Kanbiọ sọn Wehiatọ lẹ Dè

Atọ̀họ̀-Nuhihọ́ Lọ Tọn 1er novembre 1995, zinnudo nuhe Jesu dọ to Matiu 24:34 mẹ ji dogbọn “whẹndo he” dali. Be ehe zẹẹmẹdo dọ ayihaawe delẹ tin vlavo Ahọluduta Jiwheyẹwhe Tọn yin zizedai to olọn mẹ to 1914 wẹ ya?

Hodidọ enẹ to Atọ̀họ̀-Nuhihọ́ Lọ Tọn mẹ ma ze diọdo depope donukọnnamẹ to nuplọnmẹ dodonu tọn mítọn mẹ dogbọn 1914 dali gba. To dọdai heyin kinkandai to Matiu 24 po 25 po, Malku 13, podọ to Luku 21 mẹ, Jesu basi zẹẹmẹ ohia he na dohiagona tintin tofi etọn to huhlọn Ahọluduta tọn mẹ. Mí tindo kunnudenu susugege dọ ohia ehe ko to hẹndi mọyi sọn 1914 gbọ́n, to owhe he mẹ awhàn lẹdo aihọn pé he hugan ehe ko jọ wayi to whenuho mẹ lẹ bẹjẹeji te. Nugbo lọ dogbọn huvẹ, azọ̀nylankan lẹ, aigba sisọsisọ lẹ, po kunnudenu devo lẹ po dohia dọ sọn 1914 gbọ́n Jesu ko to nuyiwa taidi Ahọlu Ahọluduta Jiwheyẹwhe Tọn tọn. Ehe dohia dọ sọn whenẹnu gbọ́n mí ko tin to vivọnu titonu onú lẹ tọn mẹ. Gbọnmọ dali, diọdo depope ma tin to nukunnumọjẹnumẹ mítọn mẹ to pọndohlan ehe mẹ gba.

To whelọnu lo, etẹwẹ Atọ̀họ̀-Nuhihọ́ Lọ Tọn to hinhẹn họnwun? Eyọn, onú taun lọ wẹ yin linlẹn lọ to ehe mẹ Jesu yí hogbe lọ “whẹndo” zan te to Matiu 24:34 mẹ. Wefọ enẹ hia dọmọ: “Nugbo wẹ yẹn dọ hlan mì, whẹndo he ma to na juwayi, kaka yè nado hẹn onú helẹ pó ṣẹ.” Etẹ dọ wẹ Jesu te gbọn “whẹndo” dali, to azán etọn gbè po mítọn po mẹ?

Wefọ susu lẹ dohia dọ Jesu ma yí “whẹndo” zan gando pipli pẹvi kavi tangan de go gba, he zẹẹmẹdo nukọntọ Juvi lẹ tọn kẹdẹ kavi devi nugbonọ etọn lẹ kẹdẹ. Kakatimọ, e yí “whẹndo” zan to whẹgbledo sọha susugege Ju lẹ tọn he gbẹ ẹ dai lẹ mẹ. Nalete, po ayajẹ po, mẹdopodopo sọgan wà nuhe apọsteli Pita dotuhomẹnamẹ to azán Pẹntikọsti tọn gbè, nado lẹnvọjọ bo “whlẹn mìde sọn whẹndo nuyọnẹn wintinwintin tọn he si.”—Owalọ lẹ 2:40.

To hodidọ enẹ mẹ, e họnwun dọ Pita ma to hodọ taun do owhe nujọnu tọn depope kavi tedidi ojlẹ tọn de ji gba, kavi dọ ewọ kọ̀n “whẹndo” lọ dopọ na azán titengbe de gba. E ma to didọ dọ gbẹtọ lẹ dona yin whinwhlẹngan sọn whẹndo lọ heyin jiji to owhe dopolọ mẹ po Jesu po kavi whẹndo he yin jiji to owhe 29 W.M. mẹ, to whenuena Jesu yí baptẹm bo lẹzun Ahọlu-Dide gba. Pita to hodọ dogbọn Juvi mayisenọ ojlẹ enẹ mẹ tọn lẹ dali—vlavo mẹdelẹ gbẹpo to jọja yin, devo lẹ yin mẹho—he ko jẹakọ hẹ nuplọnmẹ Jesu tọn lẹ, bo mọ kavi sè dogbọn azọ́njiawu etọn lẹ dali, bo ma ko kẹalọyi ewọ taidi Mẹssia gba.

