Filipinu lẹ 4:6, 7—“Mì Jẹtukla Nudepope Tọn Blo”

“Mì yin magbọjẹnọ na nudepope blo, ṣigba to nulẹpo mẹ, mì nọ yí odẹ̀, ovẹ̀ po pẹdido po do hẹn obiọ mìtọn lẹ zun yinyọnẹn na Jiwheyẹwhe; jijọho Jiwheyẹwhe tọn he yiaga hugan nukunnumọjẹnumẹ lẹpo nasọ họ́ ahun mìtọn po nugopipe apọ̀nmẹ tọn mìtọn po gbọn Klisti Jesu gblamẹ.”—Filipinu lẹ 4:6, 7, Lẹdogbedevomẹ Aihọn Yọyọ Tọn.

“Mì jẹtukla nudepope tọn blo; ṣigba to odẹ̀ mẹ to ovẹ̀ mẹ po pẹdido po mẹ, mì nọ yí kanbiọ mìtọn hia Jiwheyẹwhe to onú popo mẹ. Jijọho Jiwheyẹwhe tọn he hú nuyọnẹn lẹpo na whlá ayiha mìtọn po linlẹn mìtọn lẹ po (to) Klisti Jesu mẹ.”—Filipinu lẹ 4:6, 7, Biblu Wiwe lọ—Gun Alada.

Zẹẹmẹ Filipinu lẹ 4:6, 7 Tọn

Sinsẹ̀n-basitọ Jiwheyẹwhe tọn lẹ sọgan de nuhiha glanglan kavi lẹnpọn yetọn lẹ pò eyin yé nọ hodẹ̀ hlan ẹn. E dopagbe dọ emi na na yé jijọho ahun mẹ tọn, ehe na gọalọna yé nado pehẹ nuhiha yetọn lẹ bo basi hihọ́na nulẹnpọn po numọtolanmẹ yetọn lẹ po. Wefọ 6tọ donù dẹ̀hiho wunmẹ he na gọalọna yé nado mọ jijọho mọnkọtọn yí lẹ go.

Ovẹvivẹ yin odẹ̀ de he mẹ yè nọ yí ahundopo do vẹ̀ Jiwheyẹwhe te na alọgọ. Mẹde sọgan vẹ̀ Jiwheyẹwhe to whenue e to nuhahun kavi owù mẹ, dile Jesu wà do. (Heblu lẹ 5:7) Dile e nọ saba yindo, odẹ̀ mọnkọ lẹ nọ yin hihò pludopludo.

Obiọ lẹ yin odẹ̀ he mẹ yè nọ biọ onú tangan de Jiwheyẹwhe te. Mẹhe nọ sẹ̀n ẹn lẹ sọgan biọ ẹ “nudepope,” podọ “to ninọmẹ depope mẹ.” Amọ́, odẹ̀ mọnkọ lẹ dona sọgbe hẹ ojlo Jiwheyẹwhe tọn, dile Biblu dọ do.—1 Johanu 5:14.

Odẹ̀ pẹdido tọn lẹ nọ biọ dọ mí ni dopẹ́ na Jiwheyẹwhe na nue e ko wà kavi bo na wá wà na mí lẹ. Eyin mí nọ ze ayiha do whẹwhinwhẹ́n he mí tindo nado nọ dopẹna Jiwheyẹwhe lẹ ji, ehe nọ gọalọna mí nado tindo ayajẹ zọnmii.—1 Tẹsalonikanu lẹ 5:16-18.

Nado na gblọndo na odẹ̀ enẹlẹ, Jiwheyẹwhe nọ na sinsẹ̀n-basitọ etọn lẹ jijọho. “Jijọho Jiwheyẹwhe tọn” yin vivomẹninọ he mí nọ tindo na mí tindo haṣinṣan vivẹ́ po ewọ po wutu. (Lomunu lẹ 15:13; Filipinu lẹ 4:9) Jijọho ehe “yiaga hugan nukunnumọjẹnumẹ lẹpo” na Jiwheyẹwhe dè wẹ e nọ wá sọn bo sọgan gọalọna mí zẹ̀ nuhe mí gán lẹn lẹpo go.

Wefọ Biblu tọn ehe dọ dọ jijọho Jiwheyẹwhe tọn sọgan họ́ ahun mítọn. Hogbe Glẹkigbe tọn he yin lilẹdo “họ́” tofi tindo kanṣiṣa hẹ hogbe awhànfunfun tọn de he nọ basi zẹẹmẹ nuhe awhànpa de nọ wà nado họ́ tòdaho gángán de tọn. Mọdopolọ, jijọho Jiwheyẹwhe tọn nọ basi hihọ́namẹ to numọtolanmẹ-liho podọ to apọ̀nmẹ. Ehe nọ zọ́n bọ ninọmẹ ayimajai tọn lẹ ma nọ húagbọ́ mẹ.

Jijọho he Jiwheyẹwhe nọ namẹ nọ basi hihọ́na mí “gbọn Klisti Jesu gblamẹ,” to whenuena e yindọ Jesu gblamẹ wẹ mí sọgan yin họntọn Jiwheyẹwhe tọn te. Jesu ze ogbẹ̀ etọn jo taidi ofligọ de na ylando mítọn lẹ. Eyin mí tindo yise to ewọ mẹ, mí sọgan duvivi dona Jiwheyẹwhe tọn lẹ tọn. (Heblu lẹ 11:6) Jesu wẹ yin whẹgbọtọ na mí nado dọnsẹpọ Jiwheyẹwhe. Jesu dọmọ: “Mẹdepope ma nọ wá Otọ́ dè adavo gbọn yẹn gblamẹ.”—Johanu 14:6; 16:23.

Nujijọ He Lẹdo Filipinu lẹ 4:6, 7 Lẹ

Apọsteli Paulu wẹ kàn owe Biblu tọn he yin Filipinu lẹ hlan Klistiani he nọ nọ̀ tòdaho Filipi tọn mẹ lẹ.a To adà owe enẹ tọn he wá yin weta 4tọ todin mẹ, Paulu na tuli mẹhe to agun lọ mẹ lẹ nado nọ jaya, podọ e dopẹna yé na alọtútlú yetọn, ehe nọ hẹn ayajẹ wá na ẹn. (Filipinu lẹ 4:4, 10, 18) E do lehe odẹ̀ nọ zọ́n bọ yè nọ tindo jijọho Jiwheyẹwhe tọn do hia, podọ e zinnudo nuhe ji mí dona nọ lẹnnupọndo po nuhe mí dona wà nado mọ alọgọ sọn “Jiwheyẹwhe jijọho tọn” dè po ji—Filipinu lẹ 4:8, 9.