AZỌ́NDENAMẸ enẹ ma sọgan yin wiwadotana to ojlẹ azán, osẹ, kavi osun kleun delẹ tọn gblamẹ gba. Ṣigba, to afọdopolọji tlolo, devi lọ lẹ jẹ mẹplọ́n ji. Ṣigba yé ma hẹn ojlo bu to hosọ hinhẹngọwa tọn mẹ gba. Apọsteli Pita dọho gandego hlan gbẹtọgun daho de he pli dopọ to Jelusalẹm, dọmọ: “Mì lẹnvọjọ . . . [bo diọ mìde], na yè nido súnsún ylando mìtọn lẹ sẹ̀, [na] . . . ojlẹ awumimiọn tọn na sọn nukun Oklunọ tọn mẹ wá; ewọ nasọ do Jesu Klisti hlan, mẹhe yè dọyẹwheho etọn hlan mì dai: Mẹhe olọn ma sọgan nọ ma yí kaka e na do jẹ ojlẹ [hinhẹngọwa] onú popo tọn mẹ, he Jiwheyẹwhe ko dọ sọn onù yẹwhegán wiwe etọn lẹpo tọn mẹ sọn whenuena aihọn ko ṣẹ̀.”—⁠Owalọ lẹ 3:19-21.

‘Ojlẹ hinhẹngọwa tọn’ ehelẹ na hẹn “ojlẹ awumimiọn tọn” lẹ wá sọn Jehovah dè. Hinhẹngọwa heyin dọdai etọn dọ lọ na wá to adà debọdo-dego awe mẹ. Tintan, hinhẹngọwa gbigbọmẹ tọn he na fakọnamẹ de na tin, he to yìyì to alọnu todin. Awetọ, ehe na yin hihodo gbọn paladisi yinukundomọ de zizedai to aigba ji dali.

Nujijla sinsinyẹn de yin bibẹjẹeji nado plọn gbẹtọ akọta lẹpo tọn lẹ nado nọ doayi nuhe Klisti ko degbè etọn na hodotọ etọn lẹ nado wà lẹ go. (Matiu 28:20) Lehe e yin kọfanamẹnu do sọ nado mọ mẹhe ko nọ do jijọ kanlin-jọmẹ tọn hia dai lẹ diọ pọndohlan yetọn lẹ! Yé klọ́n gbẹtọ-yinyin hoho lọ dai, he nọ de jijọ taidi “homẹgble,” “nutlọ,” po “ohógblo” po tọ́n, bosọ ze gbẹtọ-yinyin yọyọ lọ dógo, “ehe yè diọ zun yọyọ jẹ oyọnẹn [he pegan] mẹ kẹdẹdi apajlẹ [Jiwheyẹwhe] mẹhe dá ẹ tọn.” To linlẹn gbigbọmẹ tọn de mẹ, hogbe yẹwhegán Isaia tọn lẹ to yinyin hinhẹndi etlẹ yin todin dọmọ: “Ohla [mẹhe nọ do jijọ ohla-jọmẹ tọn hia dai] ga na nọ nọ̀hẹ lẹngbọvu [mẹhe nọ do jijọ homẹmimiọn tọn hia] dopọ, kinnikinni ovu na mlọnai hẹ gbọgbọẹvu; oyìnvu po kinnikinni po, po kanlin yìnyìn po na nọ nọ̀ pọ́”—⁠Kọlọsinu lẹ 3:8-10; Isaia 11:6, 9.