Lehe Ofligọ lọ Whlẹn Mí Do
“Mẹhe nọ do yise hia to Visunnu lọ mẹ tindo ogbẹ̀ madopodo; mẹhe nọ vẹtolina Visunnu lọ ma na mọ ogbẹ̀, ṣigba homẹgble Jiwheyẹwhe tọn nọ gbọṣi e ji.”—JOH. 3:36.
1, 2. Whẹwhinwhẹ́n tẹ wutu wẹ Atọ̀họ̀-Nuhihọ́ lọ Tọn do yin zinzinjẹgbonu to tintan whenu?
HOSỌ de to zinjẹgbonu ẹnẹtọ linlinnamẹwe ehe tọn mẹ to octobre 1879 dọmọ: “Mẹhe yí sọwhiwhe do plọn Biblu lẹ nọ mọdọ okú Klisti tọn yin nujọnu taun.” Hosọ lọ wá vivọnu po nudọnamẹ titengbe de po dọmọ: “Mì gbọ mí ni gbẹ́ nudepope he dohia dọ okú Klisti tọn ma yin avọ́sinsan po oyẹsu po na ylando dai mlẹnmlẹn.”—Hia 1 Johanu 2:1, 2.
2 Dopo to whẹwhinwhẹ́n he wutu Atọ̀họ̀-Nuhihọ́ lọ Tọn do yin zinzinjẹgbonu to tintan whenu to juillet 1879 lẹ mẹ wẹ nado yiavunlọna nuplọnmẹ Biblu tọn gando ofligọ lọ go. Nuhe yin kinkan do e mẹ lẹ yin ‘núdùdù to ojlẹ sisọ mẹ,’ na to vivọnu owhe 1800 lẹ tọn, gbẹtọ he sọalọakọ́n dọ emi yin Klistiani lẹ jẹ ayihaawe tindo ji gando lehe okú Jesu tọn sọgan yin ofligọ de na ylando mítọn lẹ do go. (Mat. 24:45) To ojlẹ enẹ mẹ, mẹsusu wẹ jẹ yise tindo ji to nuplọnmẹ nulẹ tin yededenu tọn mẹ, yèdọ nuplọnmẹ de he jẹagọdo nugbo lọ dọ gbẹtọ ko hẹn ninọmẹ pipé dowhenu tọn bu. Mẹhe nọ plọnmẹ linlẹn nulẹ tin yededenu tọn lẹ nọ plọnmẹ dọ gbẹtọ to wunmẹ diọ do dagbe ji bo ma tindo nuhudo ofligọ tọn. Abajọ apọsteli Paulu na ayinamẹ Timoti dọmọ: “Basi hihọ́na nuhe yin zizedo alọmẹ na we lọ, bo nọ dapana ohó ovọ́ lẹ he nọ kọnmasin do onú wiwe go podọ na ohó agọjẹdomẹ tọn he yè nọ yí lalo do ylọdọ ‘oyọnẹn’ lẹ. Na gbọn oyọnẹn mọnkọtọn lẹ jijlá dali, mẹdelẹ ko jo yise lọ do.”—1 Tim. 6:20, 21.
3. Kanbiọ tẹlẹ wẹ mí na gbadopọnna todin?
3 Ayihaawe matin dọ hiẹ ko magbe ma na do “jo yise lọ do.” Nado hẹn yise towe lodo, nuhe sọgbe wẹ e yin nado gbadopọnna kanbiọ ehelẹ: Etẹwutu n’tindo nuhudo ofligọ lọ tọn? Etẹwẹ ofligọ lọ biọ? Nawẹ n’sọgan mọaleyi sọn awuwledainanu ehe he sọgan whlẹn mi sọn homẹgble Jiwheyẹwhe tọn mẹ gbọn?
Mọ Whlẹngán sọn Homẹgble Jiwheyẹwhe Tọn Mẹ
4, 5. Etẹwẹ dohia dọ homẹgble Jiwheyẹwhe tọn gbọṣi aihọn ylankan ehe ji?
4 Biblu po whenuho po dohia dọ homẹgble Jiwheyẹwhe tọn ko “gbọṣi” akọ̀ gbẹtọvi lẹ tọn ji sọn whenue Adam waylando. (Joh. 3:36) Ehe họnwun to nugbo lọ mẹ dọ gbẹtọvi depope ma ko penugo nado dapana okú. Nupojipetọ-yinyin agbàwhinwhlẹn tọn Satani tọn gboawupo mlẹnmlẹn nado basi hihọ́na gbẹtọvi lẹ sọn nugbajẹmẹji he to jijideji lẹ mẹ, podọ gandudu gbẹtọvi tọn depope ma ko penugo nado hẹn pekọ wá na nuhudo tangan tòvi yetọn lẹ tọn. (1 Joh. 5:19) Abajọ awhàn, mẹhuhu, po ohẹ́n po gbẹ́ pò to tuklado gbẹtọvi lẹ.
