Ojlo Ṣie Wẹ Nado Yí Gbẹzan Ṣie Pete Do Sẹ̀n Jehovah

Sọn ovu whenu gbọ́n wẹ n’ko yiwanna nugbo lọ. N’jlo na klan dee do wiwe na Jehovah bo yí baptẹm. Enẹwutu, whenue n’do owhe 13, homẹ ṣie hùn dọ n’jẹ yanwle enẹ kọ̀n. Whenue n’do owhe 14, Mẹmẹsunnu Helge Lincka kanse mi eyin vlavo n’ko lẹnnupọndo gbehosọnalitọ bibasi ji. N’gbẹ́ flin ojlẹ enẹ ganji. Dile etlẹ yindọ otọ́ ṣie po onọ̀ ṣie po ko sẹ̀n di gbehosọnalitọ ojlẹ gli tọn lẹ pọ́n (ehe nọ yin yiylọ todin dọ gbehosọnalitọ alọgọtọ tọn), n’ma yọ́n nuhe e zẹẹmẹdo paali nado yin gbehosọnalitọ whepoponu tọn. Kanbiọ Mẹmẹsunnu Linck tọn do okún de do ahun ṣie mẹ—enẹ wẹ ojlo lọ nado wà susu dogọ to sinsẹ̀nzọn Jehovah tọn mẹ.

Mí Wleawudaina Homẹkẹn

To 1974, nuhahun tonudidọ tọn lẹ to Éthiopie dekọtọn do mẹwiwle, mẹhuhu po hunyanhunyan po mẹ. To nukọn mẹ, mí ma gán nọ dọyẹwheho sọn họndekọn jẹ họndekọn ba podọ pipli kleunkleun lẹ kẹdẹ mẹ wẹ mí gán nọ basi opli lẹ te. Mẹjitọ ṣie lẹ jẹ alọgọna míwu ovi lẹ ji nado wleawudaina nukundiọsọmẹ devo lẹ. Nunọwhinnusẹ́n Biblu tọn lẹ gọalọna mí nado yọ́n nuhe kadaninọ Klistiani tọn zẹẹmẹdo. Mí plọn dọ Jehovah na gọalọna mí nado yọ́n nuhe mí na dọ eyin yè kanhose mí, podọ etlẹ gán biọ dọ mí ni gbọṣi abọẹ to whedelẹnu.—Matiu 10:19; 27:12, 14.

AFP PHOTO

Whenue n’fó wehọmẹ, n’jẹ azọ́nwa ji to agahun-glintẹn Éthiopie tọn. To afọnnu gbèdopo he n’wá azọ́nmẹ, azọ́nwatọgbẹ́ ṣie lẹ yí zohunhun do dọnudo mi na n’ko yin dide nado deanana tito awhànfọ dide tọn he nọ yin bibasi to whepéwhenu hùnwhẹ gandudu lọ tọn whenu. To afọdopolọji, n’yì dọna ogán ṣie dọ na kadaninọ Klistiani tọn ṣie wutu, n’ma nọ do mahẹ to hùnwhẹ mọnkọ lẹ mẹ.

To wunkẹngbe, whenue n’to azọ́nwa to agahun-glintẹn lọ, n’mọ sunnu delẹ ja sọn olá bo hẹn osò do abọ́ ji bo to zọnlinzin ja fihe yè nọ yí tike te. N’vẹ̀do dọ mẹhe to tintẹnpọn nado họ̀n sọn otò lọ mẹ de wle gbé wẹ yé ja sin. Kakatimọ, yẹn wẹ yé dlẹnalọdo! Naegbọn yé to alọdlẹndo mi? Ninọmẹ lọ wá diọ to ajiji mẹ, na yẹn mẹhe ko bẹ azọ́n ṣie jẹeji ganji.

