Baptẹm—Yanwle He Nọ Hẹn Ale Wá De!

Jesu plọn mí dọ baptẹm yin afọdide de he Klistiani lẹpo dona ze. (Hia Matiu 28:19, 20.) Etẹwẹ baptẹm yin? Podọ etẹwẹ mẹde dona wà nado jẹ yanwle enẹ kọ̀n?

1. Etẹwẹ baptẹm yin?

Hogbe lọ “baptizi” wá sọn hogbe Glẹkigbe tọn de mẹ, he zẹẹmẹdo “nado zín” do osin mẹ. Whenue Jesu yin bibaptizi, ewọ yin yinylọ́n do Tọ̀sisa Jọdani tọn mẹ, podọ enẹgodo e “tọ́n sọn osin lọ mẹ.” (Malku 1:9, 10) To aliho dopolọ mẹ, nado yin bibaptizi, Klistiani nugbo lẹ nọ yin zínzín kavi yin yinylọ́n do osin mẹ mlẹnmlẹn.

2. Etẹwẹ baptẹm-yíyí nọ dohia?

Eyin mẹde yí baptẹm, mẹlọ nọ dohia dọ emi ko klan emide do wiwe hlan Jehovah Jiwheyẹwhe. Aliho tẹ mẹ wẹ mẹde nọ basi klandowiwe te? Jẹnukọnna baptẹm, mẹlọ nọ hodẹ̀ edeṣo bo nọ dọna Jehovah dọ emi jlo na sẹ̀n Ewọ kakadoi. E nọ dopà nado basi sinsẹ̀n hlan Jehovah kẹdẹ bosọ nọ ylọ ojlo Jiwheyẹwhe tọn wiwà dọ nujọnu hugan to gbẹzan etọn mẹ. Mẹlọ nọ basi nudide nado “mọ́n ede” bosọ nọ to nuplọnmẹ Jesu tọn lẹ po apajlẹ etọn po ‘hodo zọnmii.’ (Matiu 16:24) Klandowiwe po baptẹm mẹde tọn po nọ hẹn ẹn yọnbasi na mẹlọ nado tindo haṣinṣan pẹkipẹki hẹ Jehovah podọ hẹ yisenọ hatọ lẹ.

3. Etẹlẹ wẹ mẹde dona wà nado pegan na baptẹm?

A sọgan jẹ awuwle ji nado yí baptẹm eyin a nọ plọnnu gando Jehovah go bosọ hẹn yise towe to ewọ mẹ lodo. (Hia Heblu lẹ 11:6.) Lehe nuhe a yọnẹn gando Jehovah go lẹ po yise towe to ewọ mẹ po to jijideji sọ, mọ wẹ owanyi towe na Ewọ na siso dogọ do niyẹn. Podọ e họnwun dọ enẹ na whàn we nado nọ dọho Jehovah tọn na mẹdevo lẹ bo nọ setonuna nujinọtedo etọn lẹ. (2 Timoti 4:2; 1 Johanu 5:3) Eyin mẹde “[jẹ zọnlinzin ji] dile e jẹ do to Jehovah nukọn nado hẹn homẹ etọn hùn to gigọ́ mẹ,” mẹlọ sọgan basi dide nado klan gbẹzan etọn do wiwe hlan Jiwheyẹwhe bo yí baptẹm.—Kolosinu lẹ 1:9, 10.a

DINDONANU DOGỌ

4. Nuhe mí sọgan plọn sọn baptẹm Jesu tọn mẹ

Hia Matiu 3:13-17 nado mọ nudọnamẹ susu dogọ gando baptẹm Jesu tọn go. Enẹgodo, dọhodo kanbiọ ehelẹ ji:

• Be Jesu gbẹ́ yin yọpọvu de whenue e yí baptẹm wẹ ya?

• Aliho tẹ mẹ wẹ e yin bibaptizi te? Be yè húnhún osin do ota na ẹn poun wẹ ya?

Whenue Jesu yí baptẹm godo wẹ e bẹ azọ́n vonọtaun he Jiwheyẹwhe dena ẹn nado wà to aigba ji lọ jẹeji. Hia Luku 3:21-23 gọna Johanu 6:38, enẹgodo dọhodo kanbiọ ehe ji:

• Azọ́n tẹwẹ Jesu zedo otẹn tintan mẹ hugan to gbẹzan etọn mẹ to baptẹm etọn godo?