5 Enẹwutu, e họnwun dọ dona Jehovah tọn ma tin to titonu ylankan ehe ji. Paulu dọ dọ “Homẹgble Jiwheyẹwhe tọn to yinyin didohia sọn olọn mẹ sọta omẹ jijọ-madi-Jiwheyẹwhe tọn [lẹpo].” (Lom. 1:18-20) Enẹwutu, mẹhe ma lẹnvọjọ sọn gbẹzan jijọ-madi-Jiwheyẹwhe tọn mẹ lẹ ma na họ̀ngán sọn kọdetọn walọyizan yetọn tọn mẹ. To egbehe, homẹgble Jiwheyẹwhe tọn to yinyin hinhẹn zun yinyọnẹn to owẹ̀n whẹdanamẹ tọn he nọ yin kinkọnjẹgbonu di azọ̀nylankan do aihọn Satani tọn ji mẹ, podọ nudọnamẹ mọnkọtọn lẹ nọ sọawuhia to owe sinai do Biblu ji mítọn susu mẹ.—Osọ. 16:1.
6, 7. Azọ́n tẹwẹ Klistiani yiamisisadode lẹ to anadena to alọnu, podọ dotẹnmẹ tẹwẹ gbẹ́ hùn dotena gbẹtọvi he yin apadewhe aihọn Satani tọn lẹ?
6 Be ehe zẹẹmẹdo dọ whenu ko fẹ́ na gbẹtọvi lẹ nado gbẹ́ gandudu Satani tọn dai nado mọ nukundagbe Jiwheyẹwhe tọn wẹ ya? Lala, na dotẹnmẹ lọ gbẹ́ hundote na gbẹtọ lẹ nado gbọwhẹ hẹ Jehovah. Klistiani yiamisisadode he yin “afọzedaitọ lẹ he to otẹn Klisti tọn mẹ,” wẹ yin tọ́ntlọ́ngbọ́n to lizọnyizọn gbangba tọn mẹ ehe gblamẹ gbẹtọ akọta lẹpo tọn to yinyin oylọ-basina te dọmọ: “Mì gbọwhẹ hẹ Jiwheyẹwhe.”—2 Kọl. 5:20, 21.
7 Apọsteli Paulu dọ dọ Jesu “whlẹn mí sọn homẹgble he ja lọ mẹ.” (1 Tẹs. 1:10) To whenue Jehovah na do homẹgble etọn godo tọn hia, e na dekọtọn do vasudo madopodo mẹ na ylanwatọ he ma lẹnvọjọ lẹ. (2 Tẹs. 1:6-9) Mẹnu wẹ na luntọ́n? Biblu dọmọ: “Mẹhe nọ do yise hia to Visunnu lọ mẹ tindo ogbẹ̀ madopodo; mẹhe nọ vẹtolina Visunnu lọ ma na mọ ogbẹ̀, ṣigba homẹgble Jiwheyẹwhe tọn nọ gbọṣi e ji.” (Joh. 3:36) Mọwẹ, to whenue titonu ehe na wá vivọnu, mẹhe to ogbẹ̀ bo to yise dohia to Jesu po ofligọ lọ po mẹ lẹpo na lùn azán godo tọn homẹgble Jiwheyẹwhe tọn tọ́n.
Lehe Ofligọ lọ Wazọ́n Do
8. (a) Todido jiawu tẹwẹ yin zizedonukọnna Adam po Evi po? (b) Nawẹ Jehovah do ede hia di Jiwheyẹwhe whẹdida dodo pipé tọn de gbọn?
