Weta 10
Ahọluduta Jiwheyẹwhe Tọn to Gandu
1, 2. Nawẹ gandudu gbẹtọvi tọn lẹ sọawuhia taidi nuhe ma penugo gbọn?
VLAVO hiẹ ko tindo numimọ azọ́nwanu de hihọ tọn, kiki nado wá mọ dọ e ma wazọ́n. Mí ni dọ dọ hiẹ ylọ nujladotọ de. Ṣigba ojlẹ vude he godo e “jla” onú lọ do, e sọ vọ gble. Lehe enẹ hẹnmẹjẹflumẹ do sọ!
2 Onú dopolọ wẹ po gandudu gbẹtọvi lẹ tọn po. Gbẹtọ lẹ ko yí whepoponu do jlo gandudu he na na nujikudo jijọho po ayajẹ po tọn. Ṣogan, vivẹnudido vẹkuvẹku lẹ nado jla ninọmẹ aihọn he gblezọn lọ tọn do ma ko tindo kọdetọn dagbe de gba. Gbekọndopọ jijọho tọn susu ko yin bibasi—enẹgodo gbakija. Humọ, gandudu tẹwẹ ko penugo nado de ohẹ́n, wangbẹna akọta tọn, sẹ́nhẹngba, azọ̀n, po lẹdo hinhẹngble po sẹ sọn aimẹ mlẹnmlẹn? Gandudu gbẹtọ tọn ma yọ́n jlado. Ahọlu Islaeli tọn nuyọnẹntọ lọ Sọlọmọni tlẹ kanse dọmọ: “Mẹnu wẹ to gbẹtọ lẹ mẹ he sọgan tunwun aliho ede tọn?”—Howhinwhẹn lẹ 20:24.
3. (a) Etẹwẹ yin hosọ yẹwhehodidọ Jesu tọn? (b) Nawẹ mẹdelẹ basi zẹẹmẹ Ahọluduta Jiwheyẹwhe Tọn gbọn?
3 Ma hẹn todido bu blo! Gandudu dolido aihọn tọn mayin odlọ de poun gba. E ko yin hosọ yẹwhehodidọ Jesu tọn. E ylọ ẹ dọ “ahọludu Jiwheyẹwhe tọn,” podọ e plọn hodotọ etọn lẹ nado hodẹ̀ na ẹn. (Luku 11:2; 21:31) Nugbo wẹ dọ, Ahọluduta Jiwheyẹwhe Tọn nọ yin nùdego to whedelẹnu to lẹdo sinsẹ̀n tọn lẹ mẹ. Na nugbo tọn, livi susu lẹ nọ hodẹ̀ na ẹn egbesọegbesọ to whenuena yé basi dọvọdọ Odẹ̀ Oklunọ tọn (he sọ nọ yin yiylọdọ Otọ́ Mítọn kavi odẹ̀ apajlẹ tọn). Ṣigba gbẹtọ lẹ nọ na gblọndo voovo lẹ to whenuena yé yin kinkanse dọmọ, “Etẹwẹ Ahọluduta Jiwheyẹwhe Tọn yin?” Mẹdelẹ nọ dọ dọ, “E tin to ahun towe mẹ.” Mẹdevo lẹ nọ ylọ ẹ dọ olọn. Biblu na gblọndo he họnwun, dile mí na mọ do.
AHỌLUDUTA DE PO LẸNDAI DE PO
4, 5. Naegbọn Jehovah dè nado hẹn dohia yọyọ nupojipetọ-yinyin etọn tọn wá, podọ etẹwẹ e na wadotana?
4 Jehovah Jiwheyẹwhe ko yí whepoponu do yin Ahọlu, kavi Ahọlu Ganhunupotọ, wẹkẹ lọ tọn. Nugbo lọ dọ e dá onú lẹpo zé e do otẹn he yiaga enẹ mẹ. (1 Otannugbo 29:11; Psalm 103:19; Owalọ lẹ 4:24) Ṣigba Ahọluduta he Jesu dọyẹwheho etọn yin onú devo, kavi tin to otẹn awetọ mẹ na nupojipetọ-yinyin Jiwheyẹwhe tọn to wẹkẹ lẹpo ji. Ahọluduta Mẹssia Tọn enẹ tindo lẹndai tangan de, ṣigba etẹwẹ lẹndai lọ?
