Nawẹ A Gán Jihọntọn Pẹkipẹki hẹ Jiwheyẹwhe Gbọn?

Gblọndo Biblu tọn

A gán jihọntọn pẹkipẹki hẹ Jiwheyẹwhe, eyin a plọnnu nado yọ́n ewọ, bosọ nọ wà nuhe nọ hẹn homẹ etọn hùn lẹ. Gbọnmọ dali, Jiwheyẹwhe na ‘dọnsẹpọ we.’ (Jakọbu 4:8) Biblu na mí deji dọ “ewọ ma dẹn do dopodopo mítọn.”—Owalọ lẹ 17:27.

• Afọdide delẹ nado yọ́n Jiwheyẹwhe

• Linlẹn agọ̀ delẹ he nọ glọnalinamẹ nado yọ́n Jiwheyẹwhe

Afọdide delẹ nado yọ́n Jiwheyẹwhe

Nọ hia Biblu

• Nue Biblu dọ: “Owe-wiwe lẹpo wẹ yin gbigbọdo sọn Jiwheyẹwhe dè.”—2 Timoti 3:16.

• Zẹẹmẹ: Jiwheyẹwhe wẹ yin Mẹhe hẹn Biblu wá aimẹ. Ewọ yí linlẹn etọn lẹ do ayiha mẹ na mẹhe kàn Biblu lẹ. Gbọn owe vonọtaun ehe gblamẹ, Jiwheyẹwhe de gbẹzan he nkọ e jlo dọ mí ni zan hia mí. E sọ do omẹ nankọ he ewọ yin hia mí, gbọn jẹhẹnu etọn delẹ taidi owanyi, whẹdida dodo po lẹblanu po gblamẹ.—Eksọdusi 34:6; Deutelonomi 32:4.

• Nue a gán wà: Nọ hia Biblu egbesọegbesọ. (Jọṣua 1:8) Nọ lẹnayihamẹpọn do nue a hia ji, bo nọ kanse dewe dọ: ‘Etẹwẹ ehe plọn mi gando Omẹ nankọ he Jiwheyẹwhe yin go?’—Salmu lẹ 77:12.

  Di apajlẹ, hia Jelemia 29:11, enẹgodo kanse dewe dọ: ‘Etẹwẹ Jiwheyẹwhe nọ jlo na mi—jijọho kavi nugbajẹmẹji? Be Jiwheyẹwhe nọ jlo na yiahọsu to mẹgo wẹ ya, kavi e nọ jlo dọ sọgodo ṣie ni yọ́n?’

Nọ yí sọwhiwhe do pọ́n nudida lẹ

• Nue Biblu dọ: “Jẹhẹnu mayinukundomọ [Jiwheyẹwhe tọn] lẹ to yinyin mimọ hezeheze sọn whenue gbọ́n aihọn ko yin didá, na yé yin ayidego gbọn nuhe yin bibasi lẹ dali.”—Lomunu lẹ 1:20.

• Zẹẹmẹ: Nudida Jiwheyẹwhe tọn he nukun sọgan mọ lẹ nọ do omẹ nankọ he ewọ yin hia mí jẹ obá de mẹ, kẹdẹdile anazọ́n de sọgan do nususu hia gando alọnuzọ́nwatọ lọ go do, kavi dile zomọ he gẹdẹ taun de sọgan dọ nususu gando mẹhe de e tọ́n go do. Di apajlẹ, nugopipe he apọ̀n gbẹtọ tọn tindo lẹ po aliho gigẹdẹ he mẹ apọ̀n mítọn yin awuwlena te po nọ dohia dọ Jiwheyẹwhe do nuyọnẹn taun, podọ lehe e na dogbó nugopipe he to owhè po sunwhlẹvu he pò lẹ po si do, dohia dọ ewọ dohuhlọn.—Salmu lẹ 104:24; Isaia 40:26.

• Nue a gán wà: Nọ yí whenu zan nado pọ́n nudida he to gbẹ̀mẹ lẹ, bo plọnnu gando yé go. Whenue a to mọwà, nọ kanse dewe dọ, ‘Etẹwẹ aliho jiawu he mẹ nudida lẹ yin awuwlena te plọn mí gando Jiwheyẹwhe go?’a Amọ́ nado dọ hójọhó, nususu devo lẹ tin he nudida lẹ ma gán plọn mí gando Mẹdatọ lọ go. Enẹwutu wẹ ewọ do na mí Biblu.

Nọ yí yinkọ Jiwheyẹwhe tọn zan

• Nue Biblu dọ: “Yẹn na nọ basi hihọ́na ẹn, na ewọ yọ́n oyín ṣie. Ewọ na dawhá ylọ mi bọ yẹn na siọ ẹ.”—Salmu lẹ 91:14, 15.

• Zẹẹmẹ: Jiwheyẹwhe, he yinkọ etọn nọ yin Jehovah, nọ yí nukun vonọtaun do pọ́n mẹhe yọ́n oyín etọn bosọ nọ yí i zan po sisi po lẹ.b (Salmu lẹ 83:18; Malaki 3:16) Eyin Jiwheyẹwhe dọ yinkọ etọn titi na mí, be e jlo dọ mí ni yọ́n omẹ nankọ he ewọ yin wutu wẹ. E dọmọ: “Yẹn wẹ Jehovah. Yinkọ ṣie niyẹn.”—Isaia 42:8.

• Nue a gán wà: Nọ zan yinkọ lọ Jehovah, whenue a to hodọ gando ewọ go.

Nọ dọhona Jehovah to odẹ̀ mẹ

• Nue Biblu dọ: “Jehovah ma dẹn do mẹhe nọ dawhá ylọ ẹ lẹpo.”—Salmu lẹ 145:18.

