Jehovah Hẹn Mí Deji Dọ Aigba Na Lẹzun Paladisi

1. Owẹ̀n tẹwẹ yẹwhegán Isaia do Islaelivi hatọ etọn lẹ?

YẸWHEGÁN Isaia dọ dọ Jehovah wẹ “Jiwheyẹwhe nugbo tọn lọ.” To paa mẹ, hogbe he yin lilẹdo “nugbo” nọ zẹẹmẹdo “niṣẹ.” (Isa. 65:16, Odò.) “Niṣẹ” zẹẹmẹdo “ni yinmọ” kavi “na jide tọn.” Eyin hogbe lọ “niṣẹ” yin yiyizan to Biblu mẹ gando Jehovah kavi Jesu go, e nọ namẹ nujikudo dọ nude yin nugbo. Enẹwutu, owẹ̀n Isaia tọn na Islaelivi hatọ etọn lẹ họnwun: Eyin Jehovah dọ dọdai nude tọn, e nọ mọ hẹndi janwẹ. Jehovah ko do nugbo ehe hia gbọn opagbe etọn lẹpo hinhẹndi dali.

2. Naegbọn mí gán dejido opagbe Jehovah tọn he gando sọgodo mítọn go lẹ go, podọ kanbiọ tẹlẹ ji wẹ mí na dọhodo?

² Be mí gán deji dọ opagbe he Jehovah do gando sọgodo mítọn go lẹ na mọ hẹndi ga ya? Nudi owhe 800 to ojlẹ Isaia tọn godo, apọsteli Paulu basi zẹẹmẹ nuhewutu yè gán dejido opagbe Jiwheyẹwhe tọn lẹ go to whepoponu tọn. Paulu dọmọ: “E glo Jiwheyẹwhe nado dolalo.” (Heb. 6:18) Kẹdẹdile asisa osin tọn de ma gán de osin he vivi po ojẹ̀-sin po tọ́n to ojlẹ dopolọ mẹ do, mọ wẹ Jehovah he yin Asisa nugbo tọn ma gán dolalo do niyẹn. Enẹwutu, mí gán deji mlẹnmlẹn do nuhe Jehovah dọ lẹpo go, ehe bẹ opagbe etọn he gando sọgodo mítọn go lẹpo hẹn. To hosọ ehe mẹ, mí na gbadopọnna kanbiọ ehelẹ: Etẹwẹ Jehovah dopà dọ emi na na mí to sọgodo? Podọ nujikudo tẹwẹ Jehovah na dọ opagbe emitọn na mọ hẹndi?

OPÀ TẸWẸ JEHOVAH KO DO?

3. (a) Opagbe tẹwẹ devizọnwatọ Jiwheyẹwhe tọn lẹ yiwanna taun? (Osọhia 21:3, 4) (b) Nawẹ mẹdelẹ nọ yinuwa gbọn eyin mí má opagbe enẹ hẹ yé?

³ Devizọnwatọ Jiwheyẹwhe tọn lẹ lẹdo aihọn pé wẹ yiwanna opagbe he mí jlo na gbadopọnna lọ taun. (Hia Osọhia 21:3, 4.) Jehovah dopà ojlẹ de tọn whenue “okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.” Susu mítọn wẹ nọ yí wefọ tulinamẹ tọn he gando ogbẹ̀ to Paladisi mẹ go ehe zan whenue mí to yẹwhehodọ na mẹdevo lẹ. Nawẹ mẹdelẹ nọ yinuwa gbọn whenue mí má opagbe ehe hẹ yé? Yé gán kanse dọ, “Be ehe gán jọ nugbonugbo a?”

4. (a) Etẹwẹ Jehovah yọnẹn, podọ etẹwẹ e mọ hlan nukọn? (b) Gbọnvona dọ Jehovah dopà, nudevo tẹwẹ e sọ wà?

