Dọdai He Gando Sọgodo Mítọn Go Lẹ

WHENUENA apọsteli Pita to hodọ gando sọgodo gbẹtọvi lẹ po aigba po tọn go, e wlan dọmọ: “Di opagbe etọn [Jiwheyẹwhe tọn], míwlẹ to nukundo olọn yọyọ lẹ, po aigba yọyọ de po, fihe dodo nọ nọ̀.” (2 Pita 3:13) Yẹwhegán Isaia wẹ yin omẹ tintan he gblamẹ opagbe “olọn yọyọ lẹ po aigba yọyọ de po” tọn yin dido gbọn. (Isaia 65:17; 66:22) Pita yihodọ sọn dọdai ehe mẹ bo dohia dọ e ma ko mọ hẹndi mlẹnmlẹn to azán etọn gbè.

Enẹgodo, to nudi owhe 96 W.M., Osọhia he yin nina gbọn apọsteli Johanu gblamẹ lọ dohia dọ “aigba yọyọ” lọ na bẹ dona susu hẹn to Ahọluduta Jiwheyẹwhe tọn glọ. (Osọhia 21:1-4) Nuhe Jesu po apọsteli Paulu po dọ dọ e na jọ whẹpo Ahọluduta Jiwheyẹwhe tọn nido wá lẹ ko to hẹndi mọyi todin. Enẹwutu, mí sọgan donukun dọ Ahọluduta enẹ na hẹn aihọn yọyọ lọ wá to madẹnmẹ. Etẹwẹ na yin ninọmẹ aihọn yọyọ enẹ tọn? Owe Isaia tọn dọ ẹ na mí.

Dona Aihọn Yọyọ lọ Tọn Lẹ

Jijọho Lẹdo Aihọn Pé po Sinsẹ̀n-Bibasi to Pọmẹ Po. “Yé nasọ yí ohí yetọn do tùn agbogọdọẹ: akọta ma to na ze ohí do akọta ji ba, mọ yé ma to na plọn awhànfun ba.”—Isaia 2:2-4.

Jijọho to Gbẹtọ po Kanlin lẹ po Ṣẹnṣẹn. “Ohla ga na nọ nọhẹ lẹngbọvu dopọ, kinnikinni ovu na mlọnai hẹ gbọgbọẹvu; oyìnvu po kinnikinni po, po kanlin yìnyìn po na nọ nọpọ́; yọpọvu nasọ hẹn yé dánpe. Oyìn po beali po na dù; ovi yetọn lẹ nasọ mlọnai dopọ: kinnikinni nasọ dù amà di oyìnsú. . . . Yé ma na gbleawunamẹ, mọ yé ma to na gbà sudo to osó wiwe ṣie lẹpo ji: na aihọn na gọ́ na nuyọnẹn OKLUNỌ tọn, dile osin ṣinyọ́n ohù ji do.”—Isaia 11:6-9.

Núdùdù Susugege Na Tin Na Mẹlẹpo. “To osó he ji wẹ OKLUNỌ awhànpa lẹ tọn na [wleawu] núdùdù onú dojó tọn te na akọta lẹpo, núdùdù vẹnhàn tọn to owhà ji, onú dojó he gọ́ na ojó tọn, vẹnhàn he do to owhà ji.”—Isaia 25:6.

Okú Ma Na Tin Ba. “Ewọ [Jiwheyẹwhe] na ze okú mì to awhàngbigba mẹ; Oklunọ JIWHEYẸWHE nasọ súnsún dasin sọn nukun lẹpo mẹ; e nasọ de vlẹko omẹ etọn lẹ tọn sọn aihọn lẹpo mẹ: na OKLUNỌ ko dọ ẹ.”—Isaia 25:8.

Oṣiọ lẹ Na Yin Finfọnsọnku. “Oṣiọ towe lẹ na nọgbẹ̀, gọna oṣiọ ṣie lẹ yé na fọ́n. Mì fọ́n, na mì ni jihàn, mì mẹhe tin to kọ́gudu mẹ lẹ: . . . aigba nasọ họ̀n oṣiọ lẹ jẹgbonu.”—Isaia 26:19.

