Jiwheyẹwhe Pinpẹn-Nutọn-Yọnẹntọ Wẹ Jehovah
“Jiwheyẹwhe ma yin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyín etọn dali.”—HEBLU LẸ 6:10.
1. Nawẹ Jehovah do pinpẹn-nutọn-yinyọnẹn etọn hia nawe Moabinu lọ Luti gbọn?
JEHOVAH nọ yọ́n pinpẹn vivẹnudido mẹhe nọ tẹnpọn po ahun lẹpo po nado wà ojlo etọn lẹ tọn tlala, podọ e nọ suahọ etọn yé susugege. (Heblu lẹ 11:6) Dawe nugbonọ lọ Boazi yọ́n adà dagbedagbe jẹhẹnu Jiwheyẹwhe tọn ehe ganji, na e dọna nawe Moabinu lọ Luti he gbọn owanyi dali penukundo onọ̀ asu etọn tọn he yin asuṣiọsi de go dọmọ: “OKLUNỌ ni suahọ azọ́n towe, yè nisọ na ale gigọ́ de we sọn OKLUNỌ dè.” (Luti 2:12) Be Jiwheyẹwhe dona Luti ya? Gbau! Etẹ nkọ, otàn etọn yin kinkàndai to Biblu mẹ! Humọ, e wlealọ hẹ Boazi bo lẹzun onọ̀-daho Ahọlu Davidi po Jesu Klisti po tọn. (Luti 4:13, 17; Matiu 1:5, 6, 16) Ṣigba dopo poun wẹ ehe yin to apajlẹ susu he Biblu bẹhẹn lẹ mẹ he do pinpẹn-nutọn-yinyọnẹn Jehovah tọn na devizọnwatọ etọn lẹ hia.
2, 3. (a) Etẹwẹ hẹn aliho he mẹ Jehovah nọ do pinpẹn-nutọn-yinyọnẹn hia te lẹ jẹna ayidego? (b) Naegbọn Jehovah nọ penugo nado do pinpẹn-nutọn-yinyọnẹn nujọnu tọn hia? Basi dohia.
2 To nukun Jehovah tọn mẹ, nuyiwa mawadodo tọn wẹ e na yin ma nado nọ do pinpẹn-nutọn-yinyọnẹn hia. Heblu lẹ 6:10 dọmọ: “Jiwheyẹwhe ma yin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyín etọn dali, na le mì to devizọnwa hlan mẹwiwe lẹ do, bosọ to bibasi i.” Nuhe hẹn hodidọ ehe jẹna ayidego taun wẹ yindọ, Jiwheyẹwhe nọ do pinpẹn-nutọn-yinyọnẹn hia mẹhe ze yede jo na ẹn lẹ mahopọnna dọ yé yin mapenọ bo whete do gigo etọn go.—Lomunu lẹ 3:23.
3 Na mapenọ-yinyin mítọn wutu, mí sọgan nọ lẹndọ nuyiwa mẹdezejo jijọ-di-Jiwheyẹwhe tọn mítọn lẹ ma sọtẹ́n bo masọ jẹ nado yin didona gbọn Jiwheyẹwhe dali. Nalete, Jehovah nọ mọnukunnujẹ mẹwhinwhàn po ninọmẹ mítọn lẹ po mẹ to gigọ́ mẹ bosọ nọ pọ́n sinsẹ̀nzọn alindọn lẹpo tọn mítọn hlan di nujọnu. (Matiu 22:37) Di dohia: Mí ni dọ dọ onọ̀ de mọ nunina de—yèdọ kọnú he pọ̀kuẹ de—to tafo etọn ji. E sọgan pọ́n nunina lọ hlan taidi numadinu de bo ze e dlan apadopo. Ṣigba, kalti he zọnpọ hẹ nunina lọ dohia dọ viyọnnu pẹvi etọn dè wẹ e wá sọn podọ akuẹ he ewọ jọ̀ lẹpo wẹ e yí do họ̀ ẹ. Nukun he onọ̀ lọ na yí do pọ́n nunina lọ gbọnvo todin. Vlavo po dasin po to nukunmẹ wẹ e na gbò ovi etọn fán bo do pinpẹn-nutọn-yinyọnẹn etọn hia po ahundopo po.
