Nawẹ Mí Dona Nọ Pọ́n Whlepọn lẹ Hlan Gbọn?
MẸTẸNPỌN! Whlepọn! Mẹlẹpo wẹ dona pannukọn yé. Yé sọgan yin hinhẹnwa gbọn gbemanọpọ lẹ, awusinyẹnnamẹnu akuẹzinzan tọn lẹ, agbasamalo, homẹkẹn, kọgbidinamẹ hagbẹ tọn nado waylando, nukundidiọsọ teninọ mítọn nado gbọṣi kadaninọ mẹ bo dapana boṣiọ-sinsẹ̀n, po onú susu devo lẹ po dali. Mahopọnna whlepọn he mí pannukọn lẹ, yé nọ saba hẹn magbọjẹ daho wá. Nawẹ mí sọgan pehẹ yé po kọdetọn dagbe po gbọn? Be mí nọ mọaleyi sọn yé mẹ to aliho depope mẹ ya?
Godonọnamẹ He Yọnhugan Lọ
Ahọlu Davidi hohowhenu tọn zan gbẹzan he gọ́ na whlepọn lẹ, ṣogan e kú taidi nugbonọ. Nawẹ e penugo nado doakọnna gbọn? E dlẹnalọdo asisa huhlọn etọn tọn to whenuena e dọmọ: “OKLUNỌ wẹ lẹngbọhọtọ ṣie. Yẹn ma na gbọ̀agba [nude tọn].” Enẹgodo e zindonukọn dọmọ: “Nugbo, eyin yẹn tlẹ to zọnlinzin gbọn agbàdo zinvlu gọ́ngọ́n tọn ṣẹnṣẹn, yẹn ma obu na di na oylan de: na hiẹ tin to dè e; aglọ towe po opò towe po, yé homẹmiọnna mi.” (Psalm 23:1, 4) Mọwẹ, Jehovah yin asisa godonọnamẹ he ma tindo dogbó tọn. E penukundo Davidi go gbọ̀n ojlẹ bẹwlu hugan tọn lẹ mẹ, podọ e ko wleawufo nado wà nudopolọ na mí eyin e lẹzun dandan.
Nawẹ mí sọgan mọ godonọnamẹ Jehovah tọn yí gbọn? Biblu dlẹnalọdo aliho lọ to whenuena e dọmọ: “Dọ́ ẹ pọ́n, bosọ mọdọ yinyọ́n wẹ OKLUNỌ.” (Psalm 34:8) Oylọ basinamẹ zohunhunnọ de wẹ enẹ yin, ṣigba etẹwẹ e zẹẹmẹdo? Tulinamẹ de wẹ e yin nado sẹ̀n Jehovah bo hẹn gbẹzan mítọn sọgbe hẹ ojlo etọn mlẹnmlẹn. Mọwiwa nọ biọ dọ mí ni gbẹ́ mẹdekannujẹ mítọn delẹ dai, bo basi avọ́sinsan lẹ. To whẹho delẹ mẹ, e tlẹ sọgan dekọtọn do whlepọn lẹ mẹ—yèdọ homẹkẹn po yajiji po. Etomọṣo, e ma nọ vẹna mẹhe kẹalọyi oylọ basinamẹ Jehovah tọn po ahundopo po lẹ gbede dọ yé wàmọ. Jehovah na yin homẹdagbenọ hlan yé. E na deanana yé bo penukundo yé go to gbigbọ-liho. E na penukundo yé go to whlepọn lẹ mẹ gbọn Ohó etọn, gbigbọ wiwe etọn, po agun Klistiani tọn po gblamẹ. Podọ e na na yé ogbẹ̀ madopodo to godo mẹ.—Psalm 23:6; 25:9; Isaia 30:21; Lomunu lẹ 15:5.
Mẹhe basi nudide gbẹzan didiọ tọn nado sẹ̀n Jehovah bosọ tẹdo nudide enẹ go lẹ mọdọ Jehovah nọ hẹn opagbe etọn lẹpo di. Islaelivi he hodo Jọṣua biọ Aigba Pagbe tọn ji lẹ tindo numimọ enẹ tọn. To Jọdani didasa godo, whlepọn lẹ wá he yé dona doakọnna, awhàn lẹ dona yin fùnfùn, bọ nupinplọn awubla tọn lẹ dona yin pinplọn. Ṣigba whẹndo enẹ yin nugbonọ hugan tọgbo yetọn he tọ́nsọn Egipti he kú to zungbo mẹ lẹ. Enẹwutu, Jehovah nọgodona nugbonọ lọ lẹ, podọ gando ninọmẹ yetọn to vivọnu gbẹzan Jọṣua tọn go, Biblu dọmọ: “OKLUNỌ sọ na gbọjẹ yé lẹdo, kẹdẹdi ehe e whlé na lẹpo hlan otọ́ yetọn lẹ . . . Nude ma gbòpo sọn onú dagbe he OKLUNỌ dọ hlan owhé Islaeli tọn depope mẹ gba; popolẹpo wẹ ṣẹ.” (Jọṣua 21:44, 45) Mílọsu sọgan tindo numimọ enẹ eyin mí ganjẹ Jehovah go mlẹnmlẹn to whenue mí tin to whlepọn glọ podọ to ojlẹ devo lẹpo mẹ.
