Mì Lẹzun Sisètọ Nuwọntọ lẹ Blo
“Mì ni yin basitọ ohó lọ tọn, mì yin sisètọ kẹdẹ blo, to mìde kiklọ mẹ.”—JAKOBU 1:22.
1. Azọ́njiawu tẹlẹ wẹ Islaelivi hohowhenu tọn lẹ tindo lẹblanulọkẹyi nado mọ po nukun po?
“YÈ MA sọgan wọnji e go” na yin hogbe he sọgbe de nado basi zẹẹmẹ azọ́njiawu he Jehovah wà to Egipti hohowhenu tọn mẹ lẹ tọn. Dopodopo Azọ̀nylankan Ao lọ lẹ tọn yin budonamẹnu he yè ma sọgan mọ́n lẹ. Whlẹngán mẹpaṣa tọn Islaelivi lẹ tọn gbọn osin Ohù Vẹẹ heyin mimá lọ mẹ bọdo nugbajẹmẹji enẹlẹ go. (Deutelonomi 34:10-12) Eyin hiẹ ko yí nukun do mọ nujijọ enẹlẹ wẹ, matin ayihaawe hiẹ ma na ko wọnji Omẹ lọ he wà yé go pọ́n gbede gba. Ṣogan, psalm-kàntọ lọ jihàn dọmọ: “Yé [Islaelivi lẹ] wọn Jiwheyẹwhe whlẹngantọ yetọn, he wà onú dahodaho lẹ to Egipti; azọ́njiawu lẹ to aigba Ham tọn ji, podọ onú dobu lẹ to Ohù Vẹẹ kọ̀n.”—Psalm 106:21, 22.
2. Etẹwẹ dohia dọ pinpẹn-nutọn-yinyọnẹn he Islaeli tindo na azọ́n huhlọnnọ Jiwheyẹwhe tọn lẹ yin ojlẹ gli tọn?
2 To Ohù Vẹẹ didasa godo, Islaelivi lẹ “sọ dibusi OKLUNỌ: yé sọ yise to OKLUNỌ mẹ.” (Eksọdusi 14:31) Islaelivi sunnu lẹ kọnawudopọ hẹ Mose to ohàn awhàngbigba tọn de jiji hlan Jehovah mẹ, podọ Miliam po yọnnu devo lẹ po yigbe gbọn akọ̀hún hihò po wedudu po dali. (Eksọdusi 15:1, 20) Mọwẹ, nuyiwa huhlọnnọ Jiwheyẹwhe tọn lẹ yinuwado omẹ Jehovah tọn lẹ ji. Ṣigba, pinpẹn-nutọn-yinyọnẹn yetọn na Omẹ lọ he wà onú enẹlẹ yin ojlẹ gli tọn. To madẹnmẹ to enẹgodo susu yetọn yinuwa taidi dọ yé ko jẹazọ̀n nuwinwọn tọn titengbe de wẹ nkọtọn. Yé lẹzun nuhlúndọtọ po lewutọ lẹ po sọta Jehovah. Delẹ to yé mẹ tindo mahẹ to boṣiọ-sinsẹ̀n po fẹnnuwiwa zanhẹmẹ tọn po mẹ.—Osọha lẹ 14:27; 25:1-9.
Etẹwẹ Sọgan Hẹn Mí Wọnjinugo?
