Titá Hinhọ́n do Tintin Tofi Klisti Tọn Ji
“whenuena ovi gbẹtọ tọn na wá to gigo etọn mẹ, ... é [na] klán yé dovo sọn yenọzo go.”—MATIU 25:31, 32.
1. Tadena tẹwẹ sinsẹ̀ngan Mẹylọhodotọklisti basi na hogbe lọ lẹ to Matiu 24:3 nado zẹẹmẹdo?
TO AZAN atọ̀n jẹnukọnna okú Jesu tọn, ẹnẹ to devi etọn lẹ mẹ dọ̀nsẹpọ ẹ bo kanse e po nujikudo po dọmọ: “Dọ na mí, whenuena onú helẹ na jọ? etẹwẹ na yin ohia wiwá [Glẹki, pa·rou·siʹa] towe tọn, po opòdo aihọn tọn po tọn?” Na owhe kanweko lẹ, sinsẹ̀ngan Mẹylọhodotọklisti tọn lẹ po wekantọ lẹ po ko detana ohó he yè dọna Jesu helẹ to Matiu 24:3 (Osty) nado zẹẹmẹdo dọ ewọ na yin mimọ whladopo dogọ to agbasalan mẹ nado yin pinpọn gbọn gbẹtọvi lẹpo dali. Gbọnmọ, yé ko plọnmẹ dọ lẹgọwá Klisti tọn na yin po dohia daho de po hunwhẹ yinukundomọ pligidi de po. Yé dlẹnalọdo e taidi wiwá awetọ Klisti tọn. Ṣigba be lẹnpọn yetọn lẹ sọgbe ya?
2, 3. (a) Vogbingbọn tẹwẹ Bladopọ 2tọ́ owe lọ Etudes des Ecritures basi to hogbe lọ lẹ “wiwá” po “tintin tofi” po ṣẹnṣẹn? (b) Etẹwẹ omẹ Jehovah tọn lẹ wá mọnukunnujẹemẹ gando zẹẹmẹ pa·rou·siʹa Klisti tọn go?
2 To 1889, taidi hinhọ́n tindo tọ́ owhe kanweko 19tọ whenu tọn lẹ, mẹyiamisisadode Jehovah tọn lẹ ko kẹalọyi vọjlado do whẹho lẹgọwá Klisti tọn ji. To bladopọ 2tọ Etudes des Ecritures, weda 164 jẹ 166 tọn mẹ, Charles T. Russell, azinponọ tintan Ogbẹ́ Watch Tower Bible and Tract Society tọn, wlan dọmọ: “Parousia ... nọtena tintin tofi, bo ma dona yin lilẹdogbedevomẹ gbede pọn taidi wiwá gba, kẹdẹ dile e te do to Biblu Glẹnsigbe paa tọn mẹ ... ‘Emphatic Diaglott,’ yèdọ lẹdogbedevomẹ họakuẹ taun Alẹnu Yọyọ tọn de, basi lẹdogbedevomẹ parousia tọn to aliho he sọgbe mẹ, yèdọ tintin tofi ... , e ma yin enẹ heyin wiwá tọn, taidi dọ e tin to aliho ji jà gba, ṣigba tintin tofi, taidi to wiwá godo [Jesu] dọmọ, ‘Kẹdẹ dile azán Noa tọn tin te do, mọkẹdẹ wẹ parousia [tintin tofi] Ovi gbẹtọ tọn na yin.’ Do ayi e go, dọ nuyijlẹdonugo lọ ma yin wiwá Noa tọn po wiwá Oklunọ mítọn tọn po gba ... Nalete, vogbingbọn lọ tin to ṣẹnṣẹn ojlẹ tintin tofi Noa tọn to gbẹtọ lẹ ṣẹnṣẹn ‘jẹnukọnna singigọ́ lọ,’ po ojlẹ tintin tofi Klisti tọn po to aihọn mẹ, taidi wiwá whlaawetọ etọn, ‘jẹnukọnna mìyọn lọ’—yèdọ Azán tuklanọ hugan Oklunọ lọ [Jehovah] tọn to ehe mẹ aihọn ehe na wá vivọnu.”—Matiu 24:37.
