Gbẹninọ Sọgbe hẹ Klandowiwe Klistiani Tọn to Mẹdekannujẹ Mẹ
“Fie [gbigbọ] Oklunọ tọn tin te, mẹdekannujẹ tin to finẹ.”—2 KỌLINTINU LẸ 3:17.
1. Dohlan mẹnu wẹ Kunnudetọ Jehovah tọn lẹ yin kinklandowiwe hlan, podọ naegbọn yé do nọ yí nuyizan sọgbe hẹ osẹ́n lẹ zan?
KUNNUDETỌ JEHOVAH tọn lẹ yise dọ sinsẹ̀n yetọn na dẹn-to-aimẹ kakadoi. Enẹwutu yé donukun devizọnwiwa hlan Jiwheyẹwhe “to [gbigbọ] po nugbo po mẹ” kakadoi. (Johanu 4:23, 24) Taidi nudida he tin to yedekannu lẹ, Klistiani ehelẹ ko basi klandowiwe mlẹnmlẹn hlan Jehovah Jiwheyẹwhe bo magbe nado nọgbẹ̀ sọgbe hẹ ẹ. Nado jẹ yanwle enẹ kọ̀n, yé ganjẹ Ohó Jiwheyẹwhe tọn podọ gbigbọ wiwe etọn go. Dile yé to afọdona nuyiwa klandowiwe Klistiani tọn yetọn po ahun lẹpo po to mẹdekannujẹ heyin ninamẹ sọn Jiwheyẹwhe dè mẹ, Kunnudetọ lọ lẹ do sisi he sọgbe hia na azọngban gandudu “huhlọn daho lẹ” tọn bo nọ basi yizan dagbe aliho sọgbe hẹ osẹ́n po awuwledainanu lẹ po tọn. (Lomunu lẹ 13:1; Jakobu 1:25) Di dohia, Kunnudetọ lẹ yí Ogbẹ́ Watch Tower zan taidi azọ́nwanu sọgbe hẹ osẹ́n de—dopo to susu lẹ mẹ to otò voovo lẹ mẹ—nado hẹn yé penugo nado basi wadotana azọ́n alọgọna gbẹtọ hatọ yetọn lẹ tọn, na titengbe tọn to aliho gbigbọmẹ tọn lẹ mẹ. Ṣigba Kunnudetọ lẹ yin kinklandowiwe hlan Jiwheyẹwhe, e mayin hlan nuyizan sọgbe hẹ osẹ́n depope gba, podọ klandowiwe yetọn hlan Jehovah na dẹn-to-aimẹ kakadoi.
2. Naegbọn Ogbẹ́ Watch Tower po nuyizan sọgbe hẹ osẹ́n di enẹ nkọtọn lẹ po nọ yin pinpẹn etọn yọnẹn taun gbọn Kunnudetọ Jehovah tọn lẹ dali?
2 Taidi devizọnwatọ heyin kinklandowiwe hlan Jiwheyẹwhe lẹ, Kunnudetọ Jehovah tọn lẹ tin to dandannu glọ nado hodo ayinamẹ Jesu tọn lẹ nado “hẹn akọta lẹpo zun nuplọntọ, bosọ nọ baptizi yé do oyín Otọ́, po Ovi tọn po, po [gbigbọ wiwe] tọn po mẹ: Na mì ni sọ nọ plọ́n yé.” (Matiu 28:19, 20) Azọ́n ehe na to nukọnzindo kakajẹ opodo titonu lọ tọn, na Jesu sọ dọmọ: “Yè nasọ dọyẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opòdo na wá.” (Matiu 24:3, 14) To owhe dopodopo mẹ, zomọ wezinzin Ogbẹ́ Watch Tower tọn lẹ po pipli sọgbe hẹ osẹ́n di enẹ nkọtọn lẹ po nọ wleawuna livi susu Biblu lẹ, owe lẹ, alọnuwe lẹ, gọna linlinnamẹwe lẹ na Kunnudetọ Jehovah tọn lẹ na yizan to azọ́n kunnudide lẹdo aihọn pé tọn yetọn mẹ. Enẹwutu nuyizan sọgbe hẹ osẹ́n ehelẹ yin nuhọakuẹ taun to alọgigọna devizọnwatọ Jiwheyẹwhe tọn lẹ mẹ nado nọgbẹ̀ sọgbe hẹ klandowiwe yetọn hlan ẹn.
