Jehovah nọ yiwanna nado do nukundagbe sisosiso etọn hia mẹhe nọ hẹn homẹ etọn hùn lẹ. Owe-wiwe lẹ donù nujijọ awe delẹ go ehe whenu E dọna Jesu te dọ e yin mẹyiwanna Emitọn, yèdọ Visunnu he emi kẹalọyi. (Mat. 3:17; 17:5) Be e na jlo we nado sè dọ Jehovah to jide vọ́ na we dọ a tindo nukundagbe emitọn ya? Mí ma nọ sè ogbè Jehovah tọn tlọlọ, amọ́ e nọ dọhona mí gbọn Ohó etọn gblamẹ. Whenue mí hia hogbe Jesu tọn lẹ to owe Wẹndagbe tọn lẹ mẹ, e nọ taidi dọ mí to ogbè Jehovah tọn sè bọ e to nukundagbe dohia mí wẹ nkọ. Jesu nọ do jẹhẹnu Otọ́ etọn tọn lẹ hia to aliho pipé mẹ. Enẹwutu, whenue mí hia dọ Jesu do nukundagbe hia hodotọ etọn he yin nugbonọ mahopọnna dọ yé yin mapenọ lẹ, mí gán yí nukun homẹ tọn do mọdọ Jehovah to hogbe enẹlẹ yizan na mílọsu. (Joh. 15:9, 15) Eyin whlepọn lẹ wá mí ji, enẹ ma yin ohia lọ dọ mí ko hẹn nukundagbe Jiwheyẹwhe tọn bu. Kakatimọ, yé nọ hùn dotẹnmẹ lẹ dote na mí nado do obá he mẹ mí yiwanna Jiwheyẹwhe bosọ nọ dejido ewọ go jẹ hia.—Jak. 1:12. w24.03 28 huk. 10-11

Eyin mẹjitọ de wẹ a yin, gọalọna ovi towe lẹ nado nọ wleawuna gblọndo he sọgbe hẹ owhe yetọn lẹ. To whedelẹnu, whẹho sinsinyẹn delẹ taidi dehe gando nuhahun alọwle tọn kavi whẹho walọ dagbe tọn go lẹ wẹ nọ yin dogbapọnna to nupinplọn de mẹ, amọ́ e yọnbasi dọ hukan dopo kavi awe ni tin he ji ovi de gán na gblọndo te. Humọ, nọ gọalọna ovi towe lẹ nado mọnukunnujẹ nuhewutu yè gán nọma ylọ yé to whelẹponu he yé ze alọ mẹ. Zẹẹmẹ ehe bibasi gán zọ́n bọ yé ma na jẹflumẹ whenue yè ma yí alọ yetọn bo ka yí mẹdevo lẹ tọn. (1 Tim. 6:18) Mímẹpo wẹ gán wleawuna gblọndo mẹjlọdote tọn he na gbògbéna Jehovah bosọ na tuli Klistiani hatọ mítọn lẹ. (Howh. 25:11) Dile etlẹ yindọ to whedelẹnu, mí gán dọ numimọ mẹdetiti tọn kleun de, mí ma dona nọ dọho glanglan gando míde go. (Howh. 27:2; 2 Kọl. 10:18) Kakatimọ, mí nọ dovivẹnu nado ze ayidonugo do Jehovah, Ohó etọn po omẹ etọn lẹ po ji taidi pipli de.—Osọ. 4:11 w23.04 24-25 huk. 17-18

Owanyi yin dandan nado nọ nukle bo gbọṣi lẹnpọn dagbenọ-yinyin mítọn mẹ. (Mat. 22:37-39) Owanyi na Jiwheyẹwhe nọ gọalọna mí nado doakọnnanu to lizọnyizọn lọ mẹ, mahopọnna nuhahun depope he mọwiwà gán hẹnwa na mí. (2 Tim. 1:7, 8) Na mí sọ yiwanna mẹhe ma tindo nuyise dopolọ hẹ mí lẹ wutu, mí nọ to yẹwhehodọ bo tlẹ nọ dekunnu gbọn alokan po wekanhlanmẹ lẹ po gblamẹ. Mí ma nọ hẹn todido bu dọ to gbèdopo, kọmẹnu mítọn lẹ na wá diọ bo jẹ nuhe sọgbe wà ji. (Ezek. 18:27, 28) Mí sọ nọ yiwanna Klistiani hatọ mítọn lẹ. Mí nọ do owanyi mọnkọ hia eyin mí “nọ to tulina ode awetọ bo nọ to ode awetọ hẹn lodo.” (1 Tẹs. 5:11) Kẹdẹdile awhànfuntọ lẹ nọ wazọ́n abọ́ to abọ́ go to awhàngbenu do, mí nọ na tuli ode awetọ. Mí ma na desọn ojlo mẹ gbede bo gbleawuna mẹmẹsunnu po mẹmẹyọnnu mítọn lẹ po kavi yí oylan do sú oylan họ́. (1 Tẹs. 5:13, 15) Mí sọ nọ do owanyi mítọn hia eyin mí nọ na sisi mẹmẹsunnu he nọ deanananu to agun mẹ lẹ.—1 Tẹs. 5:12. w23.06 10 huk. 6; 11 huk. 10-11