Whenuena Ojlo Jiwheyẹwhe Tọn Na Yin Wiwà to Aigba Ji

WHENUENA Jesu plọn devi etọn lẹ nado nọ hodẹ̀ dọ, “Ojlo towe ni yin wiwà to aigba go, dile e te to olọn mẹ,” e to hodọ sọn numimọ mẹ na e ko nọ̀ olọn mẹ hẹ Otọ́ lọ wutu. (Matiu 6:10; Johanu 1:18; 3:13; 8:42) To whenuena Jesu tin to olọn mẹ, e ko tindo numimọ ojlẹ de tọn whenuena nuhe jọ to olọn mẹ podọ to aigba ji lẹpo tin to gbesisọmẹ hẹ ojlo Jiwheyẹwhe tọn. Ojlẹ awuvivi tọn he hẹn kọdetọn dagbe po pekọ po wá wẹ enẹlẹ yin.—Howhinwhẹn lẹ 8:27-31.

Nudida gbigbọnọ lẹ wẹ Jiwheyẹwhe dá jẹnukọn, yèdọ ‘angẹli etọn lẹ, hlọnhlọnnọ to huhlọn mẹ, he to ohó etọn basi.’ Yé yin “devizọnwatọ etọn lẹ, he to homẹhunnu etọn wà lẹ.” (Psalm 103:20, 21) Be dopodopo yetọn tindo ojlo mẹdetiti tọn ya? Mọwẹ, podọ to whenuena aigba yin didá, “visunnu Jiwheyẹwhe tọn [ehelẹ] to abóbó dó na homẹhun.” (Job 38:7) Abóbó didó yetọn dohia dọ homẹ yetọn hùn do lẹndai Jiwheyẹwhe tọn go, bọ yé sọ kẹalọyi ojlo Jiwheyẹwhe tọn.

To dodonu aigba tọn zizedai godo, Jiwheyẹwhe wleawuna ẹn nado yin fininọ gbẹtọ tọn podọ to godo mẹ e dá sunnu po yọnnu tintan lọ po. (Gẹnẹsisi, weta 1) Be ehe lọsu jẹna abóbó wẹ ya? Kandai gbọdo lọ dọmọ: “Jiwheyẹwhe sọ mọ nuhe e dá lẹpo, bo doayi e go e yọ́n tlala,” mọwẹ, e pé, bo ma tindo oblọ depope.—Gẹnẹsisi 1:31.

Etẹwẹ yin ojlo Jiwheyẹwhe tọn na mẹjitọ mítọn tintan lẹ po kúnkàn yetọn po? Sọgbe hẹ Gẹnẹsisi 1:28, ehe lọsu yọ́n tlala: “Jiwheyẹwhe dona yé; Jiwheyẹwhe sọ dọ hlan yé, dọmọ, Mì yin sinsẹ́nnọ, bo sudeji, bosọ gọ́ aigba ji, bo dugán do e ji: bo duahọlu to whèvi ohù tọn ji, podọ to ohẹ̀ aga tọn ji, [podọ] to nuhe to ogbẹ̀ lẹpo ji he nọ lìn to aigba ji.” Nado hẹn azọ́ndenamẹ enẹ di, mẹjitọ mítọn tintan lẹ—gọna kúnkàn yetọn—dona nọgbẹ̀ kakadoi. Nudepope ma dohia dọ yé na jiya nugbajẹmẹji, whẹdida mawadodo, ayimajai, kavi okú tọn gba.

Ojlẹ de wẹ ehe yin bọ ojlo Jiwheyẹwhe tọn to yinyin wiwà to olọn mẹ podọ to aigba ji. Mẹhe wà ojlo etọn lẹpo na mọ ayajẹ to mọwiwà mẹ. Etẹwẹ hẹn nuhahun wá lo?