Etẹwẹ sọgan hẹn jidide mítọn to Jehovah mẹ gbọjọ? Jesu dlẹnalọdo onú dopo to whenue e dọmọ: “Mẹde ma sọgan sẹ̀n Oklunọ awe gba . . . Mìwlẹ ma sọgan sẹ̀n Jiwheyẹwhe po Mamọni po gba.” (Matiu 6:24) Eyin mí dotudo Jehovah go, mí ma na dín hihọ́ to fie suhugan gbẹtọ lẹ tọn nọ dín in te gba, yèdọ to agbasanu lẹ mẹ. Jesu na ayinamẹ hodotọ etọn lẹ dọ: “Ṣigba mì dín ahọludu Jiwheyẹwhe tọn, po dodo etọn po whẹ́; onú helẹ pó wẹ yè na dogọ hlan mì.” (Matiu 6:33) Klistiani de he tindo pọndohlan jlẹkaji tọn gando agbasanu lẹ go bo ze Ahọluduta Jiwheyẹwhe tọn do otẹn tintan mẹ to gbẹzan etọn mẹ wẹ basi nudide he sọgbe lọ. (Yẹwhehodọtọ 7:12) Nugbo wẹ dọ, e sọgan biọ dọ e ni suahọ de. E sọgan yí agbasanu lẹ do sanvọ́. Ṣigba, e na gbẹ̀n ale susu. Podọ Jehovah na nọgodona ẹn.—Isaia 48:17, 18.
Nuhe Mí Nọ Plọn sọn Whlepọn lẹ Mẹ
Nugbo wẹ dọ dide nado “dọ́ ẹ pọ́n, bosọ mọdọ yinyọ́n wẹ OKLUNỌ” ma nọ whlá mẹde sọn nujijọ ajiji gbẹzan tọn lẹ si gba; mọjanwẹ e ma na whlá mí mlẹnmlẹn sọn mẹgbeyinyan Satani po nuyizan gbẹtọvi tọn etọn lẹ po si do niyẹn. (Yẹwhehodọtọ 9:11) Taidi kọdetọn de, ahundoponọ-yinyin po gbemima Klistiani de tọn po sọgan yin whiwhlepọn. Etẹwutu Jehovah nọ dike sinsẹ̀n-basitọ etọn lẹ ni pehẹ whlepọn mọnkọtọn lẹ? Apọsteli Pita na whẹwhinwhẹ́n dopo to whenuena e wlan dọmọ: “Le e tlẹ te dinvie na whenu de, yin e ma sọgan nọma jọ, mì tin to awubla mẹ gbọn whlepọn susu dali: dọ [jẹhẹnu] yise mìtọn tọn, he yọnwhanpẹ hú sika he nọ sudo, eyin e bosọ yin miyọ́n wẹ yè tlẹ yí do to whiwhle e pọ́n, na yè nido mọ ẹn to pipà mẹ, to yẹyi mẹ, to gigo mẹ to osọhia Jesu Klisti tọn whenu.” (1 Pita 1:6, 7) Mọwẹ, whlepọn lẹ nọ dike mí ni do jẹhẹnu yise mítọn tọn po owanyi mítọn na Jehovah po hia. Podọ yé nọ gọalọ nado na gblọndo na vlẹko po whẹsadokọnamẹ Satani Lẹgba tọn lẹ po.—Howhinwhẹn lẹ 27:11; Osọhia 12:10.
Whlepọn lẹ sọ nọ gọalọna mí nado wleawuna jẹhẹnu Klistiani tọn devo lẹ. Di apajlẹ, lẹnnupọndo hogbe psalm-kàntọ lọ tọn lẹ ji dọ: “[Jehovah] . . . mọ whiwhẹnọ lẹ: ṣigba saklanọ wẹ e yọnẹn sọn aganu.” (Psalm 138:6) Susu mítọn mayin whiwhẹnọ to jọwamọ-liho gba, ṣigba whlepọn lẹ sọgan gọalọna mí nado wleawuna jẹhẹnu titengbe enẹ. Flin ojlẹ lọ to azán Mose tọn gbè to whenuena mana dùdù na osẹ susu, osun susu, lẹzun apọṣimẹnu de na Islaelivi delẹ. E họnwun dọ whlepọn de wẹ enẹ yin na yé, dile etlẹ yindọ mana yin awuwlena to azọ́njiawu-liho do. Lẹndai tẹwẹ whlepọn lọ tin na? Mose dọna yé dọmọ: “[Jehovah] yí mana do yìn we to zungbo lọ mẹ . . . na e nido hòhuwhẹ we, podọ na ewọ nido tẹ́n we pọ́n.”—Deutelonomi 8:16.