⁴ Na nugbo tọn, whenue Jehovah gbọdo apọsteli Johanu nado kàn opagbe he gando ogbẹ̀ to Paladisi mẹ go ehe, ewọ yọnẹn dọ to egbehe, mí na má todido ehe hẹ mẹdevo lẹ whenue mí to owẹ̀n Ahọluduta lọ tọn lá. Jehovah sọ mọ hlan nukọn dọ e na vẹawuna mẹsusu nado yí opagbe he gando “onú yọyọ lẹ” go ehe sè. (Isa. 42:9; 60:2; 2 Kọl. 4:3, 4) Enẹwutu, nawẹ mí gán hẹn mídelẹ po mẹdevo lẹ po kudeji dọ dona he yin zẹẹmẹ basina to Osọhia 21:3, 4 mẹ lẹ na wá yin nugbo gbọn? Gbọnvona dọ Jehovah dopagbe homẹmiọnnamẹ tọn ehe, e sọ na whẹwhinwhẹ́n he dutomẹji lẹ he wutu mí gán deji dọ e na yinmọ nugbo. Whẹwhinwhẹ́n tẹlẹ wẹ e na?

JEHOVAH NA MÍ NUJIKUDO GANDO OPAGBE ETỌN GO

5. Whẹwhinwhẹ́n tẹlẹ wẹ mí do nado dejido opagbe Jiwheyẹwhe tọn he gando Paladisi go lọ go, podọ fitẹ wẹ mí nọ mọ whẹwhinwhẹ́n enẹlẹ te?

⁵ Mí mọ whẹwhinwhẹ́n lẹ nado dejido opagbe he Jehovah do gando Paladisi go lọ go to wefọ he bọdego ehelẹ mẹ. Wefọ lọ lẹ dọmọ: “Mẹhe sinai to ofìn ji lọ dọmọ: ‘Pọ́n! Yẹn to nulẹpo hẹn zun yọyọ.’ Humọ, e dọmọ: ‘Kanwe, na ohó ehelẹ tindo jidide bo yin nugbo wutu.’ Ewọ sọ dọna mi dọmọ: ‘Yé ko yin hinhẹndi! Yẹn wẹ Alfa podọ Omega, yèdọ bẹjẹeji po opodo po.’”—Osọ. 21:5, 6a.

6. Naegbọn jidenamẹ he to Osọhia 21:5, 6 mẹ do hẹn jidide mítọn to opagbe Jiwheyẹwhe tọn mẹ lodo?

⁶ Naegbọn wefọ Biblu tọn ehe do nọ hẹn jidide mítọn to opagbe Jiwheyẹwhe tọn mẹ lodo? Owe lọ Osọhia—Hẹndi Pete Etọn Sẹpọ! dọ gando wefọ enẹlẹ go dọ: “E taidi dọ Jehovah lọsu to alọdowemẹ [nado na jide gbẹtọvi nugbonọ lẹ], na nuhe dù dona sọgodo tọn ehelẹ wẹ nkọ.”b Opagbe Jiwheyẹwhe tọn yin kinkandai to Osọhia 21:3, 4 mẹ. Amọ́ enẹgodo, to wefọ 5 po 6tọ po mẹ, mí mọ alọdowemẹ Jehovah tọn to linlẹn de mẹ, he hẹn mí kudeji dọ opagbe etọn na mọ hẹndi janwẹ. Mì gbọ mí ni yí sọwhiwhe do gbadopọnna hogbe he Jehovah yizan nado hẹn mí deji lẹ.

7. Etẹwẹ jẹna ayidego to hodidọ bẹjẹeji tọn he Jiwheyẹwhe yizan to jidevọnamẹ etọn mẹ, podọ naegbọn enẹ do yin onú vonọtaun de?

⁷ Jidenamẹ Jehovah tọn bẹjẹeji dole: “Mẹhe sinai to ofìn ji lọ dọmọ.” (Osọ. 21:5a) Hogbe ehelẹ jẹna ayidego, na ehe wẹ yin dopo to whla atọ̀n gee he Jehovah lọsu dọho to owe Osọhia tọn mẹ lẹ mẹ. Enẹwutu, jidenamẹ ehe ma wá sọn angẹli huhlọnnọ de dè, e ma tlẹ wá sọn Jesu he yin finfọnsọnku lọ dè, amọ́ sọn Jehovah lọsu paapá dè! Ehe zinnudo nugbo-yinyin nuhe e dọ bọdego to wefọ lọ mẹ lẹ tọn ji. Naegbọn e do yinmọ? Na Jehovah “ma sọgan dolalo” wutu wẹ. (Titu 1:2) Hodidọ ehe zọ́n bọ mí gán dejido nuhe mí hia to Osọhia 21:5, 6 mẹ lẹ go mlẹnmlẹn.

