“Mì Yiahọsu Mìde Tọn Blo”

15. Whẹwhinwhẹ́n tẹwẹ yin nina to Lomunu lẹ 12:19 mẹ he wutu mí ma dona yiahọsu?

¹⁵ Paulu dohia dọ whẹwhinwhẹ́n titengbe devo he wutu mí ma dona yiahọsu wẹ yindọ nuyiwa whiwhẹ tọn wẹ enẹ yin. E dọmọ: “Mẹvivẹ ṣie emi, mì yiahọsu mìde tọn blo, ṣigba mì kuku gbọ bo jotẹn hlan homẹgble: na yè wlan ẹn dọ, Ahọsuyi wẹ ṣie; yẹn na suahọ, wẹ [Jehovah] dọ.” (Lomunu lẹ 12:19) Saklanọ wẹ Klistiani he nọ tẹnpọn nado yiahọsu, na e to azọngban Jiwheyẹwhe tọn hòyí. (Matiu 7:1) Humọ, gbọn tintẹnpọn nado didẹ whẹho lọ na ede dali, e to didohia dọ e ma tindo yise to jidenamẹ Jehovah tọn mẹ dọmọ: “Yẹn na suahọ.” To vogbingbọn mẹ, Klistiani nugbo lẹ nọ deji dọ Jehovah na “yiahọsu na mẹṣinyanṣinyan etọn lẹ.” (Luku 18:7, 8; 2 Tẹsalonikanu lẹ 1:6-8) Yé nọ gbọn whiwhẹ dali jo ahọsu oylan tọn yíyí do alọmẹ na Jiwheyẹwhe.—Jẹlemia 30:23, 24; Lomunu lẹ 1:18.

18. Naegbọn e do sọgbe bo yin nuyiwa owanyi po whiwhẹ po tọn ma nado yiahọsu?

¹⁸ To dogbapọn kleun Lomunu lẹ weta 12 tọn ehe mẹ, mí ko mọ whẹwhinwhẹ́n dolido susu he wutu mí ma dona “yí oylan do yiahọsu oylan tọn to mẹde go.” Tintan, aliho nuyiwa tọn he sọgbe wẹ e yin nado dapana ahọsuyíyí. To pọndohlanmẹ na lẹblanu Jiwheyẹwhe tọn he yin didohia mí, e sọgbe bosọ yin lẹnpọn dagbenu dọ mí ni ze míde jona Jehovah bosọ yìn gbedide etọn lẹ sọn ojlo mẹ wá—gọna gbedide lọ nado yiwanna kẹntọ mítọn lẹ. Awetọ, nuyiwa owanyi tọn wẹ e yin ma nado yí oylan do yiahọsu oylan tọn. Eyin mí dapana ahọsuyíyí bo nọ dín jijọho, mí nọ gbọn owanyi dali jlo nado gọalọna mẹhe tlẹ yin nukundiọsọmẹtọ akonka lẹ nado wá lẹzun sinsẹ̀n-basitọ Jehovah tọn lẹ. Atọ̀ntọ, nuyiwa whiwhẹ tọn wẹ e yin nado dapana oylan yíyí do yiahọsu. Dohia sakla tọn wẹ e na yin nado yiahọsu na míde, na Jehovah dọmọ: “Ahọsuyi wẹ ṣie.” Ohó Jiwheyẹwhe tọn sọ na avase dọ: “Whenuena sakla wá, whenẹnu wẹ winyan wá: ṣigba nuyọnẹn tin to whiwhẹnọ lẹ dè.” (Howhinwhẹn lẹ 11:2) Eyin mí gbọn nuyọnẹn dali jo ahọsu oylan tọn yíyí do alọmẹ na Jiwheyẹwhe, e nọ dohia dọ mí tindo whiwhẹ.