• “Ewọ Whẹ́whẹ́ Wẹ Yiwanna Mí”
    Dọnsẹpọ Jehovah

    • “Jiwheyẹwhe Wẹ Owanyi”

      15. Hogbe tẹwẹ Biblu yizan dogbọn jẹhẹnu Jehovah tọn heyin owanyi dali, podọ aliho tẹmẹ wẹ hogbe ehe yin vonọtaun te? (Pọ́n nudọnamẹ odò tọn.)

      15 Biblu dọ nude dogbọn owanyi dali ehe e ma dọ gbede dogbọn jẹhẹnu titengbe Jehovah tọn he pò lẹ dali. Owe-wiwe ma dọ dọ Jiwheyẹwhe wẹ huhlọn kavi dọ Jiwheyẹwhe wẹ whẹdida dodo kavi tlẹ dọ dọ Jiwheyẹwhe wẹ nuyọnẹn gba. E tindo jẹhẹnu enẹlẹ wẹ, ewọ wẹ yin asisa yiaga hugan yetọn, podọ e ma sọgan yin yiyijlẹdo atọ̀n he pò lẹpo go gba. Ṣigba, gando jẹhẹnu ẹnẹtọ lọ go, hogbe he tindo zẹẹmẹ sisosiso de yin yiyizan dọmọ: “Jiwheyẹwhe wẹ owanyi.”b (1 Johanu 4:8) Etẹwẹ ehe zẹẹmẹdo?

      16-18. (a) Naegbọn Biblu dọ dọ “Jiwheyẹwhe wẹ owanyi”? (b) To nudida he tin to aigba ji lẹpo mẹ, naegbọn e do yin dọ gbẹtọ wẹ jẹ nado yin yẹhiadonu owanyi heyin jẹhẹnu Jehovah tọn tọn?

      16 Hogbe lọ “Jiwheyẹwhe wẹ owanyi” ma yin hogbe he tindo zẹẹmẹ tlọlọ de poun, taidi dọ, “Jiwheyẹwhe yin nudopolọ hẹ owanyi” gba. E ma na sọgbe nado lilẹ́ hogbe lọ nado dọ dọ “owanyi wẹ Jiwheyẹwhe” gba. Jehovah ma yin jẹhẹnu he ma sọgan yin nukun yí do mọ de gba. E yin mẹde he tindo numọtolanmẹ voovo lẹ po jẹhẹnu devo lẹ po to yidogọmẹ na owanyi. Ṣogan, owanyi nọ sọawuhia sisosiso to nuyiwa Jehovah tọn lẹpo mẹ. Enẹwutu, owe whenuho tọn de dọ gando wefọ ehe go dọmọ: “Ohia kavi jẹhẹnu tintan Jiwheyẹwhe tọn wẹ owanyi.” To paa mẹ, mí sọgan pọ́n ẹn hlan to aliho ehe mẹ: Huhlọn Jehovah tọn nọ hẹn ẹn penugo nado yinuwa. Whẹdida dodo po nuyọnẹn etọn po nọ deanana aliho he mẹ e nọ yinuwa te lẹ. Ṣigba owanyi Jehovah tọn wẹ nọ whàn ẹn nado yinuwa. Podọ owanyi etọn sọ nọ sọawuhia to aliho he mẹ e nọ yí jẹhẹnu he pò lẹpo zan te.

      17 E nọ saba yin didọ dọ Jehovah wẹ yin apajlẹ owanyi tọn. Enẹwutu, eyin mí jlo na plọnnu dogbọn owanyi he sinai do nunọwhinnusẹ́n ji dali, mí dona plọnnu dogbọn Jehovah dali. Nugbo wẹ dọ, mí sọgan mọ jẹhẹnu dagbe ehe to gbẹtọvi lẹ mẹ ga. Ṣigba naegbọn e do tin to yé mẹ? To onú lẹ didá whenu, Jehovah dọ hogbe ehelẹ, na taun tọn hlan Ovi etọn dọmọ: “Gbọ mí ni basi gbẹtọ . . . to apajlẹ mítọn mẹ.” (Gẹnẹsisi 1:26) To nudida he tin to aigba ehe ji lẹpo mẹ, gbẹtọvi lẹ kẹdẹ wẹ sọgan basi nudide nado do owanyi hia bo gbọnmọ dali hodo apajlẹ Otọ́ yetọn he to olọn mẹ tọn. Flindọ Jehovah yí nudida voovo lẹ zan nado nọtena jẹhẹnu tangan etọn lẹ. Ṣigba, Jehovah yí gbẹtọ heyin nudida etọn he yiaga hugan to aigba ji zan taidi yẹhiadonu jẹhẹnu ayidego etọn tọn—yèdọ owanyi.—Ezekiẹli 1:10.

  • “Ewọ Whẹ́whẹ́ Wẹ Yiwanna Mí”
    Dọnsẹpọ Jehovah

    • b Hogbe Owe-wiwe tọn devo lẹ tindo adà he sọgan yin yiyijlẹdo yedelẹ go. Di apajlẹ, “Hinhọ́n wẹ Jiwheyẹwhe” podọ “Miyọ́n dusúdo de wẹ Jiwheyẹwhe.” (1 Johanu 1:5; Heblu lẹ 12:29) Ṣigba ehelẹ dona yin pinpọnhlan di nuyijlẹdonugo lẹ, na yé yí Jehovah jlẹdo onú yinukundomọ lẹ go. Jehovah taidi hinhọ́n, na ewọ yin wiwe po dodonọ po. “Zinvlu,” kavi mawé depope ma tin to ewọ mẹ. Podọ e sọgan yin yiyijlẹdo miyọ́n go na aliho he mẹ e nọ yí huhlọn nuvasudo tọn etọn zan te wutu.