Mì Yin Lẹnpọn Dagbenọ to Apọ̀nmẹ—Opodo Ko Sẹpọ
“Opodo onu lẹpo tọn to sisẹpọ́; enẹwutu, [ṃì yín lẹnpọn dagbenọ to apọ̀nmẹ, NW] bo sọ nọ họ́ mìde hlan odẹ̀.”—1 PITA 4:7.
1. (a) Numimọ flumẹjijẹ tọn tẹwẹ sinsẹ̀ngan de po hodotọ etọn lẹ po tindo? (b) Na onu donukun delẹ ma ko mọ hẹndi yí wutu, kanbiọ tẹlẹ wẹ sọgan yin kinkanse?
“TO ODẸ̀ godo tọn whèjai ehe tọn whenu, yẹn mọ oylọ de yí sọn Jiwheyẹwhe dè. E dọ dọ gbẹtọ 116 000 lẹ na yì olọn mẹ podọ yọ̀do 3 700 000 oṣiọ yisenọ lẹ tọn na hundonuvo hlan agahomẹ.” Wẹ sinsẹ̀ngan de dọ gando Wiwá Azán lẹ Tọn go to whèjai he jẹnukọnna 28 octobre 1992, heyin azán whẹdida tọn sọgbe hẹ dọdai yetọn lẹ. Ṣigba, kaka jẹ 29 octobre, omẹ dopo tata ma yì olọn mẹ gba, podọ yọ̀do oṣiọ lẹ tọn dopo tata ma yin hùnhùn gba. Kakati nado yin zizedaga po awuyiya po sọyì olọn mẹ, mẹhe sọn Corée he tindo yise to whẹdazan mẹ lẹ mọ aihọngbe azán devo de tọn poun. Whẹdazán he yè dọ dọ e na wá lọ ko wà bo ko sọ juwayi, ṣigba obú ma di mẹhe to nukundo whẹdazan lẹ gba. Etẹwẹ Klistiani lẹ na wà. Be yé na doalọte to yise tintindo mẹ dọ opòdo to sisẹpọ po awuyiya po wẹ ya?
2. Mẹnu wẹ dọho na apọsteli lẹ gando azán whẹdida sọgodo tọn de go, podọ to ninọmẹ tẹlẹ glọ wẹ yé sè ehe te?
2 Nado na gblọndo, mì gbọ mí ni flin nujijọ lọ to whenuena Jesu to hodọdopọ nuglọ tọn tindo hẹ devi etọn lẹ. To finẹ, to agbegbe Sesalea Filippi tọn mẹ, to agewaji whèzẹtẹn Ohù Galili tọn, po Osó jiawu Helmoni tọn po he wleawu na ninọmẹ dagbe whànpẹnọ de to jọwamọ liho, yé sè bọ e to didọ po nujikudo po dọ e mi na yin hùhù. (Matiu 16:21) Hogbe mẹhẹn lẹnnupọn tọn devo lẹ bọdego. To whenuena e basi zẹẹmẹ na yé dọ devi-yinyin zẹẹmẹdo zinzan gbẹ̀zan mẹdetiti-yido-sanvọ zọnmi i tọn po godo, Jesu na avase dọmọ: “Ovi gbẹtọ tọn na wà to gigo Otọ́ etọn tọn mẹ, po angẹli etọn lẹ po; whenẹnu wẹ é na suahọ omẹ dopodopo dile azọ́n etọn te.” (Matiu 16:27) Jesu dọho gando wiwá sọgodo tọn de go. Ṣigba, to nujijọ ehe whenu, Whẹdatọ de wẹ ewọ na yin. To ojlẹ enẹ mẹ onu lẹpo na sinai do eyin vlavo e na mọ mẹhe na to hihodo e po nugbonọ-yinyin po de kavi lala. Whẹdida Jesu tọn na sinai do walọyizan ji, mahopọnna lehe omẹ enẹ sọgan ko tindo kavi gọ̀n ma tindo adọkunnu aihọn mẹ tọn do sọ. Nugbo ehe wẹ devi etọn lẹ dona hẹn do ayiha mẹ gligli. (Matiu 16:25, 26) Gbọnmọ, Jesu Klisti lọsu wẹ dọna hodotọ etọn lẹ nado pọ́n ali na wiwá gigonọ etọn, po whẹdida etọn po.
