Be Hiẹ Flin ya?

Be hiẹ ko na ayidonugo sọwhiwhe tọn zinjẹgbonu agọe Atọ̀họ̀-Nuhihọ́ Lọ Tọn lẹ ya? Eyin mọwẹ, hiẹ na mọ ẹn yin awuvivinamẹnu nado flin nuhe bọdego helẹ:

● Naegbọn sinsẹ̀n-nuplọnmẹ sẹ́gbè tọn ma do sọgbe hẹ lẹnpọn dagbe?

Eyin Jiwheyẹwhe yọnẹn jẹnukọn bosọ degbe aijijẹ jẹ ylando mẹ Adam tọn, to whelọnu lo Jehovah lẹzun dowatọ ylando tọn to whenuena e dá gbẹtọ podọ e nasọ yin azọngbannọ na kanyinylan po yajiji gbẹtọvi tọn lẹpo po. Ehe ma sọgan yin hinhẹn sọgbe hẹ nugbo lọ dọ Jehovah yin Jiwheyẹwhe owanyinọ he gbẹwanna kanyinylan gba. (Psalm 33:5; Howhinwhẹn lẹ 15:9; 1 Johanu 4:8)—15/4, weda 7, 8.

● To hẹndi Isaia 2:2-4 tọn mẹ, etẹwẹ gbẹtọ lẹ sọn akọta susu lẹ mẹ to wiwà?

Dile yé to lìnlìn wá ohọ̀ sinsẹ̀n-bibasi Jehovah tọn mẹ, yé sọ joagọ sọn ‘awhàn pinplọn’ kọ̀n na yé yí jidide yetọn do hihọ-basinamẹ awhànpa olọn mẹ Jiwheyẹwhe tọn lẹ mẹ, ehe ko wleawufó nado và kẹntọ jijọho tọn lẹpo sudo.—15/4, weda 30.

● Mẹnu lẹ wẹ yin omẹ huhlọnnọ Jiwheyẹwhe tọn heyin hodọdego to Joẹli 3:10, 11 mẹ lẹ?

Na whla 280 delẹ to Biblu mẹ, Jiwheyẹwhe nugbo lọ yin yiylọdọ ‘Jehovah awhànpa lẹ tọn.’ (2 Ahọlu lẹ 3:14) Awhànpa ehelẹ wẹ awhànpa huhlọnnọ angẹli olọn mẹ tọn lẹ, he ko wleawufó nado hẹn gbedide Jehovah tọn di.—1/5, weda 23.

◻ Nupinplọn tẹwẹ mí sọgan plọn sọn bibiọ Jehovah tọn to Job si nado hodẹ̀ na mẹhe waylando sọta ẹ lẹ? (Job 42:8)

Whẹpo Job do yin hinhẹngọwa ninọmẹ agbasalilo tọn de mẹ, Jehovah biọ dọ e ni hodẹ̀ do ota mẹhe ko waylando sọta ẹ lẹ tọn mẹ. Ehe dohia dọ Jehovah biọ dọ mí ni jona mẹhe waylando sọta mí lẹ whẹpo ylando mítọn lẹ nido sọgan yin jijona mí. (Matiu 6:12; Efesunu lẹ 4:32)—1/5, weda 31.

◻ Etẹ dọ wẹ Jakobu te to whenuena e dọmọ: “Mì gbọ̀ homẹfa ni wazọ́n etọn tla”? (Jakobu 1:4)

Homẹfa tindo azọngban de nado yiwà, yèdọ ‘azọ́n de.’ Azọ́ndenamẹ etọn wẹ nado hẹn mí sọgbe mlẹnmlẹn to linlẹn lẹpo mẹ. Enẹwutu, gbọn didike na whlepọn lẹ ni basi wadotana nuyiwa yetọn tọn matin yizan aliho ma sọgbe hẹ Owe-wiwe nado doalọtena yé to niyaniya mẹ dali, yise mítọn nọ yin whiwhlepọn bo nọ yin kiklọwe.—15/5, weda 16.

◻ Naegbọn Jiwheyẹwhe ko nọte dẹn sọmọ nado didẹ nuhahun gbẹtọvi tọn lẹ?

Pọndohlan ojlẹ Jehovah tọn gbọnvona míwlẹ tọn. Na Jiwheyẹwhe madopodo lọ, ojlẹ lọ sọn didá Adam tọn whenu kakajẹ din ma tlẹ ko pé osẹ dopo. (2 Pita 3:8) Ṣigba pọndohlan ojlẹ tọn depope he mí tindo, azán dopodopo he to jujuyi hẹn mí sẹpọ azán whẹsuna Jehovah tọn.—1/6, weda 5, 6.

◻ Etẹwẹ nọ whàn Kunnudetọ Jehovah tọn lẹ?