3. Na jijọ mape tọn mítọn wutu, etẹwẹ mí sọgan wọnji?
3 Pinpẹn-nutọn-mayọnẹn Islaeli tọn paṣamẹ taun. Etomọṣo, onú dopolọ sọgan jọ do mí go. Nugbo wẹ dọ, mí ma ko tindo numimọ azọ́njiawu sọn olọn mẹ wá mọnkọtọn lẹ tọn pọ́n gba. Ṣigba, to haṣinṣan mítọn hẹ Jiwheyẹwhe mẹ, nujijọ delẹ ko tin he go mí ma sọgan wọnji na taun tọn. Delẹ to mí mẹ sọgan flin whenuena mí kẹalọyi nugbo Biblu tọn. Ojlẹ ayajẹ tọn devo lẹ sọgan bẹ dẹ̀hiho klandowiwe mítọn tọn hlan Jehovah po baptẹm osin mẹ tọn mítọn taidi Klistiani lẹ po hẹn. Susu mítọn ko tindo numimọ alọgọ Jehovah tọn to ojlẹ devo lẹ mẹ to gbẹzan mítọn mẹ. (Psalm 118:15) Hú popolẹpo, gbọn okú avọ́sinsan tọn heyin Visunnu Jiwheyẹwhe lọsu titi tọn, yèdọ Jesu Klisti tọn gblamẹ, mí ko mọ todido whlẹngán tọn yí. (Johanu 3:16) Etomọṣo, na jijọ mape tọn mítọn wutu, mí sọgan wọnji onú dagbe he Jehovah ko wà na mí lẹ go po awubibọ po eyin mí pannukọn ojlo agọ̀ lẹ po magbọjẹ gbẹ̀mẹ tọn lẹ po.
4, 5. (a) Nawẹ Jakobu na avase gando owù yinyin sisètọ nuwọntọ lẹ go gbọn? (b) Nawẹ mí sọgan yí nuyijlẹdonugo Jakobu tọn heyin gbẹtọ po mẹpọnnu tọn po zan gbọn?
4 To wekanhlanmẹ etọn hlan Klistiani hatọ lẹ mẹ, Jakobu nọvisunnu daa Jesu tọn na avase gando owù yinyin sisètọ nuwọntọ lẹ go. E wlan dọmọ: “Mì yin basitọ ohó lọ tọn, mì yin sisètọ kẹdẹ blo, to mìde kiklọ mẹ. Na eyin mẹde yin sisètọ ohó lọ tọn, bọ e mayin basitọ gba, e taidi dawe de he to nukunmẹ etọn yè ji po e po pọ́n to mẹpọnnu mẹ: na whenuena e pọ́n ede pó, bo tọ́n yì, to afọdopolọji e wọn omẹ he nkọ ewọ yin.” (Jakobu 1:22-24) Etẹwẹ hogbe Jakobu tọn enẹlẹ zẹẹmẹdo?
5 To whenuena mí fọ́n to afọnnu, mí nọ saba pọ́n mẹpọnnu mẹ nado pọ́n vọjlado he mí dona basi na awusọhia mítọn lẹ. Dile mí to mahẹ tindo to nuyiwa devo lẹ mẹ bọ ayiha yin zizedo onú devo lẹ ji, mí nọ doalọtena nulinlẹnpọn gando nuhe mí mọ to mẹpọnnu mẹ go. Ehe sọgan jọ to linlẹn gbigbọmẹ tọn de mẹ ga. Dile mí to dogbapọnna Ohó Jiwheyẹwhe tọn, mí sọgan yí nuhe mí yin jlẹdo nuhe Jehovah donukun dọ mí ni yin go. Gbọnmọ dali, mí nọ wá mọ madogán mítọn lẹ tlọlọ. Oyọnẹn ehe dona whàn mí nado basi vọjlado lẹ to gbẹtọ-yinyin mítọn mẹ. Ṣigba dile mí to nukọnzindo to nuyiwa egbesọegbesọ tọn mítọn lẹ mẹ bosọ to ahidi hẹ nuhahun mítọn lẹ, mí sọgan doalọtena nulinlẹnpọn do onú gbigbọmẹ tọn lẹ ji po awubibọ po. (Matiu 5:3; Luku 21:34) E nọ taidi dọ mí wọnji nuyiwa owanyinọ Jiwheyẹwhe tọn lẹ do ota mítọn mẹ go nkọtọn. Eyin ehe jọ, mí nọ yin hunhundonuvo hlan linlẹn ylanwiwa tọn lẹ.