3. To linlẹn tẹmẹ wẹ Kunnudetọ Jehovah tọn lẹ nọ saba yí hogbe lọ “Ogbẹ́” zan te?
3 Mẹde sọgan dọnnu dọ aliho he mẹ Kunnudetọ lẹ nọ dọho dogbọn Ogbẹ́ Watch Tower dali—kavi nọ dọho whẹwhẹ poun gando “Ogbẹ́ lọ” go—dohia dọ yé nọ pọn ẹn hlan taidi nuhe hugan azọ́nwanu sọgbe hẹ osẹ́n de. Be yé ma nọ pọn ẹn nado yin aṣẹpipa godo tọn do whẹho sinsẹ̀n-bibasi tọn lẹ ji ya? Owe lọ Les Témoins de Jéhovah: Prédicateurs du Royaume de Dieu hẹn onú agokun ehe họnwun gbọn zẹẹmẹ bibasi dali dọmọ: “To whenuena Atọ̀họ̀-Nuhihọ́ Lọ Tọn [1er juin 1938, Glẹnsigbe] dlẹnalọdo ‘Ogbẹ́ Lọ,’ ehe zẹẹmẹdo, e mayin nuyizan sọgbe hẹ osẹ́n tata de gba, ṣigba pipli Klistiani mẹyiamisisadode lẹ tọn he ko wleawuna ogbẹ́ enẹ bo nọ yí ì zan.”a Enẹwutu hogbe lọ nọtena “afanumẹ nugbonọ, nuyọnẹntọ.” (Matiu 24:45) To linlẹn ehe mẹ wẹ Kunnudetọ lẹ nọ yí hogbe lọ “Ogbẹ́” zan to paa mẹ te.
4. (a) Nawẹ susu Kunnudetọ lẹ tọn nọ basi zẹẹmẹ yedelẹ tọn nado sọgan dapana nukunnumamọjẹnumẹ lẹ gbọn? (b) Naegbọn mí dona tin to jlẹkaji na nuhe dù yizan hogbe tọn?
4 Nado sọgan dapana nukunnumamọjẹnumẹ lẹ, Kunnudetọ Jehovah tọn lẹ nọ tẹnpọn nado yin sọwhiwhenọ dogbọn lehe yé nọ dọho yedelẹ tọn hlan mẹhe mayin Kunnudetọ lẹ dali. Kakati nado to didọ, “Ogbẹ́ plọn mẹ,” susu Kunnudetọ lẹ tọn mọdọ e pọnte nado yí hogbe mọnkọtọn lẹ taidi, “Biblu dọ dọ” kavi, “yẹn mọnukunnujẹemẹ dọ Biblu plọnmẹ dọ” zan. To aliho ehe mẹ yé nọ zinnudo nudide mẹdetiti tọn he Kunnudetọ dopodopo ko basi ji to alọkikẹyi nuplọnmẹ Biblu tọn lẹ mẹ bosọ nọ dapana nuyiwadomẹji lalo tọn nina dọ Kunnudetọ lẹ to aliho de mẹ yin hagbẹ klandovo de. Na nugbo tọn, linlẹn lẹ gando yizan hogbe tọn go ma dona lẹzun whẹho nudindọn tọn pọ́n gbede gba. To popolẹpo mẹ, yizan hogbe tọn yin nujọnu jẹ obá de mẹ nado glọnalina nukunnumamọjẹnumẹ lẹ poun. Jlẹkaji-ninọ Klistiani tọn yin bibiọ. Biblu dotuhomẹna mí ‘ma nado hòavùn ohó tọn.’ (2 Timoti 2:14, 15) Owe wiwe lẹ sọ dọ nunọwhinnusẹ́n ehe dọmọ: “Adavo mì yí odẹ́ do dọhó he bọawu yinyọnẹn, nawẹ yè na yọ́n onú he yè dọ do?”—1 Kọlintinu lẹ 14:9.
