Ahọluduta Jiwheyẹwhe Tọn Yiaga Hugan to Aliho Lẹpo Mẹ

JESU KLISTI plọn hodotọ etọn lẹ dọmọ: “Enẹwutu le wẹ mì ni nọ hodẹ̀ do: Otọ́ mítọn he tin to olọn mẹ, hihiọ wẹ oyín towe. Ahọludu towe ni wá. Ojlo towe ni yin wiwà to aigba go, dile e te to olọn mẹ.” (Matiu 6:9, 10) Odẹ̀ he mẹsusu nọ ylọdọ Odẹ̀ Oklunọ tọn ehe, basi zẹẹmẹ lẹndai Ahọluduta Jiwheyẹwhe tọn tọn.

Gbọn Ahọluduta lọ gblamẹ, yinkọ Jiwheyẹwhe tọn na yin kinklandowiwe. E na yin kiklọwé sọn masin he ko yin kinkọ̀n do e go na atẹṣiṣi Satani po gbẹtọ po tọn wutu lẹpo mẹ. Ehe yin nujọnu. Ayajẹ nudida nuyọnẹntọ lẹpo tọn sinai do yinkọ Jiwheyẹwhe tọn hinhẹn do wiweji podọ alọkikẹyi jlọjẹ etọn nado dugán sọn ojlo mẹ wá ji.—Osọhia 4:11.

Humọ, Ahọluduta lọ yin didoai na ‘ojlo Jiwheyẹwhe tọn nido sọgan yin wiwà to aigba go, dile e te do to olọn mẹ.’ Etẹwẹ ojlo enẹ yin? Yèdọ nado gọ̀ haṣinṣan he tin to Jiwheyẹwhe po gbẹtọ po ṣẹnṣẹn, ehe Adam hẹnbu, do otẹn etọn mẹ. Ahọluduta lọ nasọ yí lẹndai Jehovah, Nupojipetọ Wẹkẹ lọ tọn wà, nado wleawuna paladisi aigba ji tọn de fie mẹdagbe lẹ sọgan duvivi ogbẹ̀ tọn kakadoi te. Mọwẹ, Ahọluduta Jiwheyẹwhe tọn na jla nuhe ylando dowhenu tọn hẹngble lẹpo do bo na hẹn lẹndai owanyinọ Jiwheyẹwhe tọn na aigba di. (1 Johanu 3:8) Na nugbo tọn, Ahọluduta ehe po nuhe e na wadotana po, wẹ owẹ̀n tangan Biblu tọn.

Yiaga to Aliho Tẹlẹ Mẹ?

Ahọluduta Jiwheyẹwhe tọn yin gandudu nujọnu tọn he tindo aṣẹpipa daho de. Yẹwhegán Daniẹli do obá he mẹ e tindo huhlọn jẹ hia mí to kleun mẹ. Ojlẹ dindẹn die wayi, e dọ dọdai dọmọ: “Jiwheyẹwhe olọn tọn na ze ahọludu de daga, he . . . na gbà ahọludu do flinflin bo sú ahọludu [gbẹtọvi tọn] lẹpo do.” Humọ, to ma taidi gandudu gbẹtọvi tọn lẹ, he sọawuhia bosọ busẹ sọn aimẹ to whenuho gblamẹ, Ahọluduta Jiwheyẹwhe tọn “ma na yin vivà gbede.” (Daniẹli 2:44) E ma ko vọ̀ do finẹ gba. To adà lẹpo mẹ, Ahọluduta ehe yiaga hugan gandudu gbẹtọvi tọn lẹpo.

Ahọluduta Jiwheyẹwhe tọn tindo Ahọlu he yiaga de. Lẹnnupọndo mẹhe Ahọlu enẹ yin ji. To “odlọ de po numimọ” he yin nina Daniẹli lẹ po mẹ, e mọ Gandutọ Ahọluduta Jiwheyẹwhe tọn tọn taidi “visunnu gbẹtọ tọn de” he yin hinhẹnwa Jiwheyẹwhe Ganhunupotọ nukọn bọ ‘ahọluigba, gigo, po ahọludu madopodo de po’ yin nina ẹn. (Daniẹli 7:1, 13, 14) Visunnu gbẹtọ tọn enẹ wẹ Jesu Klisti—yèdọ Mẹssia lọ. (Matiu 16:13-17) Jehovah Jiwheyẹwhe de Ovi etọn titi, Jesu, nado yin Ahọlu Ahọluduta Etọn tọn. To whenuena Jesu tin to aigba ji, e dọna Falesi kanylantọ lẹ dọmọ: “Ahọludu Jiwheyẹwhe tọn tin to gblagbla mìtọn mẹ,” kavi to hogbe devo mẹ dọ ewọ, he yin Ahọlu sọgodo Ahọluduta enẹ tọn, tin to ṣẹnṣẹn yetọn.—Luku 17:21.

