“Oklunọ, Plọn Mí Nado Nọ Hodẹ̀”
“Dopo to nuplọntọ etọn lẹ mẹ dọ hlan ẹn, dọ, Oklunọ, plọn mí nado nọ hodẹ̀.”—LUKU 11:1.
1. Naegbọn devi Jesu tọn dopo biọ to Jesu si nado plọn yé dẹ̀hiho?
DILE Jesu to dẹ̀ho to gbèdopo to owhe 32 W.M., devi etọn de to pinpọ́n ẹn. Jesu sọgan ko to dẹ̀ho do homẹ hlan Otọ́ etọn, enẹwutu devi lọ ma sè nuhe dọ wẹ e te. Etomọṣo, to odẹ̀ lọ godo, devi lọ dọna Jesu dọ: “Oklunọ, plọn mí nado nọ hodẹ̀.” (Luku 11:1) Etẹwẹ whàn ẹn nado basi obiọ ehe? Odẹ̀ yin nuwiwa gbesisọ tọn de to gbẹzan po sinsẹ̀n-bibasi Juvi lẹ tọn po mẹ. Owe-wiwe Heblu tọn lẹ bẹ odẹ̀ susu hẹn to owe Psalm tọn lẹ mẹ podọ to fidevo lẹ. Enẹwutu devi lọ ma to bibiọ dọ Jesu ni plọn ẹn nuhe e ma ko jẹakọhẹ paali kavi nuhe e ma ko wà pọ́n gbede gba. Matin ayihaawe, ewọ jẹakọhẹ odẹ̀ aṣa tọn he nukọntọ sinsẹ̀n Ju tọn lẹ nọ hò. Ṣigba todin e ko doayi odẹ̀ Jesu tọn go, bo sọgan ko mọ dọ vogbingbọn daho de tin to odẹ̀ dodonọ jijlá labbi lẹ tọn po aliho he mẹ Jesu hodẹ̀ te po ṣẹnṣẹn.—Matiu 6:5-8.
2. (a) Etẹwẹ dohia dọ Jesu ma to didọ dọ mí dona nọ basi dọvọdọ odẹ̀ apajlẹ tọn lọ tọn? (b) Naegbọn mí jlo nado plọn dẹ̀hiho?
2 Nudi osun 18 delẹ jẹnukọn, to Yẹwhehodidọ Osó ji tọn etọn mẹ, Jesu ko ze apajlẹ dẹ̀hiho tọn de dai na devi etọn lẹ nado nọ hodo. (Matiu 6:9-13) Vlavo devi ehe ma tin to finẹ to ojlẹ lọ mẹ, enẹwutu Jesu gbọn homẹdagbe dali vọ́ nuagokun he tin to odẹ̀ apajlẹ tọn enẹ mẹ lẹ dọ. E jẹna ayidego dọ ewọ ma yí hogbe dopolọ lẹ pẹpẹ zan to odẹ̀ lọ lẹ mẹ, ehe dohia dọ ewọ ma to odẹ̀ he dona nọ yin vivọdọ sọn tamẹ de plọnmẹ gba. (Luku 11:1-4) Taidi devi he mí ma yọ́n yinkọ etọn enẹ, mílọsu lẹ jlo nado plọn dẹ̀hiho, na odẹ̀ mítọn lẹ nido sọgan dọ̀n mí sẹpọ Jehovah pẹkipẹki. Enẹwutu mì gbọ mí ni gbadopọnna odẹ̀ apajlẹ tọn lọ to gigọ́mẹ, dile apọsteli Matiu basi kandai etọn do. Atọ̀n to obiọ ṣinawe he e bẹhẹn lẹ mẹ gando lẹndai Jiwheyẹwhe tọn lẹ go bọ ẹnẹ gando nuhudo agbasamẹ po gbigbọmẹ tọn mítọn lẹ po go. To hosọ ehe mẹ, mí na dọhodo obiọ atọ̀n he jẹnukọn lẹ ji.
Otọ́ Owanyinọ De
3, 4. Etẹwẹ yiylọ Jehovah dọ “Otọ́ mítọn” zẹẹmẹdo?