Gbigbọ Jiwheyẹwhe Tọn Dè Nuhudo na Osẹ́n lẹ Pò
5. Nawẹ 1 Kọlintinu lẹ 10:23 dona yin nukunnumọjẹemẹ gbọn?
5 “Onú lẹpo wẹ jẹ na mi, ṣigba onú lẹpo ma yin ale tọn gba,” wẹ apọsteli Paulu doayi e go. E yidogọ dọmọ: “Onú lẹpo wẹ jẹ na mi, ṣigba onú lẹpo ma hẹn omẹ dote.” (1 Kọlintinu lẹ 10:23) E họnwun dọ Paulu ma to didọ dọ e jẹ nado wà onú he Ohó Jiwheyẹwhe tọn gbẹdai na taun tọn lẹ gba. Yijlẹdo osẹ́n 600 delẹ heyin nina Islaeli hohowhenu tọn go, to nuyijlẹdonugo liho gbedide tlọlọ vude wẹ tin he nọ deanana gbẹzan Klistiani tọn. Enẹwutu, whẹho susu wẹ yin jijodo na ayihadawhẹnamẹnu mẹdopodopo tọn. Omẹ he ko basi klandowiwe hlan Jehovah nọ duvivi mẹdekannujẹ he nọ dekọtọn sọn anademẹ gbọn gbigbọ Jiwheyẹwhe tọn dali mẹ. Na hinhẹn nugbo lẹzun edetiti tọn, Klistiani de nọ hodo ayihadawhẹnamẹnu heyin pinplọn gbọn Biblu dali etọn bo nọ ganjẹ anademẹ Jiwheyẹwhe tọn go gbọn gbigbọ wiwe dali. Ehe nọ gọalọna Klistiani klandowiwe lọ nado magbe nuhe ‘na jlọmẹdote’ bo yin ‘alemọyi’ na edetiti po mẹdevo lẹ po. E nọ yọnẹn dọ nudide he emi basi lẹ na yinuwa do haṣinṣan mẹdetiti tọn etọn hẹ Jiwheyẹwhe, mẹhe ewọ basi klandowiwe hlan ji.
6. To opli Klistiani tọn lẹ ji, nawẹ mí sọgan dohia dọ mí ko hẹn nugbo lọ zun míde tọn gbọn?
6 Kunnudetọ de nọ dohia dọ e ko hẹn nugbo lọ zun ede tọn gbọn gblọndo nina to opli Klistiani tọn lẹ ji dali. To tintan whenu, e sọgan nọ vọ́ nuhe yin didọ to owe he to yinyin pinplọn lọ mẹ hia. Ṣigba, to madẹnmẹ, e na basi nukọnyiyi jẹ obá didọ nuplọnmẹ Biblu tọn lẹ to hogbe etọn titi lẹ mẹ. Gbọnmọ dali e nọ do kunnudenu hia dọ emi to awuwlena nugopipe nulẹnpọn tọn emitọn, e mayin nado to dọvọdọ nuhe mẹdevo lẹ ko dọ tọn basi poun gba. Linlẹn lẹ didọ to hogbe edetiti tọn lẹ mẹ podọ hogbe he sọgbe nugbo lọ tọn lẹ didọ to aliho ahundoponọ tọn de mẹ na hẹn homẹhun wá na ẹn bo dohia dọ ewọ yin dududeji to ayiha edetiti tọn mẹ.—Yẹwhehodọtọ 12:10; yijlẹdo Lomunu lẹ 14:5b go.
