblehomẹ blo, na homẹgble wẹ ohia nulunọ tọn.”—Yẹwhehodọtọ 7:9, nudọnamẹ odò tọn.
“To whedelẹnu yè nọ wá mọdọ nuhewutu yè to homẹgble lọ ma tlẹ yin onú kaka de.”—Alyssa.
Lẹnnupọndo ehe ji: Be a nọ yawu gblehomẹ wẹ ya? Be a gán plọn nado nọ miọnnukundo nuṣiwa mẹdevo lẹ tọn ya?—Yẹwhehodọtọ 7:21, 22.
Lẹnnupọndo ale he jonamẹ nọ hẹnwa lẹ ji. Biblu dọmọ: “Gigo wẹ e yin . . . nado nọ miọnnukundo nuṣiwa.”—Howhinwhẹn lẹ 19:11.
“Eyin a tlẹ tindo whẹwhinwhẹ́n nado gblehomẹ, e nọ yọ́n nado jonamẹ sọn ahun mẹ wá, podọ enẹ zẹẹmẹdo dọ a ma dona hẹn mẹlọ do homẹ bo na nọ fọ́n whẹho lọ dote sọn ojlẹ de mẹ jẹ devo mẹ, na e nido vẹvẹna we. Eyin a jonamẹ, nọ wọnji e go.”—Mallory.
Lẹnnupọndo ehe ji: Be whẹho lọ sinyẹn sọmọ wẹ ya? Be a sọgan jonamẹ na jijọho nido tin ya?—Kolosinu lẹ 3:13.
Eyin a nọ dogana whẹho lẹpo to haṣinṣan họntọnjiji tọn de mẹ, a na taidi mẹhe nọ jo ohọ̀n ohọ̀ he hlá yozò de tọn donuvo to avivọ whenu
Lẹnnupọndo ninọmẹ mẹlọ tọn ji. Biblu dọmọ: “Ma nọ ze ayidonugo do ale mẹdetiti tọn [towe] lẹ kẹdẹ ji [blo], ṣigba do ale mẹdevo lẹ tọn ji ga.”—Filipinu lẹ 2:4.
“Eyin owanyi po sisi po tin to họntọn awe ṣẹnṣẹn, yè nọ mọdọ whẹwhinwhẹ́n dolido de tin nado yawu didẹ gbemanọpọ lẹ, na họntọnjiji lọ vẹnamẹ wutu. A ko dovivẹnu susu nado wleawuna haṣinṣan enẹ, enẹwutu a ma na jlo nado sánkanna ẹn.”—Nicole.
Lẹnnupọndo ehe ji: Be vlavo pọndohlan omẹ awetọ lọsu tọn ma sọgbe jẹ obá de mẹ ya?—Filipinu lẹ 2:3.
Nuagokun lọ die: Pinplọn nado nọ duto homẹgble ji na wà dagbe na we to whenue a na whẹ́n mẹho. Naegbọn a ma na plọn nado nọ wàmọ todin?