Nawẹ Wẹndagbe lọ to Yinyin Lilá Gbọn?

Jehovah na yí Ahọluduta etọn zan nado de nuhahun mítọn lẹpo sẹ̀ to madẹnmẹ. Owẹ̀n dagbedagbe de wẹ, he mí ma gán hẹn na míde kẹdẹ. Jesu jlo dọ hodotọ etọn lẹ ni lá owẹ̀n ehe na mẹlẹpo! (Matiu 28:19, 20) Nawẹ Kunnudetọ Jehovah tọn lẹ nọ setonuna gbedide Jesu tọn ehe gbọn?

1. Nawẹ Matiu 24:14 to hẹndi mọ to egbehe gbọn?

Jesu dọ dọdai dọmọ: “Yẹwheho wẹndagbe Ahọluduta lọ tọn ehe na yin didọ to aigba fininọ lẹpo ji.” (Matiu 24:14) Homẹ Kunnudetọ Jehovah tọn lẹ tọn nọ hùn nado tindo mahẹ to azọ́n titengbe ehe mẹ. Mí nọ lá wẹndagbe ehe lẹdo aihọn pé to ogbè 1 000 linlán mẹ! Azọ́n pligidi de wẹ azọ́n ehe, he nọ biọ vivẹnudido vonọtaun po titojininọ po. Azọ́n lọ ma gán yin wiwà matin alọgọ Jehovah tọn.

2. Vivẹnu tẹlẹ wẹ mí nọ do nado dọyẹwheho na gbẹtọ lẹ?

Mí nọ dọyẹwheho to fidepope he mí sọgan mọ gbẹtọ lẹ te. Taidi Klistiani owhe kanweko tintan whenu tọn lẹ, mí nọ dọyẹwheho “sọn whédegbè jẹ whédegbè.” (Owalọ lẹ 5:42) Aliho kunnudide tọn ehe nọ hẹn ẹn yọnbasi na mí nado jẹ gbẹtọ livi susu lẹ dè to whemẹwhemẹ. Mí sọ nọ dọyẹwheho to nọtẹn gbangba tọn lẹ, na gbẹtọ lẹ ma nọ saba nọ whégbè wutu. Mí nọ to dotẹnmẹ hundote lẹpo dín nado dọhona gbẹtọ lẹ gando Jehovah po lẹndai etọn lẹ po go.

3. Mẹnu lẹ wẹ do azọngban lọ nado nọ lá wẹndagbe lọ?

Azọngban Klistiani nugbo lẹpo tọn wẹ e yin nado nọ lá wẹndagbe lọ na mẹdevo lẹ. Mí nọ ylọ azọngban mítọn ehe dọ nujọnu. Dopodopo mítọn nọ dọyẹwheho jẹ obá he mẹ e penugo jẹ, na mí yọnẹn dọ ogbẹ̀ gbẹtọ lẹ tọn to owù mẹ wutu. (Hia 1 Timoti 4:16.) Yè ma nọ suahọ mí nado wà azọ́n ehe, na Biblu dọ dọ: “Vọnu wẹ mì mọyi, vọnu wẹ mì ni namẹ.” (Matiu 10:7, 8) E ma yin mẹlẹpo wẹ nọ kẹalọyi owẹ̀n mítọn. Etomọṣo, mí nọ zindonukọn to yẹwhehodidọ mẹ, na apadewhe sinsẹ̀n-bibasi mítọn tọn wẹ e yin bosọ nọ hẹn homẹ Jehovah tọn hùn wutu.

DINDONANU DOGỌ

4. Mí nọ dovivẹnu sinsinyẹn nado jẹ gbẹtọ lẹpo dè

VIDEO: Yẹwhehodidọ to “Awà He Dẹn Hugan Aigba Tọn lẹ Ji” (7:33)

• Etẹwẹ yin numọtolanmẹ towe gando vivẹnu he Kunnudetọ Jehovah tọn lẹ nọ do nado lá wẹndagbe lọ go?

Hia Matiu 22:39 gọna Lomunu lẹ 10:13-15, enẹgodo dọhodo kanbiọ ehelẹ ji:

• Nawẹ lizọnyizọn mítọn nọ dohia dọ mí yiwanna kọmẹnu mítọn lẹ gbọn?

• Nukun tẹwẹ Jehovah nọ yí do pọ́n mẹhe nọ lá wẹndagbe lọ lẹ? —Pọ́n wefọ 15.