7. Nudide tẹlẹ wẹ ko yin bibasi po mẹdekannujẹ po gbọn devizọnwatọ Jehovah tọn lẹ dali?
7 Kunnudetọ Jehovah tọn lẹ nọ yin whinwhan gbọn owanyi na Jiwheyẹwhe po gbẹtọvi hatọ yetọn lẹ po dali. (Matiu 22:36-40) Na nugbo tọn, yé yin kinkọndopọ pẹkipẹki gbọn okàn owanyi taidi Klisti tọn dali taidi gbẹdido mẹmẹsunnu lẹdo aihọn pé lẹ tọn. (Kọlọsinu lẹ 3:14; 1 Pita 5:9) Ṣigba taidi nudida he tin to yedekannu de, mẹdopodopo ko basi nudide mẹdetiti tọn nado lá wẹndagbe Ahọluduta Jiwheyẹwhe tọn, nado nọ kada na tonudidọ, nado joagọ sọn ohùn kọ̀n, nado dapana wunmẹ ayidedai tọn delẹ, podọ nado nọgbẹ̀ sọgbe hẹ nujinọtedo Biblu tọn lẹ. Ehelẹ mayin nudide he yè zín do yé ji lẹ gba. Yé yin nudide lẹ he yin dide etọn basi po ojlo po gbọn Kunnudetọ sọgodo tọn lẹ dali whẹpo yé tlẹ wá ze afọdide klandowiwe Klistiani tọn.
Gbedido na Hagbẹ Anademẹtọ de Ya?
8. Kanbiọ tẹwẹ dona yin hinhẹn họnwun?
8 Biblu dohia hezeheze dọ Klistiani nugbo lẹ ma nọ basi sinsẹ̀n na Jiwheyẹwhe po huhlọn yído hẹn mẹ po gba. E dọmọ: “Oklunọ lọ wẹ Gbigbọ lọ: fie [gbigbọ] Oklunọ tọn tin te, mẹdekannujẹ tin to finẹ.” (2 Kọlintinu lẹ 3:17) Ṣigba nawẹ nugbo ehe sọgan yin kinkọndopọ hẹ linlẹn “afanumẹ nugbonọ nuyọnẹntọ” lọ po Hagbẹ Anademẹtọ etọn po gbọn?—Matiu 24:45-47.
9, 10. (a) Nawẹ nunọwhinnusẹ́n tatọ-yinyin tọn yọn-na-yizan to agun Klistiani tọn lọ mẹ gbọn? (b) Etẹwẹ hihodo nunọwhinnusẹ́n tatọ-yinyin tọn hẹn zun dandan to agun Klistiani owhe kanweko tintan whenu tọn mẹ?
9 Nado na gblọndo kanbiọ ehe tọn, mí dona hẹn nunọwhinnusẹ́n Owe wiwe lẹ tọn do tatọ-yinyin ji do ayiha mẹ. (1 Kọlintinu lẹ 11:3) To Efesunu lẹ 5:21-24, Klisti yin didohia taidi “ota agun tọn,” mẹhe e yin ‘mẹmẹglọ’ hlan. Kunnudetọ Jehovah tọn lẹ mọnukunnujẹemẹ dọ afanumẹ nugbonọ nuyọnẹntọ lọ yin awuwlena po mẹmẹsunnu gbigbọmẹ Jesu tọn lẹ po. (Heblu lẹ 2:10-13) Hagbẹ afanumẹ nugbonọ ehe ko yin dide nado wleawu ‘núdùdù gbigbọmẹ tọn to osaa sisọ mẹ’ na omẹ Jiwheyẹwhe tọn lẹ. To ojlẹ opodo tọn ehe mẹ, Klisti ko dè afanumẹ ehe, ‘do nutindo etọn lẹpo ji.’ Enẹwutu otẹn etọn jẹna sisi na mẹdepope he sọalọakọn nado yin Klistiani de.
10 Lẹndai tatọ-yinyin tọn wẹ nado hẹn pọninọ dote bo hẹn ẹn diun dọ “onú lẹpo ni yin wiwà do le e jẹ do, podọ to tẹnmẹtẹnmẹ.” (1 Kọlintinu lẹ 14:40) Nado jẹ ehe kọ̀n to owhe kanweko tintan whenu, Klistiani yiamisisadode sọha de sọn hagbẹ afanumẹ nugbonọ nuyọnẹntọ lọ tọn mẹ yin dide nado yin nukunmọnu na pipli lọ blebu. Dile nujijọ he bọdego lẹ hia do, nukunpedonugo heyin bibasi gbọn hagbẹ anademẹtọ owhe kanweko tintan tọn ehe dali tindo alọkẹyi po dona Jehovah tọn po. Klistiani owhe kanweko tintan tọn lẹ kẹalọyi tito lọ po ayajẹ po. Mọwẹ, yé kẹalọyi i na taun tọn po homẹhun po bo dopẹ́ na kọdetọn dagbe he e detọn lẹ.—Owalọ lẹ 15:1-32.