6. Dogbapọnnanu Owe-wiwe tọn tẹwẹ sọgan gọalọna mí ma nado wọnji ohó Jehovah tọn?
6 To wekanhlanmẹ gbọdo etọn tintan hlan Kọlintinu lẹ mẹ, apọsteli Paulu dlẹnalọdo Islaelivi nuwọntọ lẹ to zungbo mẹ. Kẹdẹdile Klistiani owhe kanweko tintan tọn lẹ mọaleyi sọn hodidọ Paulu tọn lẹ mẹ do, dogbigbapọnna nuhe e wlan lẹ sọgan gọalọna mí ma nado wọnji ohó Jehovah tọn lẹ go. Enẹwutu mì gbọ mí ni gbadopọnna 1 Kọlintinu lẹ 10:1-12.
Mì Gbẹ́ Ojlo Aihọn Tọn lẹ Dai
7. Kunnudenu he ma yọ́n gbẹdai owanyi Jehovah tọn tẹwẹ Islaelivi lẹ mọyi?
7 Nuhe Paulu dọ gando Islaelivi lẹ go yinuwa taidi avase de na Klistiani lẹ. Paulu wlan to apadewhe dọmọ: “Mẹmẹsunnu emi, yẹn ma jlo mì ni yin madọnanọ gba, dọ otọ́ mítọn lẹpo ko tin to aslọ glọ, bọ yé omẹ pó gbọ̀n ohù mẹ wayi; bọ yè baptizi yé omẹ pó hlan Mose to aslọ lọ mẹ podọ to ohù mẹ.” (1 Kọlintinu lẹ 10:1-4) Islaelivi azán Mose gbè tọn lẹ ko mọ awusọhia daho huhlọn Jiwheyẹwhe tọn lẹ, gọna dòtin aslọ tọn jiawu he nọ deanana yé to okle bosọ gọalọna yé nado lùntọ́n gbọn Ohù Vẹẹ mẹ. (Eksọdusi 13:21; 14:21, 22) Mọwẹ, Islaelivi enẹlẹ mọ kunnudenu he yè ma sọgan gbẹdai owanyi Jehovah tọn hlan yewlẹ.
8. Etẹ mẹ wẹ jiwinwọn gbigbọnu lẹ go Islaelivi lẹ tọn dekọtọn do?
8 Paulu zindonukọn dọmọ: “Ṣigba susu yetọn go wẹ homẹ Jiwheyẹwhe tọn ma hùn do susu gba, na yè sisẹ́ yé dlan to zungbo mẹ.” (1 Kọlintinu lẹ 10:5) Lehe e blawu sọ! Suhugan Islaelivi he tọ́nsọn Egipti lẹ tọn hẹn yedelẹ zun mẹhe ma pegan nado biọ Aigba Pagbe tọn ji. Na Jiwheyẹwhe ma kẹalọyi yé na yise matindo yetọn wutu, yé kú to zungbo mẹ. (Heblu lẹ 3:16-19) Etẹwẹ mí sọgan plọn sọn ehe mẹ? Paulu dọmọ: “Ohia wẹ onú helẹ yin hlan míwlẹ, na míwlẹ nikaa jlojlo to onú ylankan lẹ mẹ glanglan, dile yewlẹ jlojlo do.”—1 Kọlintinu lẹ 10:6.
9. Nawẹ Jehovah ko basi awuwledainanu lẹ na omẹ etọn lẹ gbọn, podọ nawẹ Islaeli yinuwa gbọn?
9 Islaelivi lẹ tindo nususu gege he ji yé dona to nulẹnpọndo to gbigbọ-liho dile yé tin to zungbo mẹ. Yé biọ alẹnu de mẹ hẹ Jehovah bo lẹzun akọta heyin kinklandowiwe hlan ẹn de. Humọ, yé yin nina yẹwhenọduta de, gòhọtúntún de taidi nọtẹn sinsẹ̀n-bibasi tọn, podọ awuwledainanu de nado nọ basi avọ́sinsan lẹ hlan Jehovah. Ṣigba, kakati nado to ayajẹ do nunina gbigbọmẹ tọn ehelẹ ji, yé na dotẹnmẹ yedelẹ nado lẹzun pekọ ma tindonọ to nuhe Jiwheyẹwhe ko wleawu etọn na yé lẹ mẹ.—Osọhia lẹ 11:4-6.
