Azọngban Nọ Zọ̀n hẹ Sinsẹ̀n Nugbo lọ Yinyọnẹn
“[ayajẹnọ, nw] wẹ yé he sè ohó jiwheyẹwhe tọn, bo sọ yí ì whlá.”—LUKU 11:28.
1. To afọdopolọji he yé ko yọn sinsẹ̀n nugbo lọ, omẹ nankọtọn lẹ wẹ nọ hẹn gbẹzan yetọn sọgbe hẹ ẹ?
E MA ko pe nado yọn sinsẹ̀n nugbo lọ poun gba. Eyin mí yiwanna nuhe jlọ po nugbo po, to afọdopolọji he mí mọn ẹn, mí na zán gbẹzan mítọn sọgbe hẹ ẹ. Sinsẹ̀n nugbo lọ ma yin tamẹnuplọnmẹ apọ̀nmẹ tọn poun gba; aliho ogbẹ̀ tọn de wẹ e yin.—Psalm 119:105; Isaia 2:3; yijlẹdo Owalọ lẹ 9:2 go.
2, 3. (a) Nawẹ Jesu zinnudo nujọnu-yinyin ojlo Jiwheyẹwhe tọn wiwa ji gbọn? (b) Azọngban tẹwẹ tin to okọ̀ na mẹhe yọn sinsẹ̀n nugbo lọ lẹpo?
2 Jesu Klisti zinnudo nujọnu-yinyin wiwà nuhe Jiwheyẹwhe ko dohia nado yin ojlo Etọn. To tadona nuhe wá yin yinyọnẹn todin taidi Yẹwhehodidọ Osó ji tọn whenu, Jesu hẹn ẹn zun yinyọnẹn dọ e mayin mẹhe nọ ylọ emi dọ Oklunọ (bo nọ gbọnmọ dali do nọ sọalọakọn nado yin Klistiani lẹ) lẹpo wẹ na biọ Ahọluduta lọ mẹ gba; mẹhe to ojlo Otọ́ emitọn tọn wà lẹ kẹdẹ wẹ na biọ e mẹ. E dọ dọ, emi na gbẹ́ mẹdevo lẹ dai taidi “azọ́n ylankan wàtọ” lẹ. Naegbọn yé do yin azọ́n ylankan wàtọ? Na dile Biblu dohia do, awugbopo nado wà ojlo Jiwheyẹwhe tọn yin ylando, podọ ylando lẹpo yin azọ́n ylankan. (Matiu 7:21-23; 1 Johanu 3:4; yijlẹdo Lomunu lẹ 10:2, 3 go.) Mẹde sọgan yọn sinsẹ̀n nugbo lọ, e sọgan nọ na pipa mẹhe nọ plọn ẹn mẹ lẹ, podọ e sọgan dọho dagbe dogbọn mẹhe nọ basi i lẹ dali, ṣigba ewọ lọsu tindo azọngban lọ nado yí ì zan to gbẹzan edetiti tọn mẹ. (Jakobu 4:17) Eyin é kẹalọyi azọngban enẹ, e na mọdọ gbẹzan etọn na yin didona, podọ e na tindo numimọ ayajẹ he ma sọgan wá sọn aliho devo mẹ tọn.
3 To hosọ he jẹnukọn mẹ, mí gbadopọnna ṣidopo to ohia he yè sọgan do yọn sinsẹ̀n nugbo lọ mẹ. E ma yindọ dopodopo yetọn gọalọna mí nado yọn sinsẹ̀n nugbo lọ kẹdẹ wẹ gba ṣigba sọ zé avùnnukundiọsọmẹnu po dotẹnmẹ hundote lẹ po do nukọn na mílọsu titi lẹ. To aliho tẹ mẹ?
Nawẹ Hiẹ Nọ Yigbe Hlan Ohó Jiwheyẹwhe Tọn Do?
4. (a) Dile mẹyọyọ lẹ jẹ awukọndopọ hẹ Kunnudetọ Jehovah Tọn lẹ ji, etẹwẹ yé nọ doayi e go to madẹnmẹ gando aliho he Kunnudetọ lẹ nọ yí Biblu zan gbọn? (b) Nawẹ yinyin núdùdù ná ganji to gbigbọmẹ nọ yinuwa do devizọnwatọ Jehovah tọn lẹ ji gbọn?
