• Nọ Hodẹ̀ Nado Dọnsẹpọ Jiwheyẹwhe
    Duvivi Ogbẹ̀ Tọn Kakadoi!—Hodọdopọ Sinai Do Biblu Ji

    • 1. Mẹnu wẹ mí dona nọ hodẹ̀ hlan, podọ etẹlẹ go wẹ mí gán nọ hodẹ̀ gando?

      Jesu plọn mí dọ Otọ́ olọn mẹ tọn mítọn kẹdẹ wẹ mí dona nọ hodẹ̀ hlan. Jesu lọsu nọ hodẹ̀ hlan Jehovah. E dọmọ: “Enẹwutu, lehe mìwlẹ dona nọ hodẹ̀ do die: ‘Otọ́ mítọn he tin to olọn mẹ . . .’” (Matiu 6:9) Eyin mí hodẹ̀ hlan Jehovah, mí nọ vẹ́ hẹ ewọ dogọ.

      Mí gán hodẹ̀ diblayin gando whẹho depope go. Na nugbo tọn, eyin Jiwheyẹwhe na na gblọndo na odẹ̀ mítọn lẹ, yé dona sọgbe hẹ ojlo etọn. “Nudepope he mí biọ sọgbe hẹ ojlo [Jiwheyẹwhe tọn], ewọ nọ sè mítọn.” (1 Johanu 5:14) Jesu na mí apajlẹ nuhe go mí gán hodẹ̀ gando lẹ tọn. (Hia Matiu 6:9-13.) Gbọnvona dẹ̀hiho gando nuhahun mẹdetiti tọn mítọn lẹ go, mí ma dona nọ wọnji nado nọ dopẹna Jiwheyẹwhe, na nuhe e ko wà na mí lẹ bosọ nọ biọ ẹ nado gọalọna mẹdevo lẹ ga.

  • Naegbọn Nuylankan lẹ Do Nọ Jọ bọ Mí Sọ Nọ Jiya?
    Duvivi Ogbẹ̀ Tọn Kakadoi!—Hodọdopọ Sinai Do Biblu Ji

    • Be a yọnẹn ya?

      Lalo tintan he Satani do lọ kọnmasin do Jehovah go. Enẹ wẹ yindọ, e hẹn yinkọ dagbe Jehovah tọn gble bọ gbẹtọ lẹ masọ nọ mọ ẹn di Gandutọ dodonọ podọ owanyinọ de ba. Whenue Jehovah na doalọtena yajiji gbẹtọvi lẹ tọn to sọgodo he to yakẹ de, e na klọ masin enẹ lẹpo sẹ̀ nado suwhẹna ede. To linlẹn de mẹ, ewọ na dohia to aliho he họnwun mẹ dọ gandudu emitọn wẹ yin dagbe hugan lọ. Whẹsusuna oyín Jehovah tọn yin whẹho de he yè ma gán yí nukunpẹvi do pọ́n paali to wẹkẹ lọ mẹ.—Matiu 6:9, 10.

  • Ale He Ahọluduta lọ Na Hẹnwa Lẹ
    Duvivi Ogbẹ̀ Tọn Kakadoi!—Hodọdopọ Sinai Do Biblu Ji
    • Nupinplọn 33. Gbẹtọ lẹ to vivi paladisi tọn dù to aigba ji.

      NUPINPLỌN 33

      Ale He Ahọluduta lọ Na Hẹnwa Lẹ

      Ahọluduta Jiwheyẹwhe tọn ko to gandu. To madẹnmẹ, diọdo susu lẹ wẹ e na hẹnwa aigba ji. Gbọ mí ni gbadopọnna delẹ to nudagbe he a gán to nukọnpọnhlan nado mọ to Ahọluduta lọ glọ lẹ mẹ.

      1. Nawẹ Ahọluduta Jiwheyẹwhe tọn na hẹn jijọho po whẹdida dodo po gọwá aigba ji gbọn?

      Jesu, yèdọ Ahọlu Ahọluduta Jiwheyẹwhe tọn na và mẹylankan lẹ po gandudu aihọn tọn lẹ po sudo to awhàn Amagẹdọni tọn whenu. (Osọhia 16:14, 16) To ojlẹ enẹ mẹ, dọdai Biblu tọn ehe na mọ hẹndi mlẹnmlẹn, he dọ: “Na whenu pẹẹde dogọ, mẹylankan lẹ ma na tin ba.” (Salmu lẹ 37:10) Gbọn Ahọluduta lọ gblamẹ, Jesu na hẹn ẹn diun dọ jijọho po whẹdida dodo po tin to aigba ji.—Hia Isaia 11:4.

