‘Sọlọmọni Mayin Aṣọdona di Dopo to Ehelẹ Mẹ’

VOUNVOUN gbémẹ tọn lẹ taidi dehe yin mimọ tofi lẹ nọ saba yin mimọ to aliho lẹ pá to hùwaji Aflika tọn. Yé nọ yin yiylọdọ cosmos bo wá sọn lẹdo yozònọ Amelika tọn lẹ mẹ. Vounvoun whanpẹnọ enẹlẹ sọgan flin mí nuplọnmẹ Jesu tọn de. Susu to hosetọ etọn lẹ mẹ yin wamọnọ, bo to nuhà tlala dogbọn nuhudo agbasa tọn yetọn lẹ dali, he bẹ núdùdù po avọ̀ po hẹn.

‘Na nuhe dù avọ̀,’ Jesu kanse dọ, ‘naegbọn mì to nuhà? Mì pọ́n lii danji tọn lẹ, le yé to whinwhẹ́n; yé ma wazọ́n, mọ yé ma nọ sẹ́sekan: ṣigba yẹn dọ hlan mì, dọ Sọlọmọni mayin aṣọdona to gigo etọn lẹpo mẹ di dopo to ehelẹ mẹ.’—Matiu 6:28, 29.

Linlẹn susu wẹ tin gando wunmẹ vounvoun gbémẹ tọn he Jesu tindo to ayiha mẹ go. Nalete, Jesu yí i jlẹdo ogbé paa lẹ go, bo dọmọ: “Ṣigba, eyin Jiwheyẹwhe doaṣọna ogbé danji tọn, he tin to egbé, bọ yè sọ ze dlan zòkán mẹ to osọ̀, be nẹmunẹmu wẹ e ma na ṣinyọnavọ̀na mì, mì yise pẹvinọ?”—Matiu 6:30.

Dile etlẹ yindọ vounvoun cosmos ehelẹ ma tin to Islaeli, yé nọgodona nuplọnmẹ Jesu tọn na jide tọn. Eyin mí pọ́n yé hlan sọn zọ̀-gaa kavi sọn yakẹ, whanpẹ yetọn nọ sẹhundaga bo nọ dọ̀n ayidonugo fọtodetọ po yẹdenanutọ lẹ tọn po tlala. Na nugbo tọn, Jesu ma to hójlẹ to whenuena e dọ dọ, ‘Sọlọmọni mayin aṣọdona to gigo etọn lẹpo mẹ di dopo to ehelẹ mẹ’ gba.

Etẹwẹ mí plọn sọn ehe mẹ to egbehe? Mẹhe to Jiwheyẹwhe sẹ̀n lẹ sọgan deji dọ ewọ na gọalọna yé nado mọ dandannu gbẹ̀mẹ tọn lẹ etlẹ yin to ojlẹ sinsinyẹn lẹ mẹ. Jesu dọmọ: “Mì [nọ] dín ahọludu [Jiwheyẹwhe tọn]; onú helẹ pó [taidi núdùdù po avọ̀ he nuhudo tin na po] wẹ yè na yí dogọ na mì.” (Luku 12:31) Mọwẹ, ale nujọnu tọn lẹ nọ wá sọn Ahọluduta Jiwheyẹwhe tọn dindin mẹ. Ṣigba be hiẹ yọ́n nuhe Ahọluduta Jiwheyẹwhe tọn yin podọ nuhe e na wà na gbẹtọvi lẹ ya? Homẹ Kunnudetọ Jehovah tọn lẹ tọn na hùn nado gọalọna we nado mọ gblọndo lọ lẹ sọn Biblu mẹ.