3. Nawẹ Jesu do nujikudo wiwá sọgodo etọn tọn hia gbọn?
3 Nuhe Jesu dọ bọdego do nugbo-yinyin wiwá sọgodo etọn tọn hia. E dọ po gbedide po dọmọ: “Nugbo wẹ yẹn dọ hlan mì, mẹdelẹ tin to yé mẹhe nọte to ofi lẹ mẹ, he ma na dọ́ okú pọ́n to alọdepope mẹ, kaka yé na do mọ Ovi gbẹtọ tọn ja to ahọludu etọn mẹ.” (Matiu 16:28) Hogbe helẹ yin hinhẹndi to azán ṣidopo godo. Numimọ gigonọ ada didiọ Jesu tọn paṣa devi alọmayiemẹ etọn lẹ. Na nugbo tọn yé mọ nukunmẹ Jesu tọn to sisẹ́ taidi owhè bọ avọ̀ etọn sọ wé tété. Wunmẹ didiọ lọ yin yẹdide nuhe na jọ to gigo po Ahọluduta Klisti tọn po mẹ to sọgodo. Lehe eyin tulinamẹnu mẹhẹnlodo dọdai Ahọluduta tọn lẹ do sọ! Lehe eyin ayinamẹ titengbe hugan de na devi lọ lẹ nado yin lẹnpọn dagbenọ to apọ̀nmẹ do sọ!—2 Pita 1:16- 19.
Nuhewutu E Do Yin Onu Niyaniya Tọn Nado Yin Lẹnpọn Dagbenọ to Apọ̀nmẹ
4. Naegbọn Klistiani lẹ dona tin to aṣeji to gbigbọmẹ gando wiwá etọn go?
4 E ma yì owhe dopo to enẹgodo, mí mọ Jesu to aisinsin to Osó Olivie tọn ji, whladopo dogọ to hodọdopọ nuglọ tọn tindo hẹ devi etọn lẹ. Dile yé pọ́n otò Jelusalẹm tọn mẹ hlan, e basi zẹẹmẹ nuhe ohia tintin tofi sọgodo tọn etọn na yin podọ to enẹgodo na avase dọmọ: “Mì nọ họ́ mìde: na mì ma yọn azán he gbè Oklunọ mìtọn ja.” Hodotọ etọn lẹ dona tin to aṣeji whepoponu na ojlẹ wiwá etọn tọn ma yin yinyọnẹn wutu. Yé dona tin to awuwlemẹ hugan gbede pọn tọn na ẹn.—Matiu 24:42.
5. Nawẹ yè sọgan basi dohia nuhudo aṣejininọ tọn gbọn?
5 To wiwá etọn whenu, Oklunọ taidi ajotọ de. E zindonukọn nado dọmọ: “Ṣigba yọn ehe dọ, eyin mẹmẹnu owhé lọ tọn ko yọn ojlẹ he mẹ ajotọ ja te, é na ko họ́ali, é ma do ko dike yè ni kùndo biọ owhé etọn gbè gba.” (Matiu 24:43) Jaguda de ma nọ basi nulila nado dọna whétọ whenuena é na wá gba; yè ma tlẹ nọ yọn awhanfunnu he e na yizan lọsu gba. Enẹwutu, whétọ lọ dona to alihọ́ whepoponu. Ṣigba, na Klistiani nugbonọ lẹ, alihihọ́ matin nuṣikọ mayin na obú nuhe na jọ to sọgodo tọn wutu gba. Kakatimọ, e nọ yin whinwhàn gbọn nukundido po jeje po na wiwá Klisti tọn to gigo mẹ nado planmẹ biọ owhe Fọtọ́n jijọho tọn de mẹ.
