Nọgodona Ahọluduta Jiwheyẹwhe Tọn Bẹsọn Din!
Mí ni dọ dọ a sè dọ jẹhọn ylankan de jlo na yìn to okọ́ towe mẹ. Gandutọ lẹ jẹ avase na ji dọ: “MÌ HỌ̀N! MÌ YAWU HỌ̀N SỌN FI!” Etẹ a na wà? E họnwun dọ a na họ̀n.
Ninọmẹ mọnkọ mẹ wẹ mímẹpo te. Nujijọ de na dán aihọn lọ to madẹnmẹ, bọ Jesu ylọdọ “nukunbibia daho.” (Matiu 24:21) Mí ma gán họ̀nna nukunbibia enẹ. Amọ́, mí gán ze afọdide delẹ nado whlẹn ogbẹ̀ mítọn. Afọdide tẹlẹ?
To gbèdopo he Jesu Klisti to yẹwhehodọ to osó ji, e dọ dọ: “Enẹwutu, mì zindonukọn nado to Ahọluduta [Jiwheyẹwhe tọn] po dodowiwa etọn po dín whẹ́, podọ nudevo ehe lẹpo na yin yiyidogọ na mì.” (Matiu 6:33) Nawẹ mí na wàmọ gbọn?
Dín Ahọluduta lọ whẹ́. Ehe zẹẹmẹdo dọ Ahọluduta Jiwheyẹwhe tọn dona yin nujọnu na mí hú nudevo depope. (Matiu 6:25, 32, 33) Etẹwutu? Na gbẹtọvi lẹ ma gán didẹ nuhahun mítọn lẹ. Ahọluduta Jiwheyẹwhe tọn kẹdẹ wẹ pé e go.
Dín dodowiwa etọn. Mí dona nọ wà nuhe go mí pé lẹpo nado yìn osẹ́n Jiwheyẹwhe tọn lẹ. Etẹwutu? Na eyin mí nọ jlo na wà nuhe jlo mí, e ma na fó do dagbe ji na mí. (Howhinwhẹn lẹ 16:25) Amọ́, eyin mí nọ yìn osẹ́n Jiwheyẹwhe tọn lẹ, e na vivi na ẹn bọ ogbẹ̀ mítọn nasọ yọ́n.—Isaia 48:17, 18.
Nọ dín Ahọluduta lọ po dodowiwa etọn po whẹ́. Jesu na avase dọ mẹdelẹ na lẹndọ akuẹ susu dindin wẹ na zọ́n bọ ogbẹ̀ yetọn na yọ́n. Na mẹdevo lẹ, tukla gbẹ̀mẹ tọn lẹ gán zọ́n bọ yé ma na mọ whenu na Ahọluduta Jiwheyẹwhe tọn ba.—Matiu 6:19-21, 25-32.
Amọ́, Jesu dopagbe dọ Jiwheyẹwhe ma na jo mẹhe nọ dín Ahọluduta etọn lẹ do, bọ yé nasọ mọ ayajẹ po dona susu po to osọ.—Matiu 6:33.
Nugbo wẹ dọ devi Jesu tọn lẹ dín Ahọluduta lọ po dodowiwa etọn po, amọ́ yé gbẹ́ doakọnna yajiji. Etomọṣo, Jiwheyẹwhe ma jo yé do. Gbọnna?
Osẹ́n Jiwheyẹwhe tọn he yé yìn zọ́n bọ yé ma jiya dile e nọ yindo na mẹhe nọ vẹtoli lẹ. Yise he yé tindo dọ Ahọluduta Jiwheyẹwhe tọn na wá wẹ gọalọna yé nado doakọnna tukla gbẹ̀mẹ tọn he sinyẹn taun lẹ. Podọ Jiwheyẹwhe na yé “huhlọn he hú jọwamọ tọn,” bọ yé doakọnnanu.—2 Kọlintinu lẹ 4:7-9.
BE A NA DÍN AHỌLUDUTA LỌ WHẸ́ YA?
Klistiani he nọgbẹ̀ to hohowhenu lẹ setonuna gbedide Jesu tọn nado dín Ahọluduta lọ whẹ́. Yé lá wẹndagbe Ahọluduta lọ tọn gbọn filẹpo. (Kolosinu lẹ 1:23) To egbehe, be mẹdelẹ gbẹ́ to mọwà ya?
Mọwẹ! Kunnudetọ Jehovah tọn lẹ yọnẹn dọ to madẹnmẹ Ahọluduta Jiwheyẹwhe tọn na và aihọn ehe sudo. Enẹwutu, yé nọ wanu sọgbe hẹ gbedide Jesu tọn lọ dọ: “Yẹwheho wẹndagbe Ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo, podọ whenẹnu wẹ opodo lọ na wá.”—Matiu 24:14.
Be a na kẹalọyi wẹndagbe enẹ ya? E na yọ́n taun eyin a gán wanu di Klistiani hohowhenu tọn delẹ he nọ Belea, to Makedonia. To whenue apọsteli Paulu lá wẹndagbe lọ na yé, “yé yí jeje daho tlala do kẹalọyi ohó lọ.” Enẹgodo, yé “yí sọwhiwhe do gbadopọnna Owe-wiwe lẹ” nado dindona nuhe yé sè lẹ bo wanu sọgbe hẹ nuhe yé plọn lẹ.—Owalọ lẹ 17:11, 12.
Hiẹ lọsu gán wà nudopolọ. Eyin a nọ dín Ahọluduta lọ po dodowiwa etọn po whẹ́, Jiwheyẹwhe na nọhẹ we todin bo nasọ na we jijọho kakadoi to osọ.