Ojlo Jiwheyẹwhe tọn yin nukundiọsọ to ajijimẹ. Ṣigba whẹho lọ na yin dididẹ. Etomọṣo, ehe zẹẹmẹdo ojlẹ gaa ayimajai po awubla po tọn he na hẹn bẹwlu susu wá gando ojlo Jiwheyẹwhe tọn na gbẹtọvi go. Mímẹpo wẹ ko to oyà ehe tọn ji. Avùnnukundiọsọmẹ nankọ wẹ?

Ojlo Jiwheyẹwhe Tọn to Ojlẹ Atẹṣiṣi Tọn de Whenu

Dopo to “visunnu [gbigbọnọ] Jiwheyẹwhe tọn” lẹ mẹ mọ dotẹnmẹ hundote lọ nado hẹnalọdotena ojlo Jiwheyẹwhe tọn na gbẹtọvi lẹ, po lẹndai lọ po nado hẹn ale wá na ede. Dile nudida gbigbọnọ ehe lẹnnupọndo e ji yinukọn do, mọwẹ e nọ taidi nuhe yọnbasi taun bosọ nọ taidi linlẹn he dọnmẹdogo taun do niyẹn. (Jakobu 1:14, 15) E sọgan ko lẹn to ede mẹ dọ eyin emi sọgan klọ Adam po Evi po nado dotoaina emi kakati ni yin Jiwheyẹwhe, to whenẹnu Jiwheyẹwhe na tin to dandan glọ nado kẹalọyi nupojipetọ devo de. E sọgan ko lẹnnupọn dọ Jiwheyẹwhe ma na hù yé, na mọwiwà na zẹẹmẹdo dọ lẹndai Jiwheyẹwhe tọn gboawupo. Kakatimọ, Jehovah Jiwheyẹwhe dona diọ lẹndai etọn, bo kẹalọyi aṣẹpipa Satani tọn jẹ obá de mẹ mẹhe nudida gbẹtọvi tọn Etọn lẹ na to taliaina todin. Po gbesisọ po, atẹṣitọ enẹ wá yin yiylọdọ Satani, he zẹẹmẹdo Agọjẹdomẹtọ.—Job 1:6.

Satani yinuwa sọgbe hẹ ojlo etọn bo dọnsẹpọ yọnnu lọ. E dotuhomẹna ẹn nado gbẹkọ ojlo Jiwheyẹwhe tọn go bo jẹ jlòkoko, dọmọ: “Mì ma na kú dandan gba. . . . Mìwlẹ na tin di Jiwheyẹwhe, bo nọ yọ́n onú dagbe po oylan po.” (Gẹnẹsisi 3:1-5) Ehe taidi nuhe na hẹn mẹdekannujẹ wá to nukun yọnnu lọ tọn mẹ, enẹwutu e kẹalọyi i taidi aliho gbẹzan tọn he pọnte hugan de. Enẹgodo, e diọlinlẹn na asu etọn nado kọnawudopọ hẹ ẹ.—Gẹnẹsisi 3:6.

Ehe mayin ojlo Jiwheyẹwhe tọn na asu po asi po lọ gba. Ojlo yedetiti tọn wẹ e yin. Podọ e na hẹn nugbajẹmẹji wá. Jiwheyẹwhe ko dọna yé dọ tolivivẹ na dekọtọn do okú mẹ na yé. (Gẹnẹsisi 3:3) Yé ma yin didá nado nọgbẹ̀ matin anademẹ Jiwheyẹwhe tọn bo tindo kọdetọn dagbe gba. (Jẹlemia 10:23) Humọ, yé na lẹzun mapenọ, podọ kúnkàn yetọn na dugu mape po okú po tọn. (Lomunu lẹ 5:12) Satani ma sọgan glọnalina kọdetọn ylankan ehelẹ gba.