4, 5. Nawẹ Jesu hodo apajlẹ Jehovah tọn to pinpẹn-nutọn-yinyọnẹn didohia mẹ gbọn?
4 Na Jehovah yọ́n mẹwhinwhàn po dogbó mítọn lẹ po ganji wutu, e nọ yọ́n pinpẹn etọn eyin mí na ẹn nuhe go mí pé lẹpo, vlavo e whè kavi sù. To whẹho ehe mẹ, Jesu do apajlẹ Otọ́ etọn tọn hia to pipé mẹ. Lẹnnupọndo kandai Biblu tọn ji gando nunina kleun asuṣiọsi lọ tọn go. “[Jesu] pọ́n aga bosọ mọ omẹ adọkunnọ lẹ he to nunina yetọn lẹ dlan do adọkunnu lọ mẹ. E sọ mọ asuṣiọsi wamọnọ de, e to abọgankuẹ flinflin awe dlan do e mẹ. E dọmọ, Sọn nugbo de mẹ yẹn dọhlan mì, asuṣiọsi wamọnọ he dlan do e mẹ hú yemẹpo: na ehe lẹpo sọn susu gbọ̀pọ̀ yetọn mẹ dlan do nunina lọ mẹ: ṣigba ewọ sọn matindo etọn mẹ dlan do e mẹ dùdù he e tindo lẹpo.”—Luku 21:1-4.
5 Mọwẹ, na Jesu yọ́n ninọmẹ nawe lọ tọn taidi asuṣiọsi podọ wamọnọ wutu, e mọ nuhọakuẹ-yinyin nunina etọn tọn bosọ yọ́n pinpẹn etọn tlala. Nudopolọ sọgan yin didọ gando Jehovah go. (Johanu 14:9) Be e ma yin tulinamẹnu wẹ nado yọnẹn dọ mahopọnna ninọmẹ towe lẹ, hiẹ sọgan mọ nukundagbe Jiwheyẹwhe pinpẹn-nutọn-yọnẹntọ mítọn po Ovi etọn po tọn ya?
Jehovah Suahọ Etiopianu Budisi Jiwheyẹwhe Tọ́ De
6, 7. Naegbọn Jehovah do pinpẹn-nutọn-yinyọnẹn etọn hia Ebẹdi-melẹki, podọ gbọnna?
6 Whlasusu wẹ Owe-wiwe dohia dọ Jehovah nọ do pinpẹn-nutọn-yinyọnẹn hia mẹhe wà ojlo etọn lẹ. Lẹnnupọndo nuyiwa etọn hẹ dawe Etiopianu budisi Jiwheyẹwhe tọ́ lọ Ebẹdi-melẹki ji, he nọgbẹ̀ to azán Jẹlemia tọn gbè bosọ yin devizọnwatọ to whédo Ahọlu Zedekia Juda tọn mẹ, mẹhe ma yin nugbonọ. Ebẹdi-melẹki sè dọ ahọvi Juda tọn lẹ ko gbọn mawadodo dali sawhẹ gufinfọ́n tọn dokọna yẹwhegán Jẹlemia bo ko ze e dlan odò de mẹ, na e nido kú huvẹ to finẹ. (Jẹlemia 38:1-7) Na Ebẹdi-melẹki yọnẹn dọ Jẹlemia yin wangbẹna sinsinyẹn na owẹ̀n he lá e te wutu, e ze ogbẹ̀ ede tọn do owù mẹ bo yì vẹvẹna ahọlu lọ. Po adọgbigbo po, Etiopianu lọ dọmọ: “Ahọlu klunọ ṣie, omẹ helẹ ko wà oylan to ehe yé wà lẹpo mẹ hlan Jẹlemia yẹwhegán lọ, mẹhe yé ko ze dlan odò lọ mẹ; ewọ [nido] yin oṣiọ to otẹn lọ mẹ to fie e te na huvẹ lọ tọn wutu.” To gbedide ahọlu lọ tọn glọ, Ebẹdi-melẹki de sunnu 30 bo whlẹn yẹwhegán Jiwheyẹwhe tọn gán.—Jẹlemia 38:8-13.