Alọgọ He N’Mọ to Gànpamẹ

Awhànfuntọ lẹ plan mi yì azọ́nwatẹn de bo kanhose mi na gànhiho susu. Yé kanse mi dọ, “Mẹnu wẹ nọ suahọ Kunnudetọ Jehovah tọn lẹ? Be pipli he nọ yiavùnlọna Mẹdekannujẹ Érythrée tọn lẹ mẹ wẹ a te ya? Be gandudu États-Unis tọn wẹ hiẹ kavi baba towe nọ wazọ́n na ya?” Nugbo wẹ dọ ninọmẹ ehe ma bọawu, amọ́ po alọgọ Jehovah tọn po, n’gbọṣi abọẹ.—Filipinu lẹ 4:6, 7.

To hokansemẹ lọ godo, awhànfuntọ lẹ dọ̀n mi yì ohọ̀ he yé diọ zun gànpa de mẹ, bo ze mi do ohọ̀ he ma gblo sọmọ de mẹ (nudi mẹtlu 7), to pọmẹ hẹ yọnnu jọja 15 devo lẹ he yin zize do gànmẹ na whẹho tonudidọ tọn wutu.

To ozán enẹ mẹ, whenue n’mlọnai do kọmẹ po azọ́n-vọ́ agahun-glintẹn lọ tọn po to okọ̀, n’to nuhà gando magbọjẹ he mẹjitọ ṣie lẹ po nọvi ṣie lẹ po na to tintindo go. Yé yọnẹn dọ yè wle mi, amọ́ yé ma yọ́n fie yè ze mi sọyi taun. N’biọ Jehovah to odẹ̀ mẹ dọ ni gọalọna whẹndo ṣie nado yọ́n fihe n’te.

Whenue n’fọ́n to afọnnu, n’mọ gàntọ-ṣọ́tọ jọja de he n’yọnẹn. E ma gán yí nuhe mọ e te sè, enẹwutu e kanse mi dọ, “Aster, etẹ wà a te tofi?” N’vẹ̀ ẹ dọ ni yì dọ fihe n’te na mẹjitọ ṣie lẹ na mi. To gànhiho delẹ godo to gbenẹgbe, mẹjitọ ṣie lẹ wá do núdùdù po avọ̀ po hlan mi. Gàntọ-ṣọ́tọ lọ ko dọ fihe n’te na yé. Jehovah ko na gblọndo odẹ̀ ṣie tọn! Numimọ enẹ vọ́ jide na mi dọ n’ma to ṣokẹdẹ.

Yé ma dike ma do Biblu kavi zinjẹgbonu devo depope, podọ yé ma yigbe dọ hagbẹ whẹndo tọn kavi họntọn lẹ ni wá dla mi pọ́n. Etomọṣo, Jehovah yí gàntọ hatọ lẹ zan nado na mi tuli. N’nọ dọyẹwheho na yé egbesọegbesọ, podọ nugbo he gando Ahọluduta Jiwheyẹwhe tọn go lẹ yinuwado yé ji taun. Yé nọ saba dọna mi dọ: “Mílẹ tofi na mí to avùnlọyina gandudu gbẹtọvi tọn de wutu, amọ́ hiẹ tofi na a to avùnlọyina gandudu Jiwheyẹwhe tọn wutu. Ma jogbe blo, eyin yé tlẹ sìn-adán nado hù we!”

To whedelẹnu, gàntọ-ṣọ́tọ lẹ nọ kanhose gàntọ lẹ bosọ nọ hò yé. To zánmẹ gbèdopo, to nudi ogàn 11 mẹ, yé tọ́n gbé ṣie wá. Whenue mí jẹ abò he mẹ yé nọ kanhosemẹ te lọ, owhẹ̀ susu wẹ yé sadokọnna mi. Yé dọ dọ n’ma nọ nọgodona otò ṣie. Podọ whenue n’gbẹ́ nado vọ́ aṣagbè tonudidọ tọn de dọ gàntọ-ṣọ́tọ sunnu awe delẹ hò mi. Gàntọ-ṣọ́tọ lọ lẹ nọ wá plan mi bo nọ kanhose mi sọn ojlẹ de mẹ jẹ devo mẹ. To ninọmẹ dopodopo mẹ, n’nọ hodẹ̀ hlan Jehovah vivẹvivẹ, podọ n’nọ mọdọ e nọ hẹn mi lodo.