11. Nawẹ Hagbẹ Anademẹtọ egbehe tọn lọ dona yin pinpọnhlan gbọn?
11 Nuhọakuẹ tito mọnkọtọn tọn gbẹ́ tin-to-aimẹ. To alọnu din, Hagbẹ Anademẹtọ Kunnudetọ Jehovah tọn lẹ tọn bẹ Klistiani yiamisisadode ao hẹn, yemẹpo tindo numimọ owhe ao ao Klistiani tọn lẹ to godo yetọn. Yé nọ na anademẹ gbigbọmẹ tọn hlan Kunnudetọ Jehovah tọn lẹ, dile hagbẹ anademẹtọ owhe kanweko tintan tọn nọ wà do. (Owalọ lẹ 16:4) Taidi Klistiani fliflimẹ tọn lẹ, Kunnudetọ lẹ po homẹhun po nọ pọnhlan mẹmẹsunnu he whèwhín Hagbẹ Anademẹtọ lọ tọn lẹ na anademẹ po nukunpedonugo he sinai do Biblu ji po to whẹho sinsẹ̀n-bibasi tọn mẹ. Dile etlẹ yindọ dopodopo Hagbẹ Anademẹtọ lọ tọn lẹ yin afanumẹ Jehovah po Klisti po tọn lẹ, taidi Klistiani hatọ yetọn lẹ, Biblu plọnnu mí dọmọ: “Mì nọ yí mẹhe [yin nukọntọ to mì ṣẹnṣẹn, NW ] lẹ sè, bo nọ litai hlan yé: na yé to alindọn mìtọn lẹ họ́, yé he ma sọgan nọma dogbè onú yè wà lẹ tọn, na yé nido yí ayajijẹ do basi i, e yin po homẹgble po blo: na enẹ ma yin alenu na mì gba.”—Heblu lẹ 13:17.
12. Dohlan mẹnu wẹ Klistiani dopodopo dona dogbe na?
12 Be otẹn nukunpenugo tọn he Owe wiwe lẹ dè na Hagbẹ Anademẹtọ lọ zẹẹmẹdo dọ Kunnudetọ Jehovah tọn lẹ dopodopo dona dogbe azọ́n etọn na ẹn wẹ ya? E ma sọgbe hẹ ohó Paulu tọn lẹ hlan Klistiani lẹ to Lomu dọmọ: “Etẹwutu wẹ hiẹ to owhẹ̀ mẹmẹsunnu towe tọn da? Kavi etẹwutu wẹ hiẹ to mẹmẹsunnu towe vlẹ? Na mí omẹ pó wẹ na nọte to whẹ̀da-zìnpo Jiwheyẹwhe tọn nukọn . . . Dopodopo mítọn wẹ na dọhó ede tọn hlan Jiwheyẹwhe.”—Lomunu lẹ 14:10-12.
13. Naegbọn Kunnudetọ Jehovah tọn lẹ nọ na linlin nuwiwa yẹwhehodidọ yetọn tọn?
13 Etomọṣo, be e mayin nugbo wẹ dọ Kunnudetọ dopodopo wẹ yin nukundo nado na linlin nuwiwa yẹwhehodidọ tọn yetọn lẹ ya? Mọwẹ, ṣigba lẹndai ehe tọn yin zẹẹmẹ basina hezeheze to alọnuwe Kunnudetọ tọn de mẹ, ehe dọmọ: “Hodotọ fliflimẹ Jesu Klisti tọn lẹ tindo ojlo to linlin nukọnyiyi to azọ́n yẹwhehodidọ tọn lọ mẹ. (Malku 6:30) Dile azọ́n lọ to kọdetọn dagbe tindo, lẹndopọ linlin lẹ tọn nọ yin bibladopọ to pọmẹ po linlin numimọ ayidego tọn mẹhe to mahẹ tindo to yẹwhehodidọ wẹndagbe lọ tọn mẹ lẹ po. . . . (Owalọ lẹ 2:5-11, 41, 47; 6:7; 1:15; 4:4) . . . Lehe e yin tulinamẹnu na Klistiani azọ́nwatọ nugbonọ enẹlẹ nado se linlin nuhe to yinyin wiwadotana lẹ tọn do sọ! . . . To aliho dopolọ mẹ, titobasinanu egbezangbe Jehovah tọn nọ dovivẹnu nado hẹn kandai he sọgbe azọ́n lọ he to yinyin wiwà to hẹndi Matiu 24:14 mẹ tọn go.”