4 Dile Kunnudetọ Jehovah Tọn lẹ nọ plọn Biblu hẹ jlodotọ yọyọ lẹ, suhugan mẹyọyọ ehelẹ tọn nọ yawu tindo wuntuntun dọ nuhe nọ yin pinplọn lọ wá sọn Biblu mẹ. To gblọndo nina mẹ hlan kanbiọ yetọn lẹ, yè ma nọ dlẹnalọdo osẹ́n gbemima ṣọṣi tọn lẹ, kavi aṣa gbẹtọvi tọn lẹ, kavi hlan linlẹn gbẹtọ nukundeji lẹ tọn na yé gba. Ohó Jiwheyẹwhe lọsu titi tọn wẹ yin aṣẹ lọ. To whenuena yé yì Plitẹnhọ Ahọluduta lọ Tọn mẹ, yé nọ doayi e go dọ to finẹ lọsu ga Biblu wẹ yin nuplọnwe titengbe lọ. E ma nọ yí nugbo-dintọ ahundoponọ lẹ whenu susu nado mọnukunnujẹemẹ dọ nujinọtedo titengbe to ayajẹ he yé nọ mọ to Kunnudetọ Jehovah Tọn lẹ ṣẹnṣẹn wẹ yin nugbo lọ dọ yé nọ yin núdùdù na ganji to gbigbọmẹ sọn Ohó Jiwheyẹwhe tọn mẹ.—Isaia 65:13, 14.
5. (a) Avùnnukundiọsọmẹnu tẹwẹ yin zizedonukọnna mẹhe nọ doayi Kunnudetọ Jehovah Tọn lẹ go? (b) Nawẹ yé sọgan tindo mahẹ to ayajẹ Kunnudetọ lẹ tọn mẹ gbọn?
5 Eyin hiẹ yọn ehe, nawẹ hiẹ nọ yinuwa hlan ẹn gbọn? Eyin hiẹ mọnukunnujẹemẹ, hiẹ ma sọgan tindo whẹwhinwhẹ́n nado yin nupọntọ poun gba, kavi na jlo nado to mọ yin gba. Biblu dohia dọ mẹhe yin “sisètọ kẹdẹ” ṣigba he ma yin “basitọ ohó lọ tọn” lẹ to ‘yedelẹ klọ po lẹnpọn lalo tọn lẹ po.’ (Jakobu 1:22) Yé nọ klọ yedelẹ na yé gboawupo nado yọnẹn dọ mahopọnna nuhe yé sọgan dọ, awugbopo yetọn nado setonuna Jiwheyẹwhe dohia dọ yé ma yiwanna ẹn nugbo nugbo gba. Mẹde he sọalọakọn nado tindo yise he ma yin godonọna gbọn azọ́n dali tindo yise oṣiọ tọn. (Jakobu 2:18-26; 1 Johanu 5:3) To vogbingbọn mẹ, mẹhe yin whinwhàn gbọn owanyina Jehovah dali nado yin “azọ́n lọ basitọ” na yin “[ayajẹnọ, NW] to bibasi etọn mẹ.” Mọwẹ, dile Jesu Klisti basi zẹẹmẹ etọn do, “[ayajẹnọ, NW] wẹ yé he sè ohó Jiwheyẹwhe tọn, bo sọ yí i whlá.”—Jakobu 1:25; Luku 11:28; Johanu 13:17.
