Sọgodo Tẹwẹ Tin Na Aigba Mítọn?

“Owhe kanweko devo depope matin to kandai mẹ he sọzẹn hẹ 20tọ lọ to danuwiwa nukunmahun tovi lẹ tọn mẹ, to sọha nudindọn heyin finfọndote lẹ, gbẹtọ susugege fibẹtado dintọ lẹ tọn heyin awuwlena, livi susu gbẹtọ heyin hùhù to awhàn mẹ lẹ tọn, podọ núzinzan susugege heyin zinzan na ‘awhàn,’ ” wẹ World Military and Social Expenditures 1996 dọ. Be ninọmẹ ehe na diọ gbede ya?

Apọsteli Pita flinnu Klistiani lẹ gando opagbe heyin dido gbọn Jiwheyẹwhe dali to owhe kanweko lẹ die wayi dọmọ: “Di opagbe [Jiwheyẹwhe tọn], míwlẹ to nukundo olọn yọyọ lẹ, po aigba yọyọ de po, ofi he dodo nọnọ̀.” (2 Pita 3:13) Ohó mọnkọtọn lẹ yin apadewhe dọdai dowhenu Isaia tọn. (Isaia 65:17; 66:22) Islaeli hohowhenu tọn lẹ tindo numimọ hẹndi tintan de tọn to whenuena akọta lọ yin hinhẹngọwa aigba pagbe tọn etọn ji to kanlinmọ yinyin to Babilọni na owhe 70 godo. Gbọn vivọ opagbe “olọn yọyọ lẹ, po aigba yọyọ de po” tọn dọ dali, Pita dohia dọ dọdai lọ na gbẹ́ yin hinhẹndi to obá he gbloada tlala de mẹ—yèdọ lẹdo aihọn pé!

Ninọmẹ dodo tọn lẹ zizedai to aigba lọ blebu ji yin ojlo Jiwheyẹwhe tọn, podọ e na yin hinhẹn wá gbọn Ahọluduta olọn mẹ tọn etọn po Klisti po taidi Ahọlu dali. “Akọta ma to na ze ohi do akọta ji bà, mọ yé ma to na plọn awhànfun bà.” (Isaia 2:4) Jijọho po hihọ́ mlẹnmlẹn mọnkọtọn po to aigba ji wẹ nuhe Jesu plọn hodotọ etọn lẹ nado donukun bosọ hodẹ̀ na to nuhe nọ saba yin yiylọ to paa mẹ dọ Odẹ̀ Otọ́ Mítọn, kavi Oklunọ tọn mẹ, he dọmọ: “Ahọludu towe ni wá. Ojlo towe ni yin wiwà to aigba go, dile e te to olọn mẹ.”—Matiu 6:9, 10.

Be hiẹ na duvivi gbẹninọ to aihọn de mẹ he na yin dodonọ dile olọn te do ya? Enẹ wẹ todido he Biblu zedonukọnna mẹlẹpo he yí ahundopo do dín nado yọ́n Jiwheyẹwhe bo nọgbẹ̀ sọgbe hẹ aliho dodonọ etọn lẹ.