Be diọdo ehelẹ diọ lẹndai kavi ojlo Jiwheyẹwhe tọn na gbẹtọvi lẹ podọ na aigba kakadoi wẹ ya? Lala. (Isaia 55:9-11) Ṣigba yé fọ́n whẹho he dona yin dididẹ delẹ dote: Be gbẹtọvi lẹ sọgan “tin di Jiwheyẹwhe, bo nọ yọ́n onú dagbe po oylan po,” dile Satani dọ do ya? Eyin ojlẹ susu yin nina mí, be mí sọgan basi dide nuhe yin dagbe po oylan po tọn kavi nuhe yin alemọyinu po owùnu po tọn na míde, to adà gbẹzan tọn lẹpo mẹ ya? Be aliho gandudu Jiwheyẹwhe tọn wẹ yọ́n hugan bọ mí dona gbọnmọ dali setonuna ewọ mlẹnmlẹn ya? Be mí dona yinuwa sọgbe hẹ ojlo etọn to gigọ́mẹ ya? Etẹwẹ na yin gblọndo towe?

Aliho dopo akàn wẹ tin nado didẹ whẹho ehelẹ to nukun nudida nuyọnẹntọ lẹpo tọn mẹ: Dotẹnmẹ dona yin nina mẹhe jlo na nọgbẹ̀ matin anademẹ Jiwheyẹwhe tọn lẹpo nado tẹnpọn bo deanana yede po kọdetọn dagbe po. Hùhù yé poun ma na ko didẹ whẹho lọ gba. Dotẹnmẹ nina gbẹtọvi lẹ nado deanana yede na ojlẹ he pé na didẹ whẹho lọ lẹ na kọdetọn mẹdekannujẹ tọn lẹ na ko lẹzun nuhe họnwun hezeheze. Jiwheyẹwhe dohia dọ ewọ na didẹ whẹho lẹ to aliho ehe mẹ to whenuena e dọna yọnnu lọ dọ e na jì ovi lẹ. Gbọnmọ dali, whẹndo gbẹtọvi tọn de na bẹjẹeji. Nudide Jiwheyẹwhe tọn ehe wẹ zọ́n bọ mímẹpo tin to ogbẹ̀ to egbehe!—Gẹnẹsisi 3:16, 20.

Ṣigba, ehe ma zẹẹmẹdo dọ Jiwheyẹwhe na jotẹnna gbẹtọvi lẹ po nudida gbigbọnọ atẹṣitọ lẹ po nado to nuhe jlo yé lẹpo wà gba. Jiwheyẹwhe ma gbẹkọ nupojipetọ-yinyin etọn go gba, mọjanwẹ e ma wọnji lẹndai etọn go do niyẹn. (Psalm 83:18) E hẹn ehe họnwun to whenuena e dọ dọdai dọ mẹhe yin tọ́ntlọ́ngbọ́n to atẹṣiṣi lọ mẹ na yin vivasudo to godo mẹ bọ nugandomẹgo ylankan lẹpo na yin didesẹ. (Gẹnẹsisi 3:15) Enẹwutu, opagbe kọgbọ tọn ko yin didó na whẹndo gbẹtọvi tọn sọn bẹjẹeji gbọ́n.

Todin whẹ́, mẹjitọ mítọn tintan lẹ ko de yedelẹ po ovivi sọgodo tọn yetọn lẹ po sẹ sọn gandudu Jiwheyẹwhe tọn glọ. E na biọ dọ Jiwheyẹwhe ni hẹn ojlo etọn wiwà to onú lẹpo mẹ zun dandan na yé nado sọgan glọnalina kọdetọn ylankan nudide yetọn tọn lẹ. E na yin nudopolọ po alọhinhẹndote na yé nado tẹ́n gbẹninọ matin anademẹ Jiwheyẹwhe tọn pọ́n po.

Nugbo wẹ dọ nudide dopodopo gbẹtọ lẹ tọn wẹ e yin nado litaina gandudu Jiwheyẹwhe tọn. Yé sọgan plọn nuhe ojlo Jiwheyẹwhe tọn yin na gbẹtọ lẹ to egbehe bo hẹn gbẹninọ yetọn sọgbe hẹ ẹ pẹkipẹki dile e yọnbasi do. (Psalm 143:10) Etomọṣo, yé ma na vò sọn nuhahun lẹ si gba dile e na dẹnsọ bọ whẹho tangan lọ heyin gbẹninọ matin anademẹ Jiwheyẹwhe tọn ma ko yin dididẹ.