7 Jehovah mọ dọ Ebẹdi-melẹki do yise hia, ehe gọalọna ẹn nado duto obu depope he e sọgan ko tindo ji. Enẹwutu, Jehovah do pinpẹn-nutọn-yinyọnẹn etọn hia bo dọna Ebẹdi-melẹki gbọn Jẹlemia gblamẹ dọmọ: “Yẹn na hẹn ohó ṣie lẹ wá tòdaho he ji na oylan, podọ na dagbe ma gba . . . Ṣigba yẹn na whlẹn we to azán nẹ gbè, . . . hiẹ ma nasọ yin jijodo alọ omẹ ewlẹ tọn mẹ avosatọ mẹhe tọn hiẹ yin gba. Na yẹn na whlẹn we nugbonugbo, . . . ogbẹ̀ towe na tin na nuyànwẹnna hlan we: na hiẹ ko yí tudido towe do yẹn mẹ wutu.” (Jẹlemia 39:16-18) Mọwẹ, Jehovah whlẹn Ebẹdi-melẹki po Jẹlemia po gán sọn alọ ahọvi kanylantọ Juda tọn lẹ tọn mẹ podọ to godo mẹ sọn Babilọninu he gbà Jelusalẹm kija lẹ si. “[Jehovah] to ayiha mẹwiwe etọn lẹ tọn hẹndote; e sọ to yé whlẹn sọn alọ mẹylankan lẹ tọn mẹ,” wẹ Psalm 97:10 dọ.
“Otọ́ Towe He Mọnú Nuglọ, Na Suahọ Etọn We”
8, 9. Dile Jesu dohia do, odẹ̀ wunmẹ tẹlẹ wẹ Jehovah nọ yiwanna?
8 Kunnudenu devo dọ Jehovah nọ yọ́n pinpẹn nuyiwa mẹdezejo jijọ-di-Jiwheyẹwhe tọn mítọn lẹ tọn bosọ nọ mọ nuhọakuẹ-yinyin yetọn sọgan yin mimọ to nuhe Biblu dọ gando odẹ̀ go mẹ. “Odẹ̀ nugbonọ lẹ tọn wẹ homẹhunhun [Jiwheyẹwhe tọn],” wẹ dawe nuyọnẹntọ lọ dọ. (Howhinwhẹn lẹ 15:8) To azán Jesu tọn gbè sinsẹ̀ngán susu nọ hodẹ̀ to gbangba, e ma yin na nugbonọ-yinyin nujọnu tọn wutu gba, ṣigba nado sọgan dọ̀n ayidonugo gbẹtọ lẹ tọn. “Yé ko mọyi to gigọ́ mẹ ale yetọn,” wẹ Jesu dọ. Ṣigba, e na anademẹ hodotọ etọn lẹ dọ, “Whenuena hiẹ to dẹ̀ho, biọ abò towe mẹ, whenuena hiẹ sú ohọ̀n towe, hodẹ̀ hlan Otọ́ towe he mọnú nuglọ, Otọ́ towe he mọnú nuglọ, na suahọ etọn we.”—Matiu 6:5, 6.
9 E họnwun dọ Jesu ma to whẹgbledo dẹ̀hiho to gbangba, na ewọ lọsu wàmọ to nujijọ delẹ mẹ. (Luku 9:16) Jehovah nọ yọ́n pinpẹn etọn tlala to whenuena mí hodẹ̀ hlan ẹn po ahundopo po, bọ e ma yin nado dọ̀n ayidonugo mẹdevo lẹ tọn. Na nugbo tọn, odẹ̀ nuglọ tọn mítọn lẹ nọ do obá he mẹ owanyi mítọn na Jiwheyẹwhe po jidide mítọn to ewọ mẹ po siso jẹ hia. Abajọ bọ Jesu nọ saba dín nọtẹn nuglọ tọn lẹ nado hodẹ̀. To gbèdopo, e wàmọ “to afọnnu fliflimẹ whẹpo ai na do họ́n.” To whedevonu, “e hẹji yì biọ osó lọ mẹ jẹla nado hodẹ̀.” Podọ whẹpo Jesu do de apọsteli 12 etọn lẹ, e yí ozán lọ blebu zan nado hodẹ̀ edeṣo.—Malku 1:35; Matiu 14:23; Luku 6:12, 13.
