Nawẹ A Gán Mọaleyi sọn Opli Kunnudetọ Jehovah Tọn lẹ Tọn mẹ Gbọn?

Be a ko yì opli Kunnudetọ Jehovah tọn lẹ tọn de tẹnmẹ pọ́n ya? Eyin a ma ko yì pọ́n, vlavo a gán hanú vude whla tintan he a jei. A gán kanse dewe dọ: ‘Etẹwẹ nọ jọ to opli yetọn lẹ ji? Nawẹ opli yetọn lẹ yin nujọnu sọ? Naegbọn n’dona tin to finẹ?’ To nupinplọn ehe mẹ, a na mọ lehe pipli dopọ hẹ mẹdevo lẹ sọgan dọ̀n we sẹpọ Jiwheyẹwhe dogọ bosọ hẹn ale wá na we do.

1. Whẹwhinwhẹ́n titengbe hugan tẹ wutu wẹ mí do nọ pli dopọ?

Biblu-kantọ de do whẹwhinwhẹ́n titengbe hugan he wutu mí do nọ pli dopọ hia dọmọ: “Agun daho ṣẹnṣẹn wẹ yẹn na nọ pà Jehovah te.” (Salmu lẹ 26:12) Mọdopolọ, ayajẹnu daho wẹ e nọ yin na Kunnudetọ Jehovah tọn lẹ nado nọ pli to pọmẹ. Lẹdo aihọn pé, yé nọ pli to sẹmẹsẹmẹ nado pà Jiwheyẹwhe, nado jihàn podọ nado hodẹ̀. To ojlẹ delẹ mẹ to whemẹwhemẹ, yé sọ nọ pli dopọ na nuwiwa gbigbọmẹ tọn delẹ he gbẹtọgun susu nọ wá.

2. Etẹwẹ a na plọn to opli mítọn lẹ ji?

To opli lẹ whenu, mí nọ gbadopọnna Ohó Jiwheyẹwhe tọn sisosiso, nọ ‘basi zẹẹmẹ do e ji bo nọ hẹn ẹn họnwun.’ (Hia Nẹhemia 8:8.) Eyin a nọ wá opli mítọn lẹ, a na plọnnu gando Jehovah po jẹhẹnu dagbedagbe etọn lẹ po go. Dile a na to nuplọn dogọ gando owanyi he ewọ tindo na we go, mọ wẹ haṣinṣan towe hẹ ewọ na lodo dogọ do niyẹn. A nasọ mọnukunnujẹ lehe ewọ gán gọalọna we bọ gbẹzan towe na do ayajẹ do mẹ.—Isaia 48:17, 18.

3. Nawẹ gbẹdido hẹ mẹhe nọ wá opli mítọn lẹ gán hẹn ale wá na we gbọn?

Jehovah biọ dọ mí ni “nọ na ayidonugo ode awetọ nado nọ whàn mídelẹ hlan owanyi po azọ́n dagbe lẹ po kọ̀n, e ma yin nado nọ gbẹkọ pipli dopọ mítọn lẹ go.” (Heblu lẹ 10:24, 25) To opli lẹ ji, a na mọ mẹhe nọ hò ode awetọ tọn pọ́n lẹ, gọna gbẹtọ hiẹ nkọ he nọ jlo na plọnnu dogọ gando Jiwheyẹwhe go lẹ. A na mọdọ yé nọ yí Biblu do na tuli yenọzo. (Hia Lomunu lẹ 1:11, 12.) A nasọ dọhodopọ hẹ mẹdevo lẹ, vlavo tlẹnnọ kavi alọwlemẹ he to pipehẹ nuhahun yetọn lẹ po kọdetọn dagbe po. Whẹwhinwhẹ́n vude poun niyẹn he wutu Jehovah jlo dọ mí ni nọ pli dopọ to gbesisọ mẹ!

DINDONANU DOGỌ

4. Opli Kunnudetọ Jehovah Tọn lẹ Tọn

To owhe kanweko tintan whenu, Klistiani lẹ nọ pli dopọ to gbesisọ mẹ nado basi sinsẹ̀n hlan Jehovah. (Lomunu lẹ 16:3-5) Hia Kolosinu lẹ 3:16, enẹgodo dọhodo kanbiọ ehe ji:

• Nawẹ Klistiani dowhenu tọn lẹ nọ basi sinsẹ̀n hlan Jehovah gbọn?

VIDEO: Etẹwẹ Nọ Jọ to Plitẹnhọ Ahọluduta Tọn? (2:12)

• Etẹ go wẹ a doayi to nuhe nọ jọ to Plitẹnhọ Ahọluduta tọn de mẹ po nuhe a hia to Kolosinu lẹ 3:16 po mẹ ṣẹnṣẹn?

• To video lọ mẹ kavi to yẹdide lọ mẹ, be a doayi nudevo de go he a yiwanna to opli lẹ mẹ ya?

Hia 2 Kọlintinu lẹ 9:7, enẹgodo dọhodo kanbiọ ehe ji:

• Naegbọn Kunnudetọ Jehovah tọn lẹ ma nọ ṣinyan akuẹjọ to opli yetọn lẹ ji?

To pọmẹ hẹ mẹplọntọ towe, mì gbadopọnna nuhe na yin hodọdeji to dopo to opli osẹ ehe mẹ tọn lẹ mẹ ji.

• Adà opli lọ tọn tẹwẹ a yiwanna kavi mọdọ e na gọalọna we hugan?

Be a yọnẹn ya?