3 Sọn bẹjẹeji, Jesu dohia dọ odẹ̀ mítọn lẹ dona do haṣinṣan pẹkipẹki ṣogan he gọ́ na sisi he mí tindo hẹ Jehovah hia. To hodidọ etọn titengbe na devi etọn he pli lẹdo e to osó enẹ kọ̀n lẹ mẹ, Jesu dọna yé nado nọ ylọ Jehovah dọ “Otọ́ mítọn he tin to olọn mẹ.” (Matiu 6:9) Sọgbe hẹ weyọnẹntọ de, vlavo Jesu dọho to ogbè Heblu kavi Alamaiki he gbayipe lọ mẹ, hogbe he e yizan na “Otọ́” sọzẹn hẹ hogbe kanṣiṣa pẹkipẹki tọn he ovivu de nọ yizan na Otọ́ etọn, yèdọ ‘hogbe ovivu de tọn.’ Jehovah yiylọ dọ “Otọ́ mítọn” dohia dọ mí tindo kanṣiṣa pẹkipẹki, jidedomẹgo tọn de hẹ ẹ.
4 Gbọn hogbe lọ ‘Otọ́ mítọn’ yiyizan dali, mí sọ to didohia dọ mí yin apadewhe whẹndo daho de tọn he bẹ sunnu po yọnnu he yọ́n Jehovah taidi Ogbẹ̀-Namẹtọ yetọn lẹ po hẹn. (Isaia 64:8; Owalọ lẹ 17:24, 28) Klistiani yí gbigbọ do de lẹ yin alọkẹyi taidi “ovi Jiwheyẹwhe tọn” lẹ, podọ ewọ wẹ yé nọ to “awhado ylọ, Abba, Otọ́.” (Lomunu lẹ 8:14, 15) Omẹ livi susu ko to gbẹdo hẹ yé po nugbonọ-yinyin po. Omẹ ehelẹ ko klan yede do wiwe na Jehovah bo do klandowiwe yetọn hia gbọn yinyin bibaptizi to osin mẹ dali. “Lẹngbọ devo” ehe lẹpo sọgan dọnsẹpọ Jehovah ga to oyín Jesu tọn mẹ bo ylọ Ẹ dọ “Otọ́ mítọn.” (Johanu 10:16; 14:6) Mí sọgan hodẹ̀ hlan Otọ́ olọn mẹ tọn mítọn to gbesisọmẹ nado pà ẹ, bo dopẹ́ na ẹn na dagbe he e wà na mí lẹpo, bosọ dọ magbọjẹ mítọn lẹ na ẹn, po nujikudo lọ po dọ ewọ to tukla mítọn jẹ.—Filippinu lẹ 4:6, 7; 1 Pita 5:6, 7.
Owanyi Na Oyín Jehovah Tọn
5. Etẹwẹ yin obiọ tintan to odẹ̀ apajlẹ tọn lọ mẹ, podọ naegbọn ehe do sọgbe?
5 Bẹjẹeji obiọ lọ tọn dọ̀n ayidonugo wá onú titengbe hugan lẹ ji to niyaniya mẹ. E dọmọ: “Hihiọ [kavi klandowiwe] wẹ oyín towe.” (Matiu 6:9) Mọwẹ, oyín Jehovah tọn hihiọ, kavi kinklandowiwe dona nọ duahunmẹna mí hú nulẹpo na mí yiwanna ẹn bọ vlẹko he ko yin kinkọ̀n do oyín etọn go lẹpo nọ vẹ́ na mí wutu. Atẹṣiṣi Satani tọn po gbẹtọvi awe tintan lẹ kiklọ nado vẹtolina Jehovah Jiwheyẹwhe po kọ̀n masin do oyín Etọn go gbọn ayihaawe finfọndote gando nupojipetọ-yinyin wẹkẹ mẹ tọn Jiwheyẹwhe tọn go dali. (Gẹnẹsisi 3:1-6) Humọ, sọn dowhenu kakajẹ din, oyín Jehovah tọn ko yin vivlẹko gbọn nuyiwa po nuplọnmẹ agọ̀ mẹhe sọalọakọ́n nado yin afọzedaitọ etọn lẹ tọn po dali.