Nuplọnmẹ Jehovah tọn ko wleawuna gbẹtọ vonọtaun delẹ, heyin pinplọn nado yiwanna ode awetọ gọna kọmẹnu yetọn lẹ taidi yedelẹ. (Isaia 54:13) Owanyi wẹ yin nuhe nọ whàn Kunnudetọ Jehovah tọn lẹ nado to nukọnzindo to yẹwhehodidọ mẹ mahopọnna ojlo matindo gbẹtọ lẹ tọn po nukundiọsọmẹ po. (Matiu 22:36-40; 1 Kọlintinu lẹ 13:1-8)—15/6, weda 20.

◻ Etẹwẹ hogbe Jesu tọn lẹ dọmọ: “Mì sinyẹnlin nado gbọn họntonu bibo mẹ biọ họmẹ” zẹẹmẹdo? (Luku 13:24)

Hogbe Jesu tọn lẹ zẹẹmẹdo kanvinván, yèdọ yíyí mídelẹ zan. Hogbe etọn lẹ sọ dohia dọ mẹdelẹ sọgan dín nado ‘biọ họmẹ’ to ojlẹ he bọawu na yé kẹdẹ mẹ, yèdọ to nuwiwa awubibọ he yé jlo tọn mẹ. Enẹwutu dopodopo mítọn sọgan kanse dọ, ‘Be yẹn to dee yizan to vivẹnudido po linsinsinyẹn po mẹ ya?’—15/6, weda 31.

◻ Nawẹ mẹhe yin finfọnsọnku lẹ na yin ‘whẹdana sọn nuhe yin kinkan do owe lọ mẹ, kẹdẹdi azọ́n yetọn he ko wayi lẹ’ gbọn? (Osọhia 20:12)

Owe ehelẹ mayin kandai nuyiwa he ko wayi yetọn tọn lẹ gba; to whenuena yé kú yé nọ yin tuntundote sọn ylando he yé ko wà to gbẹwhenu yetọn lẹ mẹ. (Lomunu lẹ 6:7, 23) Ṣigba, gbẹtọvi heyin finfọnsọnku lẹ na gbẹsọ tin to ylando Adam tọn glọ. To whelọnu lo, e dona yin dọ owe ehelẹ na ze anademẹ sọn olọn mẹ wá lẹ dai he mẹlẹpo dona hodo nado sọgan mọale gigọ́ yí sọn avọ́sinsan Jesu Klisti tọn mẹ.—1/7, weda 22.

◻ Nupinplọn tẹlẹ wẹ oló Jesu tọn gando Samalianu kọmẹnu dagbe lọ go tindo na mí? (Luku 10:30-37)

Oló Jesu tọn dohia dọ mẹhe yin dodonọ nugbonugbo de yin mẹde he e mayin dọ e nọ setonuna osẹ́n Jiwheyẹwhe tọn lẹ kẹdẹ wẹ gba ṣigba nọ hodo jẹhẹnu etọn lẹ ga. (Efesunu lẹ 5:1) E sọ dohia ga dọ kọmẹnu-yinyin dona zẹ̀ aliglọnnamẹnu dogbo akọta tọn, aṣa tọn, po sinsẹ̀n tọn lẹpo po go. (Galatianu lẹ 6:10)—1/7, weda 31.

◻ Adà atọ̀n tẹlẹ mẹ wẹ hiẹ sọgan yọ́n ovi towe lẹ bosọ wleawuna anademẹ mẹjitọ tọn te?

(1) Gọalọna ovi towe lẹ nado de agbasazọ́n wunmẹ he sọgbe lọ; (2) wleawuna yé nado pehẹ kọgbidinamẹnu numọtolanmẹ tọn to wehọmẹ podọ to azọ́nwatẹn; (3) dohia yé lehe yè sọgan na pekọ nuhudo gbigbọmẹ tọn yetọn lẹ do.—15/7, weda 4.

◻ Na lẹndai tẹ wutu wẹ Jiwheyẹwhe gbọjẹ to “azán ṣinawetọ gbè”? (Gẹnẹsisi 2:1-3)

Jiwheyẹwhe ma gbọjẹ na nuṣikọ wutu gba. Kakatimọ, e doalọte sọn azọ́n aigba ji tọn mẹ nado dike na alọnuzọn etọn lẹ ni wleawu bosọ wá gigo gigọ́ mẹ, na pipà po gbégbò etọn po.—15/7, weda 18.

◻ Aliho atọ̀n tẹlẹ mẹ wẹ mí sọgan yí whẹdida dodo zan te?

Tintan, mí dona sọgbe hẹ nujinọtedo walọyizan Jiwheyẹwhe tọn lẹ. (Isaia 1:17) Awetọ, mí nọ yí whẹdida dodo zan to whenuena mí yinuwa hẹ mẹdevo lẹ to aliho he mẹ mí jlo dọ Jehovah ni yinuwa hẹ mí te. (Psalm 130:3, 4) Atọ̀ntọ, mí nọ do whẹdida dodo hia to whenuena mí yí sọwhiwhe do tindo mahẹ to nuwiwa yẹwhehodidọ tọn mẹ. (Howhinwhẹn lẹ 3:27)—1/8, weda 14, 15.