5 Dile e yin zẹẹmẹ basina to weta 6 mẹ do, asu po asi po tintan lọ ṣiatẹ sọta aṣẹpipa Jiwheyẹwhe tọn. Na whẹho he yin finfọndote lẹ wutu, Jehovah dè nado hẹn awusọhia yọyọ nupojipetọ-yinyin etọn tọn wá aimẹ. Jiwheyẹwhe lá lẹndai etọn nado wleawuna “okún” de he na só Odàn lọ, yèdọ Satani, bo de nugandomẹgo ylando he gbẹtọvi lẹ dugu etọn sẹ. “Okún” tintan lọ wẹ yin Jesu Klisti, podọ “ahọludu Jiwheyẹwhe tọn” wẹ nuyizan he na gbawhàn Satani tọn pete. Gbọn yizan Ahọluduta ehe tọn dali, Jesu Klisti na hẹn gandudu gọwa aigba ji to yinkọ Jehovah tọn mẹ bo na suwhẹna jlọjẹ nupojipetọ-yinyin Jiwheyẹwhe tọn kakadoi.—Gẹnẹsisi 3:15; Psalm 2:2-9.
6, 7. (a) Fie wẹ Ahọluduta lọ te, podọ mẹnu lẹ wẹ yin Ahọlu lọ po ganduhẹmẹtọgbẹ etọn lẹ po? (b) Mẹnu lẹ wẹ yin mẹjidugando Ahọluduta lọ tọn lẹ?
6 Sọgbe hẹ lẹdogbedevomẹ hogbe Jesu tọn lẹ na Falesi kanylantọ lẹ, e dọmọ: “Ahọludu Jiwheyẹwhe tọn tin to gblagbla mìtọn mẹ.” (Luku 17:21) Be nuhe dọ Jesu te wẹ yindọ Ahọluduta lọ tin to ahún sunnu ylankan he gblezọn enẹlẹ tọn mẹ wẹ ya? Lala. Lẹdogbedevomẹ Glẹki dowhenu tọn he sọgbe humọ de hia dọmọ: “Ahọluduta Jiwheyẹwhe tọn tin to ṣẹnṣẹn mítọn.” (Traduction du Monde Nouveau) Jesu, he tin to ṣẹnṣẹn yetọn, gbọnmọ dali to alọdlẹndo ede taidi Ahọlu sọgodo tọn lọ. Kakati nado yin nuhe omẹ de na tindo to ahún etọn mẹ poun, Ahọluduta Jiwheyẹwhe Tọn yin gandudu nujọnu tọn de, he to azọ́nwa bo tindo ahọlu de po mẹjidugando lẹ po. Gandudu olọn mẹ tọn de wẹ e yin, na yè nọ ylọ ẹ dọ “ahọludu olọn tọn” podọ “ahọludu Jiwheyẹwhe tọn.” (Matiu 13:11; Luku 8:10) To numimọ mẹ, yẹwhegan Daniẹli mọ Ahọlu etọn taidi mẹhe di “visunnu gbẹtọ tọn” he yè hẹn wá Jiwheyẹwhe Ganhunupotọ nukọn podọ yé na ẹn “gigo . . . po ahọludu de po, na gbẹtọ lẹpo, po akọta lẹ po, po ogbè lẹ po ni do nọ sẹ̀n ẹn.” (Daniẹli 7:13, 14) Mẹnu wẹ Ahọlu ehe? Eyọn, Biblu ylọ Jesu Klisti dọ “Ovi gbẹtọ tọn” (Matiu 12:40; Luku 17:26) Mọwẹ, Jehovah dè Visunnu etọn, Jesu Klisti, nado yin Ahọlu.