Gbẹtọvi tẹwẹ tindo jẹhẹnu he na sọgbe hẹ dehe Jesu tindo lẹ taidi Gandutọ de? Jesu ko do ede hia mlẹnmlẹn nado yin Nukọntọ dodonọ, he go yè sọgan dejido, he sọ nọ vẹawumẹ. Owe Wẹndagbe tọn lẹ do e hia taidi dawe zohunhunnọ de he tindo owanyi sisosiso na gbẹtọ lẹ bosọ yin mẹtọnhopọntọ. (Matiu 4:23; Malku 1:40, 41; 6:31-34; Luku 7:11-17) Humọ, okú kavi madogán gbẹtọvi tọn devo lẹ ma sọgan sayana Jesu he yin finfọnsọnku lọ gba.—Isaia 9:6, 7.

Jesu po gandutọgbẹ́ etọn lẹ po to gandu sọn otẹn he yiaga hugan de mẹ. To numimọ he Daniẹli mọ to odlọ etọn mẹ, e sọ doayi e go dọ ‘ahọludu lọ po ahọluigba lọ po wẹ yè na hlan gbẹtọ mẹwiwe lẹ.’ (Daniẹli 7:27) Jesu ma to gandu ewọ ṣokẹdẹ gba. Mẹdevo lẹ na dugán hẹ ẹ taidi ahọlu po yẹwhenọ lẹ po. (Osọhia 5:9, 10; 20:6) Apọsteli Johanu wlanwe gando yé go dọmọ: “Yẹn sọ pọ́n, doayi e go, Lẹngbọvu de ṣite to osó Ziọni ji, po gbẹtọ fọtọ́n [donu] kantọ̀nkonukunẹnẹ po e po, . . . he yè fligọ sọn aigba ji.”—Osọhia 14:1-3.

Lẹngbọvu lọ wẹ Jesu Klisti to yinyin didoai taidi Ahọlu Ahọluduta lọ tọn godo. (Johanu 1:29; Osọhia 22:3) Osó Ziọni ehe dlẹnalọdo olọn.a (Heblu lẹ 12:22) Jesu po gandutọgbẹ́ 144 000 etọn lẹ po to gandu sọn olọn mẹ. Otẹn gandudu tọn he yiaga nankọtọn die! Na yé tin to olọn mẹ wutu, yé tindo pọndohlan he gbloada taun de. To whenuena e yindọ olọn wẹ yin ahọnkan etọn, “ahọludu Jiwheyẹwhe tọn” sọ yin yiylọdọ “ahọludu olọn tọn.” (Luku 8:10; Matiu 13:11) Awhànfunnu depope, yèdọ bọmbu nuzanusẹvaun tọn lẹ lọsu ma tlẹ sọgan jẹ gandudu olọnmẹ tọn enẹ go bo hẹn awugble wá na ẹn gba. Nude ma sọgan gbawhàn etọn podọ e na hẹn lẹndai he wutu Jehovah do e ai di.—Heblu lẹ 12:28.

Ahọluduta Jiwheyẹwhe tọn tindo afọzedaitọ dejidego lẹ to aigba ji. Nawẹ mí wagbọn do yọ́n ehe? Psalm 45:16 dọmọ: ‘Hiẹ na de ahọvi lẹ do aigba lẹpo ji.’ “Hiẹ” to dọdai ehe mẹ to alọdlẹndo Ovi Jiwheyẹwhe tọn. (Psalm 45:6, 7; Heblu lẹ 1:7, 8) Enẹwutu, Jesu Klisti lọsu wẹ na de ahọvi afọzedaitọ lọ lẹ. Mí sọgan deji dọ yé na hodo anademẹ etọn po nugbonọ-yinyin po. Etlẹ yin to egbehe, sunnu he pegan bo to devizọnwa taidi mẹho to agun Klistiani tọn mẹ lẹ nọ yin pinplọn, ma nado “duklunọ” do yisenọ hatọ yetọn lẹ ji, kakatimọ yé dona basi hihọ́na yé, jlọ yé dote bo miọnhomẹna yé.—Matiu 20:25-28; Isaia 32:2.

