Be Hiẹ Tin to Mẹhe Jiwheyẹwhe Yiwanna lẹ mẹ Ya?
“Ewọ he tindo osẹ́n ṣie lẹ, bosọ yìn yé, ewọ lọ wẹ mẹhe yiwanna mi: mẹhe sọ yiwanna mi, yè na yiwanna ẹn sọn Otọ́ ṣie dè.”—JOHANU 14:21.
1, 2. (a) Nawẹ Jehovah do owanyi etọn hia gbẹtọvi gbọn? (b) Etẹwẹ Jesu zedai to ozán Nisan 14, owhe 33 W.M. mẹ?
JEHOVAH yiwanna gbẹtọvi he e dá lẹ. Na nugbo tọn, e yiwanna aihọn gbẹtọvi tọn “sọmọ bọ e yí Ovi detọ́n etọn dopo akàn namẹ, na mẹdepope he yí ì sè ma nado dọ̀n, ṣigba e nido tindo ogbẹ̀ madopodo.” (Johanu 3:16) Dile ojlẹ Oflin okú Klisti tọn to sisẹpọ, Klistiani nugbo lẹ dona yin ahunmẹduna hugan gbede pọ́n dọ Jehovah “yiwanna mí bosọ do Ovi etọn hlan nado yin oyẹsu na ylando mítọn [lẹ].”—1 Johanu 4:10.
2 To zánmẹ Nisan 14, owhe 33 W.M., Jesu po apọsteli 12 etọn lẹ po pli dopọ to abò aga tọn de mẹ to Jelusalẹm nado basi hùnwhẹ Juwayi tọn, he yin hùnwhẹ oflin whlẹngán Islaelivi lẹ tọn sọn Egipti. (Matiu 26:17-20) To whenuena yé ko basi hùnwhẹ Juvi lẹ tọn ehe godo, Jesu yàn Juda Iskaliọti jẹgbonu bosọ ze núdùdù oflin whèjai tọn he na wá lẹzun Oflin okú Klisti tọn na Klistiani lẹ dai.a To akla madotọ́n po ovẹn vẹẹ po yiyizan taidi yẹhiadonu agbasalan po ohùn etọn tọn po mẹ, Jesu hẹn apọsteli 11 he pò lẹ tindo mahẹ to núdùdù pọmẹ tọn ehe mẹ. Zẹẹmẹ gigọ́ lehe e basi i do tọn yin nina gbọn Wẹndagbe-kàntọ atọ̀n Matiu, Malku, po Luku po dali, podọ gbọn apọsteli Paulu, he ylọ ẹ dọ “tenu-núdùdù Oklunọ tọn” dali.—1 Kọlintinu lẹ 11:20; Matiu 26:26-28; Malku 14:22-25; Luku 22:19, 20.
3. Aliho tangan tẹlẹ mẹ wẹ kandai apọsteli Johanu tọn gando ganhiho godo tọn Jesu tọn lẹ hẹ devi etọn lẹ to abò aga tọn mẹ gbọnvona mẹdevo lẹ tọn te?
3 Po awuvivi po, apọsteli Johanu ma donu zize gbọn mẹji akla po ovẹn lọ po tọn go gba, vlavo nuyiwa lọ ko hẹnai taun to Klistiani fliflimẹ tọn lẹ ṣẹnṣẹn to whenuena e wlan kandai Wẹndagbe tọn etọn (to nudi 98 W.M.). (1 Kọlintinu lẹ 11:23-26) Ṣigba, to gbọdo glọ, Johanu kẹdẹ wẹ dọ nudọnamẹ titengbe delẹ na mí gando nuhe Jesu dọ bo wà tlolo jẹnukọn podọ to tlolo he E ze Oflin okú etọn tọn dai godo go. Weta atọ́n owe Wẹndagbe Johanu tọn wẹ bẹ zẹẹmẹ gigọ́ awuvivi tọn ehe hẹn. Yé do gbẹtọ wunmẹ he Jiwheyẹwhe yiwanna lẹ hia hezeheze. Mì gbọ mí ni gbadopọnna Johanu weta 13 jẹ 17.