7 Jesu kẹdẹ ma wẹ to gandu gba. Gọna ewọ wẹ gbẹtọ 144 000 lẹ he yè “fligọ sọn aigba ji” nado yin ahọlu po yẹwhenọ hatọ etọn lẹ po. (Osọhia 5:9, 10; 14:1, 3; Luku 22:28-30) Mẹjidugando Ahọluduta Jiwheyẹwhe Tọn lẹ na yin whẹndo globu gbẹtọvi lẹ tọn de he litaina nukọntọ-yinyin Klisti tọn. (Psalm 72:7, 8) Nalete, nawẹ, mí sọgan tindo nujikudo etọn dọ Ahọluduta lọ na suwhẹna nupojipetọ-yinyin Jiwheyẹwhe tọn bo hẹn ninọmẹ paladisi tọn lẹ wá aimẹ na aigba mítọn gbọn?
NUJỌNU-YINYIN AHỌLUDUTA JIWHEYẸWHE TỌN
8, 9. (a) Nawẹ mí sọgan do ginganjẹ opagbe Ahọluduta Jiwheyẹwhe Tọn lẹ go hia gbọn? (b) Nawẹ mí sọgan tindo jide nujọnu-yinyin Ahọluduta lọ tọn gbọn?
8 Mí ni dọ dọ miyọ́n va ohọ̀ towe sudo. Todin họntọn he tindo alọnu de dopagbe nado gọalọ nado vọ́ ohọ̀ towe gbá podọ nado wleawu núdùdù tọn na whẹndo towe. Eyin họntọn enẹ ko nọ saba dọ nugbo na we, be hiẹ ma na yi i sè ya? Mí ni dọ dọ hiẹ gọ̀ sọn azọ́nmẹ wá whégbè to wunkẹngbe etọn bo mọ dọ azọ́nwatọ lẹ ko to aigba jlado bo to nuhe fiọ lẹ bẹsẹ podọ núdùdù ko yin hinhẹn wá na whẹndo towe. Matin ayihaawe hiẹ na deji pete dọ to nukọnmẹ e ma yin dọ onú lẹ na yin hinhẹn gọwa kẹdẹ wẹ gba ṣigba na yọ́n hugan dai tọn.
9 Mọdopolọ, Jehovah nọ na mí jide nujọnu-yinyin Ahọluduta lọ tọn. Dile e yin didohia do to owe Biblu tọn heyin Heblu lẹ tọn mẹ, suhugan ada Osẹ́n lọ tọn yin ojlẹmọ tito Ahọluduta lọ tọn. (Heblu lẹ 10:1) Pọndohlan dọdai tọn Ahọluduta Jiwheyẹwhe Tọn sọ họnwun to ahọludu aigba ji Islaeli tọn mẹ. E ma yin gandudu paa tọn de gba, na ahọlu lẹ nọ “sín ofìn Oklunọ tọn lọ ji.” (1 Otannugbo 29:23) Humọ, e ko yin didọdai dọmọ: “Ogánpò ma na tọ́nyi sọn Juda, kavi opò ogán tọn sọn afọ etọn lẹ ṣẹnṣẹn, whẹpo Ṣilo do wá gba; hlan e dali wẹ tonusise gbẹtọ lẹ tọn na te.” (Gẹnẹsisi 49:10)a Mọwẹ, to kunkan Juda tọn heyin ahọlu lẹ tọn ehe mẹ wẹ Jesu, Ahọlu tẹgbẹ̀ gandudu Jiwheyẹwhe tọn lọ, dona yin jiji te.—Luku 1:32, 33.
10. (a) Whetẹnu wẹ dodonu Ahọluduta Jiwheyẹwhe Tọn heyin Mẹssia tọn yin zizedai? (b) Azọ́n titengbe tẹwẹ mẹhe na dugán hẹ Jesu lẹ na deanana to aigba ji?
10 Dodonu Ahọluduta Jiwheyẹwhe Tọn heyin Mẹssia tọn yin zizedai po ṣinṣinyan apọsteli Jesu tọn lẹ po. (Efesunu lẹ 2:19, 20; Osọhia 21:14) Ehelẹ wẹ yin tintan to gbẹtọ 144 000 lẹ mẹ he na dugán to olọn mẹ taidi ahọlu duhẹmẹtọ hẹ Jesu Klisti lẹ. To whenuena yé tin to aigba ji, gandutọgbẹ́ sọgodo tọn ehelẹ na hẹn nujijla kunnudide tọn de gbayipe, to kọndopọmẹ po gbedide Jesu tọn po dọmọ: “Mì yì, bo hẹn akọta lẹpo zun nuplọntọ, bosọ nọ baptizi yé do oyín Otọ́ tọn, po Ovi tọn po, po [g]bigbọ [w]iwe tọn po mẹ.”—Matiu 28:19.