14, 15. (a) Nawẹ 2 Kọlintinu lẹ 1:24 gando Hagbẹ Anademẹtọ lọ go gbọn? (b) To dodonu etẹ tọn ji wẹ Klistiani dopodopo dona basi nudide mẹdetiti tọn etọn lẹ, to nugbo tẹ́ yinyọnẹn mẹ?
14 Hagbẹ Anademẹtọ lọ yin awuwledainanu owanyinọ de po apajlẹ yise tọn he jẹna hihodo tọn po. (Filippinu lẹ 3:17; Heblu lẹ 13:7) Gbọn titẹdo po hihodo apajlẹ Klisti tọn yetọn lẹ po dali, yé sọgan basi dọvọdọ ohó Paulu tọn lẹ dọmọ: “E mayin dọ míwlẹ tindo huhlọn to yise mìtọn ji wutu gba, ṣigba alọgọnamẹtọ ayajẹ mìtọn tọn wẹ míwlẹ yin: na gbọn yise dali wẹ mì to ote.” (2 Kọlintinu lẹ 1:24) Gbọn ayidido aliho nuwiwa tọn lẹ go dali, Hagbẹ Anademẹtọ lọ nọ lẹ́ ayidonugo do alemọyi tonusisena ayinamẹ Biblu tọn ji, nọ na ayinamẹ lẹ dogbọn osẹ́n po nunọwhinnusẹ́n Biblu tọn lẹ po yiyizan dali, nọ na avase do owù whiwhla lẹ ji, bo nọ wleawu tuli heyin nuhudo na ‘azọ́nwatọgbẹ́ lẹ.’ E gbọnmọ dali de agbanpinpẹn sọn Klistiani họ̀nkọnsi etọn ji, gọalọna yé nado hẹn ayajẹ yetọn dote, bo hẹn yise yetọn lodo na yé nido sọgan nọte gli.—1 Kọlintinu lẹ 4:1, 2; Titu 1:7-9.
15 Eyin Kunnudetọ de basi nudide he sinai do ayinamẹ Biblu tọn heyin ninamẹ gbọn Hagbẹ Anademẹtọ lọ dali ji, e wà mọ sọn ojlo mẹ wá na oplọn Biblu tọn edetiti tọn ko hẹn ẹn tindo nujikudo dọ ehe wẹ yin aliho he sọgbe lọ wutu. Kunnudetọ dopodopo nọ yin nuyiwadeji gbọn Ohó Jiwheyẹwhe lọsu tọn dali nado yí ayinamẹ dagbe Owe wiwe tọn he yin nina gbọn Hagbẹ Anademẹtọ lọ dali do yizan mẹ, to yinyọnẹn to gigọ́mẹ dọ nudide he ewọ basi na yinuwa do haṣinṣan mẹdetiti tọn etọn hẹ Jiwheyẹwhe ji, mẹhe e basi klandowiwe hlan.—1 Tẹsalonikanu lẹ 2:13.