• Zẹẹmẹ: Jehovah nọ jihọntọn hẹ mẹhe nọ yí yise do hodẹ̀ hlan ẹn lẹ. Dẹ̀hiho yin adà sinsẹ̀n-bibasi tọn de he nọ dohia dọ mí tindo sisi sisosiso na Jiwheyẹwhe.

• Nue a gán wà: Nọ hodẹ̀ hlan Jiwheyẹwhe whẹwhẹ. (1 Tẹsalonikanu lẹ 5:17) Nọ dọ nue to ayimajai do na we lẹ po numọtolanmẹ towe lẹ po na ẹn.—Salmu lẹ 62:8.c

Wleawuna yise to Jiwheyẹwhe mẹ

• Nue Biblu dọ: “Matin yise, e ma yọnbasi nado hẹn homẹ Jiwheyẹwhe tọn hùn ganji.”—Heblu lẹ 11:6.

• Zẹẹmẹ: Nado vẹ́ hẹ Jiwheyẹwhe, mí dona tindo yise to ewọ mẹ. To Biblu mẹ, yise tintindo ma zẹẹmẹdo nado yise poun dọ Jiwheyẹwhe tin gba. E sọ zẹẹmẹdo nado nọ deji mlẹnmlẹn do ewọ, opagbe etọn lẹ po nubiọtomẹsi etọn lẹ po go. Eyin họntọn lẹ na vẹ́, dandan wẹ dọ yé ni nọ dejido ode awetọ go.

• Nue a gán wà: Nue mẹde yọnẹn mẹ wẹ e nọ tindo yise dolido te. (Lomunu lẹ 10:17) Enẹwutu, nọ plọn Biblu bosọ nọ hẹn dewe kudeji dọ a sọgan dejido Jiwheyẹwhe po ayinamẹ etọn lẹ po go nugbonugbo. Homẹ Kunnudetọ Jehovah tọn lẹ tọn na hùn nado plọn Biblu hẹ we.d

Nọ wà nue nọ hẹn homẹ Jiwheyẹwhe tọn hùn lẹ

• Nue Biblu dọ: “Nuhe owanyi Jiwheyẹwhe tọn zẹẹmẹdo die, dọ mí ni yìn gbedide etọn lẹ.”—1 Johanu 5:3.

• Zẹẹmẹ: Jehovah nọ jihọntọn hẹ mẹhe nọ do owanyi he yé tindo na ewọ hia gbọn nue go yé pé lẹpo wiwà nado setonuna gbedide etọn lẹ dali.

• Nue a gán wà: Eyin a to Biblu plọn, nọ doayi nue Jiwheyẹwhe yiwanna po nue e gbẹwanna lẹ po go. Nọ kanse dewe dọ, ‘Diọdo tẹlẹ wẹ n’gán bayi nado hẹn homẹhun Mẹdatọ ṣie?’—1 Tẹsalonikanu lẹ 4:1.

Nọ yí ayinamẹ Jiwheyẹwhe tọn lẹ do yizan mẹ nado mọ lehe e nọ penukundomẹgo do

• Nue Biblu dọ: “Mì dọ́pọ́n bo mọdọ Jehovah yọ́n.”—Salmu lẹ 34:8.

• Zẹẹmẹ: Jiwheyẹwhe to bibiọ to asi we nado wá yí nukun towe do mọ lehe emi yọ́n do. Eyin a ko do numimọ owanyi po godonọnamẹ etọn po tọn tlọlọ pọ́n, a na jlo nado jihọntọn hẹ ẹ janwẹ.

• Nue a gán wà: Dile a to Biblu hia, nọ yí ayinamẹ Jiwheyẹwhe tọn lẹ do yizan mẹ, bo duvivi ale he enẹ nọ hẹnwa tọn. (Isaia 48:17, 18) Sọ nọ doayi apajlẹ jọnun mẹdelẹ tọn go he Jiwheyẹwhe gọalọna bọ yé duto whlepọn lẹ ji, hẹn gbẹzan yedetiti po whẹndo yetọn po tọn pọnte, bosọ do ayajẹ nujọnu tọn.e

Linlẹn agọ̀ delẹ he nọ glọnalinamẹ nado yọ́n Jiwheyẹwhe

Linlẹn agọ̀: Jiwheyẹwhe ko dabla gbau, mí ma gán yọ́n ewọ.

Nugbo lọ: Nudelẹ tin he e gán vẹawuna mí nado yọnẹn gando Jiwheyẹwhe go, taidi lehe ewọ yin Gbigbọ bọ nukun ma gán nọ mọ ẹn do. Etomọṣo, mí sọgan yọ́n mẹhe Jiwheyẹwhe yin. Na nugbo tọn, Biblu dọ dọ mí dona yọ́n ewọ nado mọ ogbẹ̀ madopodo. (Johanu 17:3) Biblu yí hogbe he mẹ mí sọgan mọnukunnujẹ lẹ zan do dọhona mí gando Mẹdatọ mítọn, mẹhe nkọ e yin, ojlo etọn na gbẹtọvi lẹ po aigba po, gọna gbedide etọn lẹ go. (Isaia 45:18, 19; 1 Timoti 2:4) Podọ Biblu sọ do yinkọ Jiwheyẹwhe tọn hia mí, ehe ji mí ko dọhodo wayi. (Salmu lẹ 83:18) Po ehelẹ po, e ma yin dọ mí na yọ́n Jiwheyẹwhe poun wẹ gba, amọ́ mí nasọ lẹzun họntọn vivẹ́ hẹ ewọ.—Jakọbu 4:8.