Nugandomẹgo nudide mẹdetiti tọn lẹ tọn lẹzun nuhe họnwun to madẹnmẹ. Viplọnji whẹndo gbẹtọvi tọn, Kaini, hù nọvisunnu etọn Abẹli na “azọ́n etọn lẹ yin oylan wutu, bọ nọvisunnu etọn tọn yin dodo.” (1 Johanu 3:12) Ehe mayin ojlo Jiwheyẹwhe tọn gba, na Jiwheyẹwhe ko na avase Kaini bosọ sayana ẹn to godo mẹ. (Gẹnẹsisi 4:3-12) Kaini ko de gbẹzan jlòkoko Satani tọn; gbọnmọ dali e “jọ̀ sọn mẹylankan lọ dè.” Mẹdevo lẹ wà onú dopolọ.

To nuhe hugan owhe 1 500 to whenuho gbẹtọvi tọn mẹ godo, “aigba sọ gble to Jiwheyẹwhe nukọn, aihọn sọ gọ́ na [danuwiwa].” (Gẹnẹsisi 6:11) Afọdide nujikudo tọn dona yin zize nado whlá aigba sọn hẹngble si. Jiwheyẹwhe ze afọdide enẹ gbọn singigọ globu tọn de hinhẹnwa po hihọ́ bibasina whẹndo dodonọ dopo he tin to aigba ji to whenẹnu po dali—yèdọ Noa, asi etọn, visunnu etọn lẹ, po asi yetọn lẹ po. (Gẹnẹsisi 7:1) Mímẹpo yin ovivi yetọn lẹ.

Sọn whenẹnu gbọ́n, Jiwheyẹwhe ko wleawuna anademẹ na ahundoponọ he jlo na yọ́n ojlo etọn lẹ. E gbọdo sunnu nugbonọ lẹ nado kàn ohó etọn dai na mẹdepope he to anademẹ dín sọn ewọ dè. Ohó helẹ yin kinkàndai to Biblu mẹ. (2 Timoti 3:16) E gbọn owanyi dali jotẹnna gbẹtọvi nugbonọ lẹ nado tindo haṣinṣan de hẹ ẹ, bo tlẹ lẹzun họntọn etọn lẹ. (Isaia 41:8) Podọ e na yé huhlọn he yé tindo nuhudo etọn nado doakọnna whlepọn sinsinyẹn he gbẹtọ lẹ to oyà etọn ji to ojlẹ mẹdekannujẹ tọn ehelẹ mẹ. (Psalm 46:1; Filippinu lẹ 4:13) Lehe mí dopẹ́ na ehe lẹpo do sọ!

“Ojlo Towe Ni Yin Wiwà”—to Gigọ́mẹ

Nuhe Jiwheyẹwhe ko wà kakajẹ din ma ko hẹn ojlo etọn na gbẹtọvi di to gigọ́mẹ gba. Apọsteli Pita wlan dọmọ: “Di opagbe etọn, míwlẹ to nukundo olọn yọyọ lẹ, po aigba yọyọ de po, fie dodo nọ nọ̀.” (2 Pita 3:13) Hodidọ yẹhiadonu tọn ehe dlẹnalọdo gandudu yọyọ de he na paṣẹ do gbẹtọvi ji bọ ogbẹ́ gbẹtọvi tọn yọyọ de na litaina gandudu enẹ.

Yẹwhegán Daniẹli yí hogbe he họnwun lẹ zan to whenuena e wlan dọmọ: “To azán ahọlu nẹlẹ tọn lẹ mẹ wẹ Jiwheyẹwhe olọn tọn na ze ahọludu de daga, he ma na yin vivà gbede, . . . e na gbà ahọludu do flinflin bo sú ahọludu he lẹpo do, ewọ bo nasọ nọte kakadoi.” (Daniẹli 2:44) Dọdai ehe na mí todido dọ aihọn egbehe tọn he ko gblezọn na wá opodo bọ Ahọluduta, kavi gandudu Jiwheyẹwhe tọn na diọtẹnna ẹn. Wẹndagbe nankọtọn die! Nudindọn po ṣejannabi he hẹn danuwiwa gọ́ aihọn egbehe tọn mẹ po bosọ to aigba zedo owù hẹngble tọn mẹ na lẹzun otàn to gbèdopo.

