• Nawẹ Biblu Sọgan Gọalọna We Gbọn?
    Duvivi Ogbẹ̀ Tọn Kakadoi!—Hodọdopọ Sinai Do Biblu Ji
    • Nupinplọn 1. Biblu de to hùnhùn.

      NUPINPLỌN 01

      Nawẹ Biblu Sọgan Gọalọna We Gbọn?

      Diblayin mímẹpo wẹ nọ kàn kanbiọ lẹ sè gando ogbẹ̀, yajiji, okú po sọgodo po go. Whẹho egbesọegbesọ tọn delẹ sọ nọ duahunmẹna mí, taidi nado mọ dandannu gbẹ̀mẹ tọn lẹ kavi nado tindo whẹndo ayajẹnọ de. Mẹsusu wẹ mọdọ Biblu gọalọna yé, e ma yin nado mọ gblọndo na kanbiọ titengbe gbẹ̀mẹ tọn lẹ kẹdẹ gba, amọ́ e sọ nọ na yé ayinamẹ dagbe lẹ na nuwiwa egbesọegbesọ tọn yetọn. Be a lẹndọ Biblu sọgan gọalọna mẹlẹpo ya?

      1. Kanbiọ tẹlẹ sin gblọndo wẹ Biblu na?

      Biblu na gblọndo kanbiọ titengbe delẹ tọn taidi: Nawẹ ogbẹ̀ bẹjẹeji do? Naegbọn mí do to gbẹ̀mẹ? Naegbọn homẹvọnọ lẹ do nọ jiya? Etẹwẹ nọ jọ do mẹde go eyin e kú? Eyin mẹlẹpo wẹ to jijọho dín, naegbọn awhàn do gbayipe sọmọ? Etẹwẹ na jọ do aigba go to sọgodo? Biblu na mí tuli nado dín gblọndo na kanbiọ mọnkọ lẹ, podọ gbẹtọ livi susu lẹ wẹ ko mọdọ gblọndo he Biblu na lẹ sọgbe.

      2. Nawẹ Biblu gán gọalọna mí nado duvivi gbẹninọ tọn gbọn?

      Biblu nọ na mí ayinamẹ dagbe lẹ. Di apajlẹ, e nọ plọn whẹndo lẹ lehe yé gán do ayajẹ nujọnu tọn do. E sọ nọ na ayinamẹ gando lehe mí gán duto ayimajai ji do, podọ lehe mí gán duvivi azọ́n mítọn tọn do go. A na mọ nuhe Biblu plọnmẹ gando whẹho ehelẹ po susu devo lẹ po go, dile mí na to dogbapọnna owe ehe to pọmẹ. A na wá mọdọ ‘Owe-wiwe lẹpo [enẹ wẹ, nuhe to Biblu mẹ lẹpo] wẹ yin alenu.’—2 Timoti 3:16.

      Owe ehe ma diọtẹnna Biblu, kakatimọ e na na we tuli nado plọn Biblu na dewe. Enẹwutu, mí to tudohomẹna we nado nọ hia wefọ he yin sislẹ do nupinplọn ehelẹ mẹ, bo nọ yí yé jlẹdo nuhe plọn a te lẹ go.

      DINDONANU DOGỌ

      Pọ́n lehe Biblu ko gọalọna mẹsusu do, lehe a gán duvivi Biblu hihia tọn do, podọ nuhewutu e yọ́n dọ yè ni gọalọna we nado mọnukunnujẹemẹ.

      3. Biblu sọgan deanana mí

      Biblu taidi hinhọ́n he dohuhlọn de. E gán gọalọna mí nado mọnukunnujẹ lehe mí gán basi nudide dagbe lẹ do mẹ, podọ nado mọ nuhe na jọ to sọgodo lẹ hlan.

      Hia Salmu lẹ 119:105, enẹgodo dọhodo kanbiọ ehelẹ ji:

      • Nukun tẹwẹ mẹhe kàn salmu ehe nọ yí do pọ́n Biblu?

      • Nukun tẹwẹ a nọ yí do pọ́n Biblu?

      Dawe de to zọnlinzin gbọn osé he to tọ̀tó lẹ ji to whèjai de, bo tá tọ̀ṣi nado mọnukunnu.

      4. Biblu sọgan na gblọndo na kanbiọ mítọn lẹ

      Nawe de wá mọdọ kanbiọ he ko nọ duahunmẹna emi sọn owhe susu die lẹ sin gblọndo tin to Biblu mẹ. Hò VIDEO lọ, enẹgodo dọhodo kanbiọ ehelẹ ji.

      VIDEO: Ma Hẹn Todido Bu Gbede Blo! (1:48)

      • Kanbiọ tẹlẹ wẹ duahunmẹna nawe lọ to video lọ mẹ?

      • Nawẹ Biblu pinplọn wá gọalọna ẹn gbọn?

      Biblu na mí tuli nado nọ kàn kanbiọ lẹ sè. Hia Matiu 7:7, enẹgodo dọhodo kanbiọ ehe ji:

      • Kanbiọ tẹlẹ wẹ nọ duahunmẹna we bọ a mọdọ Biblu gán na gblọndo yetọn?

      5. A sọgan mọaleyi sọn Biblu hihia mẹ

      Mẹsusu wẹ nọ duvivi Biblu hihia tọn bosọ nọ mọaleyi sọn e mẹ. Hò VIDEO lọ, enẹgodo dọhodo kanbiọ ehelẹ ji.

