Kọnawudopọ Pẹkipẹki hẹ Titobasinanu Jehovah Tọn

DEVI Jakọbu wlan dọmọ: “Mì dọnsẹpọ Jiwheyẹwhe, ewọ nasọ dọnsẹpọ mì.” (Jak. 4:8) Na nugbo tọn, mahopọnna mapenọ-yinyin mítọn, Jehovah ma yiaga gbau kavi dẹn do mí gbau nado sè odẹ̀ mítọn lẹ. (Owalọ 17:27) Nawẹ mí sọgan dọnsẹpọ Jiwheyẹwhe gbọn? Mí nọ wà ehe gbọn awuwiwlena haṣinṣan pẹkipẹki de hẹ Jehovah dali—ehe bẹ dẹ̀hiho vẹkuvẹku hẹn. (Salm. 39:12) Mí sọ sọgan wleawuna haṣinṣan alọmayiemẹ de hẹ Jiwheyẹwhe gbọn Ohó etọn, Biblu pinplọn to gbesisọ mẹ dali. Enẹ na gọalọna mí nado yọ́n Jehovah Jiwheyẹwhe, lẹndai etọn lẹ po ojlo etọn po. (2 Tim. 3:16, 17) Gbọnmọ dali, mí na plọn nado yiwanna ẹn bo wleawuna obu he sọgbe lọ ma nado hẹn homẹgble e.—Salm. 25:14.

² Ṣigba, dindọnsẹpọ Jehovah nọ yọnbasi gbọn Visunnu etọn, Jesu Klisti kẹdẹ gblamẹ. (Joh. 17:3; Lom. 5:10) Gbẹtọ depope ma sọgan hẹn mí yọ́n linlẹn Jehovah tọn hú Jesu. Ewọ jẹakọ pẹkipẹki hẹ Otọ́ etọn sọmọ bo sọgan dọmọ: “Mẹde ma yọ́n mẹhe Visunnu lọ yin, adavo Otọ́ lọ, podọ mẹde ma yọ́n mẹhe Otọ́ lọ yin adavo Visunnu lọ po mẹdepope he Visunnu lọ jlo nado de e hia po.” (Luku 10:22) Enẹwutu, to whenue mí to nuhe owe Wẹndagbe tọn lẹ dọ gando linlẹn po numọtolanmẹ Jesu tọn lẹ po go plọn, matin ayihaawe, linlẹn po numọtolanmẹ Jehovah tọn lẹ po plọn wẹ mí te. Oyọnẹn mọnkọtọn nọ hẹn mí penugo nado dọnsẹpọ Jiwheyẹwhe mítọn.

³ Mí nọ wleawuna haṣinṣan pẹkipẹki de hẹ Jehovah to tatọ́-yinyin Visunnu etọn tọn glọ, eyin mí kọnawudopọ pẹkipẹki hẹ asisa yinukundomọ lọ he nọ gọalọna mí nado yọ́n lehe mí sọgan wà ojlo Jiwheyẹwhe tọn do. Dile e yin didọdai to Matiu 24:45-47 mẹ do, Klunọ lọ, Jesu Klisti ko de “afanumẹ nugbonọ podọ nuyọnẹntọ lọ,” nado nọ “na núdùdù” whédo yise tọn “to ojlẹ sisọ mẹ.” To egbehe, afanumẹ nugbonọ lọ nọ na mí núdùdù gbigbọmẹ tọn susugege lẹ. Jehovah nọ yí asisa ehe zan nado na mí ayinamẹ nado nọ hia Ohó etọn egbesọegbesọ, nado nọ yì opli Klistiani tọn lẹ to gbesisọ mẹ, podọ nado nọ wà nuhe go mí pé lẹpo to yẹwhehodidọ “wẹndagbe Ahọluduta lọ tọn” mẹ. (Mat. 24:14; 28:19, 20; Jọṣ. 1:8; Salm. 1:1-3) Mí ma dona nọ yí nukun agbasa tọn do pọ́n afanumẹ nugbonọ lọ gbede. Mí dona nọ dovivẹnu nado kọnawudopọ pẹkipẹki hẹ adà yinukundomọ titobasinanu Jehovah tọn bo nọ hodo anademẹ etọn lẹ. Ehe na dọ̀n mí sẹpọ Jehovah Jiwheyẹwhe mítọn pẹkipẹki bo nasọ gọalọ nado hẹn mí lodo bo basi hihọ́na mí mahopọnna whlepọn lẹ.