To jw.org ji, a gán mọ nọtẹn po ogàn he mẹ mí nọ basi opli mítọn lẹ te po lẹdo aihọn pé.

1. Opli mítọn lẹ nọ bẹ hodidọ lẹ, wadohia lẹ, po video lẹ po hẹn. Mí nọ jihàn bo nọ hodẹ̀ to bẹjẹeji podọ to vivọnu opli lẹ tọn

2. To adà opli mítọn delẹ tọn whenu, mẹplidopọ lẹ sọgan na gblọndo

3. Mẹlẹpo wẹ gán wá—whẹndo lẹ, tlẹnnọ lẹ, mẹhomẹ lẹ, po yọpọvu lẹ po

4. Vọnu wẹ opli mítọn lẹ nọ yin. Kunnudetọ Jehovah tọn lẹ ma nọ biọ akuẹjọ kavi yí agbánmẹkuẹ

5. Opli lẹ wiwá nọ biọ vivẹnudido

Lẹnnupọndo apajlẹ whẹndo he mẹ Jesu whẹ́n te tọn ji. Nado yì hùnwhẹ whemẹwhemẹ tọn de, yé dona zinzọnlin na nudi azán atọ̀n gbọn lẹdo osónọ lẹ mẹ, sọn Nazalẹti kaka yì Jelusalẹm. Hia Luku 2:39-42, enẹgodo dọhodo kanbiọ ehelẹ ji:

• Be a lẹndọ gbejizọnlin yetọn yì Jelusalẹm nọ biọ vivẹnudido ya?

• Naegbọn e gán biọ dọ a ni nọ dovivẹnu nado wá opli lẹ?

• Be a lẹndọ e biọ dọ a ni dovivẹnu mọnkọ ya? Etẹwutu?

• Naegbọn mí dona nọ yì opli lẹ to gbesisọ mẹ?

BLADOPỌ

Opli lẹ wiwá na gọalọna we nado plọnnu gando Jehovah go dogọ, nado vẹ́ hẹ ewọ, podọ nado nọ basi sinsẹ̀n dopọ hẹ mẹdevo lẹ.

Dogbapọn

• Naegbọn Jehovah do na tuli mí nado nọ pli dopọ?

• Etẹwẹ a na plọn to opli Kunnudetọ Jehovah tọn lẹ tọn ji?

• Ale devo tẹwẹ a lẹndọ opli lẹ wiwá sọgan hẹnwa na we?

PỌ́N NUDỌNAMẸ DEVO LẸ

Etẹwẹ a gán wà eyin a to nuhà gando opli de wiwá go? Pọ́n lehe dawe de he tindo numọtolanmẹ mọnkọtọn wá yiwanna opli lẹ do.

Mí Ma Na Wọn Lehe Yè Dokuavọna Mí Do Gbede (4:16)

Pọ́n lehe dẹpẹ de duvivi opli lẹ tọn do, podọ nuhe e wà nado to opli lẹ yì zọnmii.

N’Yiwanna Opli lẹ Taun! (4:33)

Pọ́n numọtolanmẹ he mẹdevo lẹ tindo gando opli wiwá go.

“Naegbọn N’Dona Nọ Yì Opli to Plitẹnhọ Ahọluduta Tọn Mẹ?” (Hosọ Intẹnẹt ji tọn)

Pọ́n lehe dawe he ko nọ jaguda-gbẹ́ mẹ pọ́n de diọ do, to whenue e yì opli Kunnudetọ Jehovah tọn lẹ tọn de godo.

“N’Ma Nọ Tọ́n Gbede Matin Osò Ṣie” (Alọnuwe Atọ̀họ̀-Nuhihọ́ lọ Tọn, 1^er juillet 2014 tọn)

5. Ninọmẹ aihọn tọn ko diọ sọn 1914

Hò VIDEO lọ.

VIDEO: Ninọmẹ Aihọn Tọn Diọ sọn 1914 (1:10)

Jesu ko dọ dọdai lehe nulẹ na te do to aihọn lọ mẹ tọn to whenue ewọ na lẹzun Ahọlu. Hia Luku 21:9-11, enẹgodo dọhodo kanbiọ ehe ji:

• Detẹ to ninọmẹ ehelẹ mẹ wẹ a to mimọ kavi nọ sè linlin yetọn?

Apọsteli Paulu basi zẹẹmẹ jijọ he gbẹtọ lẹ na tindo to azán godo tọn gandudu gbẹtọvi tọn lẹ mẹ tọn. Hia 2 Timoti 3:1-5, enẹgodo dọhodo kanbiọ ehe ji:

• Detẹ to jijọ enẹlẹ mẹ go wẹ a doayi dọ gbẹtọ lẹ tindo to egbezangbe?

6. Gandudu Ahọluduta Jiwheyẹwhe tọn nọ whàn mí nado yinuwa

Hia Matiu 24:3, 14, enẹgodo dọhodo kanbiọ ehelẹ ji:

• Azọ́n titengbe tẹwẹ nọ dohia dọ Ahọluduta Jiwheyẹwhe tọn to gandu to alọnu din?

• Etẹwẹ a gán wà nado doalọ to azọ́n ehe mẹ?

Ahọluduta Jiwheyẹwhe tọn ko to gandu to alọnu din, podọ azán he gbè e na dlẹnkan bo paṣẹ do aigba lọ blebu ji ko sẹpọ. Hia Heblu lẹ 10:24, 25, enẹgodo dọhodo kanbiọ ehe ji:

• Etẹwẹ dopodopo mítọn dona wà dile mí “mọdọ azán lọ to dindọnsẹpọ”?