Yẹwhegán Daniẹli gbẹ́ yin jọja whenue Babilọninu lẹ wle e taidi kanlinmọ bo plan ẹn yì fie dẹn taun do otò etọn. Amọ́, e họnwun dọ ahọluzọnwatọ Babilọni tọn lẹ doayi Daniẹli go. Yé mọ sọgbe hẹ “nuhe sọawuhia to nukunta” dọ e “ma tindo oblọ depope, [bosọ] tindo awusọhia dagbe,” podọ e wá sọn whẹndo nukundeji de mẹ. (1 Sam. 16:7) Enẹwutu, Babilọninu lẹ plọnazọ́n ẹn nado wá sẹ̀n to họ̀nmẹ otò yetọn tọn. (Dan. 1:3, 4, 6) Jehovah yiwanna Daniẹli na omẹ alọpa he jọja sunnu ehe de nado yin wutu. Na nugbo tọn, Daniẹli gán ko do nudi owhe 20 poun whenue Jehovah dọho etọn dagbe bo slẹ yinkọ etọn dopọ hẹ Noa po Jobu po, yèdọ sunnu he ko yí owhe susu lẹ zan nado wleawuna yinkọ dagbe to Jiwheyẹwhe dè lẹ. (Jen. 5:32; 6:9, 10; Jobu 42:16, 17; Ezek. 14:14) Podọ, Jehovah zindonukọn nado yiwanna Daniẹli to gbẹzan gaa podọ ayidego tọn etọn blebu mẹ.—Dan. 10:11, 19. w23.08 2 huk. 1-2

Eyin a to linlẹn nado họ̀ owhé de, e na jlo we dọ hiẹ lọsu ni pọ́n adà owhé he a jlo na họ̀ lọ tọn lẹpo. Mí gán wà nudopolọ whenue mí to Biblu hia bosọ to pinplọn ẹn. Eyin a nọ nọ̀ plaplaji nado hia ẹ poun, nugbo dodonu tọn lẹ janwẹ a gán plọn, yèdọ “onú dodonu nulila wiwe Jiwheyẹwhe tọn lẹ tọn.” (Heb. 5:12) Kakatimọ, kẹdẹdile a dona biọ owhé lọ gbè nado yọ́n lehe e te do nugbonugbo, nọ gbadopọnna nudọnamẹ họakuẹ he to e mẹ lẹ kitokito. Dopo to aliho dagbe hugan nado plọn Biblu lẹ mẹ wẹ nado mọ lehe adà voovo he e bẹhẹn lẹ tindo kanṣiṣa hẹ yede do. Nọ dovivẹnu nado mọnukunnujẹ nugbo he a yise lẹ gọna nuhewutu a do yí yé sè lẹ mẹ. Nado mọnukunnujẹ Ohó Jiwheyẹwhe tọn mẹ to gigọ́ mẹ, mí dona nọ yí sọwhiwhe do plọn nugbo sisosiso Biblu tọn lẹ. Apọsteli Paulu dotuhomẹna mẹmẹsunnu po mẹmẹyọnnu etọn lẹ po nado nọ yí sọwhiwhe do plọn Ohó Jiwheyẹwhe tọn, na yé nido sọgan “mọnukunnujẹ nuhe gbigblo, tedidi, jiyiyi po sisosiso” nugbo lọ tọn po yin mẹ “to gigọ́ mẹ.” To whenẹnu, yé na “doadọ̀do bo yin hinhẹn lodo” to yise mẹ. (Efe. 3:14-19) Mílọsu dona wà nudopolọ. w23.10 18 huk. 1-3

Biblu bẹ apajlẹ mẹsusu lẹ tọn hẹn he do homẹfa hia. Naegbọn a ma na yí i do basi yanwle nado plọnnu gando apajlẹ yetọn lẹ go? Di dohia, dile etlẹ yindọ Davidi yin yiyiamisisadode to jọja whenu nado yin ahọlu Islaeli tọn to sọgodo, e dona nọte na owhe susu whẹpo do hẹ gánzinpo ji. Simeoni po Anna po sẹ̀n Jehovah po nugbonọ-yinyin po dile yé to tenọpọn Mẹsia dopagbe lọ. (Luku 2:25, 36-38) Dile a to dogbapọnna kandai mọnkọ lẹ, dín gblọndo na kanbiọ he bọdego ehelẹ: Etẹwẹ sọgan ko gọalọna ẹn nado do homẹfa hia? Nawẹ homẹfa etọn hẹn ale wá na ẹn gbọn? Nawẹ n’gán hodo apajlẹ etọn gbọn? Nupinplọn gando apajlẹ mẹhe ma do homẹfa hia lẹ tọn go gán sọ hẹn ale wá na we ga. (1 Sam. 13:8-14) A gán kanse dọ: ‘Naegbọn yé do gboawupo nado do homẹfa hia? Kọdetọn tẹlẹ wẹ enẹ hẹnwa yé ji?’ w23.08 24 huk. 15