“PỌ́N! YẸN TO NULẸPO HẸN ZUN YỌYỌ”

8. Nawẹ Jehovah zinnudeji gbọn dọ opagbe emitọn na mọ hẹndi? (Isaia 46:10)

⁸ Todin, mì gbọ mí ni gbadopọnna hogbe lọ “Pọ́n!” (Osọ. 21:5) Hogbe Glẹkigbe tọn he yin lilẹdo “pọ́n!” yin yiyizan pludopludo to owe Osọhia tọn mẹ. Owe alọdlẹndonu tọn de dọ dọ ohia weyọ́nhia tọn he to vivọnu hogbe lọ tọn yin “aliho de nado dọ̀n ayidonugo wehiatọ lọ tọn wá nuhe bọdego ji.” Etẹwẹ bọdo ohia weyọ́nhia tọn lọ go? Jiwheyẹwhe dọmọ: “Yẹn to nulẹpo hẹn zun yọyọ.” Nugbo wẹ dọ diọdo sọgodo tọn lẹ hodọ wẹ Jehovah te, amọ́ to nukun etọn mẹ, opagbe ehe do jide sọmọ bọ e dọho gando yé go taidi dọ yé ko to jijọ wẹ nkọ.—Hia Isaia 46:10.

9. (a) Nuyiwa Jehovah tọn awe tẹlẹ wẹ hodidọ lọ “to nulẹpo hẹn zun yọyọ” nọ dlẹnalọdo? (b) Etẹwẹ na jọ do “olọn” po “aigba” dintọn po go?

⁹ Mì gbọ mí ni gbadopọnna hodidọ he bọdego to Osọhia 21:5 mẹ, e dọmọ: “Yẹn to nulẹpo hẹn zun yọyọ.” To weta Biblu tọn ehe mẹ, hodidọ enẹ to alọdlẹndo onú awe delẹ he Jehovah na wà. Tintan, e na và titonu hoho lọ sudo. Awetọ, e na yí titonu yọyọ de do diọtẹnna ẹn. To Osọhia 21:1 mẹ, mí hia dọ: “Olọn hoho lọ po aigba hoho lọ po ko juwayi.” “Olọn hoho lọ” to alọdlẹndo gandudu he Satani po aovi etọn lẹ po to anadena lẹ. (Mat. 4:8, 9; 1 Joh. 5:19) Dile e yin yiyizan do to Biblu mẹ, “aigba” gán dlẹnalọdo mẹhe nọ nọ̀ aigba ji lẹ. (Jen. 11:1; Salm. 96:1) Enẹwutu, “aigba hoho lọ” to alọdlẹndo mẹylankan he to aigba ji to egbehe lẹ. Jehovah ma na vọ́ “olọn” po “aigba” po he tin todin lẹ jlado poun; kakatimọ e na và yé sudo mlẹnmlẹn bo yí devo lẹ do diọtẹnna yé. E na yí “olọn yọyọ de po aigba yọyọ de po,” enẹ wẹ gandudu yọyọ de po gbẹtọvi dodonọ lẹ po do diọtẹnna olọn po aigba dintọn po.

10. Etẹlẹ wẹ Jehovah na hẹn zun yọyọ?

¹⁰ Aliho devo tẹ mẹ wẹ Jehovah na hẹn nulẹpo zun yọyọ te? (Osọ. 21:5) Jehovah na hẹn aigba po gbẹtọvi lẹ po zun yọyọ, to linlẹn lọ mẹ dọ, aigba na lẹzun Paladisi bọ gbẹtọvi lẹ na yin hinhẹn jẹ pipé kọ̀n. Dile Isaia dọ dọdai etọn do, aigba blebu na yin didiọzun jipa whanpẹnọ de, enẹ wẹ lẹdo dagbedagbe de he taidi jipa Edẹni tọn. Dopodopo mítọn nasọ yin hinhẹn zun yọyọ, kavi do numimọ hẹngọwa tọn. Sẹkunọ lẹ, nukuntọ́nnọ lẹ po tókunọ lẹ po na yin azọ̀nhẹngbọna, podọ oṣiọ lẹ na tlẹ yin hinhẹngọwa ogbẹ̀.—Isaia 25:8; 35:1-7.

