Ayinamẹ lẹ Nado Do Pekọ
Mí yin tlẹnnọ wẹo, mí dà asi, mí dà asu, mí yin yọpọ kavi mẹho, mímẹpo wẹ nọ jlo na do ayajẹ bo do pekọ. Enẹ wẹ Mẹdatọ lọ lọsu to dindin na mí bo do na mí ayinamẹ dagbe lẹ.
Nọ Ylọ Azọ́n Dọ Nujọnu
“Mì gbọ ewọ ni nọ wazọ́n sinsinyẹn bo nọ yí alọ etọn lẹ do wà azọ́n dagbe lẹ, na ewọ nido sọgan tindo nude nado má hẹ mẹhe to nuhudo mẹ.”—EFESUNU LẸ 4:28.
Mẹdatọ lọ jlo dọ mí ni nọ do linlẹn dagbe gando azọ́n go. Etẹwutu? Mẹhe nọ wazọ́n ganji nọ do nuhe e na do penukundo ede po whẹndo etọn po go bo nọ do ayajẹ. E tlẹ gán sọ gọalọna mẹhe to nuhudo mẹ. Onú etọn nọ jẹeji na ogán etọn. Po enẹ po, e na vẹawu dọ azọ́n ni yawu gbledo mẹhe nọ ylọ azọ́n etọn dọ nujọnu. Owe-wiwe lẹ dohia dọ onú dagbe wẹ azọ́n yin, e tlẹ dọ dọ “nunina Jiwheyẹwhe tọn wẹ.”—Yẹwhehodọtọ 3:13.
Nọ Dọ Nugbo
“Mí deji dọ mí tindo ayihadawhẹnamẹnu dagbe de, bọ mí jlo nado nọ yinuwa po ahundopo po to nulẹpo mẹ.”—HEBLU LẸ 13:18.
Mẹhe nọ dọ nugbo nọ do owì to ota, e nọ vò to ede mẹ bo nọ damlọn ganji to zánmẹ. Mẹlẹ nọ dejidego bosọ nọ na ẹn sisi. Amọ́, e ma nọ yì domọ na mẹhe ma nọ dọ nugbo lẹ. Gbọnvona enẹ, ayiha yetọn mẹ ma nọ vò bọ yé nọ to budi dọ awò emitọn na gbà to gbèdopo.
Akuẹ Ni Ma Nọ Jẹnukọnna We Blo
“Mì gbọ aliho gbẹninọ tọn mìtọn ni tin matin wanyina akuẹ, na mì ni tindo pekọ po nuhe mì tindo lẹ po.”—HEBLU LẸ 13:5.
Nugbo wẹ dọ mí do hudo akuẹ tọn nado họ̀ núdùdù po dandannu gbẹ̀mẹ tọn devo lẹ po. Amọ́, e ma yọ́n paali nado nọ ‘yiwanna akuẹ.’ E gán zọ́n bọ mẹlọ na wá pò na azọ́n bo na nọ zan ede vún do to akuẹ dín mapote. E gán hẹn nuhahun wá alọwle etọn mẹ, e ma na nọ mọ whenu na ovi etọn lẹ bo tlẹ gán doazọ̀n ede. (1 Timoti 6:9, 10) Devo wẹ sọ yindọ, e bọawu taun dọ mẹhe yiwanna akuẹ ni wà nuhe ma sọgbe nado mọ akuẹ. Abajọ dawe nuyọnẹntọ de do dọ dọ: “Nugbonọ na mọ dona susu yí, ṣigba, mẹhe to whlẹndo ji nado jẹ adọkun ma na to homẹvọnọ yin zọnmii.”—Howhinwhẹn lẹ 28:20.
De Wepinplọn Dagbe Hugan Lọ
“Whlá nuyọnẹn yọ́n-na-yizan po nugopipe nulẹnpọn tọn po.”—HOWHINWHẸN LẸ 3:21.
Wepinplọn dagbe nọ gọalọna mí nado lẹzun mẹho kavi mẹjitọ he go yè gán dejido. Amọ́, mí plọnwe ganji ma ko dohia dọ mí na vò kavi do ayajẹ to gbẹ̀mẹ. Na nulẹ nido pà mí nugbonugbo, mí do hudo oplọn he Jiwheyẹwhe nọ namẹ tọn. Owe-wiwe lẹ dohia dọ “nudepope he” mẹhe nọ dotoaina Jiwheyẹwhe nọ “wà na nọ tindo kọdetọn dagbe.”—Salmu lẹ 1:1-3.