6. Etẹwutu wẹ mí dona yin lẹnpọn dagbenọ to apọnmẹ?
6 Mahopọnna alihihọ lọ lẹpo, mẹdepope ma sọgan dọ azán he gbè é na wá te taun jẹnukọn gba. Jesu dọmọ: “Enẹwutu mì ni wleawu dai: na ojlẹ he mẹ mì ma lẹn do wẹ Ovi gbẹtọ tọn ja.” (Matiu 24:44) Enẹwutu nuhudo tin nado yin lẹnpọn dagbenọ to apọ̀nmẹ. Eyin Klistiani de lẹndọ to azán de gbè, Klisti ma na wá, vlavo enẹ sọgan yin azán he gbè é na wá te lọ taun! Na nugbo tọn, ojlẹ he ko juwayi Klistiani nugbonọ homẹdoponọ lẹ, ko tẹnpọn po ahundopo po nado dọ whenuena opodo lọ na wá. Ṣogan, hogbe avase Jesu tọn ko sọawuhia nado to nugbo yin to whelẹponu he dọmọ: “Azán nẹ po ojlẹ po tọn, mẹde ma yọnẹn, lala, e ma yin angẹli olọn tọn lẹ [kavi Visunnu, NW], adavo Otọ́ ṣie dopo akan.”—Matiu 24:36.
7. Nado yin hodotọ Klisti tọn lẹ, nawẹ mí dona zan gbẹzan mítọn gbọn?
7 Enẹwutu to whelọnu lo, tadona tẹ́ kọ̀n wẹ mí dona wá? Dọ nado yin hodotọ Klisti tọn lẹ, mí dona nọgbẹ whepoponu to yise tintindo mẹ dọ opodo titonu ylankan ehe tọn tin to yakẹ.
8. Etẹwẹ ko yin ohia he nọ do Klistiani lẹ hia sọn bẹjẹeji azán sinsẹ̀n Klistiani tọn lẹ whenu gbọ́n?
8 Walọyizan mọnkọtọn ko nọ saba yin nuhe nọ do Klistiani lẹ hia, dile whenuhodọtọ aihọn tọn lẹ po weyọnẹntọ Biblu tọn lẹ po yọnẹn do. Di dohia, zinjẹgbonutọ owe Nouveau Testament du traducteur (Glẹnsigbe) tọn lẹ, to hogbe lọ “Azán” glọ to nudọnamẹ dogọ he basi zẹẹmẹ hogbe titengbe lẹ tọn mẹ, dọmọ: “Klistiani ojlẹ A[lẹnu] Y[ọyọ] whenu tọn lẹ nọgbẹ to nukundido Azan lọ tọn mẹ (enẹ wẹ yin ojlẹ lọ) to whenuena aihọn dintọn po aovi po gọna ylanwiwa etọn lẹpo po na yin hinhẹn wá opodo podọ Jesu na gọwá aigba ji nado dawhẹna gbẹtọvi lẹpo, bo basi hunwhẹ aihọn yọyọ jijọho tọn de bo bẹ́ Gandudu etọn do aihọn lẹpo ji jẹeji.” Encyclopédie britannique doayi e go dọmọ: “Hẹngblo lẹdo aihọn pe matin awetọ sinsẹ̀n Klistiani tọn ehe yin nuhe gando nukundido Klistiani tọn go tlọlọ na ojlẹ opodo tọn lọ, to aliho nukundido niyaniya gigọwá Klisti tọn mẹ. Nukundido Klistiani tọn na ojlẹ opodo tọn ma bẹ́ ojlo wiwá Ahọluduta Jiwheyẹwhe tọn hẹn poun pọn gbede gba.”
