Eksọdusi 20:12—“Gbògbéna Otọ́ Towe po Onọ̀ Towe Po”

“Gbògbéna otọ́ towe po onọ̀ towe po, na hiẹ nido nọgbẹ̀ dẹn to aigba he Jehovah Jiwheyẹwhe towe jlo na na we ji.”—Eksọdusi 20:12, Lẹdogbedevomẹ Aihọn Yọyọ Tọn.

“Gbògbéna otọ́ towe po onọ̀ towe po: na azán towe lẹ nido yin gaa to aigba lọ ji he OKLUNỌ Jiwheyẹwhe towe na we.”—Eksọdusi 20:12, Biblu Wiwe lọ—Gun Alada.

Zẹẹmẹ Eksọdusi 20:12 Tọn

Jiwheyẹwhe degbena Islaelivi hohowhenu tọn lẹ nado nọ gbògbéna mẹjitọ yetọn lẹ. Na e yí opagbe de dogọ gbedide enẹ wutu, ewọ na yé whẹwhinwhẹ́n devo dogọ nado setonuna gbedide lọ. Dile etlẹ yindọ Osẹ́n he Jiwheyẹwhe na Islaelivi lẹ, ehe nọ yin yiylọdọ Osẹ́n Mose tọn masọ yin nubiọtomẹsi de todin ba, nujinọtedo Jiwheyẹwhe tọn lẹ ma diọ. Nuplọnmẹ nugbo he Osẹ́n Jiwheyẹwhe tọn bẹhẹn lẹ gbẹ́ yọ́n-na-yizan, podọ yé yin nujọnu na Klistiani lẹ.—Kolosinu lẹ 3:20.

Ovi lẹ, enẹ wẹ yọpọvu po ovi he whẹ́n mẹho lẹ po, nọ gbògbéna mẹjitọ yetọn lẹ to whenue yé setonuna yé bosọ nọ na yé sisi. (Levitiku 19:3; Howhinwhẹn lẹ 1:8) Etlẹ yin whenue ovi he ko whẹ́n mẹho lẹ wá do whẹndo yetọn titi ai, yé nọ zindonukọn nado yí owanyi do nọ gọalọna mẹjitọ yetọn lẹ. Di apajlẹ, yé nọ hẹn ẹn diun dọ mẹjitọ yetọn lẹ yin nukunpedego ganji to yọnhowhe yetọn mẹ, bo tlẹ nọ gọalọna yé to akuẹzinzan-liho eyin yé do hudo etọn.—Matiu 15:4-6; 1 Timoti 5:4, 8.

Doayi e go dọ ovi Islaelivi lẹ dona nọ gbògbéna otọ́ yetọn gọna onọ̀ yetọn, bo gbọnmọ dali dohia dọ yé yọ́n otẹn nujọnu tọn he onọ̀ de tindo to whẹndo mẹ. (Howhinwhẹn lẹ 6:20; 19:26) Nudopolọ wẹ ovi lẹ dona nọ wà to egbehe.

Etomọṣo, gbedide lọ dọ yè ni nọ gbògbéna mẹjitọ mẹtọn lẹ tindo dogbó. Ovi Islaelivi lẹ ma dona nọ setonuna mẹjitọ yetọn lẹ kavi na gbẹtọvi devo depope, eyin mọwiwà biọ dọ yé ni vẹtolina Jiwheyẹwhe. (Deutelonomi 13:6-8) Mọdopolọ to egbehe, Klistiani lẹ “dona setonuna Jiwheyẹwhe taidi ogán kakati nido yin gbẹtọ lẹ.”—Owalọ lẹ 5:29.

To Osẹ́n he Jiwheyẹwhe na Islaeli lọ mẹ, ewọ dopagbe dọ ovi he gbògbéna mẹjitọ yetọn lẹ na “nọgbẹ̀ dẹn podọ na .  . . tindo kọdetọn dagbe” to aigba he Jiwheyẹwhe na na yé lọ ji. (Deutelonomi 5:16) Yé ma na mọ yasanamẹ he ovi he ko whẹ́n lẹ nọ jiya etọn to whenue yé gbẹkọ osẹ́n Jiwheyẹwhe tọn go bo ṣiatẹ sọta mẹjitọ yetọn lẹ. (Deutelonomi 21:18-21) Nuplọnmẹ nugbo he osẹ́n enẹlẹ bẹhẹn ma diọ, mahopọnna dọ ojlẹ susu ko juwayi sọn whenẹnu gbọ́n jẹ din. (Efesunu lẹ 6:1-3) Vlavo mí yin yọpọ kavi mẹho, mímẹpo wẹ na dogbè na Mẹdatọ lọ. Humọ, sọgbe hẹ opagbe etọn, ovi he nọ setonuna ewọ podọ na mẹjitọ yetọn lẹ na nọgbẹ̀ dẹn. Na nugbo tọn, yé tindo todido lọ nado nọgbẹ̀ kakadoi.—1 Timoti 4:8; 6:18, 19.

Nujijọ He Lẹdo Eksọdusi 20:12 Lẹ

Otẹn he mẹ gbedide Eksọdusi 20:12 tọn lọ tin te to Gbedide Ao lẹ kavi Osẹ́n Ao lẹ mẹ jẹna ayidego taun. (Eksọdusi 20:1-17) Gbedide he jẹnukọnna ẹn lẹ basi zẹẹmẹ nuhe Islaelivi lẹ to dandannu glọ nado nọ wà hlan Jiwheyẹwhe delẹ tọn, taidi nuhudo lọ nado nọ basi sinsẹ̀n hlan ewọ kẹdẹ. Gbedide he bọdego lẹ basi zẹẹmẹ nuhe yé to dandannu glọ nado nọ wà hlan gbẹtọvi hatọ yetọn lẹ tọn, ehe bẹ gbedide lọ nado yin nugbonọ na alọwlemẹ mẹtọn podọ nado dapana ajojijẹ hẹn. Enẹwutu, gbedide lọ he dọ, nọ “gbògbéna otọ́ towe po onọ̀ towe po” nọ yin pinpọnhlan di aná de, he tin to ṣẹnṣẹn na pipli gbedide he jẹnukọnna ẹn lẹ po dehe bọdego lẹ po tọn.