10. Naegbọn mí dona nọ lẹnnupọndo Jiwheyẹwhe ji to whepoponu?
10 To ma taidi Islaelivi lẹ to zungbo mẹ, omẹ Jehovah tọn lẹ to vivi alọkẹyi Jiwheyẹwhe tọn dù to egbehe. Nalete, taidi mẹdopodopo, nujọnu wẹ e yin dọ mí ni nọ to nulẹnpọn gando Jiwheyẹwhe go. Mọwiwà na gọalọna mí nado gbẹ́ ojlo sinsinyẹn ṣejannabi tọn he sọgan ṣinyọ́n pọndohlan gbigbọmẹ tọn mítọn lẹ ji dai. Mí dona magbe ‘nado gbẹ́ ojlo jijọ-madi-Jiwheyẹwhe tọn po aihọn tọn lẹ po dai bosọ nọgbẹ̀ po ayiha he lodo de po podọ to dodowiwa mẹ gọna mẹdezejo jijọ-di-Jiwheyẹwhe tọn to titonu dinwhenu tọn ehe mẹ.’ (Titu 2:12) Mí mẹhe ko to awukọndopọ hẹ agun Klistiani tọn sọn vuwhenu gbọ́n lẹ ma dona lẹn gbede dọ onú dagbe lẹ to mí go gbọ̀ gba. Eyin linlẹn mọnkọtọn lẹ fọ́n to ayiha mítọn lẹ mẹ gbede, mí na wà dagbe nado flin Jehovah po dona jiawu he e tindo to sẹdotẹnmẹ na mí lẹ po.—Heblu lẹ 12:2, 3.
Tonusise Mlẹnmlẹn na Jehovah
11, 12. Nawẹ mẹde sọgan huwhẹ̀ boṣiọ-sinsẹ̀n tọn gbọn eyin ewọ ma tlẹ tindo mahẹ to taliaina boṣiọ mẹ?
11 Paulu na avase devo mí to whenuena e wlan dọmọ: “Mì sọ yin boṣiọ-sẹ̀ntọ dile adade yetọn yin blo; dile yè wlan ẹn dọ, Gbẹtọ [lọ lẹ] sinai nado dù bosọ nù, bosọ fọ́nṣite nado daihun.” (1 Kọlintinu lẹ 10:7) Paulu to alọdlẹndo ojlẹ lọ to whenuena Islaelivi lẹ diọlinlẹn na Aalọn nado basi oyìnvu sika tọn de na yé. (Eksọdusi 32:1-4) Dile e etlẹ yindọ e ma na yọnbasi dọ mí ni lẹhlan boṣiọ sinsẹ̀n kọ̀n tlọlọ, mí sọgan lẹzun boṣiọ-sẹ̀ntọ gbọn didike na ojlo ṣejannabi tọn lẹ ni fẹ́ ayiha mítọn sẹ̀ sọn sinsẹ̀n-bibasi hlan Jehovah po ahun lẹpo po kọ̀n.—Kọlọsinu lẹ 3:5.
12 To nujijọ devo whenu, Paulu dọho gando mẹdelẹ he onú agbasa tọn lẹ kẹdẹ wẹ nọ duahunmẹna kakati ni yin whẹho gbigbọmẹ tọn lẹ go. Gando mẹhe to ‘zọnlinzin taidi kẹntọ yatin Klisti tọn lẹ’ go, e wlan dọmọ: “Godo mẹ mẹhe tọn yin vivà, ohòtò mẹhe tọn yin yẹwhe yetọn.” (Filippinu lẹ 3:18, 19) Boṣiọ he yé to sinsẹ̀n mayin ojlẹmọ heyin pipà de gba. Ojlo yetọn na agbasanu lẹ wẹ. Nugbo wẹ dọ, e mayin ojlo lẹpo wẹ jẹagọ gba. Jehovah dá mí po nuhudo gbẹtọvi tọn lẹ po gọna nugopipe lọ nado duvivi awuvivinu voovo lẹ tọn. Ṣigba mẹhe ze yanwle gbẹdudu tọn do nukọnna haṣinṣan yetọn hẹ Jiwheyẹwhe lẹ nọ lẹzun boṣiọ-sẹ̀ntọ, na nugbo tọn.—2 Timoti 3:1-5.