NUHEWUTU WHLEPỌN LẸ TO JIJIDEJI

⁴ Vlavo hiẹ ko tin to nugbo lọ mẹ na owhe susu. Eyin mọ wẹ, matin ayihaawe hiẹ na ko yọ́n nuhe e zẹẹmẹdo nado doakọnna whlepọn lẹ. Ṣigba, eyin etlẹ yindọ azánvi ehelẹ mẹ wẹ hiẹ wá yọ́n Jehovah bo jẹ gbẹdo hẹ omẹ etọn lẹ ji, hiẹ lọsu yọnẹn dọ Satani Lẹgba nọ diọnukunsọ mẹdepope he litaina nupojipetọ-yinyin Jehovah tọn. (2 Tim. 3:12) Enẹwutu, vlavo hiẹ ko doakọnna whlepọn susu kavi vude, whẹwhinwhẹ́n depope ma tin na we nado dibu kavi gbọjọ gba. Jehovah dopagbe dọ emi na gọalọna we bo na yí whlẹngán po ogbẹ̀ sọgodo tọn po do suahọ we.—Heb. 13:5, 6; Osọ. 2:10.

⁵ Mímẹpo wẹ sọgan gbẹ́ to akọndona whlepọn lẹ to pipotọ titonu Satani tọn ehe mẹ. Sọn whenue gbọ́n Ahọluduta Jiwheyẹwhe tọn ko yin didoai to 1914, dotẹnmẹ ma yin nina Satani nado yì olọn Jehovah tọn mẹ ba. E ko yin dindọn dlan aigba ji, fie ewọ po angẹli ylankan etọn lẹ po ko yin ginglọn do. Homẹgble Satani tọn wẹ zọ́n bọ yajiji po homẹkẹndido devizọnwatọ klandowiwe Jehovah tọn lẹ po do jideji to aigba ji, podọ ehe yin ohia de dọ mí to gbẹnọ to azán godo tọn lẹ mẹ to gandudomẹji ylankan etọn do gbẹtọvi lẹ ji glọ.—Osọ. 12:1-12.

⁶ Satani to adidu na ninọmẹ mẹdèpo tọn he mẹ e tin te wutu, na e yọnẹn dọ whenu gli de wẹ emi tindo. Ewọ po aovi etọn lẹ po nọ wà nuhe go yé pé lẹpo nado glọnalina azọ́n yẹwhehodidọ Ahọluduta lọ tọn, podọ nado hẹn pọninọ he tin to devizọnwatọ Jehovah tọn lẹ ṣẹnṣẹn gble. Ehe zọ́n bọ mí dona hoavùn gbigbọmẹ tọn, dile Biblu basi zẹẹmẹ etọn do dọ “ahididi he mí tindo ma yin sọta ohùn po agbasalan po, ṣigba sọta gandudu lẹ, sọta aṣẹpipa lẹ, sọta ogán aihọn zinvlu ehe tọn lẹ, sọta huhlọn gbigbọ ylankan olọn tọn lẹ.” Eyin mí na gbawhàn bo nọ adà Jehovah tọn mẹ, mí ma dona gbọjọ to avùnhiho lọ mẹ gba, ṣigba mí dona blá gbaja gbigbọmẹ tọn mítọn gligli. Mí dona “nọte gligli sọta ayiha wintinwintin” Lẹgba tọn lẹ. (Efe. 6:10-17) Ehe biọ akọndonanu to mí si.