Plọnnu sọn Apajlẹ Dagbe Owanyi Jesu Tọn Mẹ
4. (a) Nawẹ Johanu zinnudo hosọ tangan opli he Jesu basi hẹ devi etọn lẹ to whenuena e ze Oflin lọ dai ji gbọn? (b) Whẹwhinwhẹ́n titengbe dopo tẹ wutu wẹ Jehovah yiwanna Jesu?
4 Owanyi yin hosọ he diyin de to weta atọ́n he bẹ ayinamẹ godo tọn he Jesu na to aigba ji hlan hodotọ etọn lẹ hẹn mẹ. Na taun tọn, wunmẹ voovo hogbe “owanyi” tọn wá aimẹ whla 31 to finẹ. Owanyi sisosiso Jesu tọn na Otọ́ etọn, Jehovah, podọ na devi etọn lẹ sọawuhia hezeheze to weta ehelẹ mẹ hugan fidevo depope. Owanyi he Jesu tindo na Jehovah sọawuhia to kandai Wẹndagbe tọn lẹpo mẹ, ṣigba Johanu kẹdẹ wẹ basi kandai dọ Jesu dọ hezeheze dọmọ: “Yẹn yiwanna Otọ́.” (Johanu 14:31) Jesu sọ dọ ga dọ Jehovah yiwanna emi bosọ basi zẹẹmẹ nuhewutu tọn. E dọmọ: “Yèdọ le Otọ́ yiwanna mi do, mọwẹ yẹn yiwanna mìwlẹ do ga: mì nọ nọ̀ owanyi ṣie mẹ. Eyin mì yìn osẹ́n ṣie lẹ, mì na nọ nọ̀ owanyi ṣie mẹ; yèdọ dile yẹn yìn osẹ́n Otọ́ ṣie tọn, bosọ nọ nọ̀ owanyi etọn mẹ do.” (Johanu 15:9, 10) Mọwẹ, Jehovah yiwanna Visunnu etọn na tonusise mlẹnmlẹn etọn wutu. Nuplọnmẹ dagbe nankọ die na hodotọ Jesu Klisti tọn lẹpo!
5. Nawẹ Jesu basi dohia owanyi he e tindo na devi etọn lẹ tọn gbọn?
5 Owanyi sisosiso he Jesu tindo na devi etọn lẹ yin didohia to bẹjẹeji kandai Johanu tọn heyin pipli godo tọn Jesu tọn hẹ apọsteli lẹ. Johanu dọmọ: “Dinvie jẹnukọnna hùnwhẹ juwayi tọn lọ, whenuena Jesu yọnẹn dọ ojlẹ etọn wá, bọ ewọ na do yì sọn aihọn he mẹ yì Otọ́ dè, le e yiwanna omẹ etọn titi he tin to aihọn mẹ lẹ do, e yiwanna yé jẹ podo.” (Johanu 13:1) To whèjai ayidego tọn enẹ, e na yé nuplọnmẹ titengbe de gando devizọn owanyinọ bibasi hlan mẹdevo lẹ go. E klọ afọ yetọn. Nude he dopodopo yetọn dona ko jlo nado wà hlan Jesu podọ na mẹmẹsunnu yetọn lẹ wẹ ehe yin, ṣigba yé ma wàmọ. Jesu wazọ́n whiwhẹ tọn ehe bosọ dọ hlan devi etọn lẹ to enẹgodo dọmọ: “Enẹwutu eyin yẹn mẹhe yin Oklunọ mìtọn, bosọ yin Mẹplọntọ mìtọn klọ afọ mìtọn; e sọ jẹ na mìwlẹ ni sọ klọ afọ mìnọzo tọn ga. Na yẹn ko na ohia mì, na mì nido nọ wà dile yẹn wà hlan mì do.” (Johanu 13:14, 15) Klistiani nugbo lẹ dona jlo bosọ nọ jaya nado wadevizọn hlan mẹmẹsunnu yetọn lẹ.—Matiu 20:26, 27, [NW, nudọnamẹ odò tọn]; Johanu 13:17.
Hodo Gbedide Yọyọ Lọ
6, 7. (a) Zẹẹmẹ gigọ́ titengbe tẹlẹ wẹ Johanu na gando Oflin lọ zizedai go? (b) Osẹ́n yọyọ tẹwẹ Jesu na devi etọn lẹ, podọ etẹwẹ yin yọyọ to e mẹ?