To osun atọ̀n godo, dopo to gàntọ-ṣọ́tọ lọ lẹ mẹ wá dee bo dọna mi dọ yè ko jo mi. Dile etlẹ yindọ e paṣa mi bosọ hẹn homẹ ṣie hùn, n’jẹflumẹ pẹẹde na n’ko to vivi owẹ̀n Ahọluduta tọn lilá na jọja yọnnu he to gànpamẹ lọ lẹ tọn dù.

Osun vude to whenue yè jo mi godo, awhànfuntọ lẹ wá wle jọja aflanmẹ he to whẹndo mítọn mẹ lẹpo, whenue n’ma to whégbè! Yé wle nọviyọnnu ṣie awe po nọvisunnu ṣie dopo po. To whenẹnu, n’mọdọ nuyọnẹnnu wẹ e na yin nado họ̀n sọn otò lọ mẹ. Nugbo wẹ dọ e ma bọawuna mi nado jo whẹndo ṣie do whladopo dogọ, amọ́ onọ̀ ṣie gọalọna mi nado gboadọ bo dejido Jehovah go. Ojlẹ kleun de to enẹgodo, n’do agahun yì États-Unis. To whèjai gbenẹgbe, awhànfuntọ lẹ wá whégbè nado wle mi whla awetọ. Whenue yé ba mi pò, yé họnwezun wá agahun-glintẹn lọ. Amọ́ whẹpo yé do jẹ finẹ, agahun ṣie ko sún hoho.

N’wá jẹte do Maryland bọ Haywood po Joan Ward po, yèdọ mẹdehlan he plọnnu hẹ mẹjitọ ṣie lẹ dokuavọna mi. To osun atọ́n godo, n’jẹ yanwle ṣie nado yin gbehosọnalitọ kọ̀n. Cyndi, yèdọ viyọnnu Ward lẹ tọn lẹzun gbehosọnalitọ-gbẹ́ ṣie, podọ mí duvivi ojlẹ dagbe susu tọn to lizọnyizọn lọ mẹ.

N’Ze Dee Jo Na Sinsẹ̀nzọn Jiwheyẹwhe Tọn to Bẹtẹli

To alunlun owhe 1979 tọn, n’dla Bẹtẹli pọ́n to New York bo dukosọna mẹmẹsunnu Wesley Parker. N’yiwanna jẹhẹnu dagbedagbe etọn lẹ po yanwle gbigbọmẹ tọn etọn lẹ po. Mí wlealọ to 1981, podọ n’sẹtẹn yì Wallkill to New York nado sẹ̀n to Bẹtẹli po Wesley po. N’wazọ́n họmẹjijlado po avọ̀ yinyàn po tọn, podọ to nukọn mẹ n’wazọ́n hẹ pipli he nọ penukundo MEPS go to azọ́nwatẹn Ọdinatẹẹ tọn. Sinsẹ̀nzọn wiwà to Bẹtẹli hùn dotẹnmẹ dote na mi nado ze dee jo na Jehovah mlẹnmlẹn dile n’to mẹmẹsunnu po mẹmẹyọnnu lẹ po yọnẹn dogọ, yèdọ mẹhe wá lẹzun họntọn ojlẹ dindẹn tọn ṣie lẹ.

Amọ́ to Éthiopie, whẹndo ṣie gbẹ́ to pipehẹ homẹkẹn sinsinyẹn podọ ehe nọ do magbọjẹ na mi. Nọvi ṣie atọ̀n he yè wle lẹ gbẹ́ pò to gànpamẹ.b Egbesọegbesọ wẹ onọ̀ ṣie dona dà núdùdù bo dohlan yé, na yè ma nọ na yé núdùdù to gànpa lọ mẹ wutu.