AWUWIWLENA AKỌNDONANU

⁷ Akọndonanu zẹẹmẹdo “nugopipe lọ nado pehẹ awusinyẹnnamẹnu kavi kọgbidinamẹnu.” To gbigbọ-liho, akọndonanu zẹẹmẹdo jẹhẹnu tenọgligo-hinhẹn tọn to nuhe sọgbe wiwà mẹ mahopọnna yajiji, nukundiọsọmẹ, homẹkẹn kavi ninọmẹ devo depope he yin awuwlena nado hẹn tenọgli mítọn hlan Jiwheyẹwhe gble. Klistiani lẹ dona wleawuna akọndonanu. Ehe ma nọ wá to gbèdopo gba. Nugopipe mítọn nado doakọnnanu nọ lodo dogọ dile mí to nukọnyi to gbigbọmẹ. Eyin mí nọ doakọnna whlepọn yise tọn flinflin lẹ bẹsọn whenue mí lẹzun Klistiani, mí na lodo, bo na penugo nado doakọnna whlepọn sinsinyẹn he na wá dandan to nukọn mẹ lẹ. (Luku 16:10) Mí ma dona nọte kakajẹ whenue whlepọn sinsinyẹn lẹ na wá whẹpo do magbe nado nọtegli to yise mẹ gba. Mí dona ko basi nudide he lodo whẹpo whlepọn nido wá. Nado dohia dọ akọndonanu dona yin awuwlena dopọ po jẹhẹnu devo lẹ he nọ hẹn homẹhun Jiwheyẹwhe po, apọsteli Pita wlan dọmọ: “Mì dovivẹnu vẹkuvẹku nado yí jijọ dagbe dogọ yise mìtọn, oyọnẹn dogọ jijọ dagbe mìtọn, mawazẹjlẹgo dogọ oyọnẹn mìtọn, akọndonanu dogọ mawazẹjlẹgo mìtọn, mẹdezejo na Jiwheyẹwhe dogọ akọndonanu mìtọn, owanyi mẹmẹsunnu tọn dogọ mẹdezejo na Jiwheyẹwhe mìtọn, owanyi dogọ owanyi mẹmẹsunnu tọn mìtọn.”—2 Pita 1:5-7; 1 Tim. 6:11.

⁸ Jakọbu zinnudo lehe e yin nujọnu nado wleawuna akọndonanu do ji to wekanhlanmẹ etọn mẹ dọmọ: “Mẹmẹsunnu ṣie lẹ emi, mì nọ pọ́n ẹn hlan di ayajẹ nugbonugbo, to whenuena mì pehẹ whlepọn voovo lẹ, dile mì yọnẹn do dọ nuhọakuẹ-yinyin yise mìtọn tọn he yin whiwhlepọn ehe, nọ dekọtọn do akọndonanu mẹ. Ṣigba, mì gbọ akọndonanu ni wazọ́n etọn dotana, na mìwlẹ nido sọgan sọgbe bosọ pegan mlẹnmlẹn bo ma jẹdò nudepope tọn.” (Jak. 1:2-4) Jakọbu dọ dọ Klistiani lẹ dona kẹalọyi whlepọn lẹ bosọ nọ jaya to yé mẹ, na yé nọ gọalọna mí nado wleawuna akọndonanu. Be hiẹ ko pọ́n ẹn hlan to aliho enẹ mẹ pọ́n ya? Enẹgodo, Jakọbu dohia dọ akọndonanu tindo azọ́n de nado yiwà to gbẹtọ-yinyin Klistiani tọn mítọn hinhẹn zun pipé mẹ podọ to hinhẹn mí nado yin alọkẹyi to Jiwheyẹwhe dè mẹ. Mọwẹ, akọndonanu mítọn nọ yin hinhẹn lodo egbesọegbesọ dile mí to pipehẹ whlepọn lẹ bo to dùdù to yé ji. Taidi kọdetọn de, akọndonanu nọ wleawuna jẹhẹnu dagbe devo lẹ he mí tindo nuhudo etọn.

⁹ Akọndonanu mítọn nọ hẹn homẹhun Jehovah; e na whàn ẹn nado na mí ale ogbẹ̀ madopodo tọn. Jakọbu zindonukọn dọmọ: “ Ayajẹnọ wẹ mẹlọ he to akọndona whlepọn zọnmii, na to whenuena e wá yin alọkẹyi e na mọ jẹgbakun ogbẹ̀ tọn lọ yí, he Jehovah dopagbe etọn na mẹhe zindonukọn nado to wanyina Ẹn lẹ.” (Jak. 1:12) Mọwẹ, nado mọ ogbẹ̀ wẹ zọ́n bọ mí nọ doakọnnanu. Matin akọndonanu, mí ma sọgan gbọṣi nugbo lọ mẹ. Eyin mí joawuna kọgbidinamẹ aihọn tọn lẹ, mí na yin dindọn lẹkọyi aihọn lọ mẹ. Matin akọndonanu, mí ma na tindo gbigbọ Jehovah tọn zọnmii, podọ enẹ na zọ́n bọ mí ma na de sinsẹ́n etọn tọ́n to gbẹzan mítọn mẹ.

