ALỌGỌ NA WHẸNDO LẸ
Lehe A Gán Duto Homẹgble Ji Do
Alọwlemẹ towe dọho de kavi wà nude he gblehomẹ na we, bọ a tẹnpọn nado whlá homẹgble towe. Amọ́, e doayi e go dọ nude to jijọ bo jẹ hokanse we ji. Enẹ wẹ sọ hẹn homẹgble towe sinyẹn deji. Nawẹ a gán nọ duto homẹgble ji to ninọmẹ mọnkọtọn lẹ mẹ gbọn?
Nuhe a dona yọnẹn
Awujijona homẹgble gán bẹpla agbasalilo towe. Dodinnanu lẹ dohia dọ homẹgble sinsinyẹn sọgan zọ́n bọ ohùn mẹtọn na nọ fiẹ (hypertension), hẹn ahunzọ̀n po flumẹjijẹ po wá kavi zọ́n bọ nuhe yè dù lẹ ma na nọ yin lìlì ganji to homẹ. Homẹgble sọ nọ hẹn amlọnmadọ́, magbọjẹ sinsinyẹn, azọ̀n agbasago tọn lẹ po asaku-awàku po plá mẹ. Abajọ, Biblu dọmọ: “Jo homẹgble do . . . , na awugble kẹdẹ wẹ e sọgan hẹnwa.”—Salmu lẹ 37:8, nudọnamẹ odò tọn.
Homẹgble zizewhla lọsu sọgan hẹnnugble. Homẹgble he yè natẹn na ojlẹ dindẹn to ahun mẹ gán wá taidi awutu he nọ hẹnnugble sọn homẹ. Di apajlẹ, a gán wleawuna gbigbọ homọdọdomẹgo tọn bo jẹ nuṣiwa mẹdevo tọn ṣinyan ji. Enẹ na zọ́n bọ e na nọ vẹawuna mẹdevo lẹ nado nọpọ́ hẹ we podọ e gán hẹn nuhahun sinsinyẹn wá alọwle towe mẹ.
Nuhe a sọgan wà
Nọ pọ́n jẹhẹnu dagbe alọwlemẹ towe tọn lẹ. Kàn onù atọ̀n he a yiwanna gando alọwlemẹ towe go dai. To whedevonu he nuyiwa etọn de hẹn we gblehomẹ, lẹnnupọndo jẹhẹnu he a kàn dai lọ lẹ ji. Mọwiwà gán gọalọna we nado duto homẹgble ji.
Nunọwhinnusẹ́n Biblu tọn: “Nọ dopẹ́.”—Kolosinu lẹ 3:15.
Plọn nado nọ jonamẹ. Jẹnukọn whẹ́, tẹnpọn nado nọ pọ́n nulẹ hlan dile alọwlemẹ towe nọ wà do. Mọwiwà na gọalọna we nado wleawuna nuhe Biblu ylọdọ “mẹtọnhopọn,” enẹ wẹ awuvẹmẹ. (1 Pita 3:8) Enẹgodo, kanse dewe dọ, ‘Be nuhewutu n’gblehomẹ lọ sinyẹn sọmọ bọ n’ma sọgan jona ẹn wẹ ya?’
Nunọwhinnusẹ́n Biblu tọn: “Gigo wẹ e yin . . . nado nọ miọnnukundo nuṣiwa.”—Howhinwhẹn lẹ 19:11.
Nọ yí zinzin po homẹdagbe po do dọ numọtolanmẹ towe lẹ. Nọ yí hogbe lọ “Yẹn kavi N’” zan. Di apajlẹ, kakati nado dọ dọ, “A ma nọ hò ṣie pọ́n na a ma nọ ylọ mi bo nọ dọ fie a te na mi,” a gán dọ dọ, “N’ma nọ vò to ayiha mẹ to whenue ozán kú bọ n’ma yọ́n fie a te.” Numọtolanmẹ towe lẹ didọ to aliho he jọmẹ de mẹ gán gọalọna we nado duto homẹgble ji.
Nunọwhinnusẹ́n Biblu tọn: “Mì gbọ ohó mìtọn ni nọ gọ́ na ojọmiọn, na ojẹ̀ ni nọ pé e to whepoponu.”—Kolosinu lẹ 4:6.
Nọ dotoai po sisi po. To whenue a ko dọho godo, na dotẹnmẹ alọwlemẹ towe nado dọho bo ma gbòhódonù na ẹn blo. Eyin e ko dọho fó, vọ́ nuhe e dọ lẹ dọ to hogbe towe titi mẹ nado hẹn ẹn diun dọ a mọnukunnujẹ nuhe e dọ lẹ mẹ ganji. Todidoai poun gán yí adà titengbe de wà nado gọalọna we bọ a na duto homẹgble ji.
Nunọwhinnusẹ́n Biblu tọn: “Nọ yawu nado dotoai, whleawu nado dọho.”—Jakọbu 1:19.