Johanu 14:27—“Jijọho Wẹ Yẹn Jo Do Mì Dè”

“Yẹn jo jijọho do mì dè; yẹn na mì jijọho ṣie. Yẹn ma na ẹn mì to aliho he mẹ aihọn lọ nọ namẹ te gba. Mì dike ahun mìtọn biọ bẹwlu mẹ kavi gbàdo na obu wutu blo.”—Johanu 14:27, Lẹdogbedevomẹ Aihọn Yọyọ Tọn.

“Jijọho wẹ yẹn jo do mì dè, jijọho ṣie wẹ yẹn na hlan mì: e ma yin le aihọn ko namẹ do wẹ yẹn na hlan mì do gba. Mì dike ayiha mìtọn yin tuklanọ blo, mì sọ dike e yin obunọ blo.”—Johanu 14:27, Biblu Wiwe lọ—Gun Alada.

Zẹẹmẹ Johanu 14:27 Tọn

Jesu yí hogbe enẹlẹ do to adọgbo na apọsteli etọn lẹ dọ yé ma dona nọ hanú gbau eyin yé to nuhahun mẹ. Jiwheyẹwhe na gọalọna yé bọ yé na vò sọn ayiha mẹ, dile e wà na Jesu do.

Jijọho alọpa tẹwẹ Jesu na kavi jo do na apọsteli etọn lẹ? Jesu na yé jijọho etọn, enẹ wẹ yindọ jijọho he nkọ ewọ lọsu tindo. Jijọho enẹ ma dohia dọ wiwọ́ na hán kavi dọ adán ma na gbò yé. (Johanu 15:20; 16:33) Nugbo wẹ dọ yè yinuwa hẹ Jesu to aliho agọ̀ mẹ, ehe hẹn okú wá na ẹn. Etomọṣo, e do jijọho, enẹ wẹ yindọ e vò sọn ahun mẹ. (Luku 23:27, 28, 32-34; 1 Pita 2:23) E vò to ayiha mẹ, na e yọnẹn dọ Otọ́ emitọn, Jehovaha yiwanna emi bọ homẹ etọn sọ hùn do emi go.—Matiu 3:16, 17.

Jesu na jijọho apọsteli etọn lẹ to whenue e hẹn yé deji dọ emi po Otọ́ emitọn po yiwanna yé bọ homẹ yé omẹ awe lẹ tọn nọ hùn do yé go. (Johanu 14:23; 15:9, 10; Lomunu lẹ 5:1) Yé do jijọho ehe, na yé yise dọ Jesu wẹ Visunnu Jiwheyẹwhe tọn, ehe gọalọna yé nado duto obu po nuhe nọ na yé lẹnpọn lẹ po ji. (Johanu 14:1) Dile etlẹ yindọ yé ma nasọ mọ Jesu nukun sọ nukun ba, e dopà dọ gbigbọ wiwe Jiwheyẹwhe tọn na gọalọna yé nado nọ gboadọ bosọ vò sọn ahun mẹ. (Johanu 14:25-27) Hodotọ Jesu tọn lẹ gán gboadọ to whenue yé pannukọn ninọmẹ he kàn dẹpẹ biọ lẹ, na yé yọnẹn dọ homẹ Jehovah tọn nọ hùn do yé go bọ e nasọ gọalọna yé.—Heblu lẹ 13:6.

To whenue Jesu to aigba ji, aṣa wẹ e yin na gbẹtọ lẹ nado nọ biọ jijọho na ode awetọ to whenue yé to nudọdo yede. (Matiu 10:12, 13) Amọ́, Jesu ma biọ jijọho na apọsteli etọn lẹ poun; jijọho wẹ e na yé. Podọ, jijọho he Jesu na yé gbọnvona jijọho depope he aihọnb gán namẹ. Aihọn gán namẹ jijọho jẹ obá de mẹ, vlavo na mí do họntọn lẹ, mí jẹ adọkun, diyin kavi to otẹn daho de mẹ. Amọ́, Jijọho he Jesu nọ namẹ ma sinai do lehe nulẹ te do na mí to gbẹ̀mẹ ji. Jijọho ahun mẹ tọn he nọ nọ̀ aimẹ sọyi de wẹ.

Nujijọ He Lẹdo Johanu 14:27 Lẹ

Ozán he jẹnukọnna okú Jesu tọn wẹ e dọho ehelẹ na apọsteli nugbonọ etọn lẹ. To ozán enẹ mẹ, e dọna yé dọ e ma na dẹn bọ emi na jo yé do. (Johanu 13:33, 36) Ehe hẹn apọsteli etọn lẹ blawu taun. (Johanu 16:6) Enẹwutu, Jesu sọ vọ́ jidena yé bo dọ nuhewutu yé ma dona hanú glanglan gando yìyì etọn go.

Hogbe Jesu tọn lẹ gán na huhlọn dopolọ Klistiani lẹ to egbehe. Mílọsu gán tindo jijọho. (2 Tẹsalonikanu lẹ 3:16) Whenue mí lẹzun devi Jesu tọn lẹ, mí plọn dọ ewọ po Otọ́ etọn Jehovah po yiwanna mí bọ homẹ yetọn sọ hùn do mí go. (Kolosinu lẹ 3:15; 1 Johanu 4:16) Enẹwutu, mí ma nọ hanú zẹjlẹgo. Etẹwutu? Na Jiwheyẹwhe tin hẹ mí wutu.—Salmu lẹ 118:6; Filipinu lẹ 4:6, 7; 2 Pita 1:2.

Pọ́n video kleun ehe nado mọ nue to owe Johanu tọn mẹ delẹ.