6. Etẹwẹ mí dona dapana eyin mí nọ hodẹ̀ dọ oyín Jehovah tọn ni yin kinklandowiwe?
6 Dẹ̀hiho dọ oyín Jehovah tọn ni yin kinklandowiwe nọ do teninọ mítọn to whẹho nupojipetọ-yinyin wẹkẹ tọn lọ mẹ hia—bo nọ hẹn ẹn diun dọ mí nọgodona jlọjẹ Jehovah tọn mlẹnmlẹn nado dugán do wẹkẹ lọ ji. Jehovah jlo dọ nudida nuyọnẹntọ he nọ yí ayajẹ do litaina nupojipetọ-yinyin dodo tọn etọn sọn ojlo mẹ wá lẹ ni nọ̀ wẹkẹ lọ mẹ na yé yiwanna ẹn bo yiwanna nuhe oyín etọn nọtena lẹpo wutu. (1 Otannugbo lẹ 29:10-13; Psalm 8:1; 148:13) Owanyi he mí tindo na oyín Jehovah tọn na gọalọna mí nado dapana nudepope he na kọ̀n masin do oyín wiwe enẹ go wiwà. (Ezekiẹli 36:20, 21; Lomunu lẹ 2:21-24) To whenuena e yindọ jijọho wẹkẹ lọ po mẹhe nọ nọ̀ e mẹ lẹ po tọn sinai do oyín Jehovah tọn kinklandowiwe po owanyi yíyí do litaina nupojipetọ-yinyin etọn po ji, odẹ̀ lọ dọ “hihiọ wẹ oyín towe” yin dohia jidide mítọn tọn dọ lẹndai Jehovah tọn na yin hinhẹndi nado hẹn pipà wá na ẹn.—Ezekiẹli 38:23.
Ahọluduta He Mí Nọ Hodẹ̀na
7, 8. (a) Ahọluduta tẹwẹ Jesu plọn mí nado nọ hodẹ̀na? (b) Etẹwẹ mí plọn gando Ahọluduta ehe go to owe Daniẹli po Osọhia po tọn mẹ?
7 Obiọ awetọ to odẹ̀ apajlẹ tọn lọ mẹ wẹ: “Ahọludu towe ni wá.” (Matiu 6:10) Obiọ ehe tindo kanṣiṣa pẹkipẹki hẹ tintan lọ. Ahọluduta Mẹssia tọn, yèdọ gandudu olọn mẹ tọn he Jesu Klisti yin Ahọlu dide etọn wẹ Jehovah na yizan nado klan oyín etọn do wiwe. (Psalm 2:1-9) Dọdai Daniẹli tọn do Ahọluduta Mẹssia tọn hia taidi “zannu” heyin sinsán sọn “osó” de go. (Daniẹli 2:34, 35, 44, 45) Osó lọ nọtena nupojipetọ-yinyin wẹkẹ mẹ tọn Jehovah tọn, enẹwutu zannu he nọtena Ahọluduta lọ yin dohia yọyọ gandudu Jehovah tọn de to wẹkẹ lọ mẹ. To dọdai lọ mẹ, zannu lọ wá ‘lẹzun osó daho de bosọ gọ́ aigba lọ pete ji,’ ehe dohia dọ Ahọluduta Mẹssia tọn lọ na nọtena nupojipetọ-yinyin Jiwheyẹwhe tọn nado dugán do aigba ji.
8 Omẹ 144 000 devo lẹ he kọnawudopọ hẹ Klisti to Ahọluduta ehe mẹ lẹ, “wẹ yè fligọ sọn gbẹtọ lẹ mẹ” nado dugán hẹ ẹ taidi ahọlu po yẹwhenọ lẹ po. (Osọhia 5:9, 10; 14:1-4; 20:6) Daniẹli dlẹnalọdo yé taidi “mẹwiwe Gigogán tọn lẹ,” he, to pọmẹ hẹ Klisti Tatọ́ yetọn, mọ “ahọludu lọ po ahọluigba lọ po, podọ kiklo ahọludu lẹ lọ tọn [yí] to olọn pete glọ . . . , ahọludu madopodo de wẹ ahọludu [yetọn], ahọluigba lẹpo na nọ sẹ̀n bosọ setonuna [yé].” (Daniẹli 7:13, 14, 18, 27) Gandudu olọn mẹ tọn enẹ wẹ Klisti plọn hodotọ etọn lẹ nado nọ hodẹ̀na.