To ojlẹ sinsinyẹn enẹlẹ mẹ, Jehovah lẹzun fibẹtado de na mi, podọ whẹndo Bẹtẹli tọn miọnhomẹna mi bosọ nọgodona mi. (Malku 10:29, 30) To gbèdopo, mẹmẹsunnu John Booth dọna mi dọ: “Homẹ mítọn hùn dọ a tofi bo to sinsẹ̀n to Bẹtẹli. Ehe ma na ko yọnbasi eyin Jehovah ma to didona we.”c Hogbe homẹdagbe tọn enẹlẹ vọ́ jide na mi dọ Jehovah ko dona nudide ṣie nado họ̀n sọn Éthiopie podọ dọ e na penukundo whẹndo ṣie go.

Mí Sẹ̀n Jehovah to Pọmẹ Taidi Whẹndo De

To janvier 1989, mí doayi e go dọ n’mọho. To bẹjẹeji, mí jẹflumẹ! Amọ́ to azán delẹ godo, flumẹjijẹ mítọn lẹzun ayajẹ. Etomọṣo, mí gbẹ́ to nuhà dọ mẹjitọ nankọ wẹ mí na yin, fitẹ mí na nọ podọ nawẹ mí gán penukundo míde go gbọn eyin mí tọ́n sọn Bẹtẹli.

To 15 avril 1989, mí doagbàn mọto mítọn mẹ bo jẹ aliji dedo Oregon, fie mí ko basi dide nado zindonukọn to sinsẹ̀nzọn whenu-gigọ́ tọn mẹ te taidi gbehosọnalitọ lẹ. Amọ́, ojlẹ vude to whenue mí jẹ dọ́n godo, họntọn mẹtọnhopọntọ delẹ dọna mí dọ e ma na yin nuyọnẹnnu nado basi gbehosọnalitọ to alọnu din. Nugbo wẹ dọ onú vude to mí si podọ mí to nukundo dọ n’na jivi to madẹnmẹ. Etẹwẹ mí na wà din? Ojlẹ enẹ mẹ pẹẹ wẹ nugopọntọ lẹdo tọn mítọn Guy Pierce, po asi etọn Penny po wá dla mí pọ́n.d Yé na mí tuli nado tẹdo nudide mítọn go. Enẹwutu, mí bẹ gbehosọnalitọ jẹeji bosọ deji dọ Jehovah na gọalọna mí. (Malaki 3:10) Mí zindonukọn nado to sinsẹ̀n taidi gbehosọnalitọ lẹ kakajẹ whenue mí ji visunnu mítọn tintan Lemuẹli, podọ awetọ lọ Jadon.

Numimọ he mí tindo to whenue mí basi gbehosọnalitọ to pọmẹ hẹ visunnu mítọn lẹ họakuẹ to nukun mítọn mẹ. Sinsẹ̀nzọn gbehosọnalitọ tọn hùn dotẹnmẹ susu dote na mí nado basi zẹẹmẹ nugbo Biblu tọn lẹ tọn, e ma yin na kọmẹnu mítọn lẹ kẹdẹ amọ́ na visunnu mítọn lẹ ga. (Deutelonomi 11:19) Amọ́ whenue mí ji visunnu mítọn atọ̀ntọ Japheth godo, mí to dandannu glọ nado doalọtena sinsẹ̀nzọn gbehosọnalitọ tọn whẹ́.—Mika 6:8.