11. Nawẹ azọ́n yẹwhehodidọ Ahọluduta lọ tọn to yinyin hinhẹndi to egbehe gbọn, podọ wadotana tẹwẹ e to bibasi?
11 Gbedide lọ nado hẹn mẹlẹ zun nuplọntọ to yinyin tonusena todin jẹ obá he e ma ko jẹ gbede pọ́n mẹ. Kunnudetọ Jehovah Tọn lẹ to wẹndagbe Ahọluduta lọ tọn lá lẹdo globu pe, to gbesisọmẹ po hogbe dọdai Jesu tọn lẹ po dọmọ: “Yè nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” (Matiu 24:14) Taidi ada azọ́n yẹwheho Ahọluduta lọ tọn dopo, tito-to-whinnu mẹpinplọn daho de tọn to yinyin hinhẹndi. Mẹhe litaina osẹ́n po nunọwhinnusẹ́n Ahọluduta Jiwheyẹwhe Tọn lẹ po ko to numimọ jijọho po pọninọ he gandudu gbẹtọ tọn lẹ ma sọgan hẹndi tọn po tindo. Ehe lẹpo to kunnudenu he họnwun dohia dọ Ahọluduta Jiwheyẹwhe Tọn yin nujọnu de!
12. (a) Naegbọn e do sọgbe nado ylọ lilatọ Ahọluduta lọ tọn lẹ dọ Kunnudetọ Jehovah Tọn lẹ? (b) Nawẹ Ahọluduta Jiwheyẹwhe Tọn gbọnvona gandudu gbẹtọvi lẹ tọn gbọn?
12 Jehovah dọna Islaelivi lẹ dọmọ: “Mìwlẹ wẹ kunnudetọ ṣie, . . . devi ṣie he yẹn ko dè.” (Isaia 43:10-12) Jesu, “kunnudetọ nugbonọ lọ,” lá wẹndagbe Ahọluduta lọ tọn po zohunhun po. (Osọhia 1:5; Matiu 4:17) Enẹwutu nuhe sọgbe de wẹ e yin dọ lilatọ Ahọluduta lọ tọn egbezangbe tọn lẹ ni tindo yinkọ dide sọn olọn mẹ wá lọ Kunnudetọ Jehovah Tọn lẹ. Ṣigba naegbọn Kunnudetọ lẹ do nọ yí whenu po vivẹnudido susu sọmọ po zan nado dọho na mẹdevo lẹ dogbọn Ahọluduta Jiwheyẹwhe Tọn dali. Yé nọ wà ehe na Ahọluduta lọ wẹ yin todido gbẹtọvi lẹ tọn dopo akan lọ. Gandudu gbẹtọ tọn lẹ nọ wá opodo etọn to agọgbọnẹn mẹ, ṣigba Ahọluduta Jiwheyẹwhe Tọn ma na wá opodo gbede pọ́n. Isaia 9:6, 7 ylọ Ahọlu etọn, Jesu, dọ “Ahọvi jijọho tọn” bo yidogọ dọmọ: “Ahọludu etọn po jijọho po ma na ponu.” Ahọluduta Jiwheyẹwhe Tọn ma taidi gandudu gbẹtọ tọn lẹ—he tin to finẹ egbehe ṣigba na yin didesẹ to osọ̀ gba. Na nugbo tọn, Daniẹli 2:44 dọmọ: “Jiwheyẹwhe olọn tọn na zé ahọludu de daga, he ma na yin viva gbede, mọ yè ma na jó ahọludu etọn dai hlan gbẹtọ devo lẹ gba; ṣigba e na gbà ahọludu do flinflin bo sú ahọludu he lẹpo do, ewọ bo nasọ nọte kakadoi.”