¹⁰ Eyin mí na to akọndonanu zọnmii to ojlẹ awusinyẹn tọn ehelẹ mẹ, mí dona wleawuna pọndohlan he sọgbe gando yajiji taidi Klistiani go. Flindọ Jakọbu wlan dọmọ: “Mì nọ pọ́n ẹn hlan di ayajẹ.” Ehe sọgan nọma bọawu, na e sọgan bẹ yajiji agbasalan tọn kavi awufiẹsa apọ̀nmẹ tọn hẹn wutu. Ṣigba, flindọ e gando ogbẹ̀ sọgodo tọn go. Numimọ apọsteli lẹ tọn gọalọna mí nado mọ lehe mí sọgan jaya to yajiji lẹ whenu do. Kandai lọ yin mimọ to owe Owalọ lẹ tọn mẹ, bọ e hia dọmọ: “Yé sọ ylọ apọsteli lọ lẹ bo hò yé, bosọ dosẹ́n na yé ma nado nọ dọho to oyín Jesu tọn mẹ ba, bo tún yé dote. Enẹwutu, yé tọ́nyi sọn hagbẹ Whẹdatẹn Daho Ju lẹ tọn lọ nukọn bo to ayajẹ na yé ko yin hihia jẹ nado yin winyando na oyín etọn wutu.” (Owalọ 5:40, 41) Apọsteli lọ lẹ mọnukunnujẹemẹ dọ yajiji yetọn yin kunnudenu de dọ yé to tonusena gbedide Jesu tọn podọ dọ yé ko hẹn homẹhun Jehovah. To owhe susu godo, whenue Pita to wekanhlanmẹ gbọdo etọn tintan kàn, e basi zẹẹmẹ do lehe yajiji na dodowiwa wutu yin nuhọakuẹ do ji.—1 Pita 4:12-16.

¹¹ Numimọ devo wẹ yin Paulu po Sila po tọn. To whenue yé to azọ́n mẹdehlan tọn yetọn wà to Filipi, yé yin wiwle bo yin whẹsadokọna dọ yé to tuklado tòdaho lọ bosọ to aṣa he ma sọgbe hẹ osẹ́n lẹ lá. Taidi kọdetọn de, yé yin hihò kúdaa-gbẹ̀daa bo yin zizedlan gànpamẹ. Kandai Biblu tọn lọ dọna mí dọ dile yé gbẹ́ pò to gànpamẹ bọ apà yetọn lẹ ma yin nukunpedego, “to nudi zángbodawe mẹ, Paulu po Sila po to dẹ̀ho bo yí ohàn do to Jiwheyẹwhe pà; gàntọ lẹ sọ to todoaina ogbè yetọn.” (Owalọ 16:16-25) Paulu po awetọ etọn po ma pọ́n yajiji yetọn do Klisti tamẹ hlan poun taidi kunnudenu tenọgli yetọn tọn to Jiwheyẹwhe po gbẹtọ po nukọn gba, ṣigba yé sọ pọ́n ẹn di aliho de nado dekunnuna mẹhe sọgan jlo nado dotoaina wẹndagbe lọ lẹ. Ehe yinuwado ogbẹ̀ mẹdevo lẹ tọn ji. To ozán enẹ mẹ, gàntọ-ṣọ́tọ lọ po whédo etọn po dotoai bo lẹzun devi lẹ. (Owalọ 16:26-34) Paulu po Sila po dejido Jehovah go, do huhlọn etọn go, podọ do ojlo Etọn nado gọalọna yé to yajiji yetọn mẹ go. Yé ma yin hinhẹn jẹflumẹ gba.