“OHÓ EHELẸ TINDO JIDIDE BO YIN NUGBO. . . . YÉ KO YIN HINHẸNDI!”

11. Gbedide gọna whẹwhinwhẹ́n tẹlẹ wẹ Jehovah na Johanu?

¹¹ Jidenamẹ devo tẹwẹ Jiwheyẹwhe na? Jehovah dọna Johanu dọmọ: “Kanwe, na ohó ehelẹ tindo jidide bo yin nugbo wutu.” (Osọ. 21:5) Jehovah ma na ẹn anademẹ nado “kanwe” poun. E sọ dọ whẹwhinwhẹ́n lọ. E dọmọ: “Na ohó ehelẹ tindo jidide bo yin nugbo wutu,” enẹ wẹ yindọ Ohó Jiwheyẹwhe tọn sọgbe bọ mí gán ganjẹ e go. Mí yọ́n pinpẹn etọn dọ Johanu setonu bo “kanwe” dile e mọ anademẹ etọn yí do. Ehe zọ́n bọ mí gán hianu gando opagbe Jiwheyẹwhe tọn he gando Paladisi go lọ go, bo lẹnayihamẹpọn do dona jiawu he to tepọn mí lẹ ji.

12. Naegbọn e do sọgbe dọ Jehovah ni dọ dọ: “Yé ko yin hinhẹndi!”?

¹² Etẹwẹ Jiwheyẹwhe dọ bọdego? E dọmọ: “Yé ko yin hinhẹndi!” (Osọ. 21:6) Todin, Jehovah dọho taidi dọ nuhe yin didọ gando opagbe Paladisi tọn go lẹpo ko mọ hẹndi wẹ nkọ. Podọ e sọgbe dọ e ni dọ mọ, na nudepope ma gán glọnalina ẹn nado hẹn lẹndai etọn di wutu. Jehovah sọ na mí nujikudo dejidego de gando opagbe etọn go to jidenamẹ he bọdego ehe mẹ. Etẹwẹ e dọ?

“YẸN WẸ ALFA PODỌ OMEGA”

13. Naegbọn Jehovah do dọ dọ: “Yẹn wẹ Alfa podọ Omega”?

¹³ Dile e yin nùdego do jẹnukọn, Jehovah lọsu dọhona Johanu to numimọ voovo atọ̀n delẹ mẹ. (Osọ. 1:8; 21:5, 6; 22:13) To nujijọ ehelẹ dopodopo whenu, Jehovah yí hodidọ ehe zan: “Yẹn wẹ Alfa podọ Omega.” Alfa po omega po yin wekun tintan po godo tọn po to wekun Glẹki tọn lẹ mẹ. To whenue Jehovah yí hodidọ lọ “yẹn wẹ Alfa podọ Omega” zan, nuhe dọ e te wẹ yindọ eyin e bẹ nude jẹeji, e nọ dotana ẹn po kọdetọn dagbe po.

14. (a) Na apajlẹ de he do whenue Jehovah dọ to linlẹn de mẹ dọ “Alfa,” podọ whenue e na dọ “Omega” to linlẹn de mẹ te hia. (b) Jidenamẹ tẹwẹ to Jenẹsisi 2:1-3 mẹ?