Nuhe e Zẹẹmẹdo Nado Yin Lẹnpọn Dagbenọ to Apọ̀nmẹ
9. Dile e tlẹ yindọ nukundido Pita tọn delẹ dogbọn Mẹssia lọ dali ma sọgbe, naegbọn e dona gbọṣi tugbigbo mẹ?
9 To owhe 30 hodidọ pẹkipẹki he Jesu tindo hẹ devi etọn he sẹpọ ẹ hugan lẹ po godo, onu ma ṣikọ na apọsteli Pita nado to tenọpọn opodo lọ nado wá gba. Dile e tlẹ yindọ nukundido ewọ po devi hatọ etọn lẹ po tọn to tintan whenu dogbọn Mẹssia lọ dali yin nuhe ma sọgbe, e gbọṣi jide tintindo mẹ dọ owanyi po huhlọn Jehovah tọn po na jide todido yetọn mimọyí tọn. (Luku 19:11; 24:21; Owalọ lẹ 1:6; 2 Pita 3:9, 10) E zinnudo onu agokun de ji he yin mimọ pludopludo to Owe wiwe Glẹki tọn lẹpo mẹ to whenuena e dọmọ: “Opodo onu popo tọn to sisẹ́pọ.” Enẹgodo e dotuhomẹna Klistiani hatọ etọn lẹ dọmọ: “Mì yín [lẹnpọn dagbenọ to apọ̀nmẹ, NW] bo sọ nọ họ́ mìde hlan odẹ̀.”—1 Pita 4:7.
10. (a) Etẹwẹ e zẹẹmẹdo nado yin lẹnpọn dagbenọ to apọnmẹ? (b) Etẹwẹ whẹho lẹ pinpọnhlan to lehe e sọgbe hẹ ojlo Jiwheyẹwhe tọn do bẹhẹn?
10 Yinyin “lẹnpọn dagbenọ to apọnmẹ” ma zẹẹmẹdo yinyin mẹhe bikan to pọndohlan aihọn tọn mẹ gba. Jehovah dọmọ: “Yẹn na sukún nuyọnẹn nuyọnẹntọ lẹ tọn do, bo nasọ hẹn wuntuntun zìnzìntọ lẹ tọn zùn ovọ́.” (1 Kọlintinu lẹ 1:19) Hogbe he Pita yizan sọgan zẹẹmẹdo “nado nọ lẹn ayihamẹ pọ́n.” Ayihamẹ-lẹnpọn gbigbọmẹ tọn ehe gando sinsẹ̀n-bibasi mítọn go. Enẹwutu, gbọn lẹnpọn jijlọ tintindo to apọ̀nmẹ dali, mí na pọ́n onu lẹ hlan to haṣinṣan he sọgbe hẹ ojlo Jehovah tọn mẹ; mí na mọnukunnujẹ nuhe yin titengbe lẹ po nuhe mayin mọ lẹ po go. (Matiu 6:33, 34) To pinpannukọn opodo he tin to yakẹ lọ, mí ma dona yin zizà sọyi to aliho gbẹzan gbẹdudu zẹjlẹgo tọn mẹ gba; mọdopolọ wẹ mí ma dona yin numakiyananọ gando ojlẹ he mẹ mí to gbẹnọ go gba. (Yijlẹdo Matiu 24:37- 39 go.) Kakatimọ, mí nọ yin anadena gbọn jlẹkajininọ po linlẹn he sọgbe po, gọna numọtolanmẹ, po walọyizan, he nọ yin didohia tintan hlan Jiwheyẹwhe (“mì họ́ mìde hlan odẹ̀”) podọ to enẹgodo hlan kọmẹnu mítọn lẹ (“mì tindo owanyi he hùnzo to mìde ṣẹnṣẹn”) po dali.—1 Pita 4:7, 8.
11. (a) Etẹwẹ e zẹẹmẹdo nado “lẹzun yọyọ to gbigbọ ayiha [mítọn] tọn mẹ.”? (b) Nawẹ huhlọn yọyọ apọ̀nmẹ tọn nọ gọalọna mí nado basi nudide dagbe lẹ gbọn?