6 Kandai Johanu tọn gando nuhe jọ to abò aga tọn mẹ to ozán Nisan 14 tọn mẹ go wẹ yin dopo akàn lọ he donu tintọ́n Juda Iskaliọti tọn go tlọlọ. (Johanu 13:21-30) Kinkọn kandai Wẹndagbe lẹ tọn dopọ dohia dọ tintọ́nyì mẹdehiatọ ehe tọn godo kẹdẹ wẹ Jesu ze Oflin okú Etọn tọn dai. Enẹgodo e dọho susu hẹ apọsteli nugbonọ etọn lẹ, bo na yé ayinamẹ po nuplọnmẹ godo tọn etọn lẹ po. Dile mí to awuwle nado yì Oflin lọ, mí dona tindo ojlo sisosiso to nuhe Jesu dọ to nujijọ enẹ tẹnmẹ mẹ, na mí jlo na tin to mẹhe Jiwheyẹwhe yiwanna lẹ mẹ na jide tọn wutu.
7 Nudọnamẹ tintan he Jesu dọna devi etọn lẹ to Oflin okú etọn tọn zizedai godo yin onú yọyọ de. E dọmọ: “Osẹ́n yọyọ de wẹ yẹn na hlan mì, Dọ mì ni yiwanna mìnọzo: dile yẹn yiwanna mì, na mìwlẹ ga ni yiwanna mìnọzo. Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.” (Johanu 13:34, 35) Etẹwẹ yin yọyọ to gbedide ehe mẹ? Ojlẹ kleun de godo to whèjai enẹ, Jesu basi zẹẹmẹ whẹho lẹ tọn, dọmọ: “Ehe wẹ osẹ́n ṣie, dọ mì ni yiwanna mìnọzo, yèdọ dile yẹn yiwanna mì do. Mẹde ma tindo owanyi he klo hú ehe, dọ mẹde ze ogbẹ̀ etọn liai na họntọn etọn lẹ.” (Johanu 15:12, 13) Osẹ́n Mose tọn degbena Islaelivi lẹ nado ‘yiwanna hatọ yetọn di yede.’ (Levitiku 19:18) Ṣigba gbedide Jesu tọn yì nukọn hugan mọ. Klistiani lẹ dona yiwanna yenọzo dile Klisti yiwanna yé do, yèdọ dona jlo nado yí ogbẹ̀ yetọn do sanvọ́ na mẹmẹsunnu yetọn lẹ.
8. (a) Etẹwẹ owanyi mẹdetiti-yido-sanvọ́ tọn bẹhẹn? (b) Nawẹ Kunnudetọ Jehovah tọn lẹ nọ do owanyi mẹdetiti-yido-sanvọ́ tọn hia gbọn to egbehe?
8 Ojlẹ Oflin tọn yin ojlẹ he sọgbe de nado gbeje míde pọ́n, dopodopo mítọn podọ taidi agun, nado pọ́n eyin mí tindo ohia mẹyinyọnẹn Klistiani nugbo lẹ tọn ehe nugbonugbo—yèdọ owanyi he taidi Klisti tọn. Owanyi mẹdetiti-yido-sanvọ́ tọn enẹ sọgan zẹẹmẹdo, podọ to whedelẹnu nọ zẹẹmẹdo dọ Klistiani de ni ze ogbẹ̀ etọn do owù mẹ kakati nado de mẹmẹsunnu etọn lẹ hia. Ṣigba dile e nọ saba yin do, e bẹ ojlo tintindo mítọn nado yí nujlomẹ mẹdetiti tọn mítọn lẹ do sanvọ́ nado sọgan gọalọna bo wadevizọn na mẹmẹsunnu mítọn lẹ po mẹdevo lẹ po hẹn. Apọsteli Paulu yin apajlẹ dagbe de to ehe mẹ. (2 Kọlintinu lẹ 12:15; Filippinu lẹ 2:17) Kunnudetọ Jehovah tọn lẹ yin yinyọnẹn lẹdo aihọn pé na gbigbọ mẹdetiti-yido-sanvọ́ tọn yetọn, bo nọ gọalọna mẹmẹsunnu po kọmẹnu yetọn lẹ po bosọ nọ yí yede zan nado lá nugbo Biblu tọn hlan gbẹtọ hatọ yetọn lẹ.b—Galatianu lẹ 6:10.
