Nuhe Jesu Plọn Mí

Lehe Yè Sọgan Mọ Ayajẹ Do

Etẹwẹ yin họnhungan ayajẹ tọn?

▪ Jesu donù ayajẹ go to hodidọ tintan Yẹwhehodidọ diyin etọn tọn mẹ. E dọmọ: “Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ.” (Matiu 5:3) Etẹwẹ e tindo to linlẹn mẹ? Etẹwẹ yin nuhudo gbigbọmẹ tọn mítọn?

Nado sọgan nọgbẹ̀, mí dona nọ gbọ̀, nùsin, bo dùnú dile kanlin lẹ nọ wà do. Ṣigba nado yin ayajẹnọ, mí tindo nuhudo nude tọn he kanlin lẹ ma tindo—enẹ wẹ nuhudo lọ nado yọ́n lẹndai ogbẹ̀ tọn. Dowatọ ogbẹ̀ tọn kẹdẹ wẹ sọgan gọalọna mí nado hẹn pekọ wá na nuhudo enẹ. Enẹwutu, Jesu dọmọ: “Gbẹtọ ma nọ nọgbẹ̀ gbọn akla kẹdẹ dali gba, ṣigba gbọn ohó he nọ tọ́n sọn onù Jehovah tọn mẹ lẹpo dali.” (Matiu 4:4) Mẹhe yọnẹn dọ yé tindo nuhudo gbigbọmẹ tọn lẹ nọ yin ayajẹnọ na yé dọnsẹpọ Jehovah, “Jiwheyẹwhe ayajẹnọ lọ” wutu, podọ e nọ na yé todido, he yin dandannu nado tindo ayajẹ.—1 Timoti 1:11.

Nawẹ Jesu na mí todido gbọn?

▪ “Ayajẹnọ wẹ homẹmimiọnnọ lẹ, na yé na dugu aigba tọn,” wẹ Jesu dọ. (Matiu 5:5) Jesu na todido gbẹtọvi lẹ to whenue e hẹnazọ̀ngbọna yé bo fọ́n yé sọnku. E sọ wá aigba ji po owẹ̀n todido tọn po. E basi zẹẹmẹ dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (Johanu 3:16) Mẹhe setonuna Jiwheyẹwhe lẹ na duvivi ogbẹ̀ madopodo tọn to aigba ji. Be hiẹ sọgan yí nukun homẹ tọn do pọ́n gbẹninọ to gbẹtọ homẹmimiọnnọ lẹ ṣẹnṣẹn matin yọnhopipo gbede ya? Abajọ Ohó Jiwheyẹwhe tọn do dọmọ: “Mì jaya to todido mẹ.” (Lomunu lẹ 12:12) Jesu sọ dọhodo lehe yè sọgan mọ ayajẹ todin do ji.

Aliho gbẹninọ tọn he nọ hẹn ayajẹ wá tẹwẹ Jesu plọnmẹ?

▪ Jesu na ayinamẹ yọ́n-na-yizan lẹ do whẹho delẹ ji taidi haṣinṣan to gbẹtọ lẹ ṣẹnṣẹn, alọwle, whiwhẹ, po pọndohlan he sọgbe tintindo gando onú agbasa tọn lẹ go po. (Matiu 5:21-32; 6:1-5, 19-34) Ayinamẹ Jesu tọn hihodo na gọalọna we nado mọ ayajẹ.

Alọtútlú nọ hẹn ayajẹ wá. (Owalọ lẹ 20:35) Di apajlẹ, Jesu dọmọ: “To whenue hiẹ wleawuna hùnwhẹ de, basi oylọna wamọnọ lẹ, pòtẹnnọ lẹ, sẹkunọ lẹ, nukuntọ́nnọ lẹ; hiẹ nasọ yin ayajẹnọ, na yé ma tindo nudepope he yé na yí do suahọ we.” (Luku 14:13, 14) Ayajẹ nọ wá sọn alọgigọna mẹdevo lẹ nado yin ayajẹnọ mẹ, e ma nọ wá sọn ayajẹ dindin na mẹdetiti mẹ.

Etẹwẹ yin asisa ayajẹ tọn?

▪ Azọ́nwiwa na mẹdevo lẹ sọgan hẹn we yin ayajẹnọ, ṣigba azọ́nwiwa na Jiwheyẹwhe sọgan hẹn we yin ayajẹnọ hugan. Ayajẹ he mí nọ mọ sọn azọ́nwiwa na Jiwheyẹwhe mẹ tlẹ yiaga hugan ayajẹ he mẹjitọ he yiwanna ovi yetọn lẹ nọ mọ. Nuhe jọ to gbèdopo he Jesu to mẹplọn to gbangba do ehe hia hezeheze. “Nawe de sọn gbẹtọgun lọ mẹ dọ po ogbè lélé po na ẹn dọmọ: ‘Ayajẹnọ wẹ adọ̀ he hẹn we po anọ́ he hiẹ nọ́ lẹ po!’ Ṣigba, e dọmọ: ‘Lala, kakatimọ, Ayajẹnọ wẹ mẹhe to ohó Jiwheyẹwhe tọn sè bo to yíyí i hẹn lẹ!’”—Luku 11:27, 28.

Jesu lọsu mọ pekọ po ayajẹ po dile e to ojlo Otọ́ olọn mẹ tọn etọn wà. Ojlo Jiwheyẹwhe tọn wẹ yindọ gbẹtọ lẹ ni sèhó gando todido ogbẹ̀ madopodo tọn go. To gbèdopo he Jesu basi zẹẹmẹ do todido ehe ji na jlodotọ de godo, e dọmọ: “Núdùdù ṣie wẹ nado wà ojlo ewọ he do mi hlan tọn.” (Johanu 4:13, 14, 34) Hiẹ lọsu sọgan mọ ayajẹ he nọ wá sọn nuhe nọ hẹn homẹ Jiwheyẹwhe tọn hùn wiwà mẹ gbọn nugbo Biblu tọn mimá hẹ mẹdevo lẹ dali.

Na nudọnamẹ dogọ, pọ́n weta 1 owe ehe tọn, Etẹwẹ Biblu Plọn Mí Taun? he Kunnudetọ Jehovah tọn lẹ zinjẹgbonu.

[Yẹdide to weda 16]

Pekọ hinhẹnwa na nuhudo mítọn nado yọ́n lẹndai ogbẹ̀ tọn nọ hẹn ayajẹ wá