Naegbọn Mí Gbẹ́ Nọ Hodẹ̀ dọ Ahọluduta lọ Ni Wá?
9. Naegbọn e do yin nuhe sọgbe dọ mí ni nọ hodẹ̀ dọ Ahọluduta Jiwheyẹwhe tọn ni wá?
9 To odẹ̀ apajlẹ tọn etọn mẹ, Klisti plọn mí nado nọ hodẹ̀ dọ Ahọluduta Jiwheyẹwhe tọn ni wá. Hẹndi dọdai Biblu tọn lẹ tọn dohia dọ Ahọluduta Mẹssia tọn yin zizedai to olọn mẹ to 1914.a Enẹwutu, be e gbẹ́ sọgbe dọ mí ni nọ hodẹ̀ dọ Ahọluduta enẹ ni “wá” ya? Mọwẹ. Doayi e go dọ to dọdai Daniẹli tọn mẹ, Ahọluduta Mẹssia tọn, he zannu de nọtena, wẹ na gídí boṣiọ daho de he nọtena gandudu tonudidọ gbẹtọvi tọn lẹ. To madẹnmẹ zannu lọ na diọnukunsọ boṣiọ enẹ, bo na lí ì pọ́dọ́pọ́dọ́. Dọdai Daniẹli tọn dọmọ: “Yè ma na jo ahọludu etọn dai hlan gbẹtọ devo lẹ gba; ṣigba e na gbà ahọludu do flinflin bo sú ahọludu he lẹpo do, ewọ bo nasọ nọte kakadoi.”—Daniẹli 2:44.
10. Naegbọn mí tin to jejeji dọ Ahọluduta Jiwheyẹwhe tọn ni wá?
10 Mí to jejeji nado mọ nuyiwa Ahọluduta Jiwheyẹwhe tọn tọn sọta aihọn ylankan Satani tọn na ehe na dekọtọn do klandowiwe oyín gigonọ Jehovah tọn po mẹhe jẹagọdo nupojipetọ-yinyin Jiwheyẹwhe tọn lẹpo didesẹ po mẹ. Odẹ̀ vivẹ mítọn wẹ yindọ: “Ahọludu towe ni wá,” podọ mí kọngbedopọ hẹ apọsteli Johanu dọ: “Niṣẹ. Wá, Jesu Oklunọ.” (Osọhia 22:20) Mọwẹ, na Jesu ni wá klan oyín Jehovah tọn do wiwe bo suwhẹna nupojipetọ-yinyin Etọn, na ohó psalm-kàntọ tọn lẹ nido sọgan mọ hẹndi yí dọmọ: “Na yè nido yọnẹn dọ, hiẹ, oyín mẹhe tọn dopo kẹdẹ nọ yin Jehovah, wẹ Gigogán to wẹkẹ lẹpo ji.”—Psalm 83:18.
“Ojlo Towe Ni Yin Wiwà”
11, 12. (a) Etẹ biọ wẹ mí te to whenuena mí hodẹ̀ dọ ojlo Jiwheyẹwhe tọn “ni yin wiwà to aigba go, dile e te to olọn mẹ”? (b) Onú devo tẹlẹ wẹ dẹ̀hiho dọ ojlo Jehovah tọn ni yin wiwà zẹẹmẹdo?
11 Enẹgodo Jesu plọn devi etọn lẹ nado nọ hodẹ̀ dọmọ: “Ojlo towe ni yin wiwà to aigba go, dile e te to olọn mẹ.” (Matiu 6:10) Ojlo Jehovah tọn wẹ zọ́n bọ wẹkẹ mítọn do yin didá. Nudida huhlọnnọ olọn tọn lẹ dawhá jẹgbonu dọmọ: “[Jehovah] mítọn podọ Jiwheyẹwhe mítọn, hiẹ wẹ jẹ nado yí gigo, yẹyi, po huhlọn po: na hiẹ wẹ dá onú popo, podọ to ojlo towe mẹ wẹ yé do tin, bọ yè sọ do dá yé.” (Osọhia 4:11) Jehovah tindo lẹndai de na nuhe “tin to olọn mẹ, po ehe tin to aihọn mẹ po” lẹ. (Efesunu lẹ 1:8-10) Gbọn dẹ̀hiho dọ ojlo Jiwheyẹwhe tọn ni yin wiwà dali, na taun tọn, mí to bibiọ to Jehovah si nado hẹn lẹndai etọn di. Humọ, mí sọ to didohia dọ mí tin to jejeji nado mọdọ ojlo Jiwheyẹwhe tọn yin wiwà to wẹkẹ lọ blebu mẹ.