Haṣinṣan He Yè Dona Wlebòna
9. Nado hẹn haṣinṣan họakuẹ he mí tindo hẹ Jiwheyẹwhe po Visunnu etọn po go, etẹwẹ mí nọ jaya nado wà?
9 Nudepope ma sọgan họakuẹ na mí hugan owanyi he Jehovah po Visunnu etọn, Klisti Jesu po tindo na mí. Ṣigba, mí dona wà nude nado sọgan tindo bosọ yọ́n owanyi ehe. To ozán godo tọn enẹ mẹ hẹ devi etọn lẹ, Jesu dọmọ: “Ewọ he tindo osẹ́n ṣie lẹ, bosọ yìn yé, ewọ lọ wẹ mẹhe yiwanna mi: mẹhe sọ yiwanna mi, yè na yiwanna ẹn sọn Otọ́ ṣie dè, yẹn nasọ yiwanna ẹn, bo nasọ do dee hia hlan ẹn.” (Johanu 14:21) To whenuena e yindọ mí nọ wlebòna haṣinṣan mítọn hẹ Jiwheyẹwhe podọ hẹ Visunnu etọn, mí nọ yí homẹhun do setonuna gbedide yetọn lẹ. Ehe bẹ osẹ́n yọyọ lọ nado do owanyi mẹdetiti-yido-sanvọ́ tọn hia podọ gbedide he Klisti na to fọnsọnku etọn godo hẹn “nado dọyẹwheho hlan gbẹtọ lẹ, podọ nado dekunnu,” bo dovivẹnu nado hẹn mẹhe kẹalọyi wẹndagbe lọ lẹ ‘zun devi.’—Owalọ lẹ 10:42; Matiu 28:19, 20.
10. Haṣinṣan họakuẹ tẹlẹ wẹ tin-to-aimẹ na mẹyiamisisadode lẹ podọ na “lẹngbọ devo” lẹ?
10 To godo mẹ to whèjai lọ, to gblọndo nina hlan kanbiọ de he apọsteli nugbonọ Juda (Tade) kanse e mẹ, Jesu dọmọ: “Eyin mẹde yiwanna mi, e na yìn ohó ṣie lẹ: Otọ́ ṣie nasọ yiwanna ẹn, mí nasọ wá e dè, bo nasọ basi nọtẹn mítọn to e dè.” (Johanu 14:22, 23) Dile yé tlẹ gbẹ́ tin to aigba ji, Klistiani yiamisisadode, heyin yiylọ nado dugán hẹ Klisti to olọn mẹ lẹ, nọ tindo haṣinṣan pẹkipẹki de hẹ Jehovah podọ hẹ Visunnu etọn. (Johanu 15:15; 16:27; 17:22; Heblu lẹ 3:1; 1 Johanu 3:2, 24) Ṣigba “lẹngbọ devo” heyin gbẹdohẹmẹtọ yetọn, he tindo todido gbẹninọ kakadoi to aigba ji tọn lẹ lọsu nọ tindo haṣinṣan họakuẹ de hẹ “lẹngbọhọtọ dopo” yetọn, yèdọ Jesu Klisti, podọ hẹ Jiwheyẹwhe yetọn, yèdọ Jehovah, eyin yé yin tonusetọ.—Johanu 10:16; Psalm 15:1-5; 25:14.
“Mì Ma Yin Aihọn Tọn”
11. Avase mẹhẹn lẹnnupọn tọn tẹwẹ Jesu na devi etọn lẹ?
11 To opli godo tọn he e basi hẹ devi nugbonọ etọn lẹ jẹnukọnna okú etọn whenu, Jesu na avase mẹhẹn lẹnnupọn tọn de dọ: Eyin Jiwheyẹwhe yiwanna mẹde, aihọn na gbẹwanna omẹ lọ. E dọmọ: “Eyin aihọn gbẹwanna mì, mì yọnẹn dọ, e ko gbẹwanna mi, whẹpo e do gbẹwanna mì. Eyin mìwlẹ ko yin aihọn tọn, aihọn na yiwanna etọn titi; ṣigba na mì ma yin aihọn tọn wutu, ṣigba yẹn ko de mì sọn aihọn mẹ, enẹwutu wẹ aihọn gbẹwanna mì. Mì ni flin ohó he yẹn ko dọ hlan mì dọ, Afanumẹ ma klohu oklunọ etọn. Eyin yé dohomẹkẹn mi, yé nasọ dohomẹkẹn mìwlẹ ga; eyin yé ko yí ohó ṣie hẹn, yé na yí mìtọn hẹn ga.”—Johanu 15:18-20.