¹² To egbehe ga, Jehovah ko wleawu nuhe mí tindo nuhudo etọn lẹpo tọn na mí nado gọalọna mí to ojlẹ whlepọn tọn lẹ mẹ. E jlo dọ mí ni doakọnnanu. E ko na mí Ohó gbọdo etọn nado na mí oyọnẹn he pegan gando lẹndai etọn go. Ehe nọ hẹn yise mítọn lodo. Mí nọ tindo dotẹnmẹ hundote lọ nado dogbẹ́ hẹ yisenọ hatọ lẹ podọ nado basi sinsẹ̀nzọn wiwe. Mí sọ tindo lẹblanulọkẹyi lọ nado gbọṣi haṣinṣan pẹkipẹki de mẹ hẹ Jehovah lọsu titi, gbọn odẹ̀ gblamẹ. E nọ dotoaina hogbe pipà tọn mítọn lẹ po obiọ vẹkuvẹku alọgọ tọn mítọn lẹ po nado gbọṣi teninọ wiwe de mẹ to nukọn etọn. (Flp. 4:13) Podọ mí ma dona yí nukunpẹvi do pọ́n huhlọn he nọ yin mimọyi sọn nulinlẹnpọn do todido he tin to nukọnna mí lọ ji mẹ.—Mat. 24:13; Heb. 6:18; Osọ. 21:1-4.

AKỌNDIDONA WHLEPỌN VOOVO LẸ

¹³ Whlepọn he mí nọ pehẹ to egbehe lẹ taidi dehe devi dowhenu Jesu Klisti tọn lẹ pehẹ lẹ. To ojlẹ egbezangbe tọn lẹ mẹ, Kunnudetọ Jehovah tọn lẹ ko jiya mẹzunzun po yasanamẹ to agbasa-liho po tọn to alọ agọjẹdomẹtọ he sè nudọnamẹ agọ̀ lẹ tọn mẹ. Kẹdẹdi to ojlẹ apọsteli lẹ tọn mẹ, suhugan nukundiọsọmẹ lẹ tọn wẹ nọ yin finfọndote gbọn sinsẹ̀nnọ kanylantọ lẹ dali, mẹhe Ohó Jiwheyẹwhe tọn nọ de nuplọnmẹ po nuyiwa lalo tọn yetọn lẹ po gbà. (Owalọ 17:5-9, 13) Omẹ Jehovah tọn lẹ ko mọ kọgbọ to whedelẹnu gbọn jlọjẹ sọgbe hẹ osẹ́n lẹ bibiọ dali, ehe gandudu aihọn tọn lẹ nọ namẹ. (Owalọ 22:25; 25:11) Etomọṣo, gandutọ lẹ lọsu ko yí osẹ́n lẹ do hẹnalọdotena azọ́n mítọn to ojlẹ delẹ mẹ, bo nọ dovivẹnu nado doalọtena lizọnyizọn Klistiani tọn mítọn. (Salm. 2:1-3) To ninọmẹ mọnkọtọn lẹ mẹ, mí nọ yí adọgbigbo do hodo apajlẹ apọsteli nugbonọ lẹ tọn, mẹhe dọmọ: “Míwlẹ dona setonuna Jiwheyẹwhe taidi ogán kakati nido yin gbẹtọ lẹ.”—Owalọ 5:29.

¹⁴ Dile gbigbọ wanyina akọta mẹtọn tọn fọ́n bo to jijideji lẹdo aihọn pé, mẹhe nọ dọyẹwheho wẹndagbe lọ tọn lẹ nọ yin kọgbidina sinsinyẹn nado doalọtena lizọnyizọn he Jiwheyẹwhe zedo alọmẹ na yé. Devizọnwatọ Jiwheyẹwhe tọn lẹpo wẹ mọnukunnujẹ avase he yin nina to Osọhia 14:9-12 mẹ lọ mẹ hezeheze gando sinsẹ̀n-bibasi hlan “gbekanlin lọ po boṣiọ etọn po” go. Mí yọ́n zẹẹmẹ nuhe Johanu dọ tọn dọmọ: “Fihe e biọ akọndonanu to omẹ wiwe lẹ si te die, yèdọ mẹhe to gbedide Jiwheyẹwhe tọn lẹ yìn bo tẹdo yise Jesu tọn go gligli lẹ.”