11 Lẹnpọn dagbenọ-yinyin to apọ̀nmẹ bẹ́ lilẹzun “yọyọ to gbigbọ ayiha [mítọn] tọn mẹ” hẹn. (Efesunu lẹ 4:23) Naegbọn yè nado yin hinhẹn zùn yọyọ? To whenuena e yindọ mí ko dugú mape tọn bo nọ nọ lẹdo ylando tọn lẹ mẹ, ayiha mítọn nọ yin gandudeji gbọn ayilinlẹn he jẹagọdo onu gbigbọmẹ tọn lẹ go dali. Huhlọn lọ nọ sisẹ linlẹn po ayilinlẹn mítọn lẹ po whepoponu to anademẹ po ṣejannabi po liho. Gbọnmọ, to whenuena mẹde lẹzun Klistiani de, e tindo nuhudo huhlọn yọyọ tọn, kavi walọyizan tẹgbẹ apọ̀nmẹ tọn, he na sisẹ linlẹn etọn lẹ do aliho jijlọ ji, yèdọ aliho gbigbọmẹ tọn, hlan awuwle na mẹde-yido-sanvọ. Gbọnmọ, to whenuena dide de yin zizedonukọnnamẹ, di dohia, to wepinplọn, yanwle, agbasazọn, nuyiwa pọmẹ tọn lẹ, ayidedai, wunmẹ aṣọdido tọn, kavi onu depope he e sọgan yin, ayilinlẹn tintan etọn na yin nado gbadopọnna whẹho lọ to gbigbọliho kakati nido yin agbasaliho, yèdọ pọndohlan ṣejannabi tọn. Walọyizan yọyọ apọnmẹ tọn ehe nọ hẹn ẹn bọawu nado basi dide whẹho lẹ tọn to aliho lẹnpọn dagbe apọnmẹ tọn mẹ podọ po yinyọnẹn po dọ opodo lọ ko sẹpọ.
12. Nawẹ mí sọgan “zìn to yise mẹ” zọnmii gbọn?
12 Lẹnpọn dagbenọ-yinyin to apọ̀nmẹ zẹẹmẹdo dọ mí tin to agbasalilo gbigbọmẹ tọn dagbe mẹ. Nawẹ mí sọgan “zìn to yise mẹ” to whepoponu gbọn? (Titu 2:2) Mí dona na núdùdù ayiha mítọn lẹ po wunmẹ núdùdù dagbe tọn po. (Jẹlemia 3:15) Núdùdù he dojo Ohó nugbo Jiwheyẹwhe tọn dùdù do ganmẹ po alọgọ gbọn nuyiwa gbigbọ wiwe etọn tọn po dali na gọalọna mí nado hẹn jlẹkajininọ gbigbọmẹ tọn mítọn go. Enẹwutu, gbesisọnọ-yinyin to oplọn mẹdetiti tọn mẹ, gọna sinsẹnzọn kunnudegbe tọn, odẹ̀, po haṣinṣan Klistiani tọn po, yin onu titengbe.
Lehe Lẹnpọn Dagbenọ-yinyin to Apọ̀nmẹ Nọ Họ́ Mí Do
13. Nawẹ lẹnpọn dagbenọ-yinyin to apọ̀nmẹ nọ họ́ mí sọn mahẹ tintindo to nuṣiwa nululu tọn lẹ mẹ gbọn?
13 Lẹnpọn dagbenọ-yinyin to apọ̀nmẹ sọgan họ́ mí sọn nuṣiwa nululu tọn sí he sọgan glọnalina mí ma nado mọ ogbẹ̀ madopodo lọ yí. Nawẹ ehe sọgan jọ gbọn? Apọsteli Paulu dọho gando “osẹ́n ohò ... mẹ tọn” dali. Na mẹde he zìn to yise mẹ, osẹ́n hòmẹ tọn enẹ nọ yin gandudeji gbọn nuhe mẹ e nọ tindo homẹhun te, enẹ wẹ yin “osẹ́n Jiwheyẹwhe tọn.” Nugbo, “osẹ́n ylando tọn” ehe nọ hoavùn sọta osẹ́n homẹ tọn. Ṣigba, Klistiani lẹ sọgan yin awhangbatọ po alọgọ Jehovah tọn po.—Lomunu lẹ 7:21- 25.