¹⁴ Whenue Jehovah dá Adam po Evi po godo, E hẹn lẹndai dowhenu tọn etọn na gbẹtọvi lẹ po aigba po họnwun. Biblu dọmọ: “Jiwheyẹwhe dona yé bosọ dọna yé dọmọ: ‘Mì yin sinsẹ́nnọ bo sudeji bosọ gọ́ aigba ji bo dugán do e ji.’” (Jen. 1:28) To ojlẹ enẹ mẹ, Jehovah dọ “Alfa” to linlẹn de mẹ. E hẹn lẹndai etọn họnwun, enẹ wẹ yindọ: Ojlẹ lọ na wá bọ ovivi pipé Adam po Evi po tọn he yin tonusetọ lẹ na gọ́ aigba ji bosọ diọ ẹ zun Paladisi de. To whenẹnu, Jehovah na dọ “Omega” to linlẹn de mẹ. To whenue Jehovah ko dá ‘olọn po aigba po gọna nuhe tin to yé mẹ lẹpo’ fó godo, e na mí nujikudo de. Nujikudo ehe tin to Jenẹsisi 2:1-3 mẹ. (Hia.) Jehovah de azán ṣinawetọ dovo na ede taidi wiwe. Etẹwẹ ehe zẹẹmẹdo? Jehovah hẹn mí deji dọ emi na hẹn lẹndai emitọn na gbẹtọvi lẹ po aigba po di janwẹ. E na yin hinhẹndi mlẹnmlẹn to vivọnu azán ṣinawetọ enẹ tọn.

15. Naegbọn e gán ko taidi dọ Satani glọnalina lẹndai Jiwheyẹwhe tọn na gbẹtọvi lẹ?

¹⁵ To whenue Adam po Evi po ṣiatẹ godo, yé lẹzun ylandonọ bo hẹn ylando po okú po wá kúnkan yetọn ji. (Lom. 5:12) Taidi kọdetọn de, e gán taidi dọ e ma yọnbasi dọ gbẹtọvi pipé he nọ setonuna Jehovah lẹ ni gọ́ aigba lọ ji wẹ nkọ. E taidi dọ Satani glọnalina Jehovah ma nado dọ “Omega” gbede wẹ nkọ. Satani gán ko lẹndọ Jehovah ma gán hẹn opagbe etọn di. E gán lẹndọ Jehovah na hù Adam po Evi po bo dá asu po asi po pipé devo nado hẹn lẹndai Etọn na gbẹtọvi lẹ di. Amọ́ eyin Jiwheyẹwhe wàmọ, Lẹgba na ko sawhẹdokọna Ẹn dọ lalonọ wẹ ewọ yin. Etẹwutu? To Jenẹsisi 1:28 mẹ, Jehovah ko dọna Adam po Evi po dọ kúnkan yetọn wẹ na gọ́ aigba ji.

16. Naegbọn Satani gán ko lẹndọ emi gán sawhẹdokọna Jehovah dọ e gboawupo?

¹⁶ Nudevo tẹwẹ Satani gán ko lẹndọ Jiwheyẹwhe na wà? Vlavo Satani lẹndọ Jehovah na na dotẹnmẹ Adam po Evi po nado ji ovi mapenọ he ma na penugo bo jẹ pipé kọ̀n pọ́n gbede lẹ. (Yẹwh. 7:20; Lom. 3:23) Eyin e yì domọ, ayihaawe ma tin dọ Lẹgba na ko sawhẹdokọna Jehovah dọ Ewọ gboawupo. Etẹwutu? Na ehe ma na hẹn lẹndai Jiwheyẹwhe tọn di, enẹ wẹ yindọ ovivi pipé podọ tonusetọ Adam po Evi po tọn lẹ ni gọ́ Paladisi aigba ji tọn de mẹ.