6. Eyin mí yọn pinpẹn Ohó Jiwheyẹwhe tọn nugbo nugbo, dotẹnmẹ hundote tẹlẹ wẹ mílọsu na dovivẹnu nado kẹalọyi?
6 Ayajẹ enẹ na siso dile hiẹ na to whinwhẹn to oyọnẹn ojlo Jiwheyẹwhe tọn mẹ bo yí nuhe hiẹ na plọn to nukọnmẹ lẹ do yizan mẹ. Nawẹ vivẹnu he hiẹ na do nado plọn Ohó Jiwheyẹwhe tọn na sù sọ? Fọtọ́n ao ao mẹhe ma yọnwe lẹ tọn ko wazọ́n sinsinyẹn nado yọnwehia, yé to ehe wà titengbe nado sọgan hia Owe wiwe lẹ bo plọn yé mẹdevo lẹ. Mẹdevo lẹ nọ fọ́n do mẹwhenu to afọnnu lẹpo na yé nido sọgan yí whenu delẹ zan to azán dopodopo gbè to Biblu po alọgọnamẹnu Biblu pinplọn tọn devo lẹ po hihia mẹ, taidi Atọ̀họ̀-Nuhihọ́ Lọ Tọn. Dile hiẹ hia Biblu pludopludo na dewe kavi hia wefọ he yin dide to owe nupinplọn tọn devo lẹ mẹ, yí sọwhiwhe do doayi osẹ́n po gbedide Jehovah tọn lẹ po go, bo dín aliho nado yí wuntuntun do doayi susu nunọwhinnusẹ́n he tin to finẹ lẹ go na anademẹ mítọn. Lẹnnupọn sisosiso do nuhe ada dopodopo dohia dogbọn Jiwheyẹwhe dali, lẹndai etọn, po nuyiwa etọn lẹ hẹ gbẹtọvi lẹ po ji. Na dotẹnmẹ ehe nado yinuwa do ahún towe ji. Lẹnnupọn vlavo eyin aliho delẹ tin ehe hiẹ sọgan yí ayinamẹ Biblu tọn zan to gigọmẹ to gbẹzan towe mẹ.—Psalm 1:1, 2; 19:7-11; 1 Tẹsalonikanu lẹ 4:1.
Be Mẹdezejo Towe Hlan Jehovah Yin Mlẹnmlẹn Ya?
7. (a) Nawẹ sinsẹ̀n-nuplọnmẹ Atọ̀n-to-dopomẹ yinuwado vivẹnudido gbẹtọ lẹ tọn ji nado basi sinsẹ̀n hlan Jiwheyẹwhe gbọn? (b) Etẹwẹ sọgan jọ to whenuena mẹde plọn nugbo dogbọn Jehovah dali?
7 Hlan livi susu gbẹtọ lẹ tọn, kọgbọ de wẹ e yin nado plọn dọ Jiwheyẹwhe nugbo lọ mayin Atọ̀n-to-dopomẹ de gba. Zẹẹmẹ lọ “nudinmamọdona de wẹ” ma ko hẹn pekọwa na yé pọn gbede gba. Nawẹ yé sọgan dọnsẹpọ Jiwheyẹwhe he yè ma sọgan mọnukunnujẹemẹ de gbọn? Taidi kọdetọn nuplọnmẹ enẹ tọn, yé gbọ bo gbẹkọ Otọ́ lọ (yinkọ mẹhe tọn yé ma ko sè pọn to ṣọṣi mẹ) go podọ nado sẹ̀n Jesu taidi Jiwheyẹwhe kavi nado lẹ́ sinsẹ̀n-bibasi yetọn hlan Malia (mẹhe yé ko yin pinplọn dọ e yin “Onọ̀ Jiwheyẹwhe tọn”). Ṣigba homẹ yetọn hùn to whenuena dopo to Kunnudetọ Jehovah Tọn lẹ mẹ hùn Biblu bo do yinkọ Jiwheyẹwhe tọn titi, yèdọ Jehovah hia yé. (Psalm 83:18) Homẹ yọnnu Venezuela de tọn hùn tlala na yè do oyín sọn olọn mẹ wá lọ hia ẹ sọmọ bọ e gbò viyọnnu Kunnudetọ he to nugbo họakuẹ enẹ tọn má hẹ ẹ fán bo yigbe nado tindo plọnmẹ Biblu whégbè tọn de. To whenuena omẹ mọnkọtọn lẹ plọn dọ Jesu dọho gando Otọ́ etọn go taidi “Jiwheyẹwhe ṣie po Jiwheyẹwhe mìtọn po” podọ dọ Jesu dlẹnalọdo Otọ́ etọn taidi ‘Jiwheyẹwhe nugbo dopo akan lọ,’ yé yọnẹn dọ nuhe Biblu nọ plọnmẹ dogbọn Jiwheyẹwhe dali lẹ mayin nuhe yè ma sọgan mọnukunnujẹemẹ gba. (Johanu 17:3; 20:17) Dile yé wá yọn jẹhẹnu Jiwheyẹwhe tọn lẹ, yé nọ tindo numọtolanmẹ dindọnsẹpọ ẹ tọn, nọ jẹ dẹ̀ho hlan ẹn ji, bo nọ jlo nado hẹn homẹ etọn hùn. Etẹwẹ yin kọdetọn etọn?
