Kanbiọ lẹ sọn Wehiatọ lẹ Dè

To odẹ̀ apajlẹ tọn etọn mẹ, be Jesu dohia dọ ojlo Jiwheyẹwhe tọn ko yin wiwà to olọn mẹ dile etlẹ yindọ angẹli ylankan lẹ ma ko yin yinyan jẹgbonu wẹ ya?

Dile e yin kinkàndai do to Matiu 6:10 mẹ, Jesu dọmọ: “Ojlo towe ni yin wiwà to aigba go, dile e te to olọn mẹ.” Obiọ ehe sọgan yin nukunnumọjẹemẹ to aliho awe mẹ. Tintan, taidi obiọ vivẹvivẹ de na ojlo Jiwheyẹwhe tọn nido yin wiwà to aigba ji dile e ko yin wiwà do to olọn mẹ kavi, awetọ, taidi obiọ de dọ e ni yin wiwà mlẹnmlẹn to olọn mẹ podọ to aigba ji.a Zẹẹmẹ he tin to godo na hogbe he Jesu dọ jẹnukọn lọ lẹ dọ, “ahọludu towe ni wá,” dohia dọ pọndohlan awetọ lọ sọgbe hẹ Owe-wiwe hugan. Podọ e do ninọmẹ he tin to aimẹ to whenuena Jesu tin to aigba ji po ojlẹ dindẹn to enẹgodo po tọn hia. Gbọnna?

Owe Osọhia tọn dlẹnalọdo kọdetọn voovo awe he Ahọluduta Jiwheyẹwhe tọn zizedai to olọn mẹ tindo. Tintan gando olọn lọsu go, awetọ, gando aigba go. Osọhia 12:7-9, 12 dọmọ: “Awhàn de sọ tin to olọn mẹ: Mikaẹli po angẹli etọn lẹ po to avùnho hẹ dlagọni lọ; dlagọni lọ sọ to avùnho po angẹli etọn lẹ po, yé ma sọ gbawhàn; mọ otẹn ma sọ tin na yé to olọn mẹ ba. Yé sọ yàn dlagọni daho lọ jẹgbonu, odàn hoho lọ, he yè nọ ylọ Lẹgba, podọ Satani, he nọ to aihọn lẹpo klọ: yè yàn ẹn dlan aigba ji bosọ yàn angẹli etọn lẹ jẹgbonu po e po. Enẹwutu mì to ayajẹ, mì olọn lẹ emi, po mì he nọnọ̀ yé mẹ lẹ po. Dindọn hlan aihọnmẹnu lẹ, podọ hlan yé he tin to ohù mẹ lẹ, na Lẹgba lọ ko jẹte wá mì dè, po homẹgble daho po wutu, na e yọnẹn dọ whenu gli de wẹ e tindo.”

Yinyan jẹgbonu Satani po aovi lẹ po tọn sọn olọn mẹ to 1914 godo zà gbigbọ atẹṣitọ lẹpo sẹ̀ sọn agblò ehe mẹ, bo hẹn ayajẹ susu wá na angẹli heyin visunnu nugbonọ Jehovah tọn lẹ, he na taun tọn, nọtena suhugan nudida gbigbọnọ etọn lẹ tọn. (Job 1:6-12; 2:1-7; Osọhia 12:10) Gbọnmọ dali, obiọ lọ to odẹ̀ apajlẹ tọn Jesu tọn mẹ, na nuhe dù olọn, mọ hẹndi yí. Mẹhe pò to agblò olọn tọn lọ mẹ lẹpo yin nugbonọ hlan Jehovah bo litai mlẹnmlẹn na nupojipetọ-yinyin etọn.

