To whenue Ahọlu Josia tindo owhe 26, e jẹ tẹmpli lọ vọjlado ji. To azọ́n enẹ whenu, “owe Osẹ́n Jehovah tọn he yin nina gbọn Mose gblamẹ lọ” yin mimọ. Whenue ahọlu lọ sè dile e to yinyin hihia, e basi diọdo nado setonuna nuhe yin kinkan do e mẹ to afọdopolọji. (2 Otàn. 34:14, 19-21) Be e na jlo we nado nọ hia Biblu whẹwhẹ ya? Eyin a ko to vivẹnudo nado wàmọ, nawẹ e to yìyì do? Be a nọ dohiagona wefọ he gán gọalọna we lẹ ya? Whenue Josia do nudi owhe 39, e ṣì nude wà he zọ́n bọ e hẹn ogbẹ̀ etọn bu. E dejido ede go kakati nado dín anademẹ Jehovah tọn. (2 Otàn. 35:20-25) Etẹwẹ yin nuplọnmẹ lọ? Mahopọnna owhe he mí do kavi whenue gbọ́n mí ko to Biblu plọn, mí dona zindonukọn nado to Jehovah dín. Ehe nọ biọ dọ mí ni nọ hodẹ̀ whẹwhẹ nado biọ anademẹ etọn, nọ plọn Ohó etọn, bosọ nọ mọaleyi sọn ayinamẹ Klistiani he whèwhín lẹ tọn mẹ. To whenẹnu, ayihaawe matin dọ mí na dapana nuṣiwa sinsinyẹn lẹ bosọ tindo ayajẹ dogọ.—Jak. 1:25. w23.09 12 huk. 15-16

Biblu donù yọnnu ayidego tọn susu go he yiwanna Jehovah bosọ sẹ̀n ewọ. Yé yin “mẹdehọ́tọ to walọ mẹ,” bosọ yin “nugbonọ to nulẹpo mẹ.” (1 Tim. 3:11) Humọ, mẹmẹyọnnu lẹ gán mọ apajlẹ yọnnu Klistiani he whèwhín he yé gán hodo lẹ tọn to agun yetọn lẹ mẹ. Mẹmẹyọnnu jọja lẹ emi, naegbọn mì ma na doayi yọnnu Klistiani he whèwhín bọ mì yọnẹn delẹ go ehe mì gán hodo apajlẹ yetọn? Nọ doayi jẹhẹnu dagbedagbe yetọn lẹ go; enẹgodo, nọ lẹnnupọndo lehe hiẹ lọsu gán do yé hia do ji. Jẹhẹnu titengbe de he nọ dohia dọ Klistiani de whèwhín wẹ whiwhẹ. Eyin yọnnu de yin whiwhẹnọ, e na tindo haṣinṣan dagbe de hẹ Jehovah podọ hẹ mẹdevo lẹ. Di apajlẹ, yọnnu he yiwanna Jehovah de nọ gbọn whiwhẹ dali desọn ojlo mẹ nado nọgodona tito tatọ́-yinyin tọn he Otọ́ olọn mẹ tọn etọn zedai. (1 Kọl. 11:3) Jẹhẹnu enẹ nọ yọ́n-na-yizan to aliho tangan delẹ mẹ to agun mẹ podọ to whẹndo mẹ. w23.12 18-19 huk. 3-5

Jehovah nọ donukun dọ asu de ni yiwanna asi etọn bo nọ penukundo nuhudo agbasa tọn, numọtolanmẹ tọn, po gbigbọmẹ tọn etọn lẹ po go. Awuwiwlena nugopipe nulẹnpọn tọn, sisi tintindo na yọnnu lẹ gọna gbẹtọ dejidego yinyin na gọalọna we nado yin alọwlemẹ dagbe de. To whenue a ko wlealọ godo, a gán lẹzun otọ́ de. Etẹwẹ a gán plọn sọn Jehovah dè gando otọ́ dagbe de yinyin go? (Efe. 6:4) Jehovah dọna Visunnu etọn Jesu to gbangba dọ emi yiwanna ẹn bosọ kẹalọyi i. (Mat. 3:17) Eyin a lẹzun otọ́ de, hẹn ẹn diun dọ emi nọ hẹn ovi emitọn lẹ deji whẹwhẹ dọ emi yiwanna yé. Nọ saba pà yé na onú dagbe he yé wà lẹ. Otọ́ he nọ hodo apajlẹ Jehovah tọn lẹ nọ gọalọna ovi yetọn lẹ nado lẹzun sunnu po yọnnu Klistiani he whèwhín lẹ po. A gán wleawudai todin na azọngban enẹ, eyin a nọ yí owanyi do penukundo mẹhe to whẹndo towe mẹ gọna mẹhe to agun lọ mẹ lẹ go bo nọ plọn nado do owanyi po pinpẹn-nutọn-yinyọnẹn towe po hia yé.—Joh. 15:9. w23.12 29 huk. 17-18