3 Enẹwutu omẹ Jehovah tọn lẹ to owhe kanweko 19tọ́ tọn whenu tindo nukunnumọjẹnumẹ po gbesisọ po dọ pa·rou·siʹa Klisti tọn na yin mayinukundomọ de. Yé ko sọ wá nukunnumọjẹnumẹ de kọ̀n dọ Ojlẹ Kosi lẹ tọn na wá vivọnu to alúnlùn 1914 tọn mẹ. Dile nukunnumọjẹnumẹ gbigbọmẹ tọn to nukọnyi, yé wá yọnẹn dọ Jesu Klisti yin zizé do ofin ji to olọn mẹ taidi Ahọlu Ahọluduta lọ tọn to owhe dopolọ mẹ, yèdọ 1914.—Howhinwhẹn lẹ 4:18; Daniẹli 7:13, 14; Luku 21:24; Osọhia 11:15.
“Gigọ̀wa ... Oklunọ Mítọn Tọn”
4. Etẹwẹ “gigọwá Jesu Klisti Oklunọ mítọn tọn” dlẹnalọdo?
4 To whelọnu lo, to azán mítọn gbè, etẹwẹ hodidọ Biblu tọn lọ “gigọwá Jesu Klisti Oklunọ mítọn tọn” zẹẹmẹdo? (1 Tẹsalonikanu lẹ 5:23) Gbedide dopo basi zẹẹmẹ dọ “tintin tofi,” pa·rou·siʹa, “lẹzun hogbe osẹ́n tọn na dlapọn mẹhe tin to otẹn he yiaga de mẹ tọn, titengbe ahọlu lẹ po ahọluigbagan lẹ po he to dlapọn basi sọyi pọ̀nla de ji.” Enẹwutu hogbè ehe dlẹnalọdo tintin tofi gigonọ Jesu Klisti tọn taidi Ahọlu, sọn podọ to 1914 godo, jẹgodona zizédo ofìn ji olọn mẹ etọn tọn. Enẹwutu, é tin tofí to mayinukundomọ mẹ bo ‘to ahọludu to ṣẹnṣẹn kẹntọ etọn lẹ tọn,’ bo to gandu po zohunhun po taidi Ahọlu nado hẹn gbedide dọdai ehe tọn di. (Psalm 110:2) Na owhe 79 lẹ, gbẹtọvi lẹ to aigba ji ko to numimọ nugandomẹgo tintin tofi gigonọ mayinukundomọ Klisti tọn lẹ tindo.
5. Awuwle tẹlẹ to pa·rou·siʹa whenu wẹ na yin zẹẹmẹ basina to hosọ atọ̀n linlinnamẹwe ehe tọn mẹ?
5 To hosọ debọdo-dego atọ̀n ehelẹ mẹ, mí na gbadopọnna kunnudenu jiawu wadotana Ahọluduta Klisti tọn lẹ to ojlẹ ehe mẹ. Tintan, mí na zé dọdai Biblu tọn voovo lẹ donukọnnamẹ yèdọ dehe ko sọawuhia kavi he to awusọhia to alọnu din. Awetọ, mí na basi zẹẹmẹ azọ́n daho he to yinyin wiwadotana gbọn hagbẹ́ afanumẹ nugbonọ nuyọnẹntọ lọ he Jesu to yiyizan to ojlẹ tintin tofi gigonọ etọn ehe lẹpo mẹ dali. (Matiu 24:45-47) Hosọ atọ̀ntọ na basi zẹẹmẹ na mí do opodo jiawu lọ ji, yèdọ ojlẹ “nukunbibia daho” lọ tọn. Enẹ wẹ yin ojlẹ lọ whenuena Jesu wá taidi Whẹdida-Hẹnṣẹtọ Jehovah tọn nado và mẹylankan lẹ sudo bo whlẹn dodonọ lẹ gan. (Matiu 24:21, 29-31) Ojlẹ vasudo tọn enẹ yin zẹẹmẹ basina gbọn apọsteli Paulu dali taidi hinhẹn “mì he yè bianukunna lẹ ... gbọjẹ to mì de, to whenuena yè na do Jesu Oklunọ hia sọn olọn mẹ, po angẹli huhlọnnọ etọn lẹ po, mẹhe to ahọsuyì to yé mẹ he ma yọn Jiwheyẹwhe lẹ go, podọ yé he ma setonuna wẹndagbe Jesu Klisti Oklunọ mítọn tọn lẹ.”—2 Tẹsalonikanu lẹ 1:7, 8.