5. Baptẹm yin yanwle de he kọ̀n a gán jẹ

To tintan whenu, a sọgan mọ klandowiwe po baptẹm po di nuhe na húagbọ́ we de. Amọ́, dile a to nukọnyi to oplọn towe mẹ, a na wá kudeji dọ nudide dandan tọn he a dona basi de wẹ. Hò VIDEO lọ, nado mọ mẹhe enẹ ko pà delẹ.

VIDEO: Lehe A Gán Do Haṣinṣan de hẹ Jehovah Do (1:11)

Hia Johanu 17:3 gọna Jakọbu 1:5, enẹgodo dọhodo kanbiọ ehe ji:

• Etẹlẹ wiwà wẹ gán gọalọna mẹde nado wleawufo na baptẹm?

1. Mí nọ basi klandowiwe to whenue mí dọna Jehovah to odẹ̀ mẹ dọ ewọ wẹ mí jlo na sẹ̀n kakadoi

2. To whenue mí yí baptẹm, mí nọ dohia mẹhe to mimọ mí lẹpo dọ mí ko klan míde do wiwe na Jiwheyẹwhe

6. Baptẹm yíyí nọ hẹnmẹ zun hagbẹ whẹndo Jehovah tọn

Eyin mí yí baptẹm, mí nọ lẹzun hagbẹ whẹndo he tin lẹdo aihọn pé bosọ to pọninọ mẹ de tọn. Mahopọnna dọ otò voovo mẹ wẹ mí wá sọn bọ ninọmẹ mítọn lẹ sọ gbọnvo, nuyise dopolọ lẹ wẹ mímẹpo tindo bosọ nọ setonuna nujinọtedo walọ dagbe tọn dopolọ lẹ to gbẹzan mítọn mẹ. Hia Salmu lẹ 25:14 gọna 1 Pita 2:17, enẹgodo dọhodo kanbiọ ehe ji:

• Nawẹ baptẹm nọ yinuwado haṣinṣan he mẹde tindo hẹ Jehovah podọ hẹ mẹdevo he nọ sẹ̀n Jiwheyẹwhe lẹ ji gbọn?

BLADOPỌ

Jesu plọnmẹ dọ Klistiani lẹ dona yí baptẹm. Eyin mẹde na jẹ yanwle enẹ kọ̀n, e dona wleawuna yise dolido to Jehovah mẹ, nọ setonuna nujinọtedo etọn lẹ bosọ klan ede do wiwe hlan Ẹn.

Dogbapọn

• Etẹwẹ baptẹm zẹẹmẹdo, podọ naegbọn e do yin nujọnu?

• Kanṣiṣa tẹwẹ tin to klandowiwe po baptẹm po ṣẹnṣẹn?

• Afọdide voovo tẹlẹ wẹ nọ hẹnmẹ jẹ klandowiwe po baptẹm po kọ̀n?

PỌ́N NUDỌNAMẸ DEVO LẸ

Plọnnu gando nuhe baptẹm yin po nuhe e ma yin po go.

“Etẹwẹ Baptẹm Zẹẹmẹdo?” (Hosọ Intẹnẹt ji tọn)

Gbadopọnna aliho delẹ he mẹ mẹde sọgan plọnnu yinukọn bo pegan na baptẹm te.

“Do Owanyi Towe Na Jehovah Hia Gbọn Baptẹm Yíyí Dali” (Atọ̀họ̀-Nuhihọ́ lọ Tọn, mars 2020 tọn)

Pọ́n lehe nudide dawe de tọn nado yí baptẹm ma sinai do numọtolanmẹ lẹ kẹdẹ ji do.

“Yé Jlo Dọ Yẹnlọsu Ni Dindona Nuhe Biblu Plọnmẹ Taun” (Atọ̀họ̀-Nuhihọ́ lọ Tọn, avril-juin 2013 tọn)

Gbadopọnna nuhewutu baptẹm do yin yanwle he doale de, gọna lehe a gán wleawu nado jẹ e kọ̀n do.

“Be N’Dona Yí Baptẹm Ya?” (Kanbiọ He Jọja lẹ Nọ Kanse—Gblọndo He Wazọ́n Lẹ, Bladopọ 2tọ, weta 37)