Whiwhẹ mítọn sọgan sọ yin whiwhlepọn ga. Gbọnna? Di apajlẹ, nawẹ mí nọ yinuwa hlan diọdo titobasinanu tọn lẹ do? (Isaia 60:17) Be mí nọ yí ahundopo do nọgodona azọ́n yẹwhehodidọ po mẹpinplọn tọn po ya? (Matiu 24:14; 28:19, 20) Be mí nọ kẹalọyi zẹẹmẹ nugbo Biblu tọn he “afanumẹ nugbonọ, nuyọnẹntọ” lọ wleawuna lẹ po zohunhun po ya? (Matiu 24:45-47; Howhinwhẹn lẹ 4:18) Be mí nọ nọavunte sọta kọgbidinamẹnu lọ nado tindo nuyizan he tin to zoji lẹ, avọ̀ he tin to zoji, kavi gbẹduhun yọyọ he ṣẹṣẹ tọ́n lẹ wẹ ya? Whiwhẹnọ de na penugo nado dọ mọwẹ hlan kanbiọ enẹlẹ.—1 Pita 1:14-16; 2 Pita 3:11.
Whlepọn lẹ nọ gọalọ nado wleawuna jẹhẹnu titengbe devo do mí mẹ—enẹwẹ akọndonanu. Devi Jakobu dọmọ: “Mì mẹmẹsunnu ṣie emi, whenuena mì jẹ whlepọn hunkọhunkọ mẹ, mì hia ẹ na ayajijẹ popo; na mì nisọ yọ́n ehe dọ whlepọn yise mìtọn tọn wẹ nọ wazọ́n [akọndonanu] tọn.” (Jakobu 1:2, 3) Akọndidona whlepọn debọdo-dego lẹ po jide mlẹnmlẹn to Jehovah mẹ po nọ wleawuna dolilo, linsinsinyẹn, po tenọgligo-hinhẹn po. E na hẹn mí lodo nado nọavunte sọta mẹgbeyinyan sọgodo Satani, yẹwhe he ko gblehomẹ aihọn ehe tọn lẹ tọn.—1 Pita 5:8-10; 1 Johanu 5:19; Osọhia 12:12.
Tindo Pọndohlan Jlẹkaji Tọn Gando Whlepọn lẹ Go
Jesu Klisti, Visunnu pipé Jiwheyẹwhe tọn pannukọn whlepọn susu to whenue e tin to aigba ji, bosọ mọ ale susu yí sọn akọndidona yé mẹ. Paulu wlan dọ Jesu “plọn tonuse gbọn nuhe mẹ e jiya te [lẹ].” (Heblu lẹ 5:8) Nugbonọ-yinyin etọn jẹ okú hẹn pipà wá na yinkọ Jehovah tọn bo hẹn ẹn yọnbasi na Jesu nado na nuhọakuẹ ogbẹ̀ pipé etọn tọn taidi ofligọ de na gbẹtọvi lẹ. Enẹ hùn aliho dote na mẹhe do yise hia to Jesu mẹ lẹ nado tindo nukundido ogbẹ̀ madopodo tọn. (Johanu 3:16) Na Jesu yin nugbonọ to whlepọn glọ wutu, e yin Yẹwhenọ Daho po Ahọlu zedo ofin ji mítọn po todin.—Heblu lẹ 7:26-28; 12:2.
Etẹwẹ dogbọn míwlẹ dali? Nugbonọ-yinyin mítọn to whlepọn lẹ nukọn na hẹn dona daho lẹ wá ga. Na mẹhe tindo todido olọn mẹ tọn lẹ, Biblu dọmọ: “Donanọ wẹ dawe lọ he doakọnna whlepọn: na whenuena yè tẹ́n ẹn pọ́n, e na yí ojẹgbakun ogbẹ̀ tọn, he Oklunọ ko dopagbe hlan yé he yiwanna ẹn lẹ.” (Jakobu 1:12) Mẹhe tindo todido aigba ji tọn lẹ tindo jidide dọ eyin yé doakọnnanu po nugbonọ-yinyin po, yé na dugu ogbẹ̀ madopodo tọn to paladisi aigba ji tọn mẹ. (Osọhia 21:3-6) Podọ dehe yin nujọnu hugan, akọndonanu po nugbonọ-yinyin po yetọn nọ hẹn pipà wá na yinkọ Jehovah tọn.
Dile mí to afọdomẹ Jesu tọn hodo, mí sọgan deji dọ whlepọn he mí pehẹ to titonu ehe mẹ lẹpo sọgan yin akọndona po kọdetọn dagbe po. (1 Kọlintinu lẹ 10:13; 1 Pita 2:21) Gbọnna? Gbọn ginganjẹ Jehovah, he nọ na ‘huhlọn he hugan jọwamọ tọn’ mẹhe ganjẹ ewọ go lẹ go dali wẹ. (2 Kọlintinu lẹ 4:7) Na nujikudo mítọn ni taidi Job tọn, mẹhe dọ po jidide po dile etlẹ to akọndona whlepọn sinsinyẹn lẹ dọmọ: “Whenuena ewọ ko whlé mi pọ́n, yẹn na tọ́n wá di sika.”—Job 23:10.
[Yẹdide to weda 31]
Nugbonọ-yinyin Jesu tọn to whlepọn glọ hẹn pipà wá na yinkọ Jehovah tọn. Mílọsu tọn sọgan wàmọ