Ohia Lọ
6. Ohia bladopọ tọn tẹwẹ yin zẹẹmẹ basina to Matiu weta 24 po 25 po mẹ?
6 To owhe kanweko fọtọ̀nnukunẹnẹ die wayi, devi hinhọ́n hẹntọ Jesu tọn lẹ kan ohia, kavi kunnudenu de sè e, gando tintin tofi sọgodo etọn tọn to gandudu Ahọluduta tọn mẹ go. Gblọndo etọn, he yin kinkandai to weta 24tọ po 25tọ Matiu tọn po mẹ, wleawu ohia bladopọ de tọn, ehe nuhe gando e go lẹpo to hẹndi mọyi todin to adà aigba lẹpo tọn ji. Hẹndi ohia enẹ tọn dohiagona bẹjẹeji ojlẹ nukunbibia tọn de po whlepọn daho po. Jesu na avase dọmọ: “Mì payi, na mẹde hẹn mì bú blo. Na omẹ susu na wá to oyín ṣie mẹ, dọmọ, yẹn wẹ Klisti lọ; bo nasọ hẹn omẹ susu bú. Mì nasọ sè awhàn linlin po awhàn zingidi po: mì sọ do ayi e go, na mì hanú blo na onú helẹ po ma sọgan nọ ma wá jọ gba, ṣigba opòdo ma yin dinvie.”—Matiu 24:4-6.
7. Adà ohia lọ tọn tẹlẹ wẹ mí ko mọ yin hinhẹndi sọn 1914 gbọ́n?
7 Jesu sọ dọ dọdai yinukọn dogọ dọ awhàn na tin to oba he yiaga hugan de mẹ. To hẹndi mẹ, awe to ehe mẹ ko yin kinklandovo taidi wẹkẹ whàn lẹ, dopo sọn 1914 jẹ 1918 podọ awetọ sọn 1939 jẹ 1945. Yinukọn dogọ, e dọ dọ núdùdù whèdomẹ po aigba sisọsisọ lẹ po na tin sọn fide-jẹ-devo. Klistiani nugbo lẹ na yin homẹkẹn sinsinyẹn do, dile Kunnudetọ Jehovah tọn lẹ, yèdọ hinhọ́n hẹntọ egbezangbe tọn lẹ, ko jiya homẹkẹndomẹ tọn na owhe kẹnnẹ he wayi lẹ mẹ to whenuena yé to yẹwheho wẹndagbe Ahọluduta Jiwheyẹwhe tọn lá “to aigba fininọ lẹpo mẹ na okunnu de hlan akọta lẹpo.” (Matiu 24:7-14) Owhewe Kunnudetọ Jehovah Tọn lẹ Tọn (Annuaire des Témoins de Jéhovah) dopodopo nọ yidogọna kunnudenu lọ dọ adà dọdai ehelẹ tọn to hinhẹndi mọyí.
8, 9. (a) Etẹwẹ tintin tofi taun Jesu tọn bẹhẹn? (b) Etẹwẹ dọdai Jesu tọn gando Klisti lalonọ lẹ go dohia na nuhe du nọtẹn po ninọmẹ tintin tofi etọn po?