12 Mí sọ nọ dohia gbọn odẹ̀ ehe dali dọ mí wleawufo nado hẹn gbẹzan mítọn tin to kọndopọmẹ hẹ ojlo Jehovah tọn. Jesu dọmọ: “Núdùdù ṣie wẹ nado wà ojlo mẹhe do mi hlan tọn podọ nado dotana azọ́n etọn.” (Johanu 4:34) Taidi Klistiani he ko basi klandowiwe lẹ, mí nọ hùnhomẹ to ojlo Jiwheyẹwhe tọn wiwà mẹ dile Jesu basi do. Owanyi he mí tindo na Jehovah po Ovi etọn po nọ whàn mí ma nado zan gbẹzan mítọn “hlan wantuntun gbẹtọ tọn, adavo hlan ojlo Jiwheyẹwhe tọn.” (1 Pita 4:1, 2; 2 Kọlintinu lẹ 5:14, 15) Mí nọ tẹnpọn nado dapana nuhe mí yọnẹn dọ yé jẹagọdo ojlo Jehovah tọn lẹ. (1 Tẹsalonikanu lẹ 4:3-5) Gbọn ojlẹ fifli na Biblu hihia po nupinplọn po dali, mí nọ “tunwun nuhe ojlo [Jehovah] tọn yin go,” ehe bẹ mahẹ zohunhun tọn tintindo to yẹwheho “wẹndagbe ahọludu tọn” didọ mẹ hẹn.—Efesunu lẹ 5:15-17; Matiu 24:14.
Ojlo Jehovah Tọn to Olọn Mẹ
13. Nawẹ ojlo Jiwheyẹwhe tọn ko to yinyin wiwà na whenu dindẹn jẹnukọnna atẹṣiṣi Satani tọn gbọn?
13 Ojlo Jehovah tọn ko to yinyin wiwà to olọn mẹ na whenu dindẹn whẹpo visunnu gbigbọmẹ tọn etọn dopo do ṣiatẹ bo lẹzun Satani. Owe Howhinwhẹn lẹ tọn basi zẹẹmẹ Ovi plọnji Jiwheyẹwhe tọn taidi mẹhe do nuyọnẹn nujọnu tọn hia. E dohia dọ na owhe madosọha lẹ, Visunnu dopo akàn Jiwheyẹwhe tọn “to ayajẹ whepoponu to nukọn etọn,” bo yí homẹhun do wà ojlo Otọ́ etọn tọn. To nukọn mẹ, e lẹzun “azọ́nwatọgán” Jehovah tọn to onú lẹpo he tin “to olọn lẹ mẹ, po ehe tin to aihọn mẹ po, ehe yè mọ po ehe yè ma mọ po” didá mẹ. (Howhinwhẹn lẹ 8:22-31; Kọlọsinu lẹ 1:15-17) Jehovah yí Jesu zan taidi Ohó, kavi Hoyidọtọ etọn.—Johanu 1:1-3.
14. Etẹwẹ mí sọgan plọn sọn Psalm 103 mẹ gando lehe angẹli lẹ nọ wà ojlo Jehovah tọn to olọn mẹ do go?
14 Psalm-kàntọ lọ dohia dọ nupojipetọ-yinyin Jehovah tọn wẹ yin popo to popo ji bọ awhàngbẹ́ angẹli lẹ tọn nọ dotoaina anademẹ po gbedide etọn lẹ po. Mí hia dọmọ: “OKLUNỌ ko hẹn ofìn etọn lodo to olọn lẹ mẹ; ahọludu etọn dugán to onú popo ji. Mì dona OKLUNỌ, mì angẹli etọn lẹ emi; mì hlọnhlọnnọ to huhlọn mẹ lẹ emi, he to ohó etọn basi, he to totùnai hlan ogbè ohó etọn tọn. Mì dona OKLUNỌ, mì awhàn etọn lẹ emi; mì devizọnwatọ etọn lẹ, he to homẹhunnu etọn wà lẹ. Mì dona OKLUNỌ, mì azọ́n etọn lẹpo, to ofi ahọludutẹn [kavi nupojipetọ-yinyin] etọn te lẹpo mẹ.”—Psalm 103:19-22.