Mí Plọn Visunnu Mítọn lẹ Nado Sẹ̀n Jehovah

Mí wá mọdọ azọngban titengbe hugan he mí tindo taidi mẹjitọ lẹ wẹ nado gọalọna ovi mítọn lẹ dopodopo nado nọ mọ Jehovah taidi omẹ nujọnu tọn de bosọ wleawuna haṣinṣan mẹdetiti tọn de hẹ ewọ. Nado jẹ yanwle ehe kọ̀n, mí nọ tẹnpọn nado hẹn sinsẹ̀n-bibasi whẹndo tọn zun nude he yé nọ to jejeji na. Whenue yé gbẹ́ pò to pẹvi, mí nọ hia zinjẹgbonu lọ lẹ Didotóayi Hlan Mẹplọntọ Daho Lọ po Owe Ṣie He Bẹ Otàn Biblu Tọn lẹ Hẹn po dopọ hẹ yé. Mí tlẹ sọ nọ basi wadohia delẹ to otàn lọ lẹ mẹ tọn. Na yẹn wẹ yin yọnnu dopo gee he to owhé lọ gbè wutu, eyin mí basi wadohia otàn Jezebẹli tọn, n’nọ yì adà Jezebẹli tọn wà. E nọ vivi na ovi mítọn lẹ nado yinuwa taidi dọ yé sisẹ́ mi sọn oján ji podọ nado yinuwa taidi avún lẹ! Gbọnvona sinsẹ̀n-bibasi whẹndo tọn, Wesley sọ nọ plọn Biblu hẹ visunnu mítọn lẹ dopodopo.

Mí yiwanna visunnu mítọn lẹ podọ nado nọ penukundo yé go, bosọ nọ hodẹ̀ nado gbọṣi kọndopọ mẹ taidi whẹndo de. Dile yé to whinwhẹ́n, mí sọ plọn yé onú titengbe devo lẹ. Yé nọ klọ panú, hẹn abò yetọn lẹ do wiweji bosọ nọ yàn avọ̀ yetọn lẹ. Yé sọ plọn lehe yè nọ dà núdùdù do.

E ma yin ovi mítọn lẹ kẹdẹ wẹ nọ mọ nude plọn, míwu mẹjitọ lẹ lọsu nọ wàmọ ga. To whedelẹnu, nuyiwa mítọn lẹ nọ zẹpá podọ hogbe he mí nọ zan na visunnu mítọn lẹ kavi na ode awetọ ma nọ gọ́ na ojọmiọn. To ninọmẹ mọnkọ lẹ mẹ, mí nọ do whiwhẹ hia bo nọ vẹvẹ.

Mí nọ saba ylọ mẹmẹsunnu po mẹmẹyọnnu lẹ po wá whégbè nado yí jonọ yetọn, ehe bẹ hagbẹ whẹndo Bẹtẹli tọn lẹ, mẹdehlan lẹ, nugopọntọ lẹ gọna mẹhe to sinsẹ̀n to fihe nuhudo sù te lẹ hẹn. (Lomunu lẹ 12:13) Whenue mí to jonọ mẹhe mí ylọ lẹ tọn yí, mí ma nọ dọna ovi mítọn lẹ nado yì daihun to abò devo mẹ. Yé nọ gbọṣi mí dè bo nọ duvivi hodọdopọ po numimọ lẹ po tọn. To whedelẹnu, ovi mítọn lẹ wẹ nọ flin nudọnamẹ gigọ́ lẹ gando hodọdopọ de go hugan yẹn po Wesley po.

Yẹn po Wesley po dovivẹnu vẹkuvẹku nado duvivi sinsẹ̀nzọn mítọn hlan Jehovah tọn. Di apajlẹ, mí nọ basi tito jẹnukọn nado sẹ̀ akuẹ do bo de whenu dovo na gbọjẹ, nado tọ́nwhẹ̀n yì otò voovo lẹ mẹ. To gbejizọnlin dopodopo whenu, mí nọ dla wekantẹn alahọ tọn pọ́n, nọ yì opli lẹ bosọ nọ do mahẹ to lizọnyizọn lọ mẹ. Ehe zọ́n bọ mí wá yọ́n pinpẹn titobasinanu lẹdo aihọn pé Jehovah tọn dogọ, bosọ lodo dogọ taidi whẹndo de.