5. Azọ́nwatọ hatọ Jiwheyẹwhe tọn lẹ wẹ mí yin

Numimọ susu wẹ ko dohia dọ Jehovah wẹ to anadena azọ́n mítọn. Di apajlẹ to Nouvelle-Zélande, mẹmẹsunnu de he nọ yin Paul dukosọ hẹ nawe de to whenue e to kunnude sọn whédegbè jẹ whédegbè to whèmẹ dopo. Afọnnu gbenẹgbe janwẹ nawe lọ hodẹ̀ dohlan Jiwheyẹwhe bo yí yinkọ etọn Jehovah zan bosọ biọ ẹ dọ mẹde ni wá dla emi pọ́n. Paul dọmọ: “To gànhiho atọ̀n godo, n’yì ohọ̀n etọn ji.”

Hia 1 Kọlintinu lẹ 3:9, enẹgodo dọhodo kanbiọ ehe ji:

• Nawẹ numimọ he taidi dehe wá aimẹ to Nouvelle-Zélande nkọ lẹ nọ dohia dọ Jehovah wẹ to anadena azọ́n yẹwhehodidọ tọn lọ gbọn?

Hia Owalọ lẹ 1:8, enẹgodo dọhodo kanbiọ ehe ji:

• Naegbọn mí do nuhudo alọgọ Jehovah tọn nado hẹn lizọnyizọn mítọn di?

Be a yọnẹn ya?

To osẹ dopodopo mẹ to opli osẹ ṣẹnṣẹn tọn mítọn lẹ ji, mí nọ mọ azọ́nplọnmẹ lẹ yí he nọ gọalọna mí nado dọyẹwheho. Eyin a ko yì dopo to opli ehelẹ mẹ, etẹwẹ a lẹn gando azọ́nplọnmẹ he mí nọ mọyi lẹ go?

6. Mí nọ setonuna gbedide Jiwheyẹwhe tọn nado dọyẹwheho

To owhe kanweko tintan whenu, agọjẹdomẹtọ lẹ tẹnpọn nado doalọtena hodotọ Jesu tọn lẹ ma nado dọyẹwheho. Klistiani dowhenu tọn lẹ yiavùnlọna jlọjẹ yetọn nado dọyẹwheho gbọn “wẹndagbe lọ hinhẹn lodo to osẹ́n-liho” dali. (Filipinu lẹ 1:7) Nudopolọ wẹ Kunnudetọ Jehovah tọn lẹ lọsu nọ wà to egbehe.a

VIDEO: Avùnlọyiyi Na Wẹndagbe lọ to Osẹ́n-Liho (2:28)

Hia Owalọ lẹ 5:27-42, enẹgodo dọhodo kanbiọ ehe ji:

• Naegbọn mí ma na doalọtena yẹwhehodidọ?—Pọ́n wefọ 29, 38, po 39 po.

BLADOPỌ

Jesu degbena hodotọ etọn lẹ nado lá wẹndagbe lọ na akọta lẹpo. Jehovah to alọgọna omẹ etọn lẹ nado wazọ́n ehe.

Dogbapọn

• Nawẹ wẹndagbe lọ to yinyin lilá lẹdo aihọn pé gbọn?

• Nawẹ lizọnyizọn mítọn nọ dohia dọ mí yiwanna kọmẹnu mítọn lẹ gbọn?

• Be a lẹndọ azọ́n yẹwhehodidọ tọn gán hẹn ayajẹ wá na mí ya? Etẹwutu?

PỌ́N NUDỌNAMẸ DEVO LẸ

Pọ́n lehe Kunnudetọ Jehovah tọn lẹ nọ lá wẹndagbe lọ na gbẹtọ lẹ to tòdaho lẹ mẹ do.

Kunnudide Gbangba Tọn Vonọtaun to Paris (5:11)

Nawẹ Kunnudetọ Jehovah tọn lẹ ko lá wẹndagbe lọ na fibẹtado-dintọ lẹ gbọn?

Pekọ Hinhẹnwa Na Fibẹtado-Dintọ He Nugbla Gbigbọmẹ Tọn to Hùhù Lẹ (5:59)

Pọ́n numimọ jọnun de he dohia dọ gbẹzan mẹtọn blebu yiyizan nado dọyẹwheho nọ hẹn ayajẹ wá namẹ.

Homẹ Ṣie Hùn Dọ N’De Azọ́n Ehe (6:29)

Pọ́n lehe owhẹ̀ ayidego tọn he ji mí ko dù te lẹ ko yidogọna nukọnyiyi wẹndagbe lọ lilá tọn do.

“Wẹnlatọ Ahọluduta lọ Tọn lẹ Yì Owhẹ̀ Nukọn” (Ahọluduta Jiwheyẹwhe Tọn to Gandu!, weta 13tọ)