14, 15. (a) Nuyiwadomẹji awe tẹlẹ wẹ nọ dovivẹnu nado deanana ayiha? (b) Nawẹ mí sọgan gbawhàn ayiha tọn gbọn?
14 Paulu zindonukọn gbọn vogbingbọn taun didohia to ayiha he yin gandudeji gbọn agbasa ylandonọ, he nulẹnpọn etọn tin to gbẹ̀zan pekọ hẹnwana mẹdetiti tọn ji, po ayiha he yin gandudeji gbọn gbigbọ Jiwheyẹwhe tọn dali, he nulẹnpọn etọn tin to gbẹzan mẹde-yido-sanvọ to sinsẹnzọn Jehovah tọn mẹ ji dali. Paulu wlan to Lomunu lẹ 8: 5- 7 mẹ dọmọ: “Yé he tin gbọn agbasalan dali lẹ nọ pọ́n onu he yin agbasalan tọn lẹ go; ṣigba omẹ he tin gbọn gbigbọ dali lẹ nọ pọ́n onu he yin gbigbọ tọn lẹ go. Na nado yin agbasalan nugopọntọ wẹ okú; ṣigba nado yin gbigbọ nugopọntọ wẹ ogbẹ̀ po jijọho po. Na agbasalan go pinpọn wẹ okẹ̀n do Jiwheyẹwhe go: na é ma yin mẹmẹglọ hlan osẹ́n Jiwheyẹwhe tọn kavi é ma tlẹ sọgan yin mọ lala.”
15 Enẹgodo Paulu, to wefọ 11 mẹ, basi zẹẹmẹ lehe ayiha he kọngbedopọ hẹ gbigbọ wiwe nọ gbawhàn lọ do: “Ṣigba eyin gbigbọ omẹ he zé Jesu tite sọn oṣiọ lẹ mẹ tọn nọnọ̀ mì mẹ, ewọ omẹ he zé Klisti tite sọn oṣiọ lẹ mẹ na gbọn gbigbọ etọn he nọnọ̀ mì mẹ dali diọ agbasa kúkú mìtọn do ogbẹ̀.”
16. Yẹdoklọmẹnu tẹlẹ si wẹ lẹnpọn dagbenọ-yinyin to apọ̀nmẹ nọ họ́ mí sọn?
16 Enẹwutu, gbọn lẹnpọn dagbenọ-yinyin to apọnmẹ dali, mí ma na yin kiklọ gbọn yẹdoklọmẹnu aihọn ehe tọn he tin to filẹpo lẹ dali, he nọ sọawuhia gbọn pekọ hẹnwana mẹdetiti zẹjlẹgo to wunmẹ gbẹdudu, agbasanu lẹ, po walọ gblewa tọn lẹpo mẹ dali. Lẹnpọn dagbe apọ̀nmẹ tọn mítọn na dọna mí nado “họ̀n na ogàlilọ” bo họngan sọn kọdetọn nugbajẹmẹji etọn tọn lẹ sí. (1 Kọlintinu lẹ 6:18) Lẹnpọn dagbenọ-yinyin to apọ̀nmẹ tọn mítọn na whàn mí nado zé ojlo Ahọluduta Jiwheyẹwhe tọn do otẹn tintan mẹ bo na họ́ lẹnpọn mítọn lẹ to whenuena mí yin whiwhlepọn po obiọ yanwle aihọn mẹ lẹ tọn po he sọgan hẹn haṣinṣan mítọn hẹ Jehovah zùn madogannọ.
17. Nawẹ mẹmẹyọnnu gbehosọnalitọ de do lẹnpọn dagbenọ-yinyin to apọ̀nmẹ hia gbọn to whenuena e pannukọn dandannu akuẹzinzan tọn lẹ?