13. (a) Nuhahun tẹlẹ wẹ Ahọluduta Jiwheyẹwhe Tọn na desẹ po kọdetọn dagbe po? (b) Naegbọn mí sọgan deji dọ opagbe Jiwheyẹwhe tọn lẹ na yin hinhẹndi?
13 Ahọlu gbẹtọ tọn tẹwẹ sọgan dè awhàn, sẹ́nhẹngba, azọ̀n, huvẹ, po adọtẹn matindo po sẹ? Yinukọn dogọ, ahọlu aigba ji tọn tẹwẹ sọgan fọ́n mẹhe ko kú lẹ sọnku? Ahọluduta Jiwheyẹwhe Tọn po Ahọlu etọn po na penukundo whẹho ehelẹ go. Ahọluduta lọ ma na gboawupo, taidi azọnwanu he ma wazọ́n he tindo nuhudo nado yin jijlado sọn ojlẹ de mẹ jẹ devo mẹ gba. Kakatimọ, Ahọluduta Jiwheyẹwhe Tọn na tindo kọdetọn dagbe, na Jehovah dopagbe dọmọ: “Ohó ṣie he tọ́n sọn onù ṣie . . . ma na lẹ́gọ wá dee agbá, ṣigba e na dotana onú he yẹn jlo, e na wadagbe to onú he mẹ yẹn do e hlan te.” (Isaia 55:11) Lẹndai Jiwheyẹwhe tọn ma na gboawupo gba, ṣigba whetẹnu wẹ gandudu Ahọluduta lọ tọn na bẹjẹeji?
GANDUDU AHỌLUDUTA TỌN—WHETẸNU?
14. Nukunnumamọjẹnumẹ tẹwẹ devi Jesu tọn lẹ tindo gando Ahọluduta lọ go, podọ etẹwẹ Jesu yọnẹn dogbọn gandudu etọn dali?
14 “Oklunọ, hiẹ na gọ̀ ahọludu jo hlan Islaeli to ojlẹ he mẹ lo?” Kanbiọ he yin kinkanse gbọn devi Jesu tọn lẹ dali ehe dohia dọ to ojlẹ he mẹ yé to kanbiọ ehe kanse te yé ma yọ́n lẹndai Ahọluduta Jiwheyẹwhe Tọn po ojlẹ dide lọ na gandudu etọn nado bẹjẹeji po gba. To nugbẹna yé ma nado tindo ayihaawe do whẹho lọ ji whenu, Jesu dọmọ: “E ma tin na mìwlẹ nado yọ́n whenu kavi ojlẹ he Otọ́ yí do huhlọn ede tọn mẹ gba.” Jesu yọnẹn dọ gandudu etọn do aigba ji yin sisẹdo na sọgodo, whenu dindẹn to fọnsọnku po olọn mẹ yìyì etọn po godo. (Owalọ lẹ 1:6-11; Luku 19:11, 12, 15) Owe wiwe lẹ ko dọ dọdai ehe tọn. Nawẹ e yinmọ gbọn?
15. Nawẹ Psalm 110:1 ta hinhọ́n do tedidi gandudu Jesu tọn ji gbọn?
15 To alọdindlẹndo Jesu taidi “Oklunọ” to dọdai liho, Ahọlu Davidi dọmọ: “[Jehovah] dọ hlan Oklunọ ṣie, dọ, Hiẹ sinai to adusilọ ṣie mẹ, kaka yẹn na yí kẹntọ towe lẹ do basi tokloafọligbe towe.” (Psalm 110:1; yijlẹdo Owalọ lẹ 2:34-36 go.) Dọdai ehe dohia dọ gandudu Jesu tọn ma na bẹjẹeji to afọdopolọji he e na hẹji yí olọn mẹ gba. Kakatimọ, e na nọte to adusilọ Jiwheyẹwhe tọn mẹ. (Heblu lẹ 10:12, 13) Nawẹ teninọ ehe na dẹnsọ? Whetẹnu wẹ gandudu etọn na bẹjẹeji? Biblu gọalọna mí nado din gblọndo lọ mọ.