8 To whenue e yindọ gandudu Jesu tọn bẹ́ aigba lọ blebu hẹn, sinsẹ̀n-bibasi nugbo to yinyin hinhẹngblo to otò lẹpo mẹ. Tintin tofi (pa·rou·siʹa) gbọn jlọjẹ dali etọn yin ojlẹ globu dlapọn tọn de. (1 Pita 2:12) Ṣigba be tòdaho tatọ-tẹnnọ de kavi otò ahọ́nji tọn de na tin fie Jesu sọgan yin dindọnsẹpọ te ya? Jesu na gblọndo ehe tọn gbọn didọdai dọ to nukundido mẹ na tintin tofi etọn, Klisti lalonọ lẹ na fọ́nṣite. E na avase dọmọ: “Eyin yé na dọ hlan mì, dọ, Pọ́n é [Klisti] tin to zùngbo mẹ; mì jẹgbonu yì blo; pọ́n, é tin to abò hò mẹ; mì yí yé sè blo. Na le abì nọ jẹgbonu sọn whezizẹ dali wá, bo sọ nọ yin mimọ yèdọ jẹ wheyihọ dali, mọkẹdẹ wẹ wiwá [pa·rou·siʹa] Ovi gbẹtọ tọn na nọ.”—Matiu 24:24, 26, 27.
9 Na yinyin mẹhe yọn hugan mẹdevo depope to aigba ji, Jesu, “Visunnu gbẹtọ tọn,” ko yọn fie e na tin te to whenuena tintin tofi taun etọn bẹjẹeji. E ma na dotẹn na ede dofi kavi do dọ́n kavi do nọtẹn titengbe de mẹ to aigba ji gba. E ma na sọawuhia to fie mẹde ma tin te, “to zungbo mẹ,” na mẹhe na din Mẹssia lọ lẹ nido sọgan yì ede to finẹ to mayin mimọ na gandudu aṣẹpatọ aigba lọ tọn lẹ, yèdọ nọtẹn de fie hodotọ lẹ sọgan yin azọ́nplọn to gandudu etọn glọ́, bo wleawu nado họ́ tonudidọ liai bo zé e do gánzìnpo ji taidi Ogán Mẹssia aigba ji tọn gba. Yinukọn dogọ, é ma na zé ede whla do “abò ṣẹnṣẹn,” bọ nọtẹn etọn na yin yinyọnẹn na mẹṣinṣinyan vude lẹ poun, bọ to finẹ, matin ayidego po mayọnẹn po, e blanú bo basi tito nuglọ tọn lẹ po godonọnamẹtọ ylanwiwa tọn lẹ po na gohunna gandudu aihọn mẹ tọn lẹ bo yí amisisadode ede taidi Mẹssia he yin pagbe etọn do gba. Lala!
10. Nawẹ hinhọ́n nugbo Biblu tọn lẹ họnwun to aliho globu tọn de mẹ gbọn?
10 Jẹagọdo ehe, nudepope matin nado yí whla dogbọn wiwá Jesu tọn taidi Ahọlu, to bẹjẹeji tintin tofi gandudu etọn tọn mẹ dali gba. Dile Jesu dọdai do, to ninọmẹ globu tọn de mẹ, hinhọ́n nugbo Biblu tọn lẹ zindonukọn nado to sisẹ́ mlánmlán do nọtẹn he gblo lẹ mẹ sọn adà whèzẹtẹn tọn lẹ jẹ adà whèyihọ tọn lẹ ji, to aliho globu tọn de mẹ. Na nugbo tọn, taidi hinhọ́n hẹntọ egbezangbe tọn lẹ, Kunnudetọ Jehovah Tọn lẹ sọawuhia nado yin ‘hinhọ́n kosi lẹ tọn, na whlẹngan [Jehovah tọn] nido yin kaka jẹ pòdo aigba tọn.’—Isaia 49:6.
Nuwiwa Angẹli lẹ Tọn
11. (a) To aliho tẹ mẹ wẹ pipli angẹli lẹ tọn yin yiyizan to hinhẹn hinhọ́n Ahọluduta lọ tọn họnwun te? (b) Whetẹnu podọ pipli tẹ mẹ wẹ hagbẹ́ likun lọ tọn lẹ yin bibẹpli do?