13. Etẹwẹ mí sọgan plọn sọn kandai oyìnvu sika tọn tọn mẹ?
13 To whenue yé ko tọ́nsọn Egipti godo, Islaelivi lẹ basi oyìnvu sika tọn de nado nọ basi-sinsẹ̀n hlan ẹn. To yidogọ mẹ na avase sọta boṣiọ-sinsẹ̀n, nuplọnmẹ titengbe de sọ tin to kandai ehe mẹ ga. Islaelivi lẹ vẹtolina anademẹ họnwun he wá sọn Jehovah dè. (Eksọdusi 20:4-6) Etomọṣo, yé ma tindo linlẹn lọ nado gbẹ́ Jehovah dai taidi Jiwheyẹwhe yetọn gba. Yé basi avọ́sinsan lẹ hlan oyìnvu sika tọn bosọ ylọ nujijọ lọ dọ ‘hùnwhẹ de na Jehovah.’ To aliho de mẹ yé klọ yedelẹ nado lẹndọ Jiwheyẹwhe ma na yí nukun nujọnu tọn do pọ́n tolivivẹ emilẹ tọn gba. Mẹmasi de wẹ ehe yin na Jehovah, podọ e gblehomẹna ẹn tlala.—Eksọdusi 32:5, 7-10; Psalm 106:19, 20.
14, 15. (a) Etẹwutu wẹ Islaelivi lẹ ma tindo whẹjijọ depope na lilẹzun sisètọ nuwọntọ lẹ? (b) Eyin mí magbe ma nado lẹzun sisètọ nuwọntọ lẹ, etẹwẹ mí dona wà gando gbedide Jehovah tọn lẹ go?
14 E ma nọ saba jọ dọ dopo to Kunnudetọ Jehovah tọn lẹ mẹ ni kọnawudopọ hẹ sinsẹ̀n lalo de. Ṣigba, dile yé gbẹ́ tin to agun lọ mẹ sọ, mẹdelẹ sọgan gbẹ́ anademẹ Jehovah tọn dai to aliho devo lẹ mẹ. Islaelivi lẹ ma tindo whẹjijọ depope na lilẹzun sisètọ nuwọntọ lẹ gba. Yé sè Gbedide Ao lẹ bosọ tin to finẹ to whenuena Mose na yé gbedide Jiwheyẹwhe tọn lẹ he dọmọ: “Mìwlẹ ma na basi yẹwhe devo lẹ dogọ mi gba; yẹwhe fataka tọn lẹ, kavi yẹwhe sika tọn lẹ, mì ma na basi hlan mìde gba.” (Eksọdusi 20:18, 19, 22, 23) Ṣogan, Islaelivi lẹ basi sinsẹ̀n hlan oyìnvu sika tọn lọ.