10. Jide tẹwẹ mí sọgan tindo eyin odẹ̀ mítọn lẹ nọ do ahundoponọ-yinyin po numọtolanmẹ sisosiso po hia?
10 Yí nukun homẹ tọn do pọ́n lehe Jehovah na ko yí sọwhiwhe do dotoaina odẹ̀ ahundopo Ovi etọn tọn lẹ do sọ! Na nugbo tọn, to whedelẹnu Jesu nọ “yí awhá lélé po dasin po do hodẹ̀, . . . yè sọ sè etọn na obu di i wutu.” (Heblu lẹ 5:7; Luku 22:41-44) Eyin odẹ̀ mítọn lẹ nọ do ahundoponọ-yinyin po numọtolanmẹ sisosiso mọnkọtọn po hia, mí sọgan deji dọ Otọ́ olọn mẹ tọn mítọn na yí sọwhiwhe do dotoai po pinpẹn-nutọn-yinyọnẹn po. Mọwẹ, “OKLUNỌ ma dẹn do . . . yé he to awhádo ylọ ẹ to nugbo mẹ lẹpo” dè gba.—Psalm 145:18.
11. Etẹwẹ nọ yin numọtolanmẹ Jehovah tọn gando nuhe mí nọ wà to nuglọ lẹ go?
11 Eyin Jehovah nọ yọ́n pinpẹn etọn whenuena mí hodẹ̀ hlan ẹn to nuglọ, lehe e nasọ yọ́n pinpẹn etọn do sọ eyin mí nọ setonuna ẹn to nuglọ! Mọwẹ, Jehovah yọ́n nuhe mí nọ wà to nuglọ lẹ. (1 Pita 3:12) Na nugbo tọn, nugbonọ-yinyin po tonusise mítọn po to whenuena mí tin míde ṣo nọ dohia dọ mí tindo “ayiha [kavi ahun] pipé de” hlan Jehovah, yèdọ dehe gọ́ na mẹwhinwhàn dagbe bosọ nọ tẹdo nuhe sọgbe go. (1 Otannugbo lẹ 28:9) Lehe walọyizan mọnkọtọn nọ hẹn homẹhun Jehovah do sọ!—Howhinwhẹn lẹ 27:11; 1 Johanu 3:22.
12, 13. Nawẹ mí sọgan họ́ ayiha po ahun mítọn po bo taidi devi nugbonọ Natanaeli gbọn?
12 Enẹwutu, Klistiani nugbonọ lẹ nọ họ́ yede sọta ylando nuglọ tọn he nọ hẹn ayiha po ahun po gblezọn lẹ, taidi yẹdide fẹnnuwiwa tọn po danuwiwa po pinpọn. Dile etlẹ yindọ ylando delẹ sọgan yin zize whlá do gbẹtọvi lẹ, mí yọnẹn dọ “onú lẹpo wẹ to omẹ́ bosọ hùndonuvo to nukun etọn mẹ, mẹhe míwlẹ do onú nado wà hẹ.” (Heblu lẹ 4:13; Luku 8:17) Gbọn vivẹnudido nado dapana nuhe nọ hẹn homẹgble Jehovah lẹ dali, mí nọ hẹn ayihadawhẹnamẹnu wiwe de go bo nọ jaya to yinyọnẹn mẹ dọ mí tindo nukundagbe Jiwheyẹwhe tọn. Mọwẹ, ayihaawe ma tin dọ Jehovah nọ yọ́n pinpẹn mẹhe “zinzọnlin jlọjlọ, bo to azọ́n dodo tọn wà, bosọ to ohó nugbo dọ to ayiha etọn mẹ” tọn nugbonugbo.—Psalm 15:1, 2.