12. (a) Etẹwutu Jesu na avase devi etọn lẹ dọ aihọn na gbẹwanna yé? (b) Etẹwẹ mẹlẹpo na wà dagbe nado gbadopọnna dile Oflin to sisẹpọ?
12 Jesu na avase ehe apọsteli 11 etọn lẹ podọ Klistiani nugbo he na wá to godo yetọn lẹpo ni ma do gbọjọ bo jogbe na wangbẹnamẹ aihọn tọn wutu. E yidogọ dọmọ: “Onú helẹ wẹ yẹn ko dọ hlan mì, na yè ma na do hẹn mì dahli. Yé na de mi sọn sinagọgu lẹ mẹ: mọwẹ ojlẹ lọ ja, whenuena mẹdepope he hù mì, na lẹndọ e to sinsẹ̀n basi hlan Jiwheyẹwhe. Onú helẹ pó wẹ yé na wà, na yé ma yọ́n Otọ́, yé masọ yọ́n mi wutu.” (Johanu 16:1-3) Wezẹhomẹ Biblu tọn dopo dọ dọ wunmẹ hogbe nuyiwa tọn heyin lilẹdogbedevomẹ do “dahli” zẹẹmẹdo “nado hẹn mẹde ma nado dejido kavi gbẹ́ mẹhe go e dona dejido bo setonuna dai; nado hẹn nado gbẹdai.” Dile ojlẹ Oflin tọn to sisẹpọ, mẹlẹpo na wà dagbe nado lẹnnupọndo gbẹzan omẹ nugbonọ lẹ tọn ji, to ojlẹ he wayi mẹ podọ egbehe tọn, bosọ hodo apajlẹ akọ́ndonanu to whlepọn glọ yetọn. Ma dike nukundiọsọmẹ kavi homẹkẹn ni hẹn we nado gbẹ́ Jehovah po Jesu po dai blo, ṣigba magbe nado dotudo yé go bo setonuna yé.
13. Etẹwẹ Jesu biọ do ota hodotọ etọn lẹ tọn mẹ to odẹ̀ mẹ hlan Otọ́ etọn?
13 To odẹ̀ tadona tọn etọn whẹpo do tọ́n sọn abò aga tọn enẹ mẹ to Jelusalẹm, Jesu dọna Otọ́ etọn dọmọ: “Yẹn ko na ohó towe yé; aihọn sọ gbẹwanna yé, na yé mayin aihọn tọn wutu, yèdọ dile yẹn mayin aihọn tọn. Yẹn ma basi kanbiọ dọ, hiẹ nido fọ̀ yé sọn aihọn mẹ gba, ṣigba dọ hiẹ ni whlá yé sọn oylan mẹ. Yé mayin aihọn tọn, yèdọ dile yẹn mayin aihọn tọn do.” (Johanu 17:14-16) Mí sọgan deji dọ Jehovah nọ họ́ mẹhe e yiwanna lẹ, nado na huhlọn yé dile yé tin to kada na aihọn.—Isaia 40:29-31.
Gbọṣi Owanyi Otọ́ po Owanyi Visunnu po Tọn Mẹ
14, 15. (a) Etẹ go wẹ Jesu yí ede jlẹdo, to vogbingbọn mẹ na ‘alá he klan sọn vẹntin go’ tẹ? (b) Mẹnu lẹ wẹ yin “alà” “vẹntin nugbo” lọ tọn lẹ?
