ZẸẸMẸ WEFỌ BIBLU TỌN LẸ TỌN
Howhinwhẹn lẹ 17:17—“Họntọn Nọ Yiwannamẹ Whepoponu”
“Họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.”—Howhinwhẹn lẹ 17:17, Lẹdogbedevomẹ Aihọn Yọyọ Tọn.
“Họntọn nọ yiwannamẹ whepoponu, ṣigba mẹmẹsunnu wẹ yè ji na madodego.”—Howhinwhẹn lẹ 17:17, Biblu Wiwe Gun Alada.
Zẹẹmẹ Howhinwhẹn lẹ 17:17 Tọn
Họntọn jọ họntọn lẹ nọ dejido ode awetọ go bosọ nọ yin nugbonọ. Taidi nọvi-nọvi he vẹ́ lẹ, yé nọ yin nugbonọ bosọ nọ hò ode awetọ tọn pọ́n titengbe to ojlẹ sinsinyẹn lẹ mẹ.
“Họntọn nugbo nọ yiwannamẹ to whelẹponu.” Hodidọ ehe gán sọ zẹẹmẹdo “họntọn nọ yiwannamẹ whepoponu.” Hogbe Heblu tọn lọ “owanyi” he yin yiyizan to hodidọ ehe mẹ nọ bẹ nususu hẹn hugan numọtolanmẹ de tintindo na mẹde poun. Nuyiwa owanyi matin ṣejannabi tọn de wẹ he yè nọ dohia mẹdevo lẹ. (1 Kọlintinu lẹ 13:4-7) Eyin kanṣiṣa owanyi tọn enẹ nkọ tin to họntọn lẹ ṣẹnṣẹn, haṣinṣan yetọn nọ lodo vlavo to whenue dẹsọ-dẹmẹ lẹ wá aimẹ kavi to whlepọn gbẹ̀mẹ tọn lẹ whenu. Podọ yé sọ nọ to gbesisọ mẹ nado jona ode awetọ sọn ojlo mẹ wá. (Howhinwhẹn lẹ 10:12) Humọ, họntọn de ma nọ whànwu whenue nulẹ to yìyì ganji na awetọ etọn. Kakatimọ, e nọ jaya hẹ họntọn etọn.—Lomunu lẹ 12:15.
“Họntọn nugbo . . . nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.” Howhinwhẹn lọ dohia dọ nọvi-nọvi lẹ gán vẹ́ hẹ ode awetọ nugbonugbo. Enẹwutu, whenue mí wà nuhe go mí pé lẹpo nado nọgodona họntọn he to jujugbọn ojlẹ ayimajai tọn lẹ mẹ de, mí to nuyiwa dile nọvisunnu kavi nọviyọnnu de nọ wà do wẹ. Humọ, whlepọn lẹ ma nọ dekanpona kanṣiṣa he to ṣẹnṣẹn na họntọn mọnkọ lẹ. Kakatimọ, haṣinṣan yetọn nọ lodo dogọ, podọ ehe nọ yidogọna owanyi po sisi he yé tindo na ode awetọ po.
Nujijọ He Lẹdo Howhinwhẹn lẹ 17:17 Lẹ
Owe Howhinwhẹn lẹ tọn bẹ linlẹn nuyọnẹn tọn susu lẹ hẹn, ehe nọ hẹn wehiatọ nado lẹnnupọn. Ahọlu Sọlomọni wẹ kàn suhugan owe Biblu tọn ehe tọn lẹ. E basi kandai lọ lẹ to aliho he mẹ ohó milomilo Heblugbe lẹ nọ yin kinkan te, kakati nado zan hogbe he vivi lẹ, hodidọ po linlẹn he nọ di yedelẹ po wẹ e yizan, bọ hodidọ de gán tindo kanṣiṣa hẹ devo kavi na hodidọ ni yin adà awetọ hodidọ de tọn. Howhinwhẹn lẹ 17:17 yin apajlẹ ohó milomilo he nọ di yedelẹ tọn, ehe adà awetọ wefọ lọ tọn nọ zinnudo adà tintan wefọ lọ tọn ji. Howhinwhẹn lẹ 18:24 yin apajlẹ ohó milomilo adà awenọ lẹ tọn. “Họntọn delẹ tin he nọ wleawufo nado gídí ode awetọ, ṣigba, họntọn delẹ tin he nọ sẹpọ yede pẹkipẹki hú nọvisunnu.”
Whenue Sọlomọni to Howhinwhẹn lẹ 17:17 kàn, e gán ko to nulẹnpọndo haṣinṣan pẹkipẹki he to otọ́ etọn Davidi po visunnu Ahọlu Sauli tọn Jonatani po ṣẹnṣẹn ji. (1 Samuẹli 13:16; 18:1; 19:1-3; 20:30-34, 41, 42; 23:16-18) Dile etlẹ yindọ Davidi po Jonatani po ma yin hagbẹ whẹndo tọn lẹ, yé vẹ́ hugan nọvi-nọvi lẹ. Jonatani tlẹ ze ogbẹ̀ etọn do owù mẹ do họntọn etọn jọja lọ tamẹ.a
Pọ́n video kleun ehe nado mọ nue to owe Howhinwhẹn lẹ tọn mẹ delẹ.
a Pọ́n hosọ lọ “Yé Lẹzun Họntọn Vivẹ́ Lẹ.”