13 Ṣigba, nawẹ mí sọgan họ́ ayiha po ahun mítọn po to aihọn he gọ́ na ylanwa de mẹ gbọn? (Howhinwhẹn lẹ 4:23; Efesunu lẹ 2:2) Gbọnvona alemimọyi to gigọ́ mẹ sọn awuwledainanu gbigbọmẹ tọn lẹpo mẹ, mí dona nọ dovivẹnu vẹkuvẹku nado gbẹ́ oylan dai bo wà nuhe sọgbe, bosọ nọ yawu yinuwa na ojlo agọ̀ lẹ nikaa mọhò bo ji ylando. (Jakobu 1:14, 15) Pọ́n lehe homẹ towe na hùn do sọ eyin Jesu yí hogbe he e zan gando Natanaeli go lẹ zan na we dọmọ: “Pọ́n [dawe de], mẹhe mẹ oblu ma tin te!” (Johanu 1:47) To godo mẹ, Natanaeli he sọ nọ yin yiylọ dọ Batelemi wá tindo lẹblanulọkẹyi lọ nado lẹzun dopo to apọsteli 12 Jesu tọn lẹ mẹ.—Malku 3:16-19.
“Yẹwhenọ Daho, Lẹblanunọ, Nugbonọ”
14. Nukun tẹwẹ Jesu yí do pọ́n nuyiwa Malia tọn to vogbingbọn mẹ na mẹdevo lẹ?
14 Taidi ‘apajlẹ Jiwheyẹwhe he ma yọnmọ lọ’ Jehovah tọn, Jesu nọ hodo apajlẹ pipé Otọ́ etọn tọn to whepoponu to pinpẹn-nutọn-yinyọnẹn na mẹhe to Jiwheyẹwhe sẹ̀n po ahun wiwe de po lẹ mẹ. (Kọlọsinu lẹ 1:15) Di apajlẹ, azán atọ́n whẹpo e do ze ogbẹ̀ ede tọn jo, Jesu po devi etọn delẹ po yì jogbé to owhé Simọni Bẹtani tọn gbè. To whèjai enẹ, Malia nọviyọnnu Lazalọsi po Malta po tọn “yí jlẹka nusisá nadi tọn de, akuẹgegenu” (he họakuẹ sọ azọ́nkuẹ owhe dopo tọn) bo kọ̀n do ota po afọ̀ Jesu tọn po. (Johanu 12:3) “Etẹwẹ yè to onú he hẹngu na?” wẹ mẹdelẹ dọ. Ṣigba, nukun devo pete wẹ Jesu yí do pọ́n nuyiwa Malia tọn. E pọ́n ẹn hlan taidi nuyiwa alọtútlú tọn titengbe de he gọ́ na zẹẹmẹ gando okú po ṣiọdidi etọn he to nukọn ja po go. Enẹwutu, kakati nado mọhodọdo Malia go, Jesu gbògbéna ẹn bo dọmọ: “Fidepope yè na dọyẹwheho wẹndagbe he tọn te to aihọn lẹpo mẹ, finẹ ga wẹ yè na dọho nuhe nawe he basi tọn te na oflin etọn de.”—Matiu 26:6-13.
15, 16. Nawẹ mí nọ mọaleyi sọn lehe Jesu wá nọgbẹ̀ bosọ sẹ̀n Jiwheyẹwhe taidi gbẹtọvi de mẹ gbọn?
15 Lẹblanulọkẹyi nankọ die nado tindo Jesu he yin omẹ pinpẹn-nutọn-yọnẹntọ mọnkọtọn taidi Nukọntọ mítọn! Na nugbo tọn, gbẹzan Jesu tọn taidi gbẹtọvi de hẹn ẹn pegan na azọ́n he Jehovah tindo to sẹdotẹnmẹ na ẹn—enẹ wẹ devizọnwiwa taidi Yẹwhenọ Daho podọ Ahọlu do agun mẹyiamisisadode lẹ tọn tamẹ whẹ́ podọ to enẹgodo na aihọn lẹpo.—Kọlọsinu lẹ 1:13; Heblu lẹ 7:26; Osọhia 11:15.