11 Wefọ devo he gando tintin tofi Jesu tọn go lẹ basi zẹẹmẹ etọn taidi mẹhe yin awukọndopọhẹ gbọn awhànpa angeli lẹ tọn dali kavi taidi mẹhe ‘do yé hlan gbonu.’ (Matiu 16:27; 24:31) To oló likun po ogbé ylankan po tọn mẹ, Jesu dọ dọ “oglè wẹ aihọn” podọ “jìjẹ-whenu wẹ podo owhenu tọn; gbìngbẹ̀ntọ lẹ wẹ angeli lẹ.” Ṣigba, ehe ma zẹẹmẹdo, dọ to tintin tofi etọn to gandudu Ahọluduta tọn mẹ po gigo po mẹ whenu, e na yí kiki wẹnsagun angẹli lẹ tọn kẹdẹ zán to azọ́ndenamẹ aigba tọn ji gba. Bẹjẹeji sọn 1919, angẹli lẹ to anademẹ Jesu tọn glọ klán hagbẹ́ likun tọn heyin mẹyiamisisadode gbọn gbigbọ dali aigba ji tọn lẹ, he ko vúnvúnpé gbọn nujijọ Wẹkẹ Whàn I tọn dali dovo, podọ ehelẹ yin awuwlena na nuwiwa yinukọn dogọ to oyín Ahọlu lọ tọn mẹ. (Matiu 13:38-43) To 1920 lẹ gblamẹ fọtọ́n susu devo lẹ tọn hẹn teninọ yetọn go na Ahọluduta zédai Jiwheyẹwhe tọn bo yin yíyí amisisadode po gbigbọ Jiwheyẹwhe tọn po. Mẹyiamisisadode ehelẹ yin yiyi dogọ hukan pipotọ dowhenu tọn po pọndohlan nujikudo dagbe tọn po. To bẹdopọ mẹ, yé nọpọ do yin hagbẹ́ afanumẹ nugbonọ nuyọnẹntọ lọ tọn na ojlẹ mítọn.
12. Nuklọwe tẹ mẹ wẹ angẹli lẹ tindo mahẹ te, podọ po kọdetọn tẹ po to aigba ji?
12 Apajlẹ devo mahẹ tintindo angẹli lẹ tọn to tintin tofi Jesu tọn whenu podọ jẹgodona zizédo ofin ji etọn to 1914 yin kinkandai to Osọhia 12:7-9 mẹ dọmọ: “Mikaẹli [Jesu Klisti] po angẹli etọn lẹ po to avùnho hẹ dlagọni lọ; dlagọni lọ sọ to avùnho po angẹli etọn lẹ po, yé ma sọ gbawhàn; mọ otẹn ma sọ tin na yé to olọn mẹ bà. Yé sọ yàn dlagọni daho lọ jẹgbonu, odàn hóhó lọ, he yè nọ ylọ Lẹgba, podọ Satani, he nọ to aihọn lẹpo klọ: yè yàn ẹn dlan aigba ji, bo sọ yàn angẹli etọn lẹ jẹgbonu po e po.” Gbọnmọ, olọn lẹ to aga ko yin kiklọ́we todin, bo jo lẹdo aigba ji tọn do nado yin kiklọwe mlẹnmlẹn na klandowiwe oyín Jehovah tọn. To owhe 1994 ehe tọn mẹ, avase sọn olọn mẹ wá lọ gbẹsọ yọn-na-yizan he dọmọ: “Dindọn hlan aihọnmẹnu lẹ ... na Lẹgba lọ ko jẹte wá mì de, po homẹgble daho po wutu, na é yọnẹn dọ whenu gli de wẹ é tindo.”—Osọhia 12:12.