Ahọluduta lọ tindo mẹjidugando dodonọ lẹ. Yé yin madoblọnọ podọ nugbonọ to nukun Jiwheyẹwhe tọn mẹ. (Howhinwhẹn lẹ 2:21, 22) “Homẹmimiọnnọ lẹ na dugu aigba tọn,” wẹ Biblu dọ, podọ “yé na hẹn homẹhun yede to jijọho susu mẹ.” (Psalm 37:11) Mẹjidugando Ahọluduta lọ tọn lẹ yin homẹmimiọnnọ lẹ—yèdọ mẹhe nọ kẹalọyi oplọn bo tindo walọmimiọn bosọ nọ whiwhẹ yede lẹ. Onú gbigbọ tọn lẹ wẹ nọ duahunmẹna yé jẹnukọn. (Matiu 5:3) Yé jlo na wà nuhe sọgbe bosọ nọ kẹalọyi anademẹ Jiwheyẹwhe tọn.

Osẹ́n he yiaga hugan lẹ wẹ nọ deanana Ahọluduta Jiwheyẹwhe tọn. Osẹ́n po nunọwhinnusẹ́n he nọ deanana Ahọluduta lọ lẹ po wá sọn Jehovah Jiwheyẹwhe lọsu dè. Kakati nado yin aliglọnnamẹnu zẹjlẹgo, yé nọ hẹn ale wá na mí. (Psalm 19:7-11) Gbẹninọ sọgbe hẹ nubiọtomẹsi dodo Jehovah tọn lẹ ko to ale hẹnwa na mẹsusu todin. Di apajlẹ, tonusisena ayinamẹ Biblu tọn na asu, asi, po ovi lẹ po nọ hẹn gbẹzan whẹndo tọn pọnte tlala. (Efesunu lẹ 5:33–6:3) Eyin mí setonuna gbedide lọ nado “ze owanyi dogo,” mí nọ tindo haṣinṣan dagbe hugan hẹ mẹdevo lẹ. (Kọlọsinu lẹ 3:13, 14) Dile mí to gbẹnọ sọgbe hẹ nunọwhinnusẹ́n Owe-wiwe tọn lẹ, mí sọ nọ lẹzun azọ́nwatọ dagbe bo nọ tindo pọndohlan jlẹkaji tọn gando akuẹ go. (Howhinwhẹn lẹ 13:4; 1 Timoti 6:9, 10) Mí nọ basi hihọ́na agbasalilo mítọn gbọn didapana ahànnumu, fẹnnuwiwa zanhẹmẹ tọn, taba, po amasin adínọ lẹ po dali.—Howhinwhẹn lẹ 7:21-23; 23:29, 30; 2 Kọlintinu lẹ 7:1.

Ahọluduta Jiwheyẹwhe tọn yin gandudu de he Jiwheyẹwhe lọsu doai. Jiwheyẹwhe biọ to Ahọlu gandudu lọ tọn—Mẹssia lọ, he yin Jesu Klisti—po gandutọgbẹ́ etọn lẹpo po si nado nọgodona osẹ́n dodo tọn po nunọwhinnusẹ́n owanyinọ Etọn lẹ po. Mẹjidugando Ahọluduta lọ tọn lẹ, gọna afọzedaitọ etọn aigba ji tọn lẹ, nọ hùnhomẹ nado nọgbẹ̀ sọgbe hẹ osẹ́n Jiwheyẹwhe tọn lẹ. Gbọnmọ dali, gandutọ lọ lẹ po mẹjidugando Ahọluduta lọ tọn lẹ po nọ ze gbẹninọ yetọn sinai do ojlo Jiwheyẹwhe tọn wiwà ji. Enẹwutu, mí sọgan dọ po nujikudo po dọ Ahọluduta lọ yin yẹwhehọluduta nugbo de—yèdọ gandudu gbọn Jiwheyẹwhe dali. E na hẹn lẹndai he wutu e yin didoai di dandan. Ṣigba whetẹnu wẹ Ahọluduta Jiwheyẹwhe tọn, he sọ nọ yin yiylọdọ Ahọluduta Mẹssia tọn, bẹ gandudu etọn jẹeji?

