Etẹwẹ Biblu Plọnmẹ Gando Ogbè Devo lẹ Yíyí Do Dọho Go?
Gblọndo Biblu tọn
“Ogbè devo lẹ yíyí do dọho” dlẹnalọdo nugopipe de he Klistiani dowhenu tọn delẹ mọyi to azọ́njiawu-liho nado dọho to ogbè devo mẹ mahopọnna dọ yé ma plọn ogbè lọ jẹnukọn. (Owalọ lẹ 10:46, Odò.) Mẹhe sè ogbè he mẹ hodọtọ lọ to hodọdo lẹ nọ mọnukunnujẹ nuhe dọ e te lẹ mẹ po awubibọ po. (Owalọ lẹ 2:4-8) Ogbè devo lẹ yíyí do dọho yin dopo to nunina gbigbọ wiwe tọn he Jiwheyẹwhe na delẹ to Klistiani owhe kanweko tintan tọn lẹ mẹ.—Heblu lẹ 2:4; 1 Kọlintinu lẹ 12:4, 30.
Whetẹnu podọ fie wẹ ogbè devo lẹ yíyí do dọho bẹjẹeji te?
Azọ́njiawu ehe wá aimẹ whla tintan to Jelusalẹm to afọnnu Hùnwhẹ Pẹntikọsti tọn Juvi lẹ tọn owhe 33 W.M. tọn. Nudi devi Jesu tọn 120 wẹ pli dopọ bọ “yemẹpo sọ gọ́ na gbigbọ wiwe bo jẹ hodọ ji to ogbè voovo mẹ.” (Owalọ lẹ 1:15; 2:1-4) Gbẹtọgun daho de “sọn akọta he to olọn glọ lẹpo mẹ lẹ” pli dopọ, podọ “mẹdopodopo sè bọ yé to hodọ to ogbè etọn titi mẹ.”—Owalọ lẹ 2:5, 6.
Lẹndai tẹ wutu wẹ ogbè devo lẹ yíyí do dọho do wá aimẹ?
Nado dohia dọ Klistiani lẹ tindo godonọnamẹ Jiwheyẹwhe tọn. To hohowhenu, Jiwheyẹwhe yí ohia azọ́njiawu lẹ tọn zan nado dohia dọ omẹ nugbonọ delẹ taidi Mose tindo godonọnamẹ emitọn. (Eksọdusi 4:1-9, 29-31; Sọha lẹ 17:10) Lẹndai dopolọ wutu wẹ ogbè devo lẹ yíyí do dọho wá aimẹ, nado dohia dọ agun Klistiani tọn yọyọ he ṣẹṣẹ yin didoai lọ tindo godonọnamẹ Jiwheyẹwhe tọn. Apọsteli Paulu wlan dọmọ: “Ogbè devo lẹ ma yin ohia de na yisenọ lẹ gba, ṣigba na mayisenọ lẹ.”—1 Kọlintinu lẹ 14:22.
Nado hẹn Klistiani lẹ penugo nado dekunnu mlẹnmlẹn. Mẹhe dotoaina hodotọ Jesu tọn lẹ to azán Pẹntikọsti tọn lọ gbè lẹ dọmọ: “Mí sè bọ yé to hodọ to ogbè mítọn lẹ mẹ gando nujiawu Jiwheyẹwhe tọn lẹ go.” (Owalọ lẹ 2:11) Enẹwutu, whẹwhinwhẹ́n tangan devo he wutu azọ́njiawu ehe yin wiwà wẹ nado hẹn Klistiani lẹ penugo “nado dekunnu mlẹnmlẹn,” podọ nado “hẹn gbẹtọ lẹ sọn akọta lẹpo mẹ zun devi lẹ” dile Jesu ko degbe na yé do. (Owalọ lẹ 10:42; Matiu 28:19) Nudi gbẹtọ 3 000 he mọ azọ́njiawu lọ bo sè kunnudide he yin nina yé lẹ lẹzun devi to azán enẹ gbè.—Owalọ lẹ 2:41.
Be ogbè devo lẹ yíyí do dọho na zindonukọn zọnmii wẹ ya?
Lala. Nunina gbigbọ wiwe tọn lẹ, ehe bẹ ogbè devo lẹ yíyí do dọho hẹn, yin awuwledainanu ojlẹ gli tọn de. Biblu dọ dọdai dọ: “Eyin nunina dọdai didọ tọn lẹ wẹ, yé na busẹ; eyin ogbè lẹ wẹ, yé na doalọte.”—1 Kọlintinu lẹ 13:8.
Whetẹnu wẹ ogbè devo lẹ yíyí do dọho doalọte?
Nunina gbigbọ wiwe tọn lẹ nọ saba yin nina Klistiani devo lẹ to apọsteli lẹ nukọn, titengbe gbọn alọ zizedomẹji apọsteli lẹ tọn do yisenọ hatọ lẹ ji dali. (Owalọ lẹ 8:18; 10:44-46) E taidi dọ mẹhe mọ nunina gbigbọ lọ tọn lẹ yí sọn apọsteli lẹ dè tlọlọ ma nọ má ẹn na mẹdevo lẹ. (Owalọ lẹ 8:5-7, 14-17) Di apajlẹ, ahọluzọnwatọ de sọgan na gbedewema húnkùnkùn tọn mẹde, amọ́ mẹhe mọ gbedewema lọ yí ma nọ tindo jlọjẹ sọgbe hẹ osẹ́n nado na gbedewema mọnkọ mẹdevo depope. E taidi dọ ogbè devo lẹ yíyí do dọho doalọte to okú apọsteli lẹ po mẹhe mọ nunina lọ yí sọn yé dè tlọlọ lẹ po tọn godo.
Etẹwẹ dogbọn ogbè devo lẹ yíyí do dọho to egbehe dali?
E họnwun dọ nunina ogbè devo lẹ yíyí do dọho to azọ́njiawu-liho tọn doalọte sẹpọ vivọnu owhe kanweko tintan W.M. tọn. Mẹdepope ma tin to egbehe he sọgan sọalọakọ́n dọ emi nọ yí ogbè devo lẹ do dọho gbọn huhlọn Jiwheyẹwhe tọn yiyizan dali.a
Etẹwẹ yè na yí do yọ́n Klistiani nugbo lẹ?
Jesu dọ dọ owanyi mẹde-yido-sanvọ́ tọn wẹ yè na yí do yọ́n devi emitọn lẹ. (Johanu 13:34, 35) Mọdopolọ, apọsteli Paulu plọnmẹ dọ owanyi wẹ yin ohia tẹgbẹ tọn he yè na yí do yọ́n Klistiani nugbo lẹ. (1 Kọlintinu lẹ 13:1, 8) E hẹn ẹn họnwun dọ gbigbọ Jiwheyẹwhe tọn na gọalọna Klistiani lẹ nado wleawuna jẹhẹnu delẹ he e dlẹnalọdo to pọmẹ taidi “sinsẹ́n gbigbọ tọn,” bọ owanyi wẹ jẹhẹnu tintan etọn.—Galatianu lẹ 5:22, 23.
a Pọ́n hosọ lọ “Ogbè Voovo Yíyí Do Dọho—Be Jiwheyẹwhe Dè Wẹ E Wá sọn Ya?”