16. Etẹwẹ jọ to owhe 607 J.W.M. tọn mẹ, podọ nawẹ ehe gando Ahọluduta Jiwheyẹwhe Tọn go gbọn?
16 Otò dopo kẹdẹ lọ to aigba lẹpo ji he ji Jehovah zé yínkọ etọn do wẹ Jelusalẹm. (1 Ahọlu lẹ 11:36) E sọ yin tatọ-tònọ ahọludu aigba ji tọn he Jiwheyẹwhe kẹalọyi he yin apajlẹ Ahọluduta olọn mẹ tọn heyin Jiwheyẹwhe tọn. Enẹwutu, vasudo Jelusalẹm tọn gbọn Babilọninu lẹ dali to 607 J.W.M. gọna zẹẹmẹ taun. Nujijọ ehe dohiagona bẹjẹeji alọhẹndotenamẹ gaa gandudu tlọlọ Jiwheyẹwhe tọn do omẹ etọn lẹ ji to aigba ji. Nudi owhe kanweko ṣidopo to nukọnmẹ, Jesu dohia dọ ojlẹ alọhẹndotena gandudu tọn ehe gbẹsọ po to yìyì, na e dọmọ: “Jelusalẹm na zùn zinzindai sọn Kosi lẹ de, kaka ojlẹ [dide akọta] lẹ tọn nado sọ.”—Luku 21:24.
17. (a) Etẹwẹ yin “ojlẹ dide akọta lẹ tọn,” podọ nawẹ yé na dẹnsọ? (b) Whetẹnu wẹ “ojlẹ dide akọta lẹ tọn” bẹjẹeji podọ whetẹnu wẹ e wá opodo?
17 To “ojlẹ dide akọta lẹ tọn,” whenu gandudu aihọn tọn lẹ na yin dotẹnmẹ jodona nado doalọtena gandudu he yin alọkẹyi gbọn Jiwheyẹwhe dali. Ojlẹ enẹ bẹjẹeji po vasudo Jelusalẹm tọn po to 607 J.W.M., podọ Daniẹli dohia dọ ojlẹ ehe na zindonukọn họ “ojlẹ ṣinawe.” (Daniẹli 4:23-25) Nawẹ enẹ na dẹnsọ? Biblu dohia dọ “ojlẹ” atọ̀n daa yin onú dopolọ po azán 1 260 lẹ po. (Osọhia 12:6, 14) Donu awe ojlẹ enẹ tọn, kavi ojlẹ ṣinawe, na yin azán 2 520. Ṣigba onú ayidego tọn depope ma jọ to vivọnu ojlẹ gli enẹ tọn gba. To yíyí “azán dopo na owhe dopo” hlan dọdai Daniẹli tọn bo hia owhe 2 520 bẹsọn 607 J.W.M., nalete, mí wá owhe 1914 W.M. tọn ji.—Osọha lẹ 14:34; Ezekiẹli 4:6.
18. Etẹwẹ Jesu wà to ojlẹ vude to huhlọn Ahọluduta lọ tọn mimọyi godo, podọ nawẹ ehe gando aigba go gbọn?
18 Be Jesu jẹ gandu ji to olọn mẹ to ojlẹ enẹ mẹ wẹ ya? Whẹwhinwhẹn Owe wiwe tọn lẹ nado dọ e jẹ gandu ji to ojlẹ enẹ mẹ na yin hodọ deji to weta he na bọdego mẹ. Na nugbo tọn, bẹjẹeji gandudu Jesu tọn ma na yin hiadogona po jijọho to aigba ji afọdopolọji tọn po gba. Osọhia 12:7-12 dohia dọ to whenuena e yí Ahọluduta lọ tlolo godo, Jesu na yàn Satani po angẹli aovi etọn lẹ po sọn olọn mẹ. Ehe na zẹẹmẹdo dindọn na aigba, ṣigba tulinamẹnu de wẹ e yin nado hia dọ Lẹgba tindo “whenu gli de” poun. To madẹnmẹ, mí na penugo nado jaya e ma yin na Ahọluduta Jiwheyẹwhe Tọn to gandu wutu kẹdẹ wẹ gba ṣigba na e na hẹn dona lẹ wá na aigba po gbẹtọvi tonusetọ lẹ po wutu. (Psalm 72:7, 8) Nawẹ mí wagbọn do yọnẹn dọ enẹ na jọ to madẹnmẹ?