Fọnsọnku Olọn Mẹ Tọn
13, 14. (a) Etẹwẹ Owe wiwe lẹ dohia dọ e to nukọnzindo sọn 1918 sọyì? (b) Etẹwẹ Paulu po Johanu po dohia gando pipotọ mẹyiamisisadode lẹ tọn go to egbehe?
13 Nujijọ he paṣamẹ devo to tintin tofi Klisti tọn whenu wẹ yin bẹjẹeji fọ́nsọnku olọn mẹ tọn. Apọsteli Paulu dohia dọ delẹ to mẹyiamisisadode lẹ mẹ he ko damlọn na whenu dindẹn to yọdo yetọn lẹ mẹ na yin omẹ tintan he na yin hinhẹn wá ogbẹ̀ bo nọgbẹ̀ po Klisti Jesu po to lẹdo gbigbọ tọn mẹ. Kunnudenu ko yin zizedonukọnnamẹ na owhe susu lẹ nado dohia dọ ehe sọawuhia di nuhe ko jọ sọn 1918 sọyì. Paulu wlan dọmọ: “Mọ ga wẹ yè na hẹn omẹ popo yin ogbẹ̀nọ to Klisti mẹ. Ṣigba omẹ dopodopo to kannu etọn titi mẹ: Klisti sinsẹ́n tintan lẹ; to godo yé he yin Klisti tọn lẹ to gigọ́wá [pa·rou·siʹa] whenu etọn.” (1 Kọlintinu lẹ 15:22, 23) Fọnsọnku mẹyiamisadode lẹ tọn to tintin tofi Klisti tọn whenu yin nuzideji to 1 Tẹsalonikanu lẹ 4:15-17 mẹ dọmọ: “Na ehe wẹ mí dọ hlan mì gbọn ohó Oklunọ tọn dali, dọ, mí he tin to ogbẹ̀ bo sọ pò jẹ gigọ̀wá [pa·rou·siʹa] Oklunọ tọn whenu lẹ, ma na jẹnukọnna yé he damlọn lẹ gba ... Oṣiọ he tin to Klisti mẹ lẹ whẹ́ wẹ na fọ́n: Whenẹnu wẹ yè na zé mí he pò to ogbẹ̀ lẹ do aga po yé po to aslọ mẹ, nado pé Oklunọ to aga.” Gbẹ́tọ 144 000 wẹ yin mẹyiamisisadode Klisti tọn lẹ he mọ alè jiawu ehe yí to godomẹ.—Osọhia 14:1.
14 Dile Paulu dohia do, pipotọ mẹyiamisisadode he tin to ogbẹ̀ to egbehe lẹ ma na yì Ahọluduta lọ mẹ jẹnukọnna Klistiani mẹyiamisisadode nugbonọ, po devi he yin huhu lẹ po gba. Apọsteli Johanu basi zẹẹmẹ mẹyiamisisadode he kú to egbehe lẹ tọn yinukọndogọ dole: “Donanọ wẹ oṣiọ he kú to Oklunọ mẹ lẹ sọn dinvie yì: mọwẹ, gbigbọ dọ, na yé nido gbọjẹ sọn tukla yetọn lẹ mẹ; azọ́n yetọn sọ to hihodo yé,” enẹ wẹ yindọ, to tintin fọ́nsọnku yetọn tọn mẹ. (Osọhia 14:13) Pọdọ Paulu dọmọ: “Mì dayi e go, yẹn do nudabla de hia mì; mí omẹ pó ma na damlọn gba, ṣigba mí omẹ pó wẹ yè na diọ, plaun, to nukunwhiwhe dopo mẹ, to opẹ̀n godo tọn ji: na opẹ̀n na dọnu, yè nasọ zé oṣiọ lẹ tite magble, yè na sọ diọ mí.” (1 Kọlintinu lẹ 15:51, 52) Azọ́njiawu nankọ die!
15, 16. (a) Oló tẹwẹ Jesu do to Luku 19:11-15 mẹ, podọ na whẹwhinwhẹn tẹ wutu? (b) Nawẹ dọdai ehe to hẹndi mọyí gbọn?