8. (a) Na owanyi yetọn na Jehovah po ojlo yetọn nado hẹn homẹ etọn hùn po wutu, etẹwẹ livi susu gbẹtọ lẹ tọn ko wà? (b) Naegbọn baptẹm Klistiani tọn do yin onu titengbe taun?
8 To owhe ao he wayì lẹ mẹ, gbẹtọ 2 528 524 lẹ to ageklo ṣidopo ji po lopo madosọha lẹ po ji ko klan gbẹzan yetọn do wiwe hlan Jehovah bo gbọnmọ dali do do yẹhiadonu klandowiwe ehe tọn hia gbọn baptẹm osìn mẹ tọn dali. Be hiẹ yin dopo to yé mẹ, kavi be hiẹ to awuwle todin nado yin bibaptizi wẹ ya? Baptẹm yin nujijọ titengbe de to gbẹzan Klistiani nugbo lẹpo tọn mẹ. Jesu deazọnna hodotọ etọn lẹ nado basi devi gbẹtọ akọta lẹpo tọn podọ nado baptizi yé. (Matiu 28:19, 20) E sọ jẹ na ayidonugo ga dọ to baptẹm Jesu lọsu tọn godo tlolo wẹ Jehovah lọsu dọho sọn olọn mẹ wá, bo dọmọ: “Hiẹ wẹ Ovi yiwanna ṣie; hiẹ mẹ yẹn yin homẹhunnọ tlala.”—Luku 3:21, 22.
9. Nado hẹn haṣinṣan kẹalọyi de go hẹ Jehovah, etẹwẹ yin bibiọ to mí si?
9 Haṣinṣan alọkẹyi tọn de hẹ Jehovah yin nude he yè dona yọn pinpẹn etọn. Eyin hiẹ ko biọ haṣinṣan mọnkọtọn de mẹ gbọn klandowiwe po baptẹm po dali, dapana nudepope he sọgan hẹn ẹn gble. Ma na dotẹnmẹ tuklajẹ gbẹ̀mẹ tọn lẹ po tintin to lẹnpọn mẹ dogbọn agbasanu lẹ dali po nado sisẹ ẹ do otẹn awetọ mẹ blo. (1 Timoti 6:8-12) Nọgbẹ po nugbonọ-yinyin po sọgbe hẹ ayinamẹ Hówhínwhẹ́n lẹ 3:6 mẹ tọn he dọmọ: “Yọn [Jehovah] to aliho towe lẹpo ji, ewọ na sọ jlọ omọ́ towe.”
Nawẹ Owanyi Klisti tọn Nọ Yinuwa Do Jiwe Sisosiso Do Sọ?
10. Naegbọn sinsẹ̀n-bibasi mítọn hlan Jehovah ma sọgan hẹn mí nado gbẹkọ Jesu go?
10 Na nugbo tọn, pinpẹn nutọn he sọgbe na Jehovah taidi Jiwheyẹwhe nugbo dopo akan lọ, ma nọ hẹn mẹde nado gbẹkọ Jesu Klisti go gba. To vogbingbọn mẹ, Osọhia 19:10 dọmọ: “Kunnudena Jesu wẹ nuhe nọ gbọdo dọdai.” (NW) Sọn Gẹnẹsisi kaka jẹ Osọhia, dọdai he yin gbigbọdo lẹ wleawu azọngban Jesu tọn gando lẹndai Jehovah tọn go to gigọmẹ. Dile mẹde to akọjẹhẹ zẹẹmẹ gigọ́ enẹlẹ, yẹdide mẹdọndogo tọn de he tin to mẹdekannujẹ sọn zẹẹmẹ lẹ hinhẹn gẹdẹ po linlẹn agọ̀ he nọ dekọtọn sọn nuplọnmẹ lalo Mẹylọhodotọklisti lẹ tọn po mẹ.