8 Adam po Evi po yin didá taidi gbẹtọ pipé. Eyin yé ko gbọṣi tonusise mẹ na Jiwheyẹwhe wẹ, kúnkan yetọn lẹ na ko yin ayajẹnọ bo gọ́ aigba ji bosọ nọgbẹ̀ dopọ hẹ yé to Paladisi mẹ todin. Ṣigba, e blawu dọ mẹjitọ mítọn tintan lẹ desọn ojlo mẹ bo gbà osẹ́n Jiwheyẹwhe tọn. Taidi kọdetọn de, owhẹ̀ okú madopodo tọn yin didá na yé podọ yé yin yinyan sọn Paladisi dowhenu tọn lọ mẹ. To whenue Adam po Evi po tindo ovi lẹ, ylando ko bẹpla gbẹtọvi, podọ sunnu tintan po yọnnu tintan lọ po poyọnho vudevude bo kú. Ehe dohia dọ Jehovah yin nugbonọ na ohó etọn. Humọ, Jiwheyẹwhe whẹdida dodo pipé tọn de wẹ ewọ yin. Jehovah na avase Adam dọ eyin e dù sọn atin-sinsẹ́n he emi dosẹ́n etọn lọ mẹ, e na dekọtọn do okú mẹ—podọ e jọ domọ.
9, 10. (a) Naegbọn kúnkan Adam tọn lẹ nọ kú? (b) Nawẹ mí sọgan yin whinwhlẹngán sọn okú madopodo si gbọn?
9 Taidi kúnkan Adam tọn lẹ, mí dugu agbasa mape he nọ yawu waylando bo nọ yawu kú de tọn. To whenue Adam waylando, mí to alinkàn etọn to yẹhiadonu-liho. Enẹwutu, kú-whẹ̀ he yin didá na ẹn lọ gando mí go ga. Eyin Jehovah na de okú sẹ̀ bo ma wleawu ofligọ de tọn, be e ma yin nugbonọ na ohó etọn. Na nugbo tọn, Paulu dọhodo mímẹpo tamẹ to whenue e dọmọ: “Mí yọnẹn dọ Osẹ́n lọ yin gbigbọ tọn; ṣigba yẹn yin agbasalan tọn, bo yin sisà do ylando glọ. Gbẹtọ tapònọ he yẹn yin! Mẹnu wẹ na whlẹn mi sọn agbasa he to okú ehe hẹnwa to yẹn mẹ lọ si?”—Lom. 7:14, 24.
10 Jehovah Jiwheyẹwhe kẹdẹ wẹ sọgan wleawuna dodonu he sọgbe he e nado jona ylando mítọn sọgbe hẹ whẹdida dodo bo hẹn mí jẹ mẹdekannu sọn owhẹ̀ okú madopodo tọn mẹ. E wà ehe to whenue e do Visunnu yiwanna etọn hlan sọn olọn mẹ nado yin jiji taidi gbẹtọ pipé, he sọgan ze ogbẹ̀ etọn jo taidi ofligọ de na mí. Kakati nado yinuwa di Adam, Jesu hẹn pipé-yinyin etọn go. Na nugbo tọn, “e ma wà ylando depope.” (1 Pita 2:22) Gbọnmọ dali, Jesu tindo nugopipe nado jivi he na lẹzun akọ̀ gbẹtọvi pipé tọn de. Etomọṣo, e dike kẹntọ Jiwheyẹwhe tọn lẹ ni hù i na e nido sọgan yí kúnkan ylandonọ Adam tọn lẹ do basi sọdodovi bo hẹn ẹn yọnbasi na mẹhe do yise hia to ewọ mẹ lẹ nado mọ ogbẹ̀ madopodo. Owe-wiwe lẹ basi zẹẹmẹ dọmọ: “Jiwheyẹwhe dopo wẹ tin, podọ whẹgbọtọ dopo to Jiwheyẹwhe po gbẹtọ lẹ po ṣẹnṣẹn, enẹ wẹ dawe lọ, Klisti Jesu, mẹhe ze ede jo di ofligọ he sọzẹn de na mẹlẹpo.”—1 Tim. 2:5, 6.
11. (a) Ninọmẹ tẹ go wẹ ale ofligọ lọ tọn lẹ sọgan yin yiyijlẹdo? (b) Mẹnu lẹ ji wẹ ale ofligọ lọ tọn lẹ dlẹnkan jẹ?