14 To hodọdopọ pẹkipẹki etọn hẹ devi nugbonọ etọn lẹ to ozán Nisan 14 tọn mẹ, Jesu yí ede jlẹdo “vẹntin nugbo lọ” go, to vogbingbọn mẹ na ‘alà he klan sọn vẹntin go’ heyin Islaeli lalo tọn lẹ. E dọmọ: “Yẹn wẹ vẹntin nugbo lọ, Otọ́ ṣie wẹ glesi.” (Johanu 15:1) Owhe kanweko lẹ jẹnukọn, yẹwhegán Jẹlemia basi kandai ohó Jehovah tọn ehelẹ gando omẹ atẹṣitọ etọn lẹ go dọmọ: “Yẹn ko dó we ovẹn yẹyinọ de . . . nawẹ yè gbọn diọ we zun nudido agọ̀ ovẹn alọpa devo tọn hlan mi?” (Jẹlemia 2:21) Podọ yẹwhegán Hosea wlan dọmọ: ‘Vẹntin he ko klan de wẹ Islaeli yin. E to sinsẹ́n detọn na ede. . . . Ahun yetọn ko lẹzun yẹnuwatọ.’—Hosea 10:1, 2.
15 Kakati nado de sinsẹ́n sinsẹ̀n-bibasi nugbo tọn tọ́n, Islaeli ṣiatẹ bo de sinsẹ́n tọ́n na ede. Azán atọ̀n jẹnukọn opli godo tọn etọn hẹ devi nugbonọ etọn lẹ, Jesu dọna nukọntọ Juvi yẹnuwatọ lẹ dọmọ: “Yẹn dọ hlan mì, dọ, yè na yí ahọludu Jiwheyẹwhe tọn sọn mì dè, yè nasọ yí na akọta de he na de sinsẹ́n etọn jẹgbonu.” (Matiu 21:43) Akọta yọyọ enẹ wẹ “Islaeli Jiwheyẹwhe tọn,” he bẹ Klistiani yiamisisadode 144 000 lẹ hẹn he yin yiyijlẹdo “alà” “vẹntin nugbo lọ” tọn lẹ go, yèdọ Klisti Jesu.—Galatianu lẹ 6:16; Johanu 15:5; Osọhia 14:1, 3.
16. Etẹwẹ Jesu dotuhomẹna apọsteli nugbonọ 11 lẹ nado wà, podọ etẹwẹ sọgan yin didọ gando pipotọ nugbonọ lẹ go to ojlẹ opodo tọn ehe mẹ?
16 Jesu dọna apọsteli 11 he tin to abò aga tọn mẹ hẹ ẹ lẹ dọ: “Alà depope to yẹn mẹ, he ma hẹn sinsẹ́n, ewọ de e sẹ̀: podọ alà depope he hẹn sinsẹ́n, ewọ lẹ ẹ wé, na e nido hẹn sinsẹ́n humọ. Mì nọ nọ̀ yẹn mẹ, podọ yẹn to mìwlẹ mẹ. Dile alà ma sọgan hẹn sinsẹ́n ededenu, adavo e nọ nọ̀ ovẹntin mẹ; mọkẹdẹ wẹ mìwlẹ ma sọgan, adavo mì nọ nọ̀ yẹn mẹ.” (Johanu 15:2, 4) Whenuho egbezangbe omẹ Jehovah tọn lẹ tọn dohia dọ pipotọ nugbonọ Klistiani yiamisisadode lẹ tọn ko gbọṣi kọndopọmẹ hẹ Ota yetọn, yèdọ Klisti Jesu. (Efesunu lẹ 5:23) Yé ko kẹalọyi klọwé po alà didesẹ po. (Malaki 3:2, 3) Sọn 1919 gbọ́n, yé ko de sinsẹ́n Ahọluduta tọn susugege jẹgbonu, tintan Klistiani yiamisisadode lẹ podọ, sọn 1935 gbọ́n, gbẹdohẹmẹtọ “gbẹtọ susugege” he to jijideji tẹgbẹ̀ lẹ tọn.—Osọhia 7:9; Isaia 60:4, 8-11.
17, 18. (a) Hogbe Jesu tọn tẹlẹ wẹ gọalọna mẹyiamisisadode lẹ po lẹngbọ devo lẹ po nado gbọṣi owanyi Jehovah tọn mẹ? (b) Nawẹ Oflin lọ yìyì na gọalọna mí gbọn?