Kunnudenu dohia dọ mọwẹ Pita mọnukunnujẹ yizan “whẹndo” tọn Jesu tọn mẹ to whenuena ewọ po apọsteli atọ̀n devo lẹ po tin gọna Jesu to Osó Olivie tọn ji. Sọgbe hẹ hodidọ dọdai tọn Jesu tọn, Juvi ojlẹ enẹ tọn mẹ lẹ—na taun tọn, mẹhe tin to ojlẹ Jesu tọn mẹ lẹ—na tindo numimọ kavi sè linlin awhàn tọn lẹ, aigba sisọsisọ, huvẹ, po kunnudenu devo lẹ po dọ opodo titonu Juvi lẹ tọn sẹpọ. Na nugbo tọn, whẹndo enẹ ma juwayi whẹpo opodo lọ do wá to owhe 70 W.M.—Matiu 24:3-14, 34.

E dona yin alọkẹyi dọ mí ma ko yí hogbe Jesu tọn lẹ to nukunnumọjẹnumẹ lẹnpọn dagbe tọn enẹ mẹ whepoponu gba. Ayihalinlẹn de tin na gbẹtọvi mapenọ lẹ nado jlo nado yọ́n azán taun lọ dogbọn whenuena opodo lọ na wá dali. Flin dọ etlẹ yin apọsteli lẹ din nado yọnẹn taun, bo kanse dọmọ: ‘Oklunọ, hiẹ na gọ̀ ahọludu jo hlan Islaeli to ojlẹ he mẹ lò’?—Owalọ lẹ 1:6.

Po ayilinlẹn ahundoponọ dopolọ lẹ po, devi Jiwheyẹwhe tọn lẹ to ojlẹ egbezangbe tọn lẹ mẹ ko tẹnpọn nado desọn nuhe Jesu dọ dogbọn “whẹndo” dali yèdọ ojlẹ tangan nujijọ tọn delẹ heyin linlẹn sọn 1914. Di dohia, aliho nulẹnpọn tọn dopo ko yin dọ whẹndo de sọgan yin owhe 70 kavi 80, enẹ wẹ yindọ eyin Jesu lẹzun Ahọlu to 1914 podọ gbẹtọ lẹ dona yin mẹho jẹ obá de mẹ nado doayi nujọnu-yinyin awhàn tọn po nujijọ devo lẹ po go, mí sọgan basi nulinlẹn po vogbingbọn vude po lehe opodo lọ sẹpọ do sọ.

Mahopọnna lehe linlẹn mọnkọtọn yin lẹnpọn dagbe tọn do sọ, be e sọgbe hẹ ayinamẹ he Jesu jlo nado namẹ ya? Jesu na ayinamẹ dọmọ: “Ṣigba azán nẹ po ojlẹ po tọn, mẹde ma yọnẹn, lala, e mayin angẹli olọn tọn lẹ, adavo Otọ́ ṣie dopo akàn. . . . Enẹwutu mì nọ họ́ mìde: na mì ma yọ́n azán he gbè Oklunọ mìtọn ja.”—Matiu 24:36-42.

Enẹwutu nudọnamẹ agọe tọn lọ to Atọ̀họ̀-Nuhihọ́ Lọ Tọn mẹ dogbọn “whẹndo he” dali ma diọ nukunnumọjẹnumẹ mítọn do nuhe jọ to 1914 ji gba. Ṣigba e na mí nukunnumọjẹnumẹ he họnwun yizan hogbe Jesu tọn lọ “whẹndo,” he gọalọna mí nado mọ dọ yizan etọn ma tindo dodonu depope na nulinlẹn—hihia sọn 1914—lehe mí dọnsẹpọ opodo lọ do.