15 Mílọsu ma na tindo whẹjijọ he sọgbe depope gba eyin mí lẹzun sisètọ nuwọntọ lẹ. To Owe-wiwe mẹ, mí tindo anademẹ lẹ sọn Jiwheyẹwhe dè gando adà gbẹzan tọn susu go. Di apajlẹ, Ohó Jehovah tọn gblewhẹdo akuẹ-yinyan bo ma gọ̀ sú to aliho he họnwun mẹ. (Psalm 37:21) Ovi lẹ yin gbedena nado setonuna mẹjitọ yetọn lẹ, podọ otọ́ lẹ yin nukundo nado pọ́n ovi yetọn lẹ go whẹ́n to ‘anademẹ-apọ̀nmẹ tọn Jehovah tọn mẹ.’ (Efesunu lẹ 6:1-4) Klistiani tlẹnnọ lẹ yin gbedena nado wlealọ “to Oklunọ mẹ kẹdẹ,” podọ devizọnwatọ Jiwheyẹwhe tọn he ko wlealọ lẹ yin didọna dọmọ: “Mì gbọ alọwle ni yin tintindo to gbégbigbò mẹ to omẹ popo mẹ, mì sọ dike yè hẹn adọ́ flu blo: na gàlọtọ po ayọdetọ lẹ po wẹ Jiwheyẹwhe na dawhẹna.” (1 Kọlintinu lẹ 7:39; Heblu lẹ 13:4) Eyin mí magbe ma nado yin sisètọ nuwọntọ lẹ, mí dona nọ yí nukun nujọnu tọn do pọ́n anademẹ ehelẹ po devo he wá sọn Jiwheyẹwhe dè lẹ po bosọ nọ setonuna yé.
16. Etẹlẹ mẹ wẹ sinsẹ̀n-bibasi hlan oyìnvu sika tọn dekọtọn do?
16 Jehovah ma kẹalọyi tintẹnpọn Islaelivi lẹ tọn nado basi sinsẹ̀n hlan ewọ dile e jlo yé do gba. Kakatimọ, omẹ 3 000 yin vivasudo, vlavo na azọngban titengbe he yé yiwà to nuyiwa atẹṣiṣi sinsẹ̀n-bibasi hlan oyìnvu sika tọn lọ mẹ wutu. Ylanwatọ devo lẹ jiya azọ̀nylankan de he wá sọn Jehovah dè tọn. (Eksọdusi 32:28, 35) Nuplọnmẹ nankọtọn die na mẹdepope he hia Ohó Jiwheyẹwhe tọn ṣigba de na yedelẹ nuhe yé jlo nado setonuna lẹ!
“Mì Họ̀n Na Ogalilọ”
17. Nujijọ tẹwẹ 1 Kọlintinu lẹ 10:8 to alọdlẹndo?
17 Adà dopo to fie ojlo agbasalan tọn lẹ sọgan dekọtọn do jiwinwọn gbigbọmẹ tọn mẹ te yin nùdego gbọn Paulu dali to whenuena e dọmọ: “Mì dike míwlẹ lọga blo, dile adade yetọn basi do, bọ gbẹtọ fọtọ́n-fọtọ́n donu konukunatọ̀n do jai to yé mẹ to gbèdopo.” (1 Kọlintinu lẹ 10:8) Tofi Paulu dlẹnalọdo nujijọ de he wá aimẹ to Agbàdo Moabi tọn mẹ to vivọnu zọnlinzinzin owhe 40 to zungbo mẹ Islaeli tọn. Islaelivi lẹ ko mọ alọgọ Jehovah tọn yí to agọe nado gbawhàn aigba he tin to whèzẹtẹn Jọdani tọn lẹ, ṣigba susu yetọn lẹzun nuwọntọ po pinpẹn-nutọn-mayọnẹntọ po. To bẹbẹnu Aigba Pagbe tọn, yé yin dindọ̀n gbọn fẹnnuwiwa zanhẹmẹ tọn po sinsẹ̀n-bibasi mawé Baali Peọli tọn po dali. Gbẹtọ 24 000 delẹ yin hùhù, he 1 000 to yé mẹ yin tọ́ntlọ́ngbọ́n.—Osọha 25:9.