Mí Ze Míde Jo Pete Na Sinsẹ̀nzọn Mítọn

Mí doayi e go dọ mẹsusu to lẹdo mítọn mẹ nọ do Espagne-gbè, amọ́ yè ma nọ dekunnu na yé whẹwhẹ. Enẹwutu, whenue visunnu mítọn lẹ gbẹ́ to pẹvi, mí kanhose Mẹmẹsunnu Pierce nado yọ́n nuhe e lẹn gando tẹnsisẹ na whẹndo mítọn yì agun he nọ do Espagne-gbè mẹ go. E gblọn po nukiko po dọ, “Eyin whèhutọ de wẹ a yin, fie a na mọ whèvi wle te wẹ a na yì.” Po tulinamẹ enẹ po, mí sẹtẹn yì agun Espagne-gbè tọn de mẹ to Woodburn, to Oregon. E vivi na mí nado bẹ plọnmẹ Biblu he to nukọnyi susu lẹ jẹeji bosọ gọalọna delẹ to yé mẹ nado jẹ baptẹm kọ̀n, podọ homẹ mítọn hùn nado mọdọ kándo pẹvi Espagne-gbè tọn de wá lẹzun agun.

To ojlẹ de mẹ, azọ́n gble do Wesley bọ mí dona sẹtẹn yì Californie, na agbasazọ́n yọyọ he e mọ wutu. To owhe awe godo, yẹn po Lemuel po gọna Jadon de nado bẹ gbehosọnalitọ jẹeji. To 2007, homẹ ṣie hùn taun nado yì Wehọmẹ Sinsẹ̀nzọn Gbehosọnalitọ tọn to pọmẹ hẹ yé. Ojlẹ kleun de to wehọmẹ lọ godo, mí doayi e go dọ mẹhe nọ do Arabe-gbè susu lẹ to aigba-denamẹ mítọn ji. Enẹwutu, whenue mí ko zan owhe 13 to aigba-denamẹ Espagne-gbè tọn ji godo, whẹndo mítọn de nado yì kọnawudopọ hẹ agun he nọ do Arabe-gbè. Mí duvivi nugbo lọ lilá na jonọ he nọ do Arabe-gbè lẹ tọn to lẹdo mítọn mẹ, podọ to tògodo to nujijla vonọtaun lẹ whenu. Mí zindonukọn nado to sinsẹ̀n taidi gbehosọnalitọ lẹ to aigba-denamẹ Arabe-gbè tọn ji to San Diego, to Californie.

Asu podọ tatọ́ whẹndo tọn dagbe de wẹ Wesley yin. E tindo sisi sisosiso na titobasinanu Jehovah tọn. E ma dọ nuhe ma sọgbe de gando Bẹtẹli kavi tito agun tọn lẹ go pọ́n gbede. Kakatimọ, e nọ mọ nudagbe de dọ janwẹ. E nọ hodẹ̀ hẹ mi bosọ nọ hodẹ̀ na mi, podọ whenue mí to jujugbọn ninọmẹ sinsinyẹn lẹ mẹ, odẹ̀ etọn lẹ ko miọnhomẹna mi bo gọalọna mi nado ze ayiha do fidopo.

Eyin mí pọ́n godo hlan, mí nọ mọdọ mí ko duvivi sinsẹ̀nzọn whenu-gigọ́ tọn, plọn whẹndo de whẹ́n, bosọ sẹ̀n to agun he mẹ nuhudo sù te lẹ. Mí ko mọdọ Jehovah nọ dona mẹhe ze ewọ do otẹn tintan mẹ lẹ, podọ mí ma jẹdò nude tọn pọ́n gbede. (Salmu lẹ 37:25) N’kudeji dọ nudide dagbe hugan he n’ko basi wẹ nado yí gbẹzan ṣie pete do sẹ̀n Jehovah.—Salmu lẹ 84:10.