15 To gbedopo to whenuena Jesu to yẹwhehodọ na pipli hodotọ etọn lẹ tọn dogbọn Ahọluduta Jiwheyẹwhe tọn dali, e yí oló de zán nado gọalọna yé nado vọ́ linlẹn agọ̀ yetọn lẹ jlado. Kandai lọ hia dole: “Yé to linlẹn dọ Ahọludu Jiwheyẹwhe tọn na sọawuhia to afọdoponẹji wutu. Enẹwutu e dọmọ: ‘Dawe aglosu de yì biọ otò dindẹn de mẹ, nado yí ahọludu de na ede, podọ nado lẹ́gọ̀. E sọ ylọ afanumẹ etọn ao bo na mina ao yé, bo dọ hlan yé, dọmọ, Mì yí ehe do wàjọ, kaka yẹn na do gọ̀. ... E sọ wá jọ, whenuena é yí ahọludu bo lẹ́gọ̀, wẹ é degbè yè ni ylọ afanumẹ nẹlẹ wá, yé mẹhe é ko na mina, na é nido yọn alè nẹmu mẹdopodopo dù gbọn ajọwiwà dali.”—Luku 19:11-15.
16 Jesu wẹ “dawe” lọ he yì olọn mẹ, yèdọ “otò dindẹn” mẹ fie e na mọ ahọluduta de yí te. Ahọluduta enẹ lọ wẹ e mọyi to 1914. To madẹnmẹ to enẹgodo, Klisti taidi Ahọlu na yin gbèdona gbọn mẹhe ylọ yedelẹ dọ hodotọ etọn lẹ dali nado yọn nuhe yé ko wà to nukunpipedo alemọyinu Ahọluduta lọ tọn he yin zizé do alọmẹ na yé. Nugbonọ vude poun wẹ yin dide nado mọ pipà oklunọ lọ tọn yí heyin: “[A] wà dagbe, hiẹ afanumẹ dagbe; na yè mọ hiẹ yin nugbonọ to onú pẹvi ṣiun mẹ wutu, tindo aṣẹ̀ do otò daho ao ji.” (Luku 19:17) Ojlẹ tintin tofi Klisti tọn ehe whenu bẹ́ nukọnzinzindo zohunnọ to nuwiwa yẹwhehodidọ Ahọluduta lọ tọn didọ hẹn, gọna lilá basina whẹdida Jiwheyẹwhe tọn sọta mẹylankan lẹ, po nukunpedo azọ́n ehe go po tin to aṣẹ he yin nina “afanumẹ dagbe lọ” mẹ.
Kunnudide Lẹdo Aihọn Pe
17. Ayajẹ tẹwẹ dohiagona pa·rou·siʹa?
17 Onu devo tẹwẹ na jọ to ojlẹ pa·rou·siʹa tọn ehe whenu? E na yin ojlẹ ayajẹ daho tọn to azọ́n yẹwhehodidọ lọ tọn mẹ po alọgọna mẹyọyọ lẹ nado wleawuna lùnlùn nukunbibia daho he ja lọ tọ́n po. Omẹ ehelẹ heyin “gbẹtọ susugege lẹ,” he nọ gọalọna pipotọ lọ, lẹzun “episteli pipa tọn.” (Osọhia 7:9; 2 Kọlintinu lẹ 3:1-3) Paulu donù ayajẹ azọ́n Jiwheyẹwhe tọn ehe go, to whenuena e dọmọ: “Na etẹ wẹ tódido mítọn, kavi ayajijẹ mítọn, kavi ojẹgbakun gigodido tọn? Be yèdọ é ma yin mì wẹ, to Jesu Klisti Oklunọ mítọn nukọn to gigọ̀wá pa·rou·siʹa etọn whenu?”—1 Tẹsalonikanu lẹ 2:19.
Mì Gbọṣi Wiwejininọ po Matin Whẹgbledo po Mẹ
18. (a) Odẹ̀ Paulu tọn tẹwẹ tindo onu nado yíwa hẹ pa·rou·siʹa? (b) Gbigbọ tẹwẹ mímẹpo dona dohia to ojlẹ ehe mẹ, podọ to aliho tẹlẹ mẹ?