18. Walọyizan wunmẹ tẹlẹ wẹ sọgan planmẹ biọ fẹnnuwiwa zanhẹmẹ tọn mẹ?
18 To egbehe omẹ Jehovah tọn lẹ yin yinyọnẹn ganji na nujinọtedo yiaga walọ dagbe tọn yetọn lẹ wutu. Ṣigba to whenuena yé yin whiwhlepọn po fẹnnuwiwa zanhẹmẹ tọn po, Klistiani delẹ ko doalọtena nulinlẹn gando Jiwheyẹwhe po nunọwhinnusẹ́n etọn lẹ po go. Yé ko lẹzun sisètọ nuwọntọ lẹ. To tintan whenu, whlepọn lọ sọgan gọ̀n ma bẹ nuyiwa galilọ tọn hẹn. E sọgan yin ayilinlẹn tlintlindo dindin nado pọ́n yẹdide fẹnnuwiwa tọn de, nado tindo mahẹ to hogbe kavi aihundida he ma sọgbe lẹ mẹ, kavi nado doafọna gbẹdido pẹkipẹki hẹ mẹhe ma lodo to walọyizan-liho lẹ. Onú ehe lẹpo ko plan Klistiani lẹ biọ ylanwiwa mẹ.—1 Kọlintinu lẹ 15:33; Jakobu 4:4.
19. Ayinamẹ Owe-wiwe tọn tẹwẹ nọ gọalọna mí nado “họ̀n na galilọ”?
19 Eyin mí yin whiwhlepọn nado tindo mahẹ to nuyiwa fẹnnuwiwa tọn mẹ, mí ma dona doalọtena nulinlẹnpọn gando Jehovah go gba. Kakatimọ, mí dona setonuna nuflinmẹ he tin to Ohó etọn mẹ lẹ. (Psalm 119:1, 2) Taidi Klistiani lẹ, suhugan mítọn nọ wà nuhe go mí pé lẹpo nado gbọṣi wiwejininọ mẹ to walọyizan-liho, ṣigba e nọ biọ vivẹnudido nado wà nuhe sọgbe to nukun Jiwheyẹwhe tọn mẹ lẹ. (1 Kọlintinu lẹ 9:27) Paulu wlan hlan Klistiani he tin to Lomu lẹ dọmọ: “Tonusise mìtọn gbàpe jẹ gbẹtọ lẹpo dè. Enẹwutu homẹ ṣie vivi na mìtọn wutu: ṣigba ganṣo yẹn sọ jlo na nuyọnẹn ni pé mì hlan ehe yin dagbe, bo yin mayọndenọ hlan enẹ heyin oylan.” (Lomunu lẹ 16:19) Kẹdẹdile Islaelivi 24 000 yin hùhù na ylando yetọn lẹ wutu do, gàlọtọ lẹ po ylandonọ devo lẹ po na tindo numimọ whẹdida whẹgbledomẹ Jehovah tọn to madẹnmẹ. (Efesunu lẹ 5:3-6) To whelọnu lo, kakati nado lẹzun sisètọ nuwọntọ lẹ, mí dona to ‘hinhọ̀n na galilọ’ zọnmii.—1 Kọlintinu lẹ 6:18.
Mì Yọ́n Pinpẹn Nuhe Jehovah to Wiwà lẹ Tọn to Whepoponu
20. Nawẹ Islaelivi lẹ whlé Jehovah pọ́n gbọn, podọ etẹwẹ yin kọdetọn lọ?
20 Sọha susugege Klistiani lẹ tọn ma ko joawuna fẹnnuwiwa zanhẹmẹ tọn pọ́n gbede. Ṣogan, mí dona họ́ míde dọ mí ni ma na dotẹnmẹ mídelẹ nado doafọna aliho nuyiwa tọn de he nọ dekọtọn do hùnhlún gbọzangbọzan mẹ he sọgan dekọtọn do whẹgbledomẹ sọn olọn mẹ wá mẹ. Paulu dotuhomẹnamẹ dọmọ: “Mì sọ dike míwlẹ whlé [Jehovah] pọ́n blo, dile adade [Islaelivi lẹ] tọn ga whlé e pọ́n do, bọ yè yí odàn do hù yé sudo. Mìwlẹ sọ hlún blo, dile adade yetọn ga hlún do, bọ yè sọ hù yé sudo gbọn alọ mẹvatọ tọn mẹ.” (1 Kọlintinu lẹ 10:9, 10) Islaelivi lẹ hlún sọta Mose po Aalọn po—mọwẹ, etlẹ yin sọta Jiwheyẹwhe lọsu—bo wule gando manna heyin awuwlena to azọ́njiawu-liho lọ go. (Osọha lẹ 16:41; 21:5) Be homẹgble he hùnhlún yetọn hẹnwa na Jehovah whè hugan dehe galilọ yetọn hẹnwa wẹ ya? Kandai Biblu tọn dohia dọ susu mẹhe hlún lẹ tọn wẹ yin hùhù gbọn odàn lẹ dali. (Osọha lẹ 21:6) To nujijọ he jẹnukọn de whenu, hugan hùnhlúntọ atẹṣitọ 14 700 wẹ yin vivasudo. (Osọha lẹ 16:49) Enẹwutu mì gbọ mí ni ma whlé homẹfa Jehovah tọn pọ́n gbọn sisi matindo na awuwledainanu etọn lẹ dali blo.