17 Hogbe Jesu tọn dogọ lẹ sọ gando Klistiani yiamisisadode lẹ po gbẹdohẹmẹtọ yetọn lẹ po go dọmọ: “To ehe mẹ wẹ yè pagigona Otọ́ ṣie te dọ, mì ni hẹn sinsẹ́n susu; mọwẹ mìwlẹ nasọ yin nuplọntọ ṣie. Yèdọ le Otọ́ yiwanna mi do, mọwẹ yẹn yiwanna mìwlẹ do ga: mì nọ nọ̀ owanyi ṣie mẹ. Eyin mì yìn osẹ́n ṣie lẹ, mì na nọ nọ̀ owanyi ṣie mẹ; yèdọ dile yẹn yìn osẹ́n Otọ́ ṣie tọn, bosọ nọ nọ̀ owanyi etọn mẹ do.”—Johanu 15:8-10.
18 Mímẹpo jlo na gbọṣi owanyi Jiwheyẹwhe tọn mẹ, podọ ehe nọ whàn mí nado yin Klistiani he nọ de sinsẹ́n tọn lẹ. Mí nọ wà ehe gbọn dotẹnmẹ hundote lẹpo yiyizan nado dọyẹwheho “wẹndagbe ahọludu” lọ tọn dali. (Matiu 24:14) Mí sọ nọ wà nuhe go mí pé lẹpo nado do “sinsẹ́n gbigbọ tọn” lẹ hia to gbẹzan mẹdetiti tọn mítọn mẹ. (Galatianu lẹ 5:22, 23) Oflin okú Klisti tọn yìyì na hẹn mí lodo to gbemima mítọn mẹ nado wà ehe, na mí na yin nuflin gando owanyi klohugan Jiwheyẹwhe po Klisti tọn po na mí go wutu.—2 Kọlintinu lẹ 5:14, 15.
19. Alọgọ dogọ tẹwẹ na yin hodọdeji to hosọ he na bọdego mẹ?
19 To Oflin lọ zizedai godo, Jesu dopagbe dọ Otọ́ etọn na do ‘alọgọtọ, yèdọ gbigbọ wiwe’ hlan hodotọ nugbonọ etọn lẹ. (Johanu 14:26) Lehe gbigbọ ehe nọ gọalọna mẹyiamisisadode lẹ po lẹngbọ devo lẹ po nado gbọṣi owanyi Jehovah tọn mẹ do na yin dogbapọnna to hosọ he bọdego mẹ.
[Nudọnamẹ odò tọn]
a Sọgbe hẹ azán hihia Biblu tọn, Nisan 14 owhe 2002 tọn na bẹjẹeji to whèjai, jeudi 28 mars. To whèjai enẹ, Kunnudetọ Jehovah tọn lẹ lẹdo aihọn pé na pli dopọ nado basi hùnwhẹ oflin okú Oklunọ, Jesu Klisti tọn.
b Pọ́n owe lọ Les Témoins de Jéhovah: Prédicateurs du Royaume de Dieu, heyin zinzinjẹgbonu gbọn Kunnudetọ Jehovah tọn lẹ dali, weta 19 po 32 po.
Kanbiọ Dogbapọn Tọn Lẹ
• Nuplọnmẹ yọn-na-yizan do devizọnwiwa owanyi tọn ji tẹwẹ Jesu na devi etọn lẹ?
• Etẹwutu wẹ ojlẹ Oflin tọn yin whenu he sọgbe de nado gbadopọnna mẹdetiti?
• Naegbọn avase Jesu tọn gando wangbẹnamẹ po homẹkẹndomẹ aihọn tọn po go ma dona hẹn mí dahli?
• Mẹnu wẹ yin “vẹntin nugbo” lọ? Mẹnu lẹ wẹ yin “alà” lẹ, podọ etẹwẹ yin nukundo sọn yé dè?
[Yẹdide to weda 15]
Jesu na nuplọnmẹ he yè ma sọgan wọnji de apọsteli etọn lẹ do devizọnwiwa owanyi tọn ji
[Yẹdide to weda 16]
Devi Klisti tọn lẹ setonuna gbedide etọn nado do owanyi mẹdetiti-yido-sanvọ́ tọn hia