Homẹmimiọnnọ lẹ Na Dugu Aigba Tọn

“N’lẹndọ aihọn na wá yin didiọ bo yin vivọjlado. . . . E ma yin to niyaniya mẹ gba, ṣigba to ojlẹ he gbẹ́ pò to nukọn taun de mẹ, whenuena olọn yọyọ de po aigba yọyọ de po na tin.”—Jean-Marie Pelt, lẹnunnuyọnẹntọ lẹdo tọn Flansenu de.

NA NINỌMẸ lẹdo po haṣinṣan gbẹtọvi lẹ tọn po to aigba ji ko hẹn mẹsusu jẹflumẹ wutu, yé na jlo dọ planẹti mítọn ni yin didiọzun paladisi de. Ṣogan, todido ehe ma yin odlọ ojlẹ mítọn mẹ tọn de poun gba. Sọn ojlẹ dindẹn die gbọ́n wẹ Biblu ko dopagbe dọ Paladisi na yin hinhẹngọwa to aigba ji. Hodidọ Jesu tọn lẹ dọ, “homẹmimiọnnọ lẹ . . . na dugu aigba tọn,” podọ dọ “ojlo towe ni yin wiwà to aigba go, dile e te to olọn mẹ,” yin delẹ to wefọ Owe-wiwe tọn he yin yinyọnẹn gbayipe hugan lẹ mẹ. (Matiu 5:5; 6:10) Ṣigba, to egbehe, mẹsusu ma yise dọ paladisi aigba ji tọn de na tin he mẹ homẹmimiọnnọ lẹ na nọ̀. Na suhugan mẹhe sọalọakọ́n nado yin Klistiani lẹ tọn, Paladisi ko yin hinhẹnbu.

Linlinwe sẹmẹsẹmẹ France tọn lọ La Vie basi zẹẹmẹ nuhewutu mẹsusu, e whè gbau to Ṣọṣi Katoliki tọn mẹ, masọ tindo yise to paladisi—aigba ji tọn kavi olọn mẹ tọn—de mẹ ba dọmọ: “To nuyiwadomẹji sinsinyẹn tintindo do nuplọnmẹ Ṣọṣi Katoliki tọn ji na nudi owhe 1 900 lẹ godo, [linlẹn] paladisi tọn masọ nọ yin nùdego to ojlẹ dẹ̀hiho po ayihamẹlinlẹnpọn tọn lẹ po whenu, to yẹwheho Sẹgbe tọn lẹ, wehọmẹ sinsẹ̀n-nuplọnmẹ tọn daho po pẹvi lẹ po mẹ ba.” E ko yin didọ dọ “nudabla po bẹwlu po” ko ṣinyọnyẹ hogbe lọ lọsu ji taidi “avìvì daho” de. Yẹwhenọ delẹ nọ dapana ẹn sọn ojlo mẹ wá na e “nọ de linlẹn ayajẹ aigba ji tọn tọ́n gbau wutu.”

Na nuplọnmẹtọ lẹdo tọn Frédéric Lenoir, he jẹakọ hẹ whẹho sinsẹ̀n tọn lẹ ganji, “linlẹn he ko doadọ̀do taun” delẹ janwẹ hogbe lọ paladisi nọ hẹnwa ayiha mẹ na mẹsusu. Mọdopolọ, Jean Delumeau, whenuho-kàntọ he ko de owe susu tọ́n do whẹho ehe ji, lẹndọ hẹndi tintan opagbe Biblu tọn lẹ tọn na yin to yẹhiadonu-liho. E wlan dọmọ: “Hlan kanbiọ lọ, ‘Etẹwẹ linlẹn Paladisi tọn gbẹ́ bẹhẹn todin?’ nuplọnmẹ Klistiani tọn nọ na gblọndo dọ: Na fọnsọnku Whlẹngantọ lọ tọn wutu, to gbèdopo, mímẹpo na na alọ mídelẹ bo na mọ nuhe mí to nukundo lẹpo.”

Be e gbẹ́ sọgbe nado dọho gando paladisi aigba ji tọn de go ya? Etẹwẹ na yin sọgodo planẹti mítọn tọn taun? Be pọndohlan sọgodo tọn dózin wẹ ya, kavi e họnwun gblegede? Hosọ he bọdego na na gblọndo kanbiọ ehelẹ tọn.