16 Whẹpo Jesu do wá aigba ji, e ko tindo ojlo vẹkuvẹku po owanyi vonọtaun de po na gbẹtọvi lẹ. (Howhinwhẹn lẹ 8:31) Gbọn gbẹninọ taidi gbẹtọvi de dali, e wá mọnukunnujẹ whlepọn he mí nọ pehẹ to sinsẹ̀nzọn mítọn hlan Jiwheyẹwhe mẹ to gigọ́ mẹ dogọ. “E jẹ yè ni basi [Jesu] di mẹmẹsunnu etọn lẹ,” wẹ apọsteli Paulu wlan, “na e nido yin yẹwhenọ daho, lẹblanunọ, nugbonọ . . . Na le ewlọsu ko jiya, bọ yè whle e pọ́n, e sọgan gọalọna yé he yè to whiwhlepọn lẹ.” Jesu sọgan “ yọ́n vivẹ́ madogán mítọn lẹ tọn” na e ko “[yin whiwhlepọn] kẹdẹdi míwlẹ, ṣigba to matin ylando mẹ.”—Heblu lẹ 2:17, 18; 4:15, 16.
17, 18. (a) Etẹwẹ owe he yin kinkàn hlan agun ṣinawe Asia Pẹvi tọn lẹ dohia gando nukunnumọjẹnumẹ sisosiso Jesu tọn go? (b) Etẹwẹ Klistiani yiamisisadode enẹlẹ to yinyin hinhẹn pegan na?
17 Nukunnumọjẹnumẹ sisosiso Jesu tọn gando whlepọn hodotọ etọn lẹ tọn go họnwun hezeheze to fọnsọnku etọn godo. Lẹnnupọndo wekanhlanmẹ etọn lẹ hlan agun ṣinawe Asia Pẹvi tọn lẹ ji, dile e yin kinkàndai do gbọn apọsteli Johanu dali. Hlan agun Smana tọn Jesu dọmọ: “Yẹn yọ́n . . . nukunbibia po ohẹ́n towe po.” Na taun tọn, nuhe dọ Jesu te tofi wẹ yindọ, ‘N’yọ́n nuhahun towe lẹ ganji; n’yọ́n nuhe mẹ a to jujugbọn lẹ nugbonugbo.’ Enẹgodo, na Jesu lọsu ko jiya kakajẹ kúdonu wutu, e gbọn awuvẹmẹ dali yí hogbe jidenamẹ tọn ehelẹ dogọ dọmọ: “Yin nugbonọ jẹ okú, yẹn nasọ na jẹgbakun ogbẹ̀ tọn lọ we.”—Osọhia 2:8-10.
18 Wekanhlanmẹ Jesu tọn hlan agun ṣinawe lọ lẹ bẹ hodidọ lẹ hẹn he dohia dọ e yọ́n whlepọn devi etọn lẹ tọn to gigọ́ mẹ bosọ yọ́n pinpẹn gbẹzan tenọgligo-hinhẹn yetọn tọn taun. (Osọhia 2:1–3:22) Flin dọ mẹhe Jesu to hodọna lẹ yin Klistiani yiamisisadode lẹ he todido yetọn yin nado dugán hẹ ẹ to olọn mẹ. Taidi Oklunọ yetọn, yé to yinyin hinhẹn pegan na azọngban yẹyinọ yetọn he yin nado gọalọ to ale avọ́sinsan ofligọ Klisti tọn lẹ yiyizan do gbẹtọvi he to hunwẹn lẹ tamẹ po awuvẹmẹ daho po.—Osọhia 5:9, 10; 22:1-5.
19, 20. Nawẹ “gbẹtọ susugege” lẹ nọ do pinpẹn-nutọn-yinyọnẹn yetọn hia Jehovah po Ovi etọn po gbọn?
19 Na nugbo tọn, owanyi Jesu tọn na hodotọ yiamisisadode etọn lẹ sọ dlẹnkan jẹ “lẹngbọ devo” etọn he yin nugbonọ lẹ dè, mẹhe livi susu yetọn ko to awuwlena “gbẹtọ susugege [sọgodo tọn lọ] sọn akọta lẹpo mẹ,” he na lùn “nukunbibia daho” he to nukọn ja lọ tọ́n. (Johanu 10:16; Osọhia 7:9, 14) Omẹ ehelẹ to wiwọ̀ wá Jesu dè na yé yọ́n pinpẹn avọ́sinsan ofligọ etọn po todido ogbẹ̀ madopodo tọn yetọn po. Nawẹ yé nọ do pinpẹn-nutọn-yinyọnẹn yetọn hia gbọn? Yé nọ wàmọ gbọn ‘sinsẹ̀n-bibasi hlan Jiwheyẹwhe to okle po ozán po’ dali.—Osọhia 7:15-17.