Mẹssia, Whẹdatọ Dodo Tọn De. “E ma to na dawhẹ dile nukunmẹ etọn te, mọ e ma na dawhẹ di sisè otó etọn tọn. Ṣigba e na yí dodo do dawhẹ wamọnọ lẹ tọn, bosọ yí nugbo do dawhẹna homẹmiọnnọ aigba lọ tọn lẹ.”—Isaia 11:3, 4.

Nukuntọ́nnọ po Tókunọ lẹ po Na Jẹgangan. “Nukun nukuntọ́nnọ lẹ tọn na hùn, otó tókunọ lẹ tọn nasọ hùn.”—Isaia 35:5.

Aigba Gbọgbé lẹ Na De Sinsẹ́n Tọ́n. “Zungbo po aigba he to atò po na jaya na yé; ozun na jaya, bosọ gbàsẹ́ di vounvoun lii. E na gbàsẹ́ susu, bosọ jaya, yèdọ ayajijẹ po ohàn po.”—Isaia 35:1, 2.

Aigba Yọyọ De. “Yẹn na dá olọn yọyọ lẹ [gandudu yọyọ olọn mẹ tọn de] po aigba yọyọ de po [ogbẹ́ gbẹtọvi dodonọ lẹ tọn yọyọ de]: yè ma na flin hoho tọn, mọ yé ma na wá linlẹn mẹ. Ṣigba homẹ mìtọn ni hùn, na mì nisọ to ayajẹ kakadoi to enẹ he yẹn dá mẹ. . . . Yé [mẹhe na nọ̀ aihọn yọyọ dopagbe Jiwheyẹwhe tọn mẹ lẹ] na gbá ohọ̀, bosọ nọ nọ̀ yé mẹ, yé na dó vẹngle, bosọ dù sinsẹ́n yetọn. Yé ma na gbá ohọ̀ bọ mẹdevo na nọ̀ e mẹ; yé ma na dó bọ mẹdevo na dù: na dile azán atin tọn te wẹ azán omẹ ṣie lẹ tọn na te, omẹ ṣie lẹ na dugbẹ azọ́n alọ yetọn mẹ tọn dẹn. Yé ma na wazọ́n yaya, yé ma na jivi na tukla; na yé wẹ okún donanọ OKLUNỌ tọn, podọ ovi yetọn po yé po. E nasọ wá jọ, na whẹpo yé na ylọ, yẹn na siọ, podọ le yé to hodọ to alọnu, yẹn na sè.” “Na dile olọn yọyọ po aihọn yọyọ he yẹn na basi lẹ po na nọte to nukọn ṣie, mọwẹ okún towe po oyín towe po na nọte do, wẹ OKLUNỌ dọ.”—Isaia 65:17-25; 66:22.

Sọgodo Gigonọ De

E ma yin owe Isaia tọn kẹdẹ wẹ dọ dọdai gando dona sọgodo tọn lẹ go gba. Biblu bẹ dọdai susu he basi zẹẹmẹ onú jiawu he Jiwheyẹwhe na wadotana gbọn Ahọluduta etọn he Klisti na deanana lọ gblamẹ lẹ hẹn.a Be hiẹ na jlo nado nọgbẹ̀ to ninọmẹ paladisi tọn mọnkọtọn lẹ mẹ ya? E na jlo we nugbo! Enẹwutu, dindona nuhe Biblu plọnmẹ taun dogbọn lẹndai dagbe Jiwheyẹwhe tọn na sọgodo lẹ dali na dewe, bo yọ́n nuhe a na wà nado duvivi yetọn. Kunnudetọ Jehovah tọn lẹ na hùnhomẹ nado gọalọna we.

[Nudọnamẹ odò tọn]

[Yẹdide to weda 8]

Gbẹtọvi lẹ na nọ̀ jijọho mẹ hẹ ode awetọ podọ hẹ kanlin lẹ

[Yẹdide to weda 9]

Oṣiọ lẹ na gọwá ogbẹ̀

[Yẹdide to weda 10]

Aigba blebu na lẹzun paladisi de