¹⁵ Whlepọn he awhàn, gufinfọn, kavi homẹkẹn po alọhẹndotenamẹ osẹ́n tọn lẹ po nọ hẹnwa lẹ sọgan hẹn ẹn zun nuhe ma yọnbasi nado zindonukọn to sinsẹ̀n-bibasi gbangba Klistiani tọn mẹ. E sọgan glo nado nọ pli taidi agun. Aliho hodọdopọ tọn hẹ wekantẹn alahọ tọn sọgan yin sinsán. Dlapọn nugopọntọ lẹdo tọn lẹ tọn sọgan yin alọhẹndotena. Owe mítọn lẹ mimọyi sọgan glo. Eyin depope to onú ehelẹ mẹ jọ, etẹwẹ hiẹ dona wà?

¹⁶ Gblọndo lọ wẹ yindọ, wà nuhe go a pé lẹpo to ninọmẹ lọ mẹ. Nudepope ma sọgan gbẹ́ oplọn mẹdetiti tọn. Pipli kleun lẹ sọgan gbẹ́ nọ pli na nupinplọn to owhé lẹ gbè. Owe he ko yin pinplọn wayi lẹ po Biblu lọsu po sọgan yin yiyizan na opli lẹ. Ma hanú kavi lẹzun ayimajainọ blo. To paa mẹ, Hagbẹ Anademẹtọ lọ na penugo nado wleawuna aliho hodọdopọ tọn delẹ hẹ mẹmẹsunnu azọngbannọ lẹ to ojlẹ kleun de gblamẹ.

¹⁷ Eyin hiẹ tlẹ wá mọ dewe to fie Klistiani mẹmẹsunnu towe devo de ma sẹpọ, hẹn do ayiha mẹ dọ Jehovah po Visunnu etọn, Jesu Klisti po ma dẹn do we. Hiẹ sọgan gbẹ́ hẹn todido towe lodo. Jehovah sọgan gbẹ́ sè odẹ̀ towe lẹ, podọ e sọgan yí gbigbọ etọn do hẹn we lodo. Nọ dín anademẹ sọn ewọ dè. Flindọ devizọnwatọ Jehovah tọn de wẹ hiẹ yin podọ devi Jesu Klisti tọn. Enẹwutu, nọ yí dotẹnmẹ hundote lẹpo zan nado dekunnu. Jehovah na dona vivẹnudido towe lẹ, bọ to madẹnmẹ mẹdevo lẹ sọgan wá kọnawudopọ hẹ we to sinsẹ̀n-bibasi nugbo lọ mẹ.—Owalọ 4:13-31; 5:27-42; Flp. 1:27-30; 4:6, 7; 2 Tim. 4:16-18.

¹⁸ Amọ́, taidi apọsteli lẹ po mẹdevo lẹ po, eyin yè tlẹ yí okú do dobuna we, dejido “Jiwheyẹwhe he nọ fọ́n oṣiọ lẹ lọ” go. (2 Kọl. 1:8-10) Yise towe dọ e na fọ́n we sọnku sọgan gọalọna we nado doakọnna nukundiọsọmẹ he tlẹ sinyẹn hugan lọ. (Luku 21:19) Klisti Jesu ze apajlẹ enẹ dai na mí; e yọnẹn dọ nugbonọ-yinyin etọn to whlepọn lẹ glọ na hẹn mẹdevo lẹ lodo nado doakọnnanu. Hiẹ lọsu sọgan yin asisa mẹhẹnlodo tọn na mẹmẹsunnu towe lẹ to aliho dopolọ mẹ.—Joh. 16:33; Heb. 12:2, 3; 1 Pita 2:21.