Wehọmẹvi po Awhànfuntọ lẹ Po
16. Dile etlẹ yindọ nudide lẹ gando walọyizan go yin whẹho mẹdetiti tọn, naegbọn mẹdelẹ nọ yin didesẹ sọn agun mẹ?
16 Ṣigba eyin nudide lẹ na walọyizan yin whẹho mẹdetiti tọn, naegbọn bọ delẹ to Kunnudetọ Jehovah tọn lẹ mẹ nọ yin didesẹ̀ sọn agun mẹ? Mẹdepope ma nọ magbe poun dọ mahẹ tintindo to ylando titengbe de mẹ nọ biọ mẹdesẹ sọn agun mẹ gba. Kakatimọ, nuyiwa ehe yin nubiọtomẹsi Owe wiwe tọn to whenuena hagbẹ agun lọ tọn de gbọn lẹnvọjọ ma tindo dali bo tindo mahẹ to ylando sinsinyẹn lẹ mẹ kẹdẹ, taidi dehe yin hodọdeji to weta 5tọ owe Tintan Kọlintinu lẹ tọn mẹ. Gbọnmọ dali, to whenuena e yindọ Klistiani de sọgan yin didesẹ sọn agun mẹ na hinhẹn galilọ zun aṣa wutu, ehe nọ jọ eyin omẹ lọ gbẹ́ kẹdẹ nado kẹalọyi alọgọnamẹ gbigbọmẹ tọn lẹngbọhọtọ owanyinọ lẹ tọn. E mayin Kunnudetọ Jehovah tọn lẹ kẹdẹ wẹ nọ hodo nuwiwa Klistiani tọn ehe gba. Encyclopédie de la religion [Glẹnsigbe] doayi e go dọmọ: “Pipli gbẹtọ tọn depope nọ sọalọakọn na jlọjẹ etọn nado basi hihọ́ na ede sọta hagbẹ he ma sọgbe hẹ nubiọtomẹsi etọn lẹ he sọgan ze dagbemẹ-ninọ paa do owù mẹ. To tito sinsẹ̀n tọn de mẹ jlọjẹ ehe ko nọ saba yin huhlọnna gbọn yise lọ dali dọ alọhẹndotenamẹ [heyin mẹdidesẹ tọn] nọ yinuwa do teninọ mẹde tọn to Jiwheyẹwhe nukọn ji.”
17, 18. Nawẹ gbesisọ mẹdidesẹ sọn agun mẹ tọn sọgan yin zẹẹmẹ basina gbọn?
17 Kunnudetọ Jehovah tọn lẹ yin nuplọntọ Biblu tọn lẹ. (Jọṣua 1:8; Psalm 1:2; Owalọ lẹ 17:11) Tito-to-whinnu wepinplọn Biblu tọn heyin awuwlena gbọn Hagbẹ Anademẹtọ lọ dali sọgan yin yiyijlẹdo nupinplọn wehọmẹ tọn de go heyin titodohukanji gbọn pipli nukunpedonugotọ wepinplọn tọn de dali. Dile etlẹ yindọ pipli nukunpedonugotọ lọ na ede mayin asisa owe he to yinyin pinplọn tọn, e nọ wleawuna nupinplọn lọ, nọ magbe aliho mẹpinplọn tọn, bo nọ na anademẹ heyin dandan lẹ. Eyin mẹdepope gbọn tasinsinyẹn dali gbẹ́ nado nọgbẹ̀ sọgbe hẹ nubiọtomẹsi wehọmẹ lọ tọn, bo nọ hẹn awusinyẹnnamẹnu lẹ wá wehọmẹvi hatọ lẹ ji, kavi nọ hẹn winyan wá wehọmẹ lọ ji, ewọ sọgan yin didesẹ. Aṣẹpipa wehọmẹ tọn lẹ tindo jlọjẹ lọ nado yinuwa na alemọyi wehọmẹvi lẹ tọn to blebu mẹ.