17. Nawẹ Jehovah didẹ atẹṣiṣi Satani po gbẹtọvi tintan lẹ po tọn gbọn, podọ etẹwẹ na jọ to godo mẹ? (Sọ pọ́n yẹdide lọ.)

¹⁷ Jehovah didẹ atẹṣiṣi he Satani po gbẹtọvi tintan lẹ po fọndote lọ to aliho he dona ko paṣa Satani taun de mẹ. (Salm. 92:5) Nugbonọ wẹ Jehovah, podọ e na dotẹnmẹ Adam po Evi po nado ji ovi lẹ, bo gbọnmọ dali hẹn ohó etọn di. Podọ, Jehovah dohia dọ nudepope ma gán glọnalina emi nado wà nuhe emi dọ. E hẹn ẹn diun dọ lẹndai etọn na mọ hẹndi gbọn awuwiwlena “kúnkan” de he na whlẹn ovivi tonusetọ Adam po Evi po tọn lẹ gán dali. (Jen. 3:15; 22:18) Ofligọ lọ he Jehovah wleawuna dona ko paṣa Satani taun! Etẹwutu? Na e yin awuwledainanu de he sinai do owanyi matin ṣejannabi ji wutu. (Mat. 20:28; Joh. 3:16) Satani goyitọ lọ ma tindo jẹhẹnu enẹ. Enẹwutu, etẹwẹ awuwledainanu ofligọ lọ tọn na hẹn yọnbasi? To vivọnu owhe Fọtọ́n lọ tọn, ovivi pipé Adam po Evi po tọn he yin tonusetọ lẹ na nọgbẹ̀ to paladisi mẹ to aigba ji sọgbe hẹ lẹndai dowhenu tọn Jehovah tọn. To ojlẹ enẹ mẹ, Jehovah na dọ “Omega” to linlẹn de mẹ.

LEHE MÍ NỌ HẸN JIDIDE MÍTỌN TO OPAGBE JEHOVAH TỌN GANDO PALADISI GO MẸ LODO DO

18. Jidenamẹ atọ̀n tẹlẹ wẹ Jiwheyẹwhe na mí? (Sọ pọ́n apotin lọ “Whẹwhinwhẹ́n Atọ̀n Delẹ Nado Dejido Opagbe Jehovah Tọn Go.”)

¹⁸ Po nuhe mí ko gbadopọnna lẹ po, jidenamẹ tẹlẹ wẹ mí gán má hẹ mẹhe nọ do ayihaawe dọ opagbe Jiwheyẹwhe tọn gando Paladisi lọ go ma na mọ hẹndi lẹ? Tintan, Jehovah lọsu wẹ dopà lọ. Owe Osọhia tọn dọmọ: “Mẹhe sinai to ofìn ji lọ dọmọ: ‘Pọ́n! Yẹn to nulẹpo hẹn zun yọyọ.’” E tindo nuyọnẹn, huhlọn po ojlo lọ po nado hẹn opagbe etọn di. Awetọ, hẹndi opagbe Jehovah tọn lẹ tọn do jide sọmọ bọ to nukun etọn mẹ e taidi dọ yé ko mọ hẹndi wẹ nkọ. E dọ po gbesisọ po dọmọ: “Ohó ehelẹ tindo jidide bo yin nugbo. . . . Yé ko yin hinhẹndi!” Atọ̀ntọ, eyin Jehovah bẹ nude jẹeji, e nọ dotana ẹn po kọdetọn dagbe po dile hodidọ ehe dohia do: “Yẹn wẹ Alfa podọ Omega.” Jehovah na dohia dọ Satani wẹ yin lalonọ bosọ gboawupo.

19. Eyin e vẹawuna mẹlẹ nado dejido opagbe Jiwheyẹwhe tọn he gando Paladisi go lọ go, etẹwẹ a gán wà?

¹⁹ Nọ flindọ whedepopenu he a má jidenamẹ Jiwheyẹwhe tọn hẹ mẹhe a dukosọna to lizọnyizọn lọ mẹ lẹ, hiẹ lọsu nọ hẹn jidide towe to opagbe Jehovah tọn lẹ mẹ lodo. Enẹwutu, whedevonu he a to opagbe tulinamẹ tọn he gando Paladisi he ja lọ go hia dile e yin zẹẹmẹ-basina do to Osọhia 21:4 mẹ, bọ mẹde kanse dọ “Be ehe gán jọ nugbonugbo a?” Etẹwẹ a gán dọ? Naegbọn a ma na hia wefọ 5 po 6tọ po na mẹlọ bo basi zẹẹmẹ do yé ji? Do lehe Jehovah ko doalọwemẹ to linlẹn de mẹ nado na mí nujikudo gando opagbe etọn lẹ go do hia.—Isa. 65:16.