11. Nawẹ pinplọn nuhe Biblu plọnmẹ taun dogbọn Ovi Jiwheyẹwhe tọn dali yinuwa do yọnnu de ji to Pologne gbọn?
11 Nugbo dogbọn Ovi Jiwheyẹwhe tọn dali yinyọnẹn sọgan tindo nuyiwadomẹji he siso de do mẹde ji. Enẹ wẹ yin whẹho Danuta tọn, yèdọ yọnnu de to Pologne. E ko tindo haṣinṣan hẹ Kunnudetọ Jehovah tọn lẹ na owhe ṣinatọ̀n, bo duvivi nuhe yé nọ plọnmẹ tọn, ṣigba ma to sinsẹ̀n nugbo lọ hẹn zùn apadewhe gbẹzan etọn tọn gba. Enẹgodo e mọ vọkan dopo owe lọ Le plus grand homme de tous les temps tọn yí, ehe zé gbẹzan Jesu tọn donukọnnamẹ to aliho he bọawu nado mọnukunnujẹemẹ tọn de mẹ.a To whèjai, e hùn owe lọ, bo jlo nado hia weta dopo poun. Ṣigba, to wunkẹngbe, to whenuena e hia owe lọ fó godo wẹ e do zee dai. E bẹ́avi. E vẹvẹ dọ: “Jehovah jona mi.” Taidi kọdetọn nuhe e ko hia tọn, e mọnukunnujẹ owanyi he ko yin didohia gbọn Jehovah po Visunnu etọn po dali hezeheze hugan gbede pọn. E mọnukunnujẹemẹ dọ na owhe ṣinatọ̀n e ko gbọn pinpẹn nutọn madohia dali do to agọ̀bájo sọn alọgọ he Jiwheyẹwhe gbọn homẹfa dali do to alọ etọn dlẹn hlan ẹn. To 1993 e yin bibaptizi to yẹhiadonu klandowiwe etọn hlan Jehovah mẹ to dodonu yise to Jesu Klisti mẹ tọn ji.
12. Nawẹ oyọnẹn he pegan dogbọn Jesu Klisti dali nọ yinuwa do gbẹzan mítọn ji gbọn?
12 “Oyọnẹn [pegan] Jesu Klisti Oklunọ mítọn tọn” tin to kọndopọmẹ hẹ Klistiani zohunhunnọ po sinsẹ́nnọ de po. (2 Pita 1:8) Jẹ oba tẹ mẹ wẹ hiẹ na tindo mahẹ to nuwiwa mọnkọtọn mẹ, yèdọ mahẹ Ahọluduta lọ tọn tintindo hẹ mẹdevo lẹ? Sọha he mẹdopodopo penugo nado basi nọ sinaido ninọmẹ susu lẹ ji. (Matiu 13:18-23) Ninọmẹ delẹ tin he mí ma sọgan diọ; devo lẹ mí sọgan diọ. Etẹwẹ na whàn mí nado yọnẹn podọ nado basi diọdo he mí sọgan basi lẹ? Apọsteli Paulu wlan dọmọ: “Owanyi Klisti tọn to huhlọn na mí”; to hogbe devo mẹ, owanyi he e dohia gbọn ogbẹ̀ etọn zizejo na mí klo sọmọ bọ dile pinpẹn nutọn yinyọnẹn mítọn na ẹn na to whinwhẹn deji, ahún mítọn lẹ na yin whinwhan sisosiso. Taidi kọdetọn de, mí yọnẹn dọ e ma na sọgbe depope na mí nado zindonukọn to afọdona yanwle ṣejannabi tọn lẹ bo to gbẹnọ to aliho he klo hugan mẹ nado hẹn pekọwana míde. Kakatimọ, mí na vọ nuwiwa mítọn lẹ jlado nado zé azọ́n he Klisti plọn devi etọn lẹ nado wà do otẹn tintan mẹ.—2 Kọlintinu lẹ 5:14, 15.