15. Nawẹ huhlọn Ahọluduta tọn he Jesu mọyi yidogọna ojlo Jiwheyẹwhe tọn wiwà to olọn mẹ gbọn?
15 To atẹṣiṣi etọn godo, dotẹnmẹ lọ gbẹ́ hundote na Satani nado biọ olọn mẹ, dile owe Job tọn dohia do. (Job 1:6-12; 2:1-7) Ṣigba, owe Osọhia tọn dọ dọdai dọ ojlẹ lọ na wá bọ Satani po aovi etọn lẹ po na yin yinyàn sọn olọn mẹ. E họnwun dọ ojlẹ enẹ wá to whenuena Jesu Klisti mọ huhlọn Ahọluduta tọn yí to 1914 godo tlolo. Sọn whenẹnu gbọ́n, atẹṣitọ enẹlẹ ma sọgan biọ olọn mẹ ba. Yé yin ginglọn do lẹdo aigba tọn ji. (Osọhia 12:7-12) Ogbè nudindọn tọn depope ma na yin sisè to olọn mẹ ba, adavo ogbè he nọpọ́ bo to gigopana “Lẹngbọvu lọ,” Klisti Jesu, bosọ to Jehovah pà to taliai mẹ lẹ kẹdẹ. (Osọhia 4:9-11) Matin ayihaawe ojlo Jehovah tọn to yinyin wiwà to olọn mẹ.
Ojlo Jehovah Tọn Na Aigba
16. Nawẹ odẹ̀ apajlẹ tọn lọ do nuplọnmẹ Mẹylọhodotọklisti tọn gando todido gbẹtọvi tọn go hia nado yin lalo gbọn?
16 Gbọn pinplọnmẹ dọ mẹdagbe lẹpo wẹ jei olọn mẹ dali, ṣọṣi Mẹylọhodotọklisti tọn lẹ to didohia dọ Jiwheyẹwhe ma tindo lẹndai de na aigba. Ṣigba Jesu plọn mí nado nọ hodẹ̀ dọmọ: “Ahọludu towe ni wá. Ojlo towe ni yin wiwà to aigba go, dile e te to olọn mẹ.” (Matiu 6:10) Nado dọ hójọhó, be mí sọgan dọ dọ ojlo Jehovah tọn lẹpo ko to yinyin wiwà todin to aigba he ji danuwiwa, whẹdida agọ̀, azọ̀n, po okú po pavàvà do ya? Paali! Enẹwutu mí dona nọ hodẹ̀ vivẹvivẹ dọ ojlo Jiwheyẹwhe tọn ni yin wiwà to aigba ji, to kọndopọmẹ hẹ opagbe he apọsteli Pita kandai dọmọ: “Di opagbe etọn, míwlẹ to nukundo olọn yọyọ lẹ [gandudu Ahọluduta Mẹssia tọn gbọn Klisti dali], po aigba yọyọ de po [ogbẹ́ gbẹtọvi dodonọ lẹ tọn], ofi he dodo nọ nọ̀.”—2 Pita 3:13.