Whetẹnu wẹ onú helẹ na jọ? Devi Jesu tọn lẹ kanse dọmọ: “[Whetẹnu wẹ] onú helẹ na jọ? Etẹwẹ na yin ohia [tintin tofi] towe tọn, po opodo aihọn tọn po tọn?” Apadewhe gblọndo Jesu tọn wẹ yindọ: “Yè nasọ dọyẹwheho wẹndagbe ahọludu tọn helẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.”—Matiu 24:3, 14.

E ko yin ayidego gbayipe dọ azọ́n yẹwhehodidọ tọn ehe to yìyì lẹdo aihọn pé. Hiẹ lọsu sọgan ko doayi e go to lẹdo towe mẹ. To owe etọn ceux-ci croient aussi (Glẹnsigbe) mẹ, Mẹplọntọ Charles S. Braden wlan dọmọ: “Kunnudetọ Jehovah tọn lẹ ko hẹn aigba lọ gọ́ po kunnudide yetọn po to paa mẹ. . . . Pipli sinsẹ̀n tọn depope ma tin to aihọn mẹ he nọ do zohunhun po linsinsinyẹn dogọ po hia to vivẹnudido mẹ nado hẹn wẹndagbe Ahọluduta lọ tọn gbayipe hugan Kunnudetọ Jehovah tọn lẹ gba.” Kunnudetọ lẹ yí zohunhun do to wẹndagbe ehe lá to aigba he hugan 230 ji to nudi ogbè 400 mẹ. Azọ́n he ko yin didọdai ehe ma ko yin wiwadotana to obá he gbloada sọmọ mẹ pọ́n gba. E yin dopo to kunnudenu susu he mí tindo lẹ mẹ dọ ojlẹ lọ to dindọnsẹpọ na Ahọluduta enẹ nado diọtẹnna gandudu gbẹtọ tọn lẹ.

Ahọluduta he Jesu dọ dọ yẹwheho etọn na yin didọ lọ wẹ e sọ plọn mí nado nọ hodẹ̀na to odẹ̀ apajlẹ tọn etọn mẹ dọmọ: “Ahọludu towe ni wá. Ojlo towe ni yin wiwà to aigba go, dile e te to olọn mẹ.” (Matiu 6:10) Mọwẹ, Ahọluduta enẹ wẹ Jiwheyẹwhe na yizan nado hẹn lẹndai etọn, ojlo etọn, na gbẹtọvi podọ na aigba di.

Etẹwẹ enẹ zẹẹmẹdo? Mì gbọ Osọhia 21:3, 4 ni na gblọndo: “Yẹn sọ sè ogbè daho de sọn olọn mẹ to didọmọ, Doayi e go, gohọ̀ Jiwheyẹwhe tọn tin to gbẹtọ lẹ dè, ewọ nasọ nọhẹ yé, yé na yin omẹ etọn, Jiwheyẹwhe lọsu nasọ nọhẹ yé, bo nasọ yin Jiwheyẹwhe yetọn. Jiwheyẹwhe nasọ súnsún dasin lẹpo sẹ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” To whenẹnu, ojlo Jiwheyẹwhe tọn na yin wiwà to aigba ji podọ to olọn mẹ—to gigọ́mẹ.a Be e ma na jlo we nado yin apadewhe etọn ya?

[Nudọnamẹ Odò Tọn]

[Yẹdide to weda 5]

Kọgbigbẹ́ ojlo Jiwheyẹwhe tọn go nado nọ̀ jlòkoko hẹn nugbajẹmẹji wá