Tin to Kada na Aihọn—Jẹ Oba Tẹ Mẹ?
13. Naegbọn mí ma nado tindo mahẹ depope to sinsẹ̀n de he ko hẹn ede zun apadewhe aihọn tọn mẹ?
13 E ma vẹawu nado mọ kandai he yin bibasi gbọn Mẹylọhodotọklisti po sinsẹ̀n devo lẹ po dali gba na yé jlo nado yin apadewhe aihọn tọn wutu. Akuẹ-bẹpli ṣọṣi tọn lẹ ko yin yiyizan nado nọgodona nuwiwa gufinfọn tọn to akuẹ-zinzan liho. Yẹwhenọ lẹ ko lẹzun awhanfuntọ nuglọ tọn lẹ. Egbesọ egbesọ, linlinwe lẹ nọ de linlin tọ́n dogbọn wunmẹ sinsẹ̀n voovo tọn lẹ dali to ada voovo aihọn lọ tọn mẹ he to avùn hò hẹ ode awetọ yetọn. Alọ yetọn lẹ gọ́ na ohùn. (Isaia 1:15) Podọ lẹdo aihọn pe sinsẹ̀ngan lẹ to nukọnzindo nado yí ayiha do to anadena whẹho tonudidọ tọn. Sinsẹ̀n-basitọ nugbonọ lẹ ma nọ tindo mahẹ depope to ehe mẹ gba.—Jakobu 4:1-4.
14. (a) Etẹwẹ mí lọsu titi dona dapana eyin mí na hẹn kadaninọ na aihọn go? (b) Etẹwẹ sọgan gọalọna mí nado dapana yinyin wiwle do omọ̀ mẹ gbọn walọyizan po nuyiwa aihọn tọn lẹ po dali?
14 Ṣigba kadaninọ na aihọn bẹ́ nuhe hugan mọ hẹn. Walọyizan aihọn ehe tọn wẹ owanyina akuẹ po nuhe akuẹ sọgan họ̀ po, ojlo na nukundeji-yinyin, po yanwle madoalọte na gbẹdudu po, to pọmẹ po onu mọnkọtọn lẹ po taidi mẹtọnhopọn nujọnu tọn matindo na mẹdevo lẹ, lalodido po hogbe agbàagbà lẹ zinzan po, atẹṣiṣi sọta gbedide lẹ, po awugbopo nado yí linsinsinyẹn zan po. (2 Timoti 3:2-5; 1 Johanu 2:15, 16) Na mape mítọn titi tọn wutu, mí sọgan do delẹ to walọyizan mọnkọtọn lẹ mẹ hia to whedelẹnu. Etẹwẹ sọgan gọalọna mí to vivẹnudido mítọn mẹ nado dapana omọ̀ mọnkọtọn lẹ? Mí dona flin mídelẹ mẹhe tin to godona onu mọnkọtọn lẹpo. “Aihọn lẹpo sọ mlọnai to omẹ ylankan lọ mẹ.” (1 Johanu 5:19) Mahopọnna lehe yanwle de sọgan sọawuhia nado dọnmẹdogo do sọ, mahopọnna sọha mẹhe to gbẹ̀nọ to aliho mọnkọtọn mẹ, to whenuena mí mọ kẹntọgan Jehovah tọn, yèdọ Satani Lẹgba, to godo na ẹn, mí nọ yọn lehe e ylan do sọ.—Psalm 97:10.
Nawẹ Owanyi Towe Yinukọn Do Sọ?
15. Nawẹ owanyi matin ṣejannabi tọn he go hiẹ doayi gọalọna we nado yọn sinsẹ̀n nugbo lọ gbọn?
15 To whenuena hiẹ jẹ awukọndopọ hẹ Kunnudetọ Jehovah Tọn lẹ ji tlolo, owanyi he yin didohia to yé ṣẹnṣẹn matin ayihaawe dọn we dogo na vogbingbọn etọn na gbigbọ aihọn tọn wutu. Nuzindo owanyi matin ṣejannabi tọn ji hẹn sinsẹ̀n-bibasi wiwe ṣeke Jehovah tọn gbọnvona wunmẹ sinsẹ̀n-bibasi devo lẹpo tọn. E sọgan yin ehe wẹ duto jiwe dọ Kunnudetọ Jehovah Tọn lẹ na nugbo tọn to sinsẹ̀n nugbo lọ basi. Jesu Klisti lọsu dọmọ: “Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.”—Johanu 13:35.