      VIDEO: Biblu Hihia (2:05)

      • To video lọ mẹ, nawẹ wehihia nọ ṣí na jọja lọ lẹ?

      • Numọtolanmẹ tẹwẹ yé nọ tindo gando Biblu hihia uwọ go?

      Anademẹ Biblu tọn lẹ gán miọnhomẹna mí bo na mí todido. Hia Lomunu lẹ 15:4, enẹgodo dọhodo kanbiọ ehe ji:

      • Be e na jlo we nado yọ́n nususu dogọ gando opagbe he to wefọ ehe mẹ go ya?

      6. Mẹdevo lẹ gán gọalọna we nado mọnukunnujẹ Biblu mẹ

      Mẹsusu wẹ nọ hia Biblu na yede, amọ́ yé ko wá mọdọ hodidọ dopọ deji hẹ mẹdevo lẹ nọ gọalọ taun. Hia Owalọ lẹ 8:26-31, enẹgodo dọhodo kanbiọ ehe ji:

      • Etẹwẹ gán gọalọna mí nado mọnukunnujẹ Biblu mẹ? Pọ́n wefọ 30, 31.

      Bẹplidopọ yẹdide tọn: 1. Filipi wẹndagbe-jlatọ lọ to zẹẹmẹ Owe-wiwe lẹ tọn basi na dawe Etiopianu lọ. 2. Yọnnu Kunnudetọ Jehovah tọn de to hodọdopọ do Biblu ji hẹ onọ̀ de po ovi etọn awe lẹ po.

      Dawe Etiopianu lọ do hudo alọgọ tọn nado mọnukunnujẹ Owe-wiwe lẹ mẹ. To egbehe, mẹsusu mọdọ hodidọ dopọ do Biblu ji hẹ mẹdevo lẹ nọ gọalọ

      MẸDELẸ NỌ DỌ DỌ: “Whenu hinhẹngú wẹ Biblu pinplọn yin.”

      • Hiẹ lo, etẹwẹ a na dọ? Podọ etẹwutu?

      BLADOPỌ

      Biblu na ayinamẹ gando lehe mí na zan gbẹzan mítọn do go, e na gblọndo kanbiọ titengbe lẹ tọn, e nọ miọnhomẹna gbẹtọ lẹ bosọ nọ na yé todido.

      Dogbapọn

      • Ayinamẹ nankọ lẹ wẹ Biblu sọgan na mí?

      • Kanbiọ tẹlẹ sin gblọndo wẹ Biblu na?

      • Etẹlẹ wẹ a na ko jlo nado plọn sọn Biblu mẹ?

      Yanwle

      PỌ́N NUDỌNAMẸ DEVO LẸ

      Pọ́n lehe ayinamẹ Biblu tọn lẹ yọ́n-na-yizan to egbehe do.

      “Nuplọnmẹ Biblu Tọn lẹ Nọ Yọ́n-Na-Yizan Kakadoi” (Atọ̀họ̀-Nuhihọ́ lọ Tọn, Sọha 1 2018 tọn)

      Pọ́n lehe Biblu ko gọalọna dawe de he numọtolanmẹ sinsinyẹn lẹ dotukla to ovu whenu etọn do.

      Lehe Gbẹzan Yọyọ Podọ Ayajẹnọ Ṣie Bẹjẹeji Do (2:53)

      Pọ́n ayinamẹ dagbe delẹ he Biblu na na whẹndo lẹ.

      “Onú 12 He Nọ Hẹn Ayajẹ Wá Whẹndo Mẹ” (Fọ́n!, Sọha 2 2018 tọn)

      Pọ́n lehe Biblu de linlẹn agọ̀ he mẹlẹ tindo gando mẹhe to anadena ogbẹ̀ lọ go gbà do.

      Naegbọn Mí Dona Plọn Biblu?—Adà Gigọ́ (3:14)

  • Biblu Yin Owẹ̀n de Na Mí sọn Jiwheyẹwhe Dè
    Duvivi Ogbẹ̀ Tọn Kakadoi!—Hodọdopọ Sinai Do Biblu Ji

    • 1. Eyin gbẹtọ lẹ wẹ kàn Biblu, nawẹ Jiwheyẹwhe na yin Dowatọ etọn gbọn?

      Nudi omẹ 40 wẹ kàn Biblu, podọ e yí owhe 1 600 plipli to yé si nado dotana ẹn, yèdọ sọn owhe 1513 J.W.M. jẹ nudi owhe 98 W.M tọn. Mẹhe kàn ẹn lẹ gbọnvona yede, podọ delẹ to yé mẹ yin lẹngbọhọtọ lẹ, whèhutọ lẹ po ahọlu lẹ po. Etomọṣo, kandai Biblu tọn de ma sọta devo. Nawẹ enẹ yọnbasi gbọn? Na Jiwheyẹwhe wẹ Dowatọ Biblu tọn wutu wẹ. (Hia 1 Tẹsalonikanu lẹ 2:13.) Biblu-kantọ lẹ ma kàn linlẹn yetọn titi lẹ. Kakatimọ, yé “dọho sọn Jiwheyẹwhe dè dile yé yin anadena gbọn gbigbọ wiwea dali do.” (2 Pita 1:21) Jiwheyẹwhe yí gbigbọ wiwe etọn zan nado gbọdo sunnu lọ lẹ kavi deanana yé na yé nido kàn linlẹn etọn lẹ.—2 Timoti 3:16.