18 Gbọnvona wehọmẹvi lẹ yinyin, Kunnudetọ Jehovah tọn lẹ sọ yin awhànfuntọ lẹ ga. Yé yin awhànfuntọ Jesu Klisti tọn lẹ, heyin ayinamẹ na nado “hoavun dagbe yise tọn.” (1 Timoti 6:12; 2 Timoti 2:3) E yin yinyọnẹn ganji dọ awhànfuntọ de sọgan yin yinyàn po yẹyidesọnmẹgo po sọn devizọnwiwa awhànfunfun tọn mẹ na walọyizan he ma sọgbe hẹ awhànfuntọ de wutu. Mọdopolọ, walọyizan he ma sọgbe hẹ awhànfuntọ Klistiani de sọgan hẹn alọhẹndotenamẹ lẹ wá. Dile mẹdopodopo yin awuwlena po mẹdekannujẹ nudide tọn po, awhànfuntọ Klistiani de sọgan basi nudide dile ewọ jlo do, ṣigba e dona hẹn agbàn kọdetọn nudide etọn tọn lẹ. Paulu yihojlẹdohogo dọmọ: “Awhànfuntọ de ma yí onú aihọn he tọn do bla ede; bo na sọgan hẹn homẹ ewọ he dè e do basi awhànvipẹ́ tọn hùn gba. Podọ ga eyin mẹdepope to pipla to ahididi mẹ, yè ma ko nọ ṣinyọ́n ojẹgbakun na ẹn gba, adavo e plahi di osẹ́n tọn.” (2 Timoti 2:4, 5) Klistiani he whèwhín lẹ, gọna Hagbẹ Anademẹtọ lọ, gbọṣi adà Nukọntọ yetọn, Jesu Klisti tọn mẹ mlẹnmlẹn, bo to “osẹ́n” lọ yìn na yé nido sọgan mọale ogbẹ̀ madopodo tọn yí.—Johanu 17:3; Osọhia 2:10.
19. To dogbapọnna nugbo lẹ dogbọn klandowiwe Klistiani tọn dali, jide etẹ tọn wẹ mí dona tindo?
19 Be nugbo lẹ ma hẹn ẹn họnwun dọ Kunnudetọ Jehovah tọn lẹ yin devizọnwatọ Jiwheyẹwhe tọn lẹ, e mayin afanumẹ gbẹtọ lẹ tọn ya? Di Klistiani klandowiwe lẹ he to vivi mẹdekannujẹ ehe Klisti na yé tọn dù, yé nọ dike na gbigbọ Jiwheyẹwhe tọn po Ohó etọn po ni deanana gbẹzan yetọn lẹ dile yé to sinsẹ̀n basi to pọmẹ hẹ mẹmẹsunnu yetọn lẹ to agun Jiwheyẹwhe tọn mẹ. (Psalm 133:1) Kunnudenu ehe tọn lẹ dona sọ de ayihaawe tintindo depope sẹ̀ dogbọn asisa huhlọn yetọn tọn dali. Po psalmkantọ lọ po, yé sọgan jihan dọmọ: “OKLUNỌ wẹ huhlọn ṣie, awọ̀yínú ṣie; ewọ go wẹ ayiha ṣie dotudo, yè sọ gọalọna mi: enẹwutu homẹ ṣie vivi susu; yẹn nasọ nọ yí ohàn ṣie do pa ẹ.”—Psalm 28:7.
[Nudọnamẹ Odò Tọn]
a Yin zinzinjẹgbonu to 1993 gbọn ogbẹ́ Watchtower Bible and Tract Society of New York, Inc. dali.
Nawẹ Hiẹ Na Na Gblọndo Gbọn?
● Nawẹ Ogbẹ́ Watch Tower tọn po nuyizan sọgbe hẹ osẹ́n di enẹ nkọtọn lẹ po gọalọna Kunnudetọ Jehovah tọn lẹ gbọn?
● Nawẹ Klistiani lẹ mọaleyi sọn azọngban Hagbẹ Anademẹtọ Kunnudetọ Jehovah tọn lẹ tọn lọ mẹ gbọn?
● Naegbọn omẹ Jehovah tọn lẹ nọ na linlin nuwiwa yẹwhehodidọ tọn yetọn?
● To ninọmẹ tẹlẹ glọ wẹ mẹdidesẹ sọn agun mẹ Klistiani klandowiwe de tọn do sọgbe?
[Yẹdide to weda 19]
Hagbẹ Anademẹtọ owhe kanweko tintan tọn lọ basi hihọ́ na pọninọ sinsẹ̀n-nuplọnmẹ tọn
[Yẹdide to weda 23]
Lẹdo aihọn pé, Kunnudetọ Jehovah tọn lẹ nọ duvivi mẹdekannujẹ ehe Klisti na yé tọn