16. Dotẹnmẹ hundote tẹlẹ wẹ sọgan tin to finẹ na dopodopo mítọn lẹ nado hẹn owanyi mítọn gblo- deji?
16 Be jẹhẹnu enẹ sọ do we hia taidi dopo to devi Klisti tọn lẹ mẹ ya? Be aliho delẹ tin he mẹ hiẹ sọgan hẹn owanyi didohia towe gblodeji ya? Matin ayihaawe mímẹpo sọgan wà mọ. Onu susu wẹ e bẹhẹn hugan họntọn jijihẹ mẹdevo lẹ to Plitẹnhọ Ahọluduta lọ Tọn mẹ. Podọ eyin mí na hẹn owanyi gblodeji hlan mẹhe yiwanna mí lẹ kẹdẹ, be mí na yí onu de do gbọnvona aihọn ya? “Hú onu lẹpo, mì ni tindo owanyi he hunzo to mìde ṣẹnṣẹn,” wẹ tudohomẹnamẹ Biblu tọn. (1 Pita 4:8) Hlan mẹnu lẹ wẹ mí sọgan do owanyi he klo hugan hia? Be mẹmẹsunnu kavi mẹmẹyọnnu Klistiani de he ninọmẹ dodonu etọn tọn gbọnvona mítọn podọ mẹhe aliho nuwiwa etọn tọn lẹ nọ gblehomẹna mí wẹ ya? Be mẹde he, na kọdetọn azọ̀njijẹ kavi yọnhopipo tọn wutu, ma ko penugo nado nọ yì opli lẹ to gbesisọmẹ wẹ ya? Be alọwlemẹ mítọn wẹ ya? Kavi, vlavo, be mẹjitọ yọnhonọ mítọn lẹ wẹ ya? Mẹhe to onu dagbe basi to dido sinsẹ́n gbigbọ tọn lẹ hia lẹ, gọna owanyi, tindo numọtolanmẹ taidi dọ yé to onu ehelẹ vọ́ plọn whladopo dogọ titengbe to whenuena yé pehẹ ninọmẹ sinsinyẹn he sọgan fọndote lẹ to ayidonugo lẹpo nina hagbẹ́ whẹndo tọn de he ko lẹzun oblọnọ pete. Na nugbo tọn, to whenuena yè tlẹ pannukọn ninọmẹ ehelẹ, owanyi mítọn sọ dona dlẹnkan zẹ whédo mítọn titi go.
Kunnudide Ahọluduta lọ Tọn—Nawẹ E Yin Nujọnu Nawe Do Sọ?
17. Eyin mí ko mọaleyi na mídetiti gbọn dlapọn Kunnudetọ Jehovah Tọn lẹ tọn dali, etẹwẹ mí dona yin whinwhan todin nado wà?
17 Aliho titengbe he mẹ mí nọ do owanyi hia hlan gbẹtọ hatọ mítọn lẹ te wẹ gbọn kunnudide na yé dogbọn Ahọluduta Jiwheyẹwhe tọn dali. Pipli gbẹtọ lẹ tọn dopo kẹdẹ wẹ to azọ́n he Jesu dọ dọdai etọn ehe wà. (Malku 13:10) Omẹ ehelẹ wẹ Kunnudetọ Jehovah Tọn lẹ. Mílọsu ko mọaleyi gbọn dali etọn. Todin lẹblanulọkẹyi mítọn wẹ e yin nado gọalọna mẹdevo lẹ. Eyin mí tindo pọndohlan dopolọ he Jiwheyẹwhe tindo to whẹho ehe mẹ, azọ́n ehe na tin to otẹn tintan mẹ to gbẹzan mítọn lẹ mẹ.