E dona yin nùzindeji dọ etlẹ yin jẹnukọnna enẹ, to whenuena angẹli ylankan lẹ gbẹ́ tindo dotẹnmẹ-hundote nado nọ yì olọn mẹ, yé ko yin yinyan sọn whẹndo Jiwheyẹwhe tọn mẹ bo tin to alọhẹndotenamẹ nujọnu tọn glọ. Di apajlẹ, Juda 6 dohia dọ to owhe kanweko tintan W.M. mẹ, yé yin zize “whlá to ogàn madopodo mẹ to zinvlu [gbigbọmẹ tọn] glọ hlan whẹdida azán daho lọ tọn gbè.” Mọdopolọ, 2 Pita 2:4 dọmọ: ‘Jiwheyẹwhe ma gbọ sọn angẹli lẹ go whenuena yé waylando, ṣigba bọ e sisẹ yé dlan Taltalu mẹ [ninọmẹ winyandomẹ mlẹnmlẹn tọn de], bo jo yé hlan ogàn zinvlu [gbigbọ] mẹ tọn, nado sọ yé whlá jẹ whẹdazangbe.’b

To vogbingbọn pete mẹ na ninọmẹ yetọn taidi mẹyandogbe lẹ to whenuena yé gbẹ́ tin to olọn mẹ, angẹli ylankan lẹ ko yí aṣẹpipa daho zan do aigba ji. Nalete, Ohó Jiwheyẹwhe tọn ylọ Satani dọ “ahọvi aihọn he tọn,” bo ylọ aovi lẹ dọ “nukọntọ zinvlu aihọn he tọn lẹ.” (Johanu 12:31; Efesunu lẹ 6:11, 12; 1 Johanu 5:19) Na aṣẹpipa etọn wutu, Lẹgba sọgan ze “ahọluigba aihọn tọn lẹpo, po gigo yetọn po” donukọnna Jesu na nuyiwa sinsẹ̀n-bibasi tọn dopo. (Matiu 4:8, 9) To whelọnu lo, e họnwun dọ whenuena Ahọluduta Jiwheyẹwhe tọn na dlẹnkan ‘wá’ aigba ji, e na hẹn diọdo titengbe lẹ wá.

Tofi to aigba ji, ‘wiwá’ Ahọluduta Jiwheyẹwhe tọn na dekọtọn do titonu yọyọ pete mẹ. Ahọluduta lọ na gbà gandudu gbẹtọ tọn lẹpo do flinflin bo na lẹzun gandudu dopo akàn aigba tọn. To ojlẹ dopolọ mẹ, gbẹtọvi budisi Jiwheyẹwhe tọ́ heyin mẹjidugando etọn lẹ na yin “aigba yọyọ de.” (2 Pita 3:13; Daniẹli 2:44) Ahọluduta lọ nasọ de ylando sẹ̀ mlẹnmlẹn sọn gbẹtọvi tonusetọ lẹ dè podọ to godo mẹ e na diọ aigba zun paladisi lẹdo aihọn pé de, bo gbọnmọ dali súnsún ohia gandudu Satani tọn lẹpo sẹ̀.—Lomunu lẹ 8:20, 21; Osọhia 19:17-21.

To vivọnu Owhe Fọtọ́n lọ tọn, to whenuena Ahọluduta Mẹssia tọn ko wà ojlo Jiwheyẹwhe tọn dotana, “Ovi na ede na yin mẹmẹglọ ga hlan ewọ he yí onú lẹpo do oglọ etọn, na Jiwheyẹwhe nido yin popo to onú popo mẹ.” (1 Kọlintinu lẹ 15:28) To whenẹnu lo mẹwhlepọn godo tọn de na tin, ehe godo Satani, aovi etọn lẹ, po gbẹtọvi atẹṣitọ heyin hinhẹn buali lẹ po na yin vivasudo kakadoi to “okú awetọ” mẹ. (Osọhia 20:7-15) Enẹgodo, nudida nuyọnẹntọ lẹpo to olọn mẹ podọ to aigba ji na tin to taliai ayajẹ tọn de mẹ na nupojipetọ-yinyin owanyinọ Jehovah tọn kakadoi. To adà lẹpo mẹ, ehe na yin hẹndi mlẹnmlẹn hogbe odẹ̀ apajlẹ tọn Jesu tọn lẹ tọn.—1 Johanu 4:8.

[Nudọnamẹ Odò Tọn]