11 Lehe ofligọ lọ nọ wazọ́n do sọgan yin yiyijlẹdo ninọmẹ mẹhe sẹ̀ akuẹ do akuẹsẹdotẹn de he bẹ akuẹ yetọn lẹpo dù bo tlọ yé do ahọ́ mẹ lẹ tọn go. Mẹhe tindo akuẹsẹdotẹn lọ lẹ yin whẹdana nado sẹ̀ngàn na owhe susu. Ṣigba, etẹwẹ dogbọn homẹvọnọ he sẹ̀ akuẹ yetọn do finẹ lẹ dali? Todin he yé ko jẹhẹ́n, yé ma sọgan wà nudepope gando ninọmẹ yetọn go adavo dọ dawe adọkunnọ he jọmẹ de ni họ̀ akuẹsẹdotẹn lọ bo gọ̀ akuẹ homẹvọnọ lọ lẹpo tọn jo na yé, bosọ tún yé dote sọn ahọ́ mẹ. To aliho dopolọ mẹ, Jehovah Jiwheyẹwhe po Visunnu yiwanna etọn po ko họ̀ ovivi Adam tọn lẹpo bo sú ahọ́ ylando tọn he yé dù to dodonu hùnsọndai Jesu tọn ji. Abajọ Johanu Baptizitọ sọgan dọ gando Jesu go dọmọ: “Pọ́n Lẹngbọvu Jiwheyẹwhe tọn, he ze ylando aihọn tọn yì!” (Joh. 1:29) Gbẹtọvi he ylando yetọn yin ahọsuna lẹ bẹ mẹhe to ogbẹ̀ po oṣiọ lẹ po hẹn.
Nuhe Ofligọ lọ Biọ
12, 13. Etẹwẹ mí sọgan plọn sọn ojlo Ablaham tọn nado yí Isaki do sanvọ́ mẹ?
12 Mí ma sọgan mọnukunnujẹ nuhe ofligọ lọ biọ to Otọ́ olọn mẹ tọn mítọn po Visunnu yiwanna etọn po si to gigọ́ mẹ. Ṣigba, Biblu dọ numimọ mẹdelẹ tọn he sọgan gọalọna mí nado lẹnayihamẹpọn do whẹho ehe ji. Di apajlẹ, yí nukun homẹ tọn do pọ́n nuhe na ko yin numọtolanmẹ Ablaham tọn dile e zingbejizọnlin na azán atọ̀n yì aigba Molia tọn ji nado setonuna gbedide Jiwheyẹwhe tọn dọmọ: “Yí visunnu towe lo, yèdọ Isaki, visunnu towe dopo akàn lọ he hiẹ yiwanna, bo yì aigba Molia tọn ji; bo yí i do sanvọ́ nunina mimẹ̀ tọn de to finẹ to dopo osó lẹ tọn ji fie tọn yẹn na dọna we.”—Gẹn. 22:2-4.
13 To godo mẹ, Ablaham jẹ fihe yin didọna ẹn lọ. Yí nukun homẹ tọn do pọ́n lehe e na ko hẹn awubla wá na ẹn do nado blá alọ po afọ Isaki tọn lẹ po bo ze e mlọn agbà he Ablaham lọsu yí alọ etọn do basi ji. Lehe e na ko biọlanmẹna Ablaham nado ze ohí he e na do hù visunnu etọn daga do sọ! Pọ́n numọtolanmẹ he Isaki na ko tindo dile e to aimimlọn to agbà lọ ji, bo to tenọpọn awufiẹsa he ohí didá he na biọlanmẹna ẹn na hẹnwa e ji bo dekọtọn do okú mẹ na ẹn. Angẹli Jehovah tọn doalọtena Ablaham do gànmẹ pẹpẹ. Nuhe Ablaham po Isaki po wà to nujijọ enẹ mẹ gọalọna mí nado mọnukunnujẹ nuhe e biọ to Jehovah si nado na dotẹnmẹ awhànvipẹ Satani tọn lẹ nado hù Visunnu Etọn mẹ. Gbekọndopọ Isaki tọn hẹ Ablaham, nọtena ojlo Jesu tọn nado jiya bo kú do ota mítọn mẹ.—Heb. 11:17-19.
14. Etẹwẹ jọ to gbẹzan Jakọbu tọn mẹ he gọalọna mí nado yọ́n pinpẹn nuhe ofligọ lọ biọ tọn?
14 Nuhe ofligọ lọ biọ sọ sọgan yin yiyijlẹdo nuhe jọ to gbẹzan Jakọbu tọn mẹ de go. Josẹfu wẹ Jakọbu yiwanna hugan to visunnu etọn lẹpo mẹ. E blawu dọ mẹdaho Josẹfu tọn lẹ whànwu i bo gbẹwanna ẹn. Etomọṣo, Josẹfu tindo ojlo nado yì pọ́n lehe mẹdaho etọn lẹ te do to whenue otọ́ etọn do e hlan. To ojlẹ enẹ mẹ, mẹdaho etọn lẹ to nukunpedo lẹngbọ Jakọbu tọn lẹ go to Heblọni, fihe dẹn na nudi kilomẹtlu 100 do owhé yetọn gbè to agewaji. Yí nukun homẹ tọn do pọ́n numọtolanmẹ Jakọbu tọn to whenue visunnu etọn lẹ gọ̀ po awù Josẹfu tọn he gọ́ na ohùn po! E dọ dọ: “Awù visunnu ṣie tọn wẹ; kanlin ylankan ko hù i dù; nugbonugbo yè ko hẹn Josẹfu tlẹ́n do voovo.” Ehe lẹpo yinuwado Jakọbu ji tlala, bọ e nọ aluẹmẹ na Josẹfu na azán susu. (Gẹn. 37:33, 34) Jehovah ma nọ yinuwa to ninọmẹ lẹ mẹ kẹdẹdile gbẹtọvi mapenọ lẹ nọ wà do pẹpẹ gba. Etomọṣo, ayihamẹlinlẹnpọn do nuhe jọ to gbẹzan Jakọbu tọn mẹ ehe ji sọgan gọalọna mí jẹ obá de mẹ nado yọ́n numọtolanmẹ he Jiwheyẹwhe na ko tindo to whenue Visunnu yiwanna etọn yin nuyiwa hẹ to aliho agọ̀ mẹ bo yin hùhù to aliho ylankan mẹ taidi gbẹtọvi de to aigba ji.
Mí Mọaleyi sọn Ofligọ lọ Mẹ
15, 16. (a) Nawẹ Jehovah dohia dọ emi kẹalọyi ofligọ lọ gbọn? (b) Nawẹ hiẹ ko mọaleyi sọn ofligọ lọ mẹ gbọn?
15 Jehovah Jiwheyẹwhe fọ́n Visunnu nugbonọ etọn sọnku po agbasa gbigbọnọ gigonọ de po. (1 Pita 3:18) To azán 40 gblamẹ, Jesu he yin finfọnsọnku lọ sọawuhia devi etọn lẹ, hẹn yise yetọn lodo bo wleawuna yé na azọ́n wẹndagbe-jijlá tọn he yé na wà to nukọn mẹ lọ. Enẹgodo e yì olọn mẹ, bo ze nuhọakuẹ hùnsọndai etọn tọn donukọnna Jiwheyẹwhe, ehe na yin yiyizan do ota hodotọ nugbonọ etọn lẹ tọn mẹ, he do yise hia to nuhọakuẹ avọ́sinsan ofligọ etọn tọn mẹ lẹ. Jehovah Jiwheyẹwhe dohia dọ emi kẹalọyi ofligọ Klisti tọn gbọn azọngban zizedo alọmẹ na Jesu nado kọ̀n gbigbọ wiwe jẹgbonu do devi etọn he pli dopọ to Jelusalẹm to azán Pẹntikọsti tọn gbè to owhe 33 W.M. lẹ ji dali.—Owalọ 2:33.
16 To afọdopolọji, hodotọ yiamisisadode Klisti tọn ehelẹ jẹ tulina gbẹtọvi hatọ yetọn lẹ ji nado họ̀ngán sọn homẹgble Jiwheyẹwhe tọn mẹ gbọn baptẹm yíyí to oyín Jesu Klisti tọn mẹ dali, na jona ylando yetọn lẹ tọn. (Hia Owalọ lẹ 2:38-40.) Bẹsọn azán vonọtaun enẹ ji kakajẹ din, gbẹtọ livi susu sọn akọta lẹpo mẹ ko yin whinwhàn nado bẹ haṣinṣan jẹeji hẹ Jiwheyẹwhe to dodonu yise yetọn to avọ́sinsan ofligọ Jesu tọn mẹ ji. (Joh. 6:44) To fie mí jẹ todin, e jẹ dọ mí ni gbadopọnna kanbiọ awe devo lẹ: Be mí mọ todido ogbẹ̀ madopodo tọn yí na azọ́n dagbe mítọn lẹ wutu wẹ ya? To whenue mí ko tindo todido jiawu ehe, be e yọnbasi dọ mí ni hẹn ẹn bu ya?
17. Nukun tẹwẹ hiẹ dona yí do pọ́n dona jiawu lọ nado yin họntọn Jiwheyẹwhe tọn?
17 Na taun tọn, lẹblanulọkẹyi majẹhẹ de wẹ ofligọ lọ yin. Ṣigba, gbọn yise didohia to e mẹ dali, gbẹtọ livi susu to egbehe ko lẹzun họntọn Jiwheyẹwhe tọn lẹ, bo tindo todido nado nọgbẹ̀ kakadoi to paladisi mẹ to aigba ji. Etomọṣo, họntọn Jiwheyẹwhe tọn lilẹzun ma dohia dọ mí na gbọṣi haṣinṣan mọnkọtọn mẹ hẹ ẹ gba. Eyin mí na yin whinwhlẹngán sọn homẹgble-zan Jiwheyẹwhe tọn he ja lọ mẹ, mí dona nọ do pinpẹn-nutọn-yinyọnẹn hia na “ofligọ he Klisti Jesu suahọ etọn” lọ.—Lom. 3:24; hia Filippinu lẹ 2:12.
Nọ Do Yise Hia to Ofligọ lọ Mẹ
18. Etẹwẹ yise didohia to ofligọ lọ mẹ bẹhẹn?
18 Wefọ he ji hosọ ehe sinai do, Johanu 3:36, dohia dọ yise didohia to Oklunọ Jesu Klisti mẹ bẹ tonusisena ẹn hẹn. Pinpẹn-nutọn-yinyọnẹn na ofligọ lọ dona whàn mí nado nọgbẹ̀ to kọndopọ mẹ hẹ nuplọnmẹ Jesu tọn lẹ, he bẹ nuhe e plọnmẹ gando walọ dagbe go hẹn. (Malku 7:21-23) “Homẹgble Jiwheyẹwhe tọn ja” mẹhe gbọn lẹnvọjọ matindo dali yí galilọ, aslan gblewa tọn gọna “mawé wunmẹ lẹpo” he bẹ yẹdide fẹnnuwiwa tọn pinpọn hẹn do dó aṣa lẹpo ji.—Efe. 5:3-6.
19. Aliho dagbe tẹlẹ mẹ wẹ mí sọgan do yise hia to ofligọ lọ mẹ te?
19 Pinpẹn-nutọn-yinyọnẹn mítọn na ofligọ lọ dona whàn mí nado hẹn alọnu ján to “nuyiwa mẹdezejo na Jiwheyẹwhe tọn lẹ” mẹ. (2 Pita 3:11) Mì gbọ mí ni de whenu he pé dovo na dẹ̀hiho vẹkuvẹku to gbesisọ mẹ, Biblu pinplọn mẹdetiti tọn, opli lẹ yìyì, sinsẹ̀n-bibasi whẹndo tọn, azọ́n yẹwheho Ahọluduta tọn didọ po zohunhun po. Podọ mì gbọ mí ni ma “wọnji dagbe wiwà po onú lẹ mimá hẹ mẹdevo lẹ po go blo, na avọ́sinsan mọnkọtọn lẹ go wẹ homẹ Jiwheyẹwhe tọn nọ hùn do taun.”—Heb. 13:15, 16.
20. Dona sọgodo tọn tẹwẹ mẹhe nọ do yise hia to ofligọ lọ mẹ lẹ sọgan donukun?
20 To whenuena homẹgble Jehovah tọn na gbajẹgbonu do titonu ylankan ehe ji, lehe mí na jaya dọ mí ko do yise hia to ofligọ lọ mẹ bo do pinpẹn-nutọn-yinyọnẹn hia zọnmii do sọ! Podọ to aihọn yọyọ dopagbe Jiwheyẹwhe tọn mẹ, mí na to opẹ́ do kakadoi na awuwledainanu jiawu ehe he whlẹn mí sọn homẹgble Jiwheyẹwhe tọn mẹ.—Hia Johanu 3:16; Osọhia 7:9, 10, 13, 14.
Nawẹ Hiẹ Na Na Gblọndo Gbọn?
• Naegbọn mí tindo nuhudo ofligọ lọ tọn?
• Etẹwẹ ofligọ lọ biọ?
• Ale tẹlẹ wẹ ofligọ lọ hẹnwa?
• Nawẹ mí nọ do yise hia to avọ́sinsan ofligọ Jesu tọn mẹ gbọn?
[Yẹdide to weda 13]
Dotẹnmẹ gbẹ́ hundote na gbẹtọ lẹ nado gbọwhẹ hẹ Jehovah
[Yẹdide to weda 15]
Nulinlẹnpọn do nujijọ he gando Ablaham, Isaki po Jakọbu po go ehelẹ ji sọgan gọalọna mí nado yọ́n pinpẹn nuhe ofligọ lọ biọ tọn