Gandudu Ahọluduta Tọn Bẹjẹeji

Hodidọ Jesu tọn lẹ gọalọna mí nado yọ́n whenue gandudu Ahọluduta tọn bẹjẹeji. E dọmọ: “Jelusalẹm na zun zinzindai sọn Kosi lẹ dè, kaka ojlẹ [dide] Kosi lẹ tọn nado sọ.” (Luku 21:24) Jelusalẹm wẹ yin tòdaho dopo akàn lọ to aigba blebu ji he tindo kanṣiṣa hẹ yinkọ Jiwheyẹwhe tọn tlọlọ. (1 Ahọlu lẹ 11:36; Matiu 5:35) Tatọ́-tònọ ahọluduta he Jiwheyẹwhe kẹalọyi to aigba ji de tọn wẹ e yin. Tòdaho enẹ na yin zinzindai gbọn Kosi lẹ dali to linlẹn lọ mẹ dọ gandudu aihọn tọn lẹ na hẹnalọdotena aṣẹpipa Jiwheyẹwhe tọn do omẹ etọn lẹ ji. Whetẹnu wẹ ehe na bẹjẹeji?

Anademẹ yin nina ahọlu godo tọn he na sinai do ofìn Jehovah tọn ji to Jelusalẹm dọmọ: “Diọtẹnna ogangbakun lọ, bosọ de ojẹgbakun lọ sẹ̀: . . . Ehe ga ma nasọ tin ba, kaka ewọ do wá jlọjẹ mẹhetọn e yin; yẹn nasọ yí ì na ẹn.” (Ezekiẹli 21:25-27) Ojẹgbakun lọ na yin didesẹ sọn ota ahọlu enẹ tọn, bọ aṣẹpipa Jiwheyẹwhe tọn do omẹ Etọn lẹ ji na yin alọhẹndotena. Ehe jọ to 607 J.W.M. whenuena Babilọninu lẹ và Jelusalẹm sudo. To ‘ojlẹ dide’ he na bọdego lẹ whenu, Jiwheyẹwhe ma na tindo gandudu de to aigba ji nado nọtena aṣẹpipa etọn. To vivọnu ojlẹ enẹlẹ tọn mẹ kẹdẹ wẹ Jehovah na na huhlọn aṣẹpipa tọn hlan omẹ lọ, “jlọjẹ mẹhetọn e yin”—yèdọ Jesu Klisti. Nawẹ ojlẹ enẹ na dẹn sọ?

Dọdai Biblu tọn de to owe Daniẹli tọn mẹ dọmọ: “Sán atin lọ liai, bo và ẹ sudo; ṣogan jo dodonu adọ̀ etọn lẹ tọn dai do aigba mẹ, yèdọ po kọgàn ogànyuu po ogànvẹẹ po tọn de, . . . kaka ojlẹ ṣinawe gbọn ewọ ji.” (Daniẹli 4:23) Dile mí na mọ do, tedidi “ojlẹ ṣinawe” he yin nùdego tofi tọn yin nudopolọ po ‘ojlẹ dide Kosi lẹ tọn’ po.

To Biblu mẹ, atin lẹ nọ nọtena omẹ dopodopo lẹ, gandutọ lẹ, po ahọluduta lẹ po to whedelẹnu. (Psalm 1:3; Jẹlemia 17:7, 8; Ezekiẹli, weta 31) Atin yẹhiadonu tọn lọ yin mimọ “jẹ pòdo aigba lẹpo tọn.” (Daniẹli 4:11) Gbọnmọ dali, aṣẹpipa he atin he dona yin sinsán liai bo yin kọgàn dó na lọ nọtena dlẹnkan “jẹ opodo aigba tọn,” bo gando gandudu gbẹtọvi tọn lẹpo go. (Daniẹli 4:17, 20, 22) Enẹwutu, atin lọ nọtena aṣẹpipa yiaga hugan Jiwheyẹwhe tọn, titengbe gando aigba go. Aṣẹpipa ehe yin yiyizan na ojlẹ de gbọn ahọluduta he Jehovah zedai do akọta Islaeli tọn ji gblamẹ. Atin yẹhiadonu tọn lọ yin sinsán liai, bọ kọgàn ogànyuu po ogànvẹẹ po tọn yin didó okọ̀ na ẹn nado sọgan hẹnalọdotena dodonu etọn ma nado wú. Ehe dohia dọ ahọluduta he Jiwheyẹwhe to yiyizan nado dugán to aigba ji ma na wazọ́n ba, dile e jọ do to owhe 607 J.W.M.—ṣigba ehe ma na yin kakadoi gba. Atin lọ na yin onú do okọ̀ na kaka “ojlẹ ṣinawe” nado juwayi. To vivọnu ojlẹ enẹ tọn, Jehovah na na aṣẹpipa gandudu tọn hlan whédutọ jlọjẹnọ lọ, Jesu Klisti. E họnwun dọ “ojlẹ ṣinawe” lọ lẹ po ‘ojlẹ dide Kosi lẹ tọn’ po to alọdlẹndo ojlẹ dopolọ.