17. Etẹwẹ yin lẹndai Jehovah tọn na aigba?
17 Jehovah dá aigba na e tindo lẹndai de na ẹn wutu. E gbọdo yẹwhegán Isaia nado wlan dọmọ: “Le wẹ OKLUNỌ he dá olọn lẹ lọ dọ, Jiwheyẹwhe lọsu he dá aihọn, bosọ basi i; e ko hẹn ẹn nọte, e ma dá ẹ tata gba, e do e na mí nido nọ nọ̀ e mẹ, yẹn wẹ OKLUNỌ; mẹdevo ma tin.” (Isaia 45:18) Jiwheyẹwhe ze sunnu po yọnnu tintan lọ po do jipa paladisi tọn de mẹ bo dọna yé dọmọ: “Mì yin sinsẹ́nnọ, bo sudeji, bosọ gọ́ aigba ji, bo dugán do e ji.” (Gẹnẹsisi 1:27, 28; 2:15) E họnwun hezeheze dọ lẹndai Mẹdatọ lọ tọn wẹ yindọ akọ̀ gbẹtọvi pipé dodonọ he nọ yí ayajẹ do litaina nupojipetọ-yinyin Jehovah tọn lẹ tọn ni nọ̀ aigba ji bo nọgbẹ̀ kakadoi to Paladisi he Klisti dopagbe etọn lọ mẹ.—Psalm 37:11, 29; Luku 23:43.
18, 19. (a) Whẹpo ojlo Jiwheyẹwhe tọn na yin wiwà mlẹnmlẹn to aigba ji, etẹwẹ dona yin wiwà whẹ́? (b) Adà odẹ̀ apajlẹ tọn Jesu tọn devo tẹlẹ wẹ na yin hodọdeji to hosọ he bọdego mẹ?
18 Ojlo Jehovah tọn na aigba ma sọgan yin hinhẹndi mlẹnmlẹn pọ́n gbede eyin sunnu po yọnnu po he diọnukunsọ nupojipetọ-yinyin etọn lẹ gbẹ́ gọ́ aigba lọ ji. Gbọn awhànpa gbigbọnọ huhlọnnọ he Klisti yin nukọntọ na lẹ yiyizan dali, Jiwheyẹwhe na “husudo yé he to aihọn husudo lẹ.” Titonu ylankan Satani tọn blebu he bẹ sinsẹ̀n lalo, tonudidọ gblezọn, ajọwiwa nukunkẹn tọn, nugbomadọ tọn, po awhànpa mẹhusudo tọn lẹ po hẹn na yin didesẹ kakadoi. (Osọhia 11:18; 18:21; 19:1, 2, 11-18) Nupojipetọ-yinyin Jehovah tọn na yin whẹsuna bọ oyín etọn na yin kinklandowiwe. Ehe lẹpo biọ wẹ mí te to whenuena mí hodẹ̀ dọmọ: “Otọ́ mítọn he tin to olọn mẹ, hihiọ wẹ oyín towe. Ahọludu towe ni wá. Ojlo towe ni yin wiwà to aigba go, dile e te to olọn mẹ.”—Matiu 6:9, 10.
19 Ṣigba, to odẹ̀ apajlẹ tọn etọn mẹ, Jesu dohia dọ mí sọgan hodẹ̀ na whẹho mítọn titi lẹ ga. Adà nuplọnmẹ etọn tọn ehelẹ do odẹ̀ ji na yin hodọdeji to hosọ he bọdego mẹ.
[Nudọnamẹ Odò Tọn]
a Pọ́n weta 6 to owe Payi Dọdai Daniẹli Tọn Go! mẹ, heyin zinzinjẹgbonu gbọn Kunnudetọ Jehovah tọn lẹ dali.
Dogbapọn
• Naegbọn e do yin nuhe sọgbe dọ mí ni ylọ Jehovah dọ “Otọ́ mítọn”?
• Naegbọn dẹ̀hiho na klandowiwe oyín Jehovah tọn dona nọ duahunmẹna mí hú nulẹpo?
• Naegbọn mí nọ hodẹ̀ dọ Ahọluduta Jiwheyẹwhe tọn ni wá?
• Etẹwẹ dẹ̀hiho dọ ojlo Jiwheyẹwhe tọn ni yin wiwà to aigba ji dile e te do to olọn mẹ zẹẹmẹdo?
[Yẹdide to weda 9]
Odẹ̀ Jesu tọn gbọnvo mlẹnmlẹn na odẹ̀ dodonọ jijlá Falesi lẹ tọn
[Yẹdide to weda 10]
Klistiani lẹ nọ hodẹ̀ dọ Ahọluduta Jiwheyẹwhe tọn ni wá, oyín etọn ni yin kinklandowiwe, podọ ojlo etọn ni yin wiwà