20 Linlin lẹdo aihọn pé owhe sinsẹ̀nzọn 2006 tọn, he sọawuhia to weda 27 jẹ 30, dohia hezeheze dọ lizọnyizọnwatọ nugbonọ ehelẹ to ‘sinsẹ̀n basi hlan Jehovah to okle po ozán po’ nugbonugbo. Na nugbo tọn, to owhe enẹ mẹ, to kọndopọ mẹ hẹ pipotọ kleun Klistiani yiamisisadode lẹ tọn, yé yí lẹndopọ ganhiho 1 333 966 199 tọn zan to lizọnyizọn gbangba tọn mẹ—yèdọ nuhe nọtena hugan owhe 150 000 to bladopọ mẹ!
To Pinpẹn-Nutọn-Yinyọnẹn Dohia Zọnmii!
21, 22. (a) Na nuhe dù pinpẹn-nutọn-yinyọnẹn, naegbọn Klistiani lẹ dona họ́ yede taun to egbehe? (b) Etẹwẹ na yin dogbapọnna to hosọ he bọdego mẹ?
21 To nuyiwa hẹ gbẹtọvi mapenọ lẹ mẹ, Jehovah po Ovi etọn po ko do pinpẹn-nutọn-yinyọnẹn sisosiso hia to aliho he sẹhundaga mẹ. Ṣigba, e blawu dọ susu gbẹtọvi lẹ tọn ma nọ kiya na Jiwheyẹwhe sọmọ, bo nọ ze ayidonugo yetọn do ahunmẹdunamẹnu yetọn lẹ kẹdẹ ji. Gando jijọ gbẹtọ lẹ tọn to ‘azán godo tọn lẹ’ mẹ go, Paulu wlan dọmọ: “Gbẹtọ lẹ na lẹzun owanyi na yede tọ́, nukunkẹnnọ . . . mayọndagbenọ.” (2 Timoti 3:1-5) Lehe omẹ mọnkọtọn lẹ gbọnvo na Klistiani nugbo lẹ do sọ, he nọ do pinpẹn-nutọn-yinyọnẹn yetọn hia na nuhe Jiwheyẹwhe ko wà na yé lẹpo gbọn odẹ̀ ahundopo tọn, tonusise sọn ahun mẹ wá, po sinsẹ̀nzọn alindọn lẹpo tọn yetọn po gblamẹ!—Psalm 62:8; Malku 12:30; 1 Johanu 5:3.
22 To hosọ he bọdego mẹ, mí na gbadopọnna delẹ to awuwledainanu gbigbọmẹ tọn he Jehovah ko gbọn owanyi dali basi tito etọn na mí lẹ mẹ. Na pinpẹn-nutọn-yinyọnẹn mítọn ni sudeji dogọ dile mí to nulẹnpọndo “nunina dagbedagbe” ehelẹ ji.—Jakobu 1:17.
Nawẹ Hiẹ Na Na Gblọndo Gbọn?
• Nawẹ Jehovah ko do ede hia nado yin Jiwheyẹwhe pinpẹn-nutọn-yọnẹntọ de gbọn?
• Nawẹ mí sọgan nọ hẹn homẹhun Jehovah to fie mẹde ma te gbọn?
• Aliho tẹlẹ mẹ wẹ Jesu do pinpẹn-nutọn-yinyọnẹn hia te?
• Nawẹ gbẹninọ taidi gbẹtọvi de gọalọna Jesu nado yin gandutọ awuvẹmẹtọ podọ pinpẹn-nutọn-yọnẹntọ de gbọn?
[Yẹdide to weda 17]
Dile nunina ovi de tọn nọ vivi na mẹjitọ de do, Jehovah nọ yọ́n pinpẹn etọn eyin mí na ẹn nuhe go mí pé lẹpo