“Sọn Ovú Gbọ́n Wẹ Hiẹ Ko Yọ́n”

SỌGBE hẹ dodinnanu agọe lẹnunnuyọnẹn tọn lẹ, hodidọ na ovivu lẹ nọ yinuwa sinsinyẹn do whinwhẹ́n apọn yetọn lẹ tọn ji, wleawuna nugopipe yetọn nado lẹnnupọn, bo didẹ nuhahun lẹ. Ehe wẹ yin whẹho lọ titengbe to owhe tintan gbẹzan ovi yẹyẹ de tọn mẹ. International Herald Tribune na linlin dọ dodinnanutọ delẹ yise todin dọ “sọha hogbe he ovivu de sè to gbedopo lẹ wẹ yin onú dopo gee lọ he nọ basi nudide nugopipe nulẹnpọn sọgodo tọn, kọdetọn dagbe wehọmẹ tọn po nugopipe ogbẹ́ mẹ tọn lẹ po.”

Ṣigba, hogbe he nọ yin didọ lẹ dona wá sọn mẹde dè. E taidi dọ televiziọn de kavi ladio de, mayin nunọnutẹnmẹ de gba.

Lẹnunnuyọnẹntọ ninọmẹ apọnmẹ tọn de to Wehọmẹ Alavọ Washington tọn to Seattle, États-Unis d’Amérique dọmọ: “Mí yọnẹn todin dọ kọndopọ nuvikun lẹ tọn nọ yin awuwlena to bẹjẹeji ogbẹ̀ tọn podọ na paa tọn apọn ovivu lọ tọn nọ to tenọpọn numimọ lẹ nado yọ́n lehe kọndopọ nuvikun lẹ tọn na yin bibasi do. Mí ma yọnẹn kakajẹ agọe lehe ninọmẹ ehe nọ bẹjẹeji domẹwhenu do. Di apajlẹ, ovivu lẹ ko plọn hogbe ogbè yetọn lẹ tọn to osun ṣidopo mẹvi mẹ.”

Avùnnukundiọsọmẹ dodinnanu tọn lẹ ko hẹn linlẹn lọ gbayipe dọ ovi yẹyẹ lẹ na yọnnuin taun eyin yé yin nina owanyi susu. E sọ zinnudo nujọnu-yinyin mẹjitọ lẹ tọn ji to whinwhẹ́n ovi de tọn mẹ.

Ehe hẹn hogbe gbọdo wekanhlanmẹ apọsteli Paulu tọn lẹ hlan Timoti wá ayiha mẹ dọmọ: ‘Sọn ovu gbọ́n wẹ hiẹ ko yọ́n [owe wiwe], he sọgan hẹn we zun nuyọnẹntọ hlan whlẹngán.’ E yọnbasi dọ owe wiwe lẹ, heyin didọ hlan ovivu Timoti gbọn onọ̀ po onọ̀-daho yisenọ etọn po dali, yí azọngban tangan de wà to whinwhẹ́n etọn taidi devizọnwatọ titengbe Jiwheyẹwhe tọn mẹ.—2 Timoti 1:5; 3:15.