21. (a) Tudohomẹnamẹ tẹwẹ Paulu yin gbigbọdo nado wlan? (b) Sọgbe hẹ Jakobu 1:25, nawẹ mí sọgan yin ayajẹnọ nugbonugbo gbọn?
21 To wekinkan hlan Klistiani hatọ lẹ mẹ, Paulu dotana avase debọdo-dego lọ po tudohomẹnamẹ lọ po dọmọ: “Onú he lẹpo jọ hlan yé gbọn ali ohia tọn dali: yè sọ wlan yé na nukọnamẹ mítọn, mẹhe ji opodo whenu tọn ja. Enẹwutu mì gbọ ewọ he lẹndọ e to ote ni payi, e nikaa jai.” (1 Kọlintinu lẹ 10:11, 12) Taidi Islaelivi lẹ, mí ko mọ dona susu yí sọn Jehovah dè. Ṣigba, to ma taidi yewlẹ, na míwlẹ ni ma wọnji bosọ gboawupo nado do pinpẹn-nutọn-yinyọnẹn hia na onú dagbe he Jiwheyẹwhe to wiwà na mí lẹ pọ́n gbede blo. To whenuena magbọjẹ gbẹ̀mẹ tọn lẹ pẹnagban mí, mì gbọ mí ni lẹnnupọndo opagbe jiawu heyin mimọ to Ohó etọn mẹ lẹ ji. Mì gbọ mí ni flin haṣinṣan họakuẹ mítọn hẹ Jehovah bosọ to azọ́n kunnudide-Ahọluduta lọ tọn he ko yin zizedo alọmẹ na mí wà zọnmii. (Matiu 24:14; 28:19, 20) Nujikudo tin dọ aliho nuyiwa tọn mọnkọtọn na hẹn ayajẹ nugbo tọn wá na mí, na Owe-wiwe dopagbe dọmọ: “Mẹdepope he doun osẹ́n mẹdekannujẹ tọn he sọgbe lọ mẹ pọ́n, bosọ nọte to e mẹ, bọ ewọ mayin sisètọ nuwọntọ, ṣigba azọ́n lọ basitọ, omẹ lọ [na yin ayajẹnọ] to bibasi etọn mẹ.”—Jakobu 1:25.
Nawẹ Hiẹ Na Na Gblọndo Gbọn?
• Etẹwẹ sọgan hẹn mí lẹzun sisètọ nuwọntọ lẹ?
• Naegbọn tonusise mlẹnmlẹn hlan Jiwheyẹwhe yin dandannu?
• Nawẹ mí sọgan “họ̀n na galilọ” gbọn?
• Etẹwẹ dona yin walọyizan mítọn hlan awuwledainanu Jehovah tọn lẹ?
[Yẹdide to weda 15]
Islaelivi lẹ wọnji nuyiwa huhlọnnọ Jehovah tọn lẹ do ota yetọn mẹ go
[Yẹdide to weda 16]
Omẹ Jehovah tọn lẹ ko magbe nado hẹn nujinọtedo yiaga walọ dagbe tọn lẹ go