17 Di apajlẹ, to otò yozò tọn de mẹ to Huwaji whèzẹtẹn Asie tọn, wẹ mẹmẹyọnnu jọja de tin te he zé ojlo Ahọluduta lọ tọn do otẹn tintan pete mẹ to ahun etọn mẹ. E ko wleawu owanyi tọn na sinsẹ̀nzọn whenu-gigọ tọn. To otò enẹ mẹ susu agbasazọ́n tọn lẹ biọ azọ́n whenu-gigọ́ azan ṣidopo jei ṣinawe tọn. To whenuena e tọ́n sọn wehọmẹ daho université po godo, otọ́ etọn, he ma yin dopo to Kunnudetọ Jehovah tọn lẹ mẹ, donukun ìn nado hẹn akuẹ susu wá whégbè na whẹndo lọ. Ṣigba to whenuena e yindọ e tindo ojlo sinsinyẹn na gbehosọnalitọ bibasi, e mọ agbasazọ́n whenu-glì tọn de bo bẹ́ sinsẹ̀nzọn gbehosọnalitọ tọn jẹeji. Ehe gblehomẹna otọ́ etọn, he dobuna ẹn dọ emi na bẹ́ nutindo mẹmẹyọnnu lọ tọn lẹ dlan alihogboji. Na akọhiho wutu, e tlọ biọ ahọ́ sinsinyẹn mẹ, bọ e donukun viyọnnu etọn nado sú ahọ́ lọ. Nọvisunnu mẹmẹyọnnu lọ tọn to nuplọn to wehomẹ daho université de, podọ na ahọ́ lọ wutu, akuẹ ma tin ba nado sú wehọmẹ-kuẹ etọn. Nọvisunnu lọ dopagbe dọ eyin mẹmẹyọnnu lọ gọalọna emi, emi na penukundo whẹndo lọ go eyin emi mọ agbasazọ́n de. Mẹmẹyọnnu lọ tindo ayihaawe to owanyi etọn na nọvisunnu etọn po owanyi etọn na sinsẹ̀nzọn gbehosọnalitọ tọn po ṣẹnṣẹn. To nulẹnpọn do whẹho lọ ji po sọwhiwhe po godo, e basi dide nado zindonukọn to gbehosọnalitọ bibasi mẹ bo dín agbasazọ́n devo. To gblọndo mẹ hlan odẹ̀ etọn lẹ, e mọ agbasazọ́n dagbe de to fie e penugo te e mayin nado gọalọna whẹndo etọn po nọvisunnu etọn po to akuẹliho kẹdẹ wẹ gba ṣigba nado zindonukọn to owanyi etọn tintan mẹ ga, yèdọ to sinsẹ̀nzọn gbehosọnalitọ tọn mẹ.
Dín Alọgọ Jehovah Tọn Nado Hẹn Lẹnpọn Dagbe Apọ̀nmẹ Tọn Go
18. (a) Naegbọn mẹdelẹ sọgan yin hinhẹn gbọjọ? (b) Wefọ tẹlẹ wẹ sọgan miọnhomẹna mẹhe to azọ̀n jẹ to ayiha mẹ lẹ?
18 Delẹ to hodotọ Klisti tọn lẹ mẹ sọgan to mimọ ẹn taidi nuhe vẹawunamẹ nado hẹn lẹnpọn dagbe apọnmẹ tọn yetọn go. Akọndonanu yetọn sọgan to didèpò na titonu ylankan dinwhenu tọn ehe to dindẹn to aimẹ hugan lehe yé donukun do wutu. Yé sọgan yin hinhẹn gbọjọ dogbọn dali etọn. Ṣigba, opodo lọ na wá janwẹ. Jehovah dopagbe enẹ tọn. (Titu 1:2) Podọ mọjanwẹ Paladisi aigba ji tọn he e dopagbe etọn na wá do. Jehovah dọ dọ e na wá dandan. (Osọhia 21:1- 5) To whenuena aihọn yọyọ lọ na wá, “atín ogbẹ̀ tọn de” na tin na mẹhe hẹn lẹnpọn dagbe apọnmẹ tọn yetọn go lẹpo.—Howhinwhẹn lẹ 13:12.