[Nudọnamẹ Odò Tọn]
a Yínkọ lọ Ṣilo zẹẹmẹdo “Mẹhe Tọn E Yin; Ewọ Mẹhe Tọn E Yin.” To ojlẹ etọn mẹ, e lẹzun nuhe họnwun dọ “Ṣilo” wẹ Jesu Klisti, “Kinnikinni lọ he sọn whẹndo Juda tọn mẹ.” (Osọhia 5:5) Delẹ to Lẹdogbedevomẹ Alẹnu Hoho tọn heyin Ju lẹ tọn yí “Mẹssia” kavi “ahọlu Mẹssia lọ” do diọ hogbe lọ “Ṣilo”.
TẸ́N OYỌNẸN TOWE PỌ́N
Etẹwẹ Ahọluduta Jiwheyẹwhe Tọn yin, podọ fie wẹ e na dugán sọn?
Mẹnu wẹ to gandu to Ahọluduta lọ mẹ, podọ mẹnu lẹ wẹ yin mẹjidugando etọn lẹ?
Nawẹ Jehovah hẹn mí deji dọ Ahọluduta etọn yin nujọnu gbọn?
Whetẹnu wẹ “ojlẹ dide akọta lẹ tọn” bẹjẹeji podọ wá opodo?
[Apotin to weda 94]
NUJIJỌ TITENGBE DELẸ HE GANDO AHỌLUDUTA JIWHEYẸWHE TỌN GO
• Jehovah lá lẹndai etọn nado wleawuna “okun” de he na só ota Odàn lọ, yèdọ Satani Lẹgba tọn.—Gẹnẹsisi 3:15.
• To 1943 J.W.M., Jehovah dohia dọ “okun” ehe na yin gbẹtọvi, ovivi Ablaham tọn de.—Gẹnẹsisi 12:1-3, 7; 22:18.
• Alẹnu Osẹ́n tọn he yin nina Islaeli to 1513 J.W.M. wleawuna “oyẹ̀ onú dagbe he ja lẹ tọn.”—Eksọdusi 24:6-8; Heblu lẹ 10:1.
• Ahọludu aigba ji Islaeli tọn bẹjẹeji to 1117 J.W.M. tọn mẹ, podọ e zindonukọn to godo mẹ to hukan Davidi tọn ji.—1 Samuẹli 11:15; 2 Samuẹli 7:8, 16.
• Jelusalẹm yin vivasudo to 607 J.W.M., podọ “ojlẹ dide akọta lẹ tọn” bẹjẹeji.—2 Ahọlu lẹ 25:8-10, 25, 26; Luku 21:24.
• To 29 W.M. tọn mẹ, Jesu yin yiyiamisisadode taidi Ahọlu Dide bo bẹ lizọnyizọn aigba ji tọn etọn jẹeji.—Matiu 3:16, 17; 4:17; 21:9-11.
• To 33 W.M. tọn mẹ, Jesu hẹji yì olọn mẹ, finẹ nado yì nọte to adusilọ Jiwheyẹwhe tọn mẹ kaka gandudu etọn nado bẹjẹeji.—Owalọ lẹ 5:30, 31; Heblu lẹ 10:12, 13.
• Jesu yin zize do ofìn ji to Ahọluduta olọn tọn mẹ to 1914 W.M. tọn mẹ dile “ojlẹ dide akọta lẹ tọn” wá opodo.—Osọhia 11:15.
• Satani po aovi etọn lẹ po yin yinyàn hlan lẹdo aigba tọn ji bo to dindọn susu dogọ hẹnwá gbẹtọvi lẹ ji.—Osọhia 12:9-12.
• Jesu to nukunpedo yẹwhehodidọ wẹndagbe Ahọluduta Jiwheyẹwhe Tọn go lẹdo aihọn pe.—Matiu 24:14; 28:19, 20.