18. Nawẹ hihia owe lọ Les Témoins de Jéhovah: Prédicateurs du Royaume de Dieu mítọn na yinuwa do mahẹ tintindo mítọn to kunnudide Ahọluduta lọ tọn mẹ gbọn?
18 Kandai ojlofọndotenamẹ tọn heyin lehe owẹn Ahọluduta lọ tọn ko yin hinhẹn sọyi ada aigba ji tọn lẹpo to azán godo tọn ehelẹ mẹ yin didọ to owe lọ Les Témoins de Jéhovah: Prédicateurs du Royaume de Dieu mẹ. Eyin e tin to ogbè towe mẹ, ma gboawupo nado hia ẹ blo. Podọ dile hiẹ na to mọ wà, na ayidonugo vonọtaun hlan aliho voovo mẹ he mẹdopodopo ko tindo mahẹ to kunnudide nina dogbọn Ahọluduta lọ dali. Be mẹhe hiẹ sọgan hodo apajlẹ yetọn lẹ de tin ya? Dotẹnmẹ susu wẹ hundote na mímẹpo. Na owanyi mítọn na Jehovah ni whàn mí nado yí yé zan ganji.
19. Nawẹ mí nọ mọaleyi do to whenuena mí kẹalọyi azọngban he nọ zọ̀n hẹ yinyọn sinsẹ̀n nugbo lọ?
19 Eyin mí gbọnmọ dali do jó míde na ojlo Jehovah tọn wiwà, mí na mọ gblọndo hlan kanbiọ lọ, Etẹwẹ yin zẹẹmẹ ogbẹ̀ tọn? (Osọhia 4:11) Mí ma na gbẹsọ po to avìdla pé, bo na yin jijodo po numọtolanmẹ nuvọnọ-yinyin tọn po ba gba. Yanwle depope matin ehe mẹ hiẹ sọgan hẹn alọnu towe jan te he na hẹn pekọ daho wá hugan yíyí ayiha lẹpo do hẹn dewe sọgbe hẹ sinsẹ̀nzọn Jehovah Jiwheyẹwhe tọn gba. Podọ lehe sọgodo he e zedonukọnna mí klo do sọ! Gbẹzan pekọhẹnwanamẹ kakadoi tọn de to aihọn yọyọ etọn mẹ, fie mí na penugo nado yí nugopipe mítọn lẹ zan te to gigọmẹ to gbesisọmẹ hẹ lẹndai owanyinọ he wutu Jiwheyẹwhe do dá gbẹtọvi lẹ. (Pọ́n w-F 1/6/94, weda 13.)
[Nudọnamẹ odò tọn]
a Yin zinzinjẹgbonu gbọn Watchtower Bible and Tract Society of New York, Inc. dali.
Nawẹ Hiẹ Na Na Gblọndo Gbọn?
◻ Naegbọn e do yin onu titengbe na sinsẹ̀n de nado kẹalọyi Biblu taidi Ohó Jiwheyẹwhe tọn bo gbògbéna Jehovah taidi Jiwheyẹwhe nugbo lọ?
◻ Etẹwẹ sinsẹ̀n nugbo lọ nọ plọnmẹ gando azọngban Jesu tọn go taidi Mẹfligọtọ?
◻ Naegbọn Klistiani lẹ dona tin to kada na aihọn bo hẹn owanyi matin ṣejannabi tọn zùn aṣa?
◻ Azọngban tẹwẹ kunnudide Ahọluduta lọ tọn tindo to sinsẹ̀n nugbo lọ mẹ?
[Yẹdide to weda 16]
Baptẹm yin afọdide titengbe de to alọkẹyi azọngban sinsẹ̀n-bibasi nugbo lọ tọn lẹ mẹ. To osun dopodopo mẹ, omẹ nudi 25 000 lẹ lẹdo aihọn pe to afọdide enẹ zé
Russie
Sénégal
Papouasie- Nouvelle- Guinée
États-Unis
[Yẹdide to weda 17]
Mahẹ nugbo Biblu tọn tintindo hẹ mẹdevo lẹ yin apadewhe sinsẹ̀n nugbo lọ tọn
États-Unis
Brésil
États-Unis
Hong Kong