19. Nawẹ yè sọgan hẹn lẹnpọn dagbe apọ̀nmẹ tọn go gbọn?
19 Nawẹ mí sọgan hẹn lẹnpọn dagbe apọ̀nmẹ tọn go gbọn? Dín alọgọ Jehovah tọn. (Psalm 54:4) Dọ̀nsẹpọ ẹ pẹkipẹki. Lehe homẹ mítọn hùn dọ Jehovah jlo mẹdọnsẹpọ pẹkipẹki mítọn do sọ! “Mì sẹpọ Jiwheyẹwhe, ewọ nasọ sẹpọ mì,” wẹ devi Jakobu wlan. (Jakobu 4: 8) Paulu dọmọ: “Mì nọ jaya to Oklunọ mẹ whepoponu: yẹn sọ vọ́ dọ, Mì jaya. Mì gbọ homẹmimiọn mìtọn ni zùn yinyọnẹn hlan omẹ popo. Oklunọ to sisẹpọ́. Mì jẹtukla nudepope tọn blo; ṣigba to odẹ̀ mẹ to ovẹ̀ mẹ po pẹdido po mẹ, mì nọ yí kanbiọ mìtọn hia Jiwheyẹwhe to onu popo mẹ. Jijọho Jiwheyẹwhe tọn he hú onu nuyọnẹn lẹpo na whlá ayiha mìtọn po linlẹn mìtọn lẹ po to Klisti Jesu mẹ.” (Filippinu lẹ 4:4-7) Podọ to whenuena agbàn titonu he to kúkú jei ehe tọn lẹ wá taidi nuhe klo hugan nado didá janwẹ, zé yé do alọ Jehovah tọn mẹ, podọ ewọ na hẹn we lodo.—Psalm 55:22.
20. Yanwle tẹ mẹ wẹ mí dona to nukọnzindo zọnmii te, sọgbe hẹ 1 Timoti 4:10?
20 Mọwẹ, opodo lọ ko sẹpọ, enẹwutu mì yin lẹnpọn dagbenọ to apọ̀nmẹ! Ayinamẹ dagbe de wẹ e yin to owhe 1 900 lẹ die wayi; ayinamẹ titengbe wẹ e yin to egbehe ga. Mì gbọ mí ni zindonukọn nado to lẹnpọn jijlọ apọnmẹ tọn mítọn lẹ yizan nado pà Jehovah dile ewọ to nukọnzindo nado deanana mí blẹo biọ aihọn yọyọ etọn mẹ.—1 Timoti 4:10. (Pọ́n w-F 1/6/93, weda 13.)
Nawẹ Hiẹ Na Na Gblọndo Gbọn?
◻ Etẹwẹ lẹnpọn dagbe apọ̀nmẹ tọn yin?
◻ Naegbọn e do yin onu niyaniya tọn sọmọ nado yin lẹnpọn dagbenọ to apọ̀nmẹ?
◻ Nawẹ mí sọgan yin hinhẹn zun yọyọ to huhlọn ayiha mítọn tọn mẹ gbọn?
◻ Avùn whepoponu tọn tẹwẹ mí dona to hihò to ayiha mítọn lẹ mẹ?
◻ Nawẹ mí sọgan hẹn lẹnpọn dagbenọ-yinyin to apọ̀nmẹ tọn go gbọn?
[Yẹdide to weda 15]
Dindọnsẹpọ Jiwheyẹwhe to odẹ̀ mẹ nọ gọalọna mí nado hẹn lẹnpọn dagbe apọ̀nmẹ tọn go
[Yẹdide to weda 17]
Yinyin lẹnpọn dagbenọ to apọ̀nmẹ, mí ma na yin kiklọ gbọn yẹdoklọmẹnu aihọn ehe mẹ tọn lẹ dali gba