¹⁹ Gbọnvona homẹkẹn po nukundiọsọmẹ lẹ po, e sọgan sọ biọ dọ hiẹ ni doakọnna ninọmẹ awusinyẹnnamẹ tọn devo lẹ. Di apajlẹ, mẹdelẹ ko gbọjọ na ojlo matindo mẹhe tin to aigba-denamẹ yetọn ji lẹ tọn wutu. Mẹdevo lẹ dona diahi hẹ azọ̀n agbasa tọn kavi numọtolanmẹ tọn yetọn titi lẹ kavi yé dona doakọnna madogán he agbasa mape tọn yetọn nọ hẹnwa lẹ. Apọsteli Paulu lọsu dona doakọnna whlepọn wunmẹ delẹ he nọ glọnalina kavi hẹn sinsẹ̀nzọn etọn vẹawuna ẹn to ojlẹ delẹ mẹ. (2 Kọl. 12:7) Humọ, Epafloditu, Klistiani owhe kanweko tintan whenu tọn de sọn Filipi, lẹzun mẹhe “jẹflumẹ na [họntọn etọn lẹ] ko sè dọ e to azọ̀njẹ wutu.” (Flp. 2:25-27) Mapenọ-yinyin mítọn po mẹdevo lẹ tọn po sọgan fọ́n nuhahun he vẹawu taun nado doakọnna lẹ dote. Dẹ́sọ-dẹ́mẹ lẹ sọgan hẹn wiwọ́ lẹ wá to Klistiani hatọ lẹ ṣẹnṣẹn kavi etlẹ yin to whẹndo mẹ. Ṣigba, mẹhe nọ hodo ayinamẹ he tin to Ohó Jehovah tọn mẹ lẹ sọgan doakọnna aliglọnnamẹnu mọnkọtọn lẹ bosọ duto yé ji.—Ezek. 2:3-5; 1 Kọl. 9:27; 13:8; Kol. 3:12-14; 1 Pita 4:8.

MAGBE NADO HẸN NUGBONỌ-YINYIN GO

²⁰ Mí dona nọ tẹdo mẹhe Jehovah ko de taidi Ota agun lọ tọn, yèdọ Klisti Jesu go gligli. (Kọl. 2:18, 19) Mí dona nọ wazọ́n to kọndopọ mẹ hẹ “afanumẹ nugbonọ podọ nuyọnẹntọ lọ” po mẹhe yin dide taidi nugopọntọ lẹ po. (Heb. 13:7, 17) Eyin mí hodo tito yẹwhehọluduta tọn lẹ pẹkipẹki bo nọ kọngbedopọ hẹ mẹhe to anadenanu lẹ, mí na yin tito-basina nado wà ojlo Jehovah tọn. Mí dona nọ yí lẹblanulọkẹyi he mí tindo nado nọ hodẹ̀ lọ zan to gigọ́ mẹ. Flindọ, etlẹ yin adó gànpa tọn kavi gànhọ ṣokẹdẹninọ tọn de ma gán glọnalina mí nado dọhodopọ hẹ Otọ́ owanyinọ olọn mẹ tọn mítọn kavi hẹn pọninọ he mí tindo hẹ sinsẹ̀n-basitọ hatọ lẹ gble gba.

²¹ Po gbemima po nado doakọnnanu, mì gbọ mí ni wà nuhe go mí pé lẹpo nado hẹn azọ́ndenamẹ mítọn di nado dọyẹwheho, bo zindonukọn to azọ́n he Jesu Klisti he yin finfọnsọnku lọ zedo alọmẹ na hodotọ etọn lẹ lọ mẹ. Jesu dọmọ: “Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé to oyín Otọ́ tọn, Visunnu tọn, po gbigbọ wiwe tọn po mẹ, bo nọ plọn yé nado payi nuhe yẹn ko degbe etọn na mì lẹpo go.” (Mat. 28:19, 20) Taidi Jesu, mì gbọ mí ni nọ doakọnnanu. Mì gbọ mí ni hẹn todido Ahọluduta lọ tọn po nukundido ogbẹ̀ madopodo tọn po do ayiha mẹ. (Heb. 12:2) Taidi devi Klisti tọn he ko yí baptẹm lẹ, mí tindo lẹblanulọkẹyi lọ nado doalọ to hẹndi dọdai he Jesu dọ gando “vivọnu titonu lọ tọn” go tọn mẹ. E dọmọ: “Yẹwheho wẹndagbe Ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo, podọ whenẹnu wẹ opodo lọ na wá.” (Mat. 24:3, 14) Eyin mí yí mídelẹ zan po ahun lẹpo po na azọ́n enẹ to ojlẹ ehe mẹ, mí na tindo ayajẹ lọ nado tindo ogbẹ̀ madopodo to aihọn yọyọ dodo tọn Jehovah tọn mẹ!