18 Paulu sọ hodẹ na klandowiwe mẹhe tin to ogbẹ̀ to ojlẹ tintin tofi Klisti tọn ehe whenu lẹ dọmọ: “Na Jiwheyẹwhe jijọho tọn lọsu ni klọ́ mì zùn wiwe mlẹnmlẹn; yẹn sọ to dẹho hlan Jiwheyẹwhe dọ yè ni yí gbigbọ, ayiha, po agbasa mítọn lẹ po whlá to pipa mẹ hlan gigọ̀wá [pa·rou·siʹa] Jesu Klisti Oklunọ mítọn tọn whenu.” (1 Tẹsalonikanu lẹ 5:23) Mọwẹ, to egbehe, eyin vlavo mí yin apadewhe pipotọ mẹyiamisisadode lọ tọn wẹo kavi sọha susugege lẹngbọ devi lẹ tọn, gbigbọ gbèkọndopọ tọn nọ blá mí dopọ to nugbodidọ mẹ na mí nido sọgan yin wiwe podọ matin whẹgbledo to ojlẹ matin awetọ ehe tọn mẹ wutu. Mọdopolọ, mí dona sinyẹnlin. Jakobu wlanwe dọmọ: “Enẹwutu, mẹmẹsunnu emi, mì sinyẹnlin kaka jẹ gigọ̀wá [pa·rou·siʹa] Oklunọ tọn whenu. ... Bo hẹn ayiha mìtọn lódo; na gigọ̀wá [pa·rou·siʹa] whenu Oklunọ tọn to sisẹpọ́.”—Jakobu 5:7, 8.
19. Nugbẹnamẹ tẹwẹ Pita na gando pa·rou·siʹa go, podọ nawẹ mí dona yigbe gbọn?
19 Apọsteli Pita lọsu tindo onu de nado dọ na mí mẹhe tin to ogbẹ̀ to ojlẹ dintọn ehe mẹ lẹ. E gbẹnuna mí sọta mẹvlẹtọ lẹ, ehe tọn suhugan yetọn tin to adà aigba ji tọn lẹpo mẹ. Pita dọmọ: “Na mì ni sọ yọn ehe whẹ́, dọ, mẹvlẹtọ lẹ na wá po ovlẹ po to azán godo tọn mẹ, bo na to zọnlinzin to ojlo yéde tọn mẹ, bo na to didọmọ, fie wẹ opagbe gigọ̀wá [pa·rou·siʹa] etọn tọn te? Na sọn whenuena otọ́ mítọn lẹ ko damlọn, doponẹ wẹ onu popo te sọn whẹ́whẹ́whenu nudida tọn gbọ́n.” (2 Pita 3:3, 4) Mahopọnna susugege mẹvlẹtọ lẹ tọn to tintin tofi Klisti tọn whenu, omẹ Jehovah tọn lẹ zindonukọn nado to sisẹ́ taidi hinhọ́n aihọn tọn, na whlẹngan mẹsusu tọn. (Pọ́n w-F 1/5/93, weda 10.)
Kanbiọ Dogbapọn tọn Lẹ
◻Nawẹ omẹ Jehovah tọn lẹ to yinyin hinhẹn tindo nukunnumọjẹnumẹ vude vude gando pa·rou·siʹa go gbọn?
◻Nawẹ Matiu 24:4-8 ko to hẹndi mọyí gbọn?
◻Nawẹ angẹli lẹ ko to gbèkọndopọ hẹ Klisti he yin zize do ofìn ji lọ gbọn?
◻Azọ́njiawu dabla tẹlẹ wẹ sọawuhia nado bọdo pa·rou·siʹa go?
◻Ayajẹ tẹwẹ yin numimọ etọn tindo to ojlẹ ehe mẹ, podọ mẹnu lẹ wẹ to mahẹ tindo to e mẹ?