Biblu gọalọna mí nado yọ́n tedidi “ojlẹ ṣinawe” lẹ tọn. E basi zẹẹmẹ dọ azán 1 260 sọzẹn hẹ “ojlẹ de [ojlẹ dopo], podọ ojlẹ lẹ [ojlẹ awe], po odaa ojlẹ de tọn po”—ehe lẹndopọ etọn yin “ojlẹ” atọ̀n daa. (Osọhia 12:6, 14) Ehe zẹẹmẹdo dọ sọha mọnkọtọn awe, kavi ojlẹ ṣinawe, yin azán 2 520.

Azán dopodopo 2 520 hihia sọn 607 J.W.M. na hẹn mí wá owhe 600 J.W.M. Ṣigba, ojlẹ ṣinawe lẹ dite tlala humọ. Yé gbẹ́ pò to yìyì to whenuena Jesu dọho gando ‘ojlẹ dide Kosi lẹ tọn’ go. Enẹwutu, ojlẹ ṣinawe lẹ yin ojlẹ dọdai tọn. Ehe zẹẹmẹdo dọ mí dona yí nunọwhinnusẹ́n Owe-wiwe tọn lọ zan he yin: “Owhe dopo na azán dopodopo.” (Osọha lẹ 14:34; Ezekiẹli 4:6) Gbọnmọ dali, ojlẹ ṣinawe he huhlọn aihọn tọn lẹ do dugán to aigba ji matin anademẹ Jiwheyẹwhe tọn yin owhe 2 520. Owhe 2 520 hihia sọn 607 J.W.M. na hẹn mí wá 1914 W.M. Owhe enẹ mẹ wẹ ‘ojlẹ dide Kosi lẹ tọn,’ kavi ojlẹ ṣinawe lẹ, wá vivọnu te. Ehe dohia dọ Jesu Klisti jẹ gandu ji taidi Ahọlu Ahọluduta Jiwheyẹwhe tọn to 1914.

“Ahọludu Towe Ni Wá”

To whenuena e yindọ Ahọluduta Mẹssia tọn ko yin zizedai to olọn mẹ, be mí dona gbẹ́ zindonukọn nado to dẹ̀ho dọ e ni wá, dile Jesu plọn mí do to odẹ̀ apajlẹ tọn lọ mẹ wẹ ya? (Matiu 6:9, 10) Mọwẹ. Obiọ enẹ sọgbe bo gbẹsọ gọ́ na zẹẹmẹ taun. Ahọluduta Jiwheyẹwhe tọn na yí huhlọn etọn zan to gigọ́ mẹ do aigba go to madẹnmẹ.

Dona nankọtọn die he gbẹtọvi nugbonọ lẹ na duvivi etọn to whenuena enẹ na jọ! Biblu dọmọ: “Jiwheyẹwhe lọsu nasọ nọhẹ yé, . . . Jiwheyẹwhe nasọ súnsún dasin lẹpo sẹ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” (Osọhia 21:3, 4) To ojlẹ enẹ mẹ, “finẹnu lẹ ma to na dọmọ, yẹn to azọ̀njẹ.” (Isaia 33:24) Mẹhe hẹn homẹ Jiwheyẹwhe tọn hùn lẹ na duvivi ogbẹ̀ madopodo tọn. (Johanu 17:3) Dile mí to tenọpọn hẹndi dọdai Biblu tọn ehelẹ po devo he jiawu lẹ po tọn, mì gbọ mí ni nọ “dín ahọludu Jiwheyẹwhe tọn, po dodo etọn po whẹ́.”—Matiu 6:33.

[Nudọnamẹ Odò Tọn]

[Blurb to weda 4]

Jehovah ko de Jesu Klisti nado yin Ahọlu Ahọluduta Etọn tọn

[Apotin/Yẹdide lẹ to weda 6]

Owhe 2 520

Octobre 607 ◀ J.W.M. W.M. ▸ Octobre 1914

Owhe 606 po osun atọ̀n po Owhe 1 913 po osun ṣinẹnẹ po

‘Ojlẹ dide Kosi lẹ tọn’ bẹjẹeji to 607 J.W.M. bo wá vivọnu to 1914 W.M.

[Yẹdide to weda 7]

Mẹjidugando Ahọluduta Jiwheyẹwhe tọn lẹ na duvivi dona susu tọn to aigba ji