      2. Nawẹ gbẹninọ na te to whenue ojlo Jiwheyẹwhe tọn na yin wiwà to aigba ji?

      To whenue Ahọluduta Jiwheyẹwhe tọn na to gandu, “dodonọ lẹ wẹ na dugu aigba tọn, yé nasọ nọgbẹ̀ to e ji kakadoi.” (Salmu lẹ 37:29) Yí nukun homẹ tọn do pọ́n lehe gbẹninọ na te to aihọn de mẹ fihe mẹlẹpo na yin dodonọ bo nasọ yiwanna Jehovah po ode awetọ po te! Mẹde ma na jẹazọ̀n, podọ mẹlẹpo na nọgbẹ̀ kakadoi.

      3. Ale tẹlẹ wẹ Ahọluduta Jiwheyẹwhe tọn na hẹnwa to vasudo mẹylankan lẹ tọn godo?

      To whenue mẹylankan lẹ ko yin vivasudo godo, Jesu na dugán taidi Ahọlu na owhe 1 000. To ojlẹ enẹ mẹ, ewọ po gandutọgbẹ́ etọn 144 000 lẹ po na gọalọna gbẹtọvi he to aigba ji lẹ nado lẹzun mẹpipe. To vivọnu ojlẹ enẹ tọn, aigba na lẹzun paladisi whanpẹnọ de, fie gbẹtọvi ayajẹnọ he nọ setonuna osẹ́n Jehovah tọn lẹ bosọ nọ mọaleyi sọn e mẹ lẹ nọ nọ̀. Enẹgodo, Jesu na gọ̀ gandudu lọ jo na Otọ́ etọn Jehovah. To whenẹnu, ‘oyín Jehovah tọn na yin kinklandowiwe’ hugan gbede pọ́n. (Matiu 6:9, 10) E na họnwun dọ Jehovah yin Gandutọ dagbe de he nọ hò dagbemẹninọ mẹjidugando etọn lẹ tọn pọ́n. To godo mẹ, Jehovah na và Satani, aovi lẹ gọna mẹdevo depope he de nado ṣiatẹ sọta gandudu Etọn sudo. (Osọhia 20:7-10) Ninọmẹ pipé he Ahọluduta Jiwheyẹwhe tọn na hẹnwa lẹ na nọ aimẹ kakadoi.

      DINDONANU DOGỌ

      Pọ́n nuhewutu mí gán deji dọ Jiwheyẹwhe na yí Ahọluduta lọ zan nado hẹn opagbe he to Biblu mẹ gando sọgodo mítọn go lẹpo di.

      4. Ahọluduta Jiwheyẹwhe tọn na hẹn gandudu gbẹtọvi tọn lẹpo wá opodo

      “Gbẹtọ ko dugán do gbẹtọ ji na awugble etọn.” (Yẹwhehodọtọ 8:9) Jehovah na yí Ahọluduta etọn zan nado hẹn ẹn diun dọ nuyiwahẹmẹ agọ̀ ehe ma nasọ tin ba.

      Hia Daniẹli 2:44 po 2 Tẹsalonikanu lẹ 1:6-8 po, enẹgodo dọhodo kanbiọ ehelẹ ji:

      • Nawẹ Jehovah po Visunnu etọn Jesu po na yinuwa hẹ gandudu gbẹtọvi tọn lẹ po godonọnamẹtọ yetọn lẹ po gbọn?

      • Nawẹ nuhe a ko plọn gando Jehovah po Jesu po go hẹn we kudeji dọ yé na yí whẹdida dodo zan to whenue yé to nuyiwa hẹ omẹ enẹlẹ gbọn?

      Jesu ko yin Ahọlu to olọn mẹ bo to gandu do aigba he lẹzun paladisi lọ ji.

      5. Jesu wẹ Ahọlu dagbe hugan lọ

      Taidi Ahọlu Ahọluduta Jiwheyẹwhe tọn, nususu lẹ wẹ Jesu na wà na dagbemẹninọ mẹjidugando etọn lẹ tọn to aigba ji. Hò VIDEO lọ nado pọ́n lehe Jesu dohia dọ emi tindo ojlo lọ nado gọalọna gbẹtọ lẹ bo ko sọ mọ huhlọn yí sọn Jiwheyẹwhe dè nado wàmọ do.

      VIDEO: Jesu Do Ale He Ahọluduta lọ Na Hẹnwa lẹ Hia (1:13)

      Whenue Jesu to aigba ji, e do nuhe Ahọluduta lọ na wadotana lẹ hia to kleun mẹ. Detẹ to dona he yin sislẹ tofi lẹ mẹ wẹ a to jejeji nado mọ? Hia wefọ he dọho gando dona lọ lẹ go lẹ.

      WHENUE JESU TO AIGBA JI, E . . .

      SỌN OLỌN MẸ, JESU NA  . . .

      • deanana huhlọn jọwamọ tọn aigba tọn lẹ.—Malku 4:36-41.

      • doalọtena nugbajẹmẹji he to aigba hẹngble lẹpo.—Isaia 35:1, 2.

      • wà azọ́njiawu nado na núdùdù gbẹtọ fọtọ́n susu lẹ.—Matiu 14:17-21.

      • hẹn ẹn diun dọ gbẹtọvi lẹpo tindo agbasalilo pipé.—Isaia 33:24.

      6. Sọgodo na yọ́n taun to Ahọluduta Jiwheyẹwhe tọn glọ

      Ahọluduta lọ na hẹn ẹn yọnbasi na gbẹtọvi lẹ nado duvivi nuhe Jehovah lẹn to dowhenu nado wà na yé tọn to gigọ́ mẹ. Yé na nọgbẹ̀ kakadoi to paladisi mẹ to aigba ji. Hò VIDEO lọ nado mọ lehe Jehovah to azọ́nwa gbọn Visunnu etọn Jesu gblamẹ nado hẹn lẹndai Etọn di do.

      VIDEO: Dohia Kleun Sọgodo Jiawu lọ Tọn (4:38)

      Hia Salmu lẹ 145:16, enẹgodo dọhodo kanbiọ ehe ji:

      • Numọtolanmẹ tẹwẹ a tindo todin he a wá yọnẹn dọ Jehovah na “hẹn pekọ wá na ojlo nutogbẹ̀ lẹpo tọn”?

      MẸDELẸ NỌ DỌ DỌ: “Eyin mímẹpo dogbepọ nugbo, mí na mọ ayiha na nuhahun aihọn tọn lẹ.”

      • Nuhahun tẹlẹ wẹ a mọdọ gandudu gbẹtọvi tọn lẹ ma gán didẹ bọ Ahọluduta Jiwheyẹwhe tọn kẹdẹ wẹ gán wàmọ?

      BLADOPỌ

      Ahọluduta Jiwheyẹwhe tọn na jẹ yanwle etọn kọ̀n. E na diọ aigba zun paladisi de lẹdo aihọn pé, fihe mẹhe nọ wà nudagbe lẹ na sẹ̀n Jehovah kakadoi te.

      Dogbapọn

      • Nawẹ Ahọluduta Jiwheyẹwhe tọn na klan oyín Jehovah tọn do wiwe gbọn?

      • Naegbọn mí gán kudeji dọ Ahọluduta Jiwheyẹwhe tọn na hẹn opagbe he to Biblu mẹ lẹpo di?

      • Dona Ahọluduta lọ tọn tẹwẹ a to jejeji nado mọ?

      Yanwle

      PỌ́N NUDỌNAMẸ DEVO LẸ

      Pọ́n nuhe Amagẹdọni zẹẹmẹdo.

      “Etẹwẹ Awhàn Amagẹdọni Tọn Zẹẹmẹdo?” (Hosọ Intẹnẹt ji tọn)

      Gbadopọnna nujijọ he na wá aimẹ to nuhe Jesu ylọdọ ­“nukunbibia daho” lọ whenu lẹ.—Matiu 24:21.

      “Etẹwẹ Nukunbibia Daho lọ Yin?” (Hosọ Intẹnẹt ji tọn)

      Pọ́n lehe whẹndo lẹ gán lẹnayihamẹpọn dopọ do dona sọgodo tọn Ahọluduta lọ tọn lẹ ji do.

      Mọ Dewe Hlan Paladisi Mẹ (1:50)

      To hosọ lọ “Kanbiọ Susu lẹ Wẹ Dotukla Mi” mẹ, pọ́n lehe mẹhe nọ fọngu sọta tito tonudidọ tọn lẹ de wá mọ gblọndo na ahunmẹdunamẹnu etọn lẹ do.

      “Biblu Nọ Diọ Gbẹzan Mẹtọn” (Alọnuwe Atọ̀họ̀-Nuhihọ́ lọ Tọn, 1er janvier 2012 tọn)