Kanbiọ lẹ sọn Wehiatọ lẹ Dè

Naegbọn Jesu sọgan dọna nawe he yin yinyọnẹn taidi ylandonọ de dọ ylando etọn lẹ ko yin jijona ẹn?—Luku 7:37, 48.

To whenuena Jesu jagla to núdùdù kọ̀n to owhé Falesi de he nọ yin Simọni tọn gbè, nawe de ‘ṣite to godo to afọ Jesu tọn lẹ kọ̀n.’ E kùn dasin etọn do afọ etọn lẹ go bosọ yí oda he to ota etọn lẹ do súnsún in sẹ̀. E to nùdo afọ etọn lẹ go magbọjẹ bo to amisisa owán gblingblinnọ lọ sá na afọ etọn lẹ. Kandai owe Wẹndagbe tọn dọ dọ nawe lọ “yin yinyọnẹn to tòdaho lọ mẹ nado yin ylandonọ.” Na nugbo tọn, gbẹtọvi mapenọ lẹpo wẹ yin ylandonọ, ṣigba Owe-wiwe lẹ nọ saba yí hogbe ehe zan na gbẹtọ he yí ylanwiwa do dó aṣa kavi he diyin na ylanwiwa etọn lẹ wutu. E yọnbasi dọ galọtọ de wẹ nawe lọ yin. Gbẹtọ mọnkọtọn wẹ Jesu dọhona dọmọ: “Ylando towe lẹ ko yin jijona we.” (Luku 7:36-38, 48) Etẹwẹ Jesu tindo to linlẹn mẹ? To whenue e yindọ avọ́sinsan ofligọ lọ tọn ma ko yin bibasi, nawẹ jona ehe yọnbasi gbọn?

To whenue nawe lọ klọ́ bo sá amisisa na afọ Jesu tọn lẹ godo, Jesu yí apajlẹ de do basi zẹẹmẹ nuagokun de tọn na jonọyitọ etọn Simọni whẹpo do jona nawe lọ. Jesu yí ylando jlẹdo ahọ́ daho de go bo dọna Simọni dọmọ: “Dawe awe duahọ do akuẹ-yannamẹtọ de; dopo duahọ denali fowe-kanweko tọn, ṣigba awetọ dù kandeao. To whenue yé ma tindo nudepope he yé na yí do suahọ, ewọ jona yé sọn ojlo mẹ wá. Enẹwutu, mẹnu to yé mẹ wẹ na yiwanna ẹn hugan?” Simọni gblọn dọmọ: “Yẹn lẹndọ mẹhe ewọ jo susu na sọn ojlo mẹ wá lọ wẹ.” Jesu sọ gblọnna ẹn dọmọ: “Hiẹ gblọn ganji.” (Luku 7:41-43) Mímẹpo wẹ duahọ tonusise tọn do Jiwheyẹwhe, enẹwutu eyin mí vẹtolina ẹn bo waylando, be mí gboawupo nado suahọ he mí dù do e niyẹn. Gbọnmọ dali, ahọ́ mítọn to susudeji. Jehovah taidi mẹhe mí duahọ do de ṣigba e jlo na jo ahọ́ lọ na mí. Abajọ Jesu na tuli hodotọ etọn lẹ nado nọ hodẹ̀ bo biọ Jiwheyẹwhe dọmọ: “Jo ahọ́ mítọn lẹ na mí, dile míwlẹ ko jona ahọ́tọnọ mítọn lẹ do ga.” (Mat. 6:12) Luku 11:4 dohia dọ ahọ́ ehelẹ nọtena ylando.

Dodonu tẹ ji wẹ Jiwheyẹwhe jona ylando lẹ te to hohowhenu? Sọgbe hẹ whẹdida dodo pipé etọn, okú wẹ yasanamẹ ylando tọn. Enẹwutu, Adam yí ogbẹ̀ etọn do suahọ ylando etọn tọn. Ṣigba, to Osẹ́n he Jiwheyẹwhe na akọta Islaeli tọn mẹ, ylanwatọ de sọgan mọ jona ylando tọn gbọn kanlin yíyí do sanvọ́ na Jehovah dali. Apọsteli Paulu wlan dọmọ: “Diblayin onú lẹpo wẹ yin kiklọ́we po ohùn po sọgbe hẹ Osẹ́n lọ, podọ eyin ohùn ma yin kinkọ̀n jẹgbonu, jona depope ma nọ wá aimẹ.” (Heb. 9:22) Na Ju lẹ, aliho dopo akàn he mẹ Jiwheyẹwhe sọgan jona ylando te niyẹn. Abajọ mẹhe to nupọn to azán Jesu tọn gbè lẹ jẹagọdo nuhe e dọna nawe lọ. Mẹhe jagla hẹ Jesu lẹ lẹn to ayiha yetọn mẹ dọmọ: “Mẹnu wẹ dawe ehe, he tlẹ nọ jo ylando lẹ namẹ?” (Luku 7:49) Enẹwutu, dodonu tẹ ji wẹ ylando nawe he yin yinyọnẹn taidi ylandonọ ehe tọn lẹ sọgan yin jijona te?

Dọdai tintan he yin didọ to whenue asu po asi po tintan ṣiatẹ godo dọho gando lẹndai Jehovah tọn nado wleawuna “okún” de he afọgbẹn etọn na yin sisó gbọn Satani po “okún” etọn po dali go. (Gẹn. 3:15) Afọgbẹn ehe sisó wá aimẹ to whenue Jesu yin hùhù gbọn kẹntọ Jiwheyẹwhe tọn lẹ dali. (Gal. 3:13, 16) Ohùn Klisti tọn he yin sinsọndai nọtena ofligọ lọ he tún gbẹtọvi lẹ sọn ylando po okú po si. To whenue e yindọ nudepope ma sọgan glọnalina Jehovah nado hẹn lẹndai etọn di, to linlẹn Jiwheyẹwhe tọn mẹ, ahọ́ ofligọ lọ tọn ko yin súsú tlolo he hogbe he tin to Gẹnẹsisi 3:15 mẹ lẹ yin didọ godo. Bẹsọn whenẹnu e sọgan jona mẹhe do yise hia to opagbe etọn mẹ lẹ.

Jẹnukọnna ojlẹ Klistiani tọn, Jehovah pọ́n gbẹtọvi susu hlan taidi dodonọ. To yé mẹ wẹ Enọku, Noa, Ablaham, Lahabi po Job po te. Gbọn yise dali, yé donukun hẹndi opagbe Jiwheyẹwhe tọn lẹ tọn. Devi Jakọbu wlan dọmọ: “Ablaham tindo yise to Jehovah mẹ, bọ e yin hihia hlan ẹn di dodowiwa.” Gando Lahabi go, Jakọbu dọmọ: “To aliho dopolọ mẹ, be e ma yin gbọn azọ́n lẹ dali wẹ Lahabi galọtọ lọ yin lilá di dodonọ ga?”—Jak. 2:21-25.

Whlasusu wẹ ahọlu Davidi Islaeli hohowhenu tọn wà ylando sinsinyẹn, ṣigba e tindo yise dolido to Jiwheyẹwhe nugbo lọ mẹ bo nọ do lẹnvọjọ ahundopo tọn hia to ninọmẹ lẹ dopodopo mẹ. Humọ, Owe-wiwe dọmọ: “Jiwheyẹwhe ze [Jesu] jo taidi avọ́nunina oyẹsu tọn de gbọn yise to ohùn etọn mẹ dali. Ehe yinmọ na e nido do dodowiwa edetiti tọn hia, na Jiwheyẹwhe to ylando he ko yin wiwà wayi lẹ jonamẹ dile e to homẹfa dohia; na e nido sọgan do dodowiwa edetiti tọn hia to ojlẹ ehe mẹ, na ewọ nido sọgan yin dodonọ, etlẹ yin to whenue mẹhe tindo yise to Jesu mẹ lẹ to yinyin lilá di dodonọ.” (Lom. 3:25, 26) To dodonu avọ́sinsan ofligọ he Jesu dona basi tọn ji, Jehovah sọgan jo ylando Davidi tọn lẹ na ẹn bo ma tùnafọ nubiọtomẹsi whẹdida dodo tọn Etọn lẹ ji.

E họnwun dọ whẹho dopolọ wẹ gando nawe he sá amisisa na afọ Jesu tọn lẹ go. E ko zan gbẹzan fẹnnuwiwa tọn wayi, ṣigba e lẹnvọjọ. E yọnẹn dọ emi tindo nuhudo tundote sọn ylando si tọn bo dohia gbọn nuwiwa etọn lẹ dali dọ emi yọ́n pinpẹn mẹhe Jehovah yizan nado wleawuna tundote enẹ tọn nugbonugbo. Dile etlẹ yindọ ahọ́ avọ́sinsan lọ tọn ma ko yin súsú, e họnwun dọ e na yin súsú dandan, podọ gbọnmọ dali nuhọakuẹ avọ́sinsan lọ tọn sọgan yin yiyizan do gbẹtọvi he taidi nawe lọ nkọ lẹ tamẹ. Enẹwutu, Jesu dọna ẹn dọmọ: “Ylando towe lẹ ko yin jijona we.”

Dile kandai ehe dohia to aliho he họnwun mẹ do, Jesu ma gbẹkọ ylanwatọ lẹ go gba. E wà dagbe na yé. Humọ, Jehovah wleawufo nado jo ylando ylanwatọ he lẹnvọjọ lẹ tọn na yé. Jidenamẹ jiawu he namẹ tuli nankọ die na mí gbẹtọvi mapenọ lẹ!